Mwanuka Ndi?

Munatanda mwamubwa magazini a uno mwaka a Kaposhi ka Kukengela ndi? Nga mukemwo, co tumoneni indi mwasa kukumbulula ebi bihula:

Bubwa muka butundamo nga tupangesa simbu yetu mukwendeka, kutolilila na kusinganyekesesa bya Yehova?

Twangula mwamubwa byakulinga, tupwa balongesi bababwa, co lalo tuzema manene Yehova.—w22.01, lipu. 30-31.

Bubwa muka butunda mu kukulahela Yehova na baje bali na kupangesa mu kutwamenena banu bendi?

Ino ikeyo simbu itunapande kukulahela manene ngila yakalingilamo Yehova byuma na kujeneka kuhuwasana. Nga tukabangeya mashiko abatwana ha simbu ino, co kukatupwila kwakwasi kukabangeya mashiko abakatwana ha simbu ya kayando kakama nameme anasa kukasholoka ngwe acingenzi nambe amakalu kuwakabangeya.—w22.02, lipu. 4-6.

Kangelo walumbunwine bika mwendekele ngwendi Bayunda “bakabwahelela na kumona mukole wa kupimisa cibumbe mu liboko lya [ngubulu wa Bayunda] Zelumbambele”? (Zaka 4:8-10)

Majwi abalekele kangelo amwesele banu ba Njambi ngwawo nameme ije tempele yamonekele ku Bayunda bamo ngwe yalisezele na ije yakulibanga, oloni ihwa kuitunga, co ikapwa ngwe mwanayongwelele Yehova.—w22.03, lipu. 16-17.

Twasa kukala bati na endekesi yaibwa? (1 Timo 4:12)

Tunapande kwendeka na cizemo na kasingimiko nga tuli mu lihya, kwimba na kukumbulula kutundilila kwisi ya mbunge nga tuli ku biwano, kushongangeya bakwetu na kujenjuka endekesi yaibi.—w22.04, lipu. 6-9.

Mwafwa bika cikashama ibanendeka ku mukanda wa Kujombolola 13:1, 2 wakele na bifwa bibakele nabyo bikashama bawana (biyulo) babanendeka ku mukanda wa Ndanyele capita 7?

Cikashama ibanendeka ku Kujombolola 13 kemanena lika ciyulo cimo ca kulimanena embwe. Oloni ou cikashama emanena biyulo byoshe bya nzili bije binayulu banu.—w22.05, lipu. 9.

Twasa kumwesa bati ngwetu twakulahela ngwetu Yehova akakula mu busunga?

Nga mukwetu natushaula, kutwendeka mwamubi nameme kutulinga mwamubi, co tunapande kulinga mwoshe mutwasela kujeneka kutulika kulundundu, na kuzesa byuma byoshe mu maboko a Yehova. Nakulahesa kukafumisako bubi bwoshe.—w22.06, lipu. 10-11.

Ndolome uje ali na kulombela ku biwano napande kwanuka bika?

Lilombelo kulyapandele kupwa ngila ya kwanenamo cinangulo ku cikungulukilo nambe kupwa ngila ya kwanenamo mutambi. Kukutondeka kulombela simbu “yailaha,” maneneni kumashangumukilo a biwano. (Mate 6:7)—w22.07, lipu. 24-25.

“Baje balingile byuma byabibi bakasangukila kubasompa.” Mu ngila muka? (Iwano 5:29)

Kubakabasompo mwafwa ya bubi bubalingile simbu kanda batse embwe. Bakabasompa kutalesa ku futisi na bilinga bibakakala nabyo munima ya kusanguka.—w22.09, lipu. 18.

Byuma muka byendekele J. F. Rutherford bije byashongangeyeye banu babangi ha ciwano cakama, lya September 1922?

Ha ciwano cakama mu Cedar Point, Ohio, U.S.A., wendekele ngwendi: “Mwene ali na kuyula! Co yeni munapu banu bendi. Ngeci ambululeni, ambululeni, ambululeni, Mwene na Bumwene bwendi!”—w22.10, lipu. 3-5.

Bingila muka bitatu bili ku mukanda wa Isaya capita 30, bije bimwesa mwakatukwaselamo Yehova mangana tukulose?

Ei capita inamwesa ngwayo (1) akatolilila na kukumbulula malombelo etu, (2) akatutwamenena, na (3) kutubezikisa ha simbu ino na kulutwe.—w22.11, lipu. 9.

Bika twendekela ngwetu majwi ali ku mukanda wa Myaso 37:10, 11, 29 alishulisilile kunima, co lalo akalishulisilila kulutwe?

Majwi endekele Mwene Devidi amwesele bibezikiso byakele mu Isalele, mu ciyulo ca Mwene Solomoni. Yesu mwakele na kwendeka bya paradaisi ya kulutwe, wapangesele majwi ali mu vesi 11. (Mate 5:5; Luka 23:43)—w22.12, lipu. 8-10, 14.