Bihula Bya Baka-kutanda
Yesu walumbunwine bika omwo wendekele ngwendi “Kesi muyongole ngweni njinaija na kunena kwoloka”?
Yesu walongesele banu ngwendi bayoye mu kwoloka umo na mukwabo. Oloni litangwa limo walekele tupositolo bendi ngwendi: “Kesi muyongole ngweni njinaija na kunena kwoloka hano ha kaye embwe. Kunjezile na kunena kwoloka embwe, oloni moko ya mukwale. Omwo yange njinaija na kunena kwangunuka kwa bana ba banalume kuli baishabo, na kwangunuka kwa bana ba banakazi kuli bainabo, na bainamweno kulyangunuka lalo kuli bainamweno.” (Mateo 10:34, 35) Yesu walumbunwine bika?
Yesu kayongwele kulingisa banu balitengulukile mu binaanga byabo embwe, oloni wazibukile ngwendi byuma byalongesa bilingisa banu bamo balyangunune mu binaanga. Ngeci, baje balishungwiya kupwa bandongesi ba Kilistu na kubambwitika banapande kuzibukila cimweja ngwabo baka-naanga yabo bamo kubakundwiya biyongola byabo. Nga muka-limbo lyabo nambe muka-naanga yabo weka abalwisa, kunasa kubakaluwila kwononoka bilongesa bya Yesu.
Mbimbiliya ishongangeya baka-Kilistu ngwayo ‘bayoye mu kwoloka na banu boshe.’ (Loma 12:18) Oloni bilongesa bya Yesu binasa kupwa ngwe “moko ya mukwale” mu binaanga bimo. Bikebyo bikalingiwa nga umo mu naanga atambula busunga bakwabo babulwisa. Co obo bakalwisa busunga bakalipwisa “bitozi” ba uje natambula busunga.—Mateo 10:36.
Baka-Kilistu baje bakala na baka-naanga yabo baje kubapwile Bakaleho banasa kulyangwila kuzibisa Yehova na Yesu kubwaha nambe kuzibisa baka-naanga yabo kubwaha. Cakumwenako, baka-naanga yabo baje kubapwile Bakaleho banasa kubasindiya ngwabo balingile hamo nabo cilika ca ku bulombelo bwabo. Banapande kulyangwila bya kulinga. Yesu wendekele ngwendi: “Woshe uje azema ishe nambe baina kutubakana yange kapandele kupwa ndongesi yange.” (Mateo 10:37) Yesu kalumbunwine ngwendi baje bapwa bandongesi bendi banapande kulikela kuzema bisemi babo. Oloni wakele na kubakwasa lika bananguke byuma byapandele kupwa bya seho manene mu buyoye bwabo. Tutwalelelaho kuzema baka-naanga yetu nameme batulwisa mwafwa ya kupangela Yehova, oloni tuzibuka ngwetu Yehova ikeye itunapande kuzema manene.
Twasa kuziba manene kubabala ku mbunge nga baka-nanga yetu batulwisa. Oloni bandongesi batwaleleleho kwanuka majwi abalekele Yesu. Wendekele ngwendi: ‘Woshe uje kambata citi cendi ca kuyandesela na kukabangeya mu myanja yange kapandele kupwa ndongesi yange.’ (Mateo 10:38) Ngeci, baka-Kilistu bazibuka ngwabo ha kupwa bandongesi ba Kilistu banapande kutwalelelaho kukolesa na kupwa ba kulongwa nameme baka-naanga yabo babalwisa. Co lalo bazibuka ngwabo bilinga byabo byabibwa byasa kushongangeya baka-naanga yabo baje kubapwile baka-kukulahela batengulule bisinganyeka byabo na kukala na lishungu lya kulilongesa Mbimbiliya.—1 Petu 3:1, 2.