Kubwezelela ku Butongwe Bwetu bwa Kulombela

1. Yehova atonda ngwendi banu bendi balinge bika? (Taleni na cikupulo.)

IYA asa kutuzembeleka na kutunangula? Tuzibuka cikumbululo ku cihula eci. Twasa kulombela kuli Yehova Njambi. Yehova ali na kutulanya ngwendi tulombele kuli ikeye. Ashaka ngwendi, ‘tulombele simbu yoshe.’ (1 Tesa 5:17) Twasa kulombela kuli ikeye na kumulomba binangulo bije bitukwasa twangule mwamubwa byakulinga mu kuyoya kwetu kwoshe. (Visi 3:5, 6) Twasa kulombela kuli ikeye ha bisimbu byabingi mwafwa wapwa muka-kwana.

2. Bika bitusimutwiya muno mu cilongesa?

² Twakandelela manene kuli Yehova ha kututabesa kulombela kuli ikeye. Oloni ha kuwana ngwe tuli na byuma byabingi bya kulinga, tunasa kwonowa kuwana simbu yaingi ya kulombela. Co lalo tunasa kuliziba ngwetu tunapande kubwezelela ku butongwe bwetu bwa kulombela. Twabezika mwafwa mu Mbimbiliya muli binangulo byabibwa bije bitutakamesa na kutukwasa tuzibuke mwakulombelela. Muno mu cilongesa tusimutwiya ha mwanja wa Yesu mangana tumone muutukwasela kuwana simbu yaingi ya kulombela. Tusimutwiya lalo mutwasa kubwezelela ku butongwe bwetu bwa kulombela na byuma bitanu bitwasa kwendeka mu malombelo etu.

YESU WAWANENE SIMBU YA KULOMBELA

3. Bika byalilongesele Yesu ha lilombelo?

³ Yesu wazibukile ngwendi Yehova wamona malombelo etu kupwa a seho. Simbu kanda aije hano hasi wamwene Ishe oku akumbulula malombelo a bangamba bendi ba kulongwa. Cakumwenako, Yesu wakele hamo na Ishe mwakumbulwile malombelo a kutundilila kwisi ya mbunge aje alombelele Hana, Devidi, Eliya na bangamba bendi bakwabo ba kulongwa. (1 Samwe 1:10, 11, 20; 1 Vimye 19:4-6; Myaso 32:5) Mukemwo Yesu walekele bandongesi bendi ngwendi balombele kushwa kumo na kukala na likulahelo.—Mate 7:7-11.

4. Bika bitulilongesa ku malombelo a Yesu?

⁴ Mwakele na kulombela kuli Yehova, Yesu wakelele bandongesi bendi mwanja waubwa umwesa mubanapande kulombelela. Ha simbu yoshe yakele hano hasi Yesu wakele na kulombela kushwa kumo. Wakele na kwaka ku mukulo simbu ya kulombela mwafwa bisimbu byabingi wakele na kuzezama manene, co lalo simbu imo banu bakele na kumuzengeleka. (Maki 6:31, 45, 46) Wakele na kwinduka mutondo-tondo mangana awane simbu ya kukala likalyendi na kulombela. (Maki 1:35) Simbu imo walombelele butsiki bwoshe simbu kanda angule byakulinga. (Luka 6:12, 13) Co lalo Yesu walombelele kushwa kumo ha litangwa lya kwinduka litangwa libamutsiile simbu kanda amanese cipangi ca seho cezilile hano hasi.—Mate 26:39, 42, 44.

5. Twasa kutembwinina bati Yesu omwo tulombela?

⁵ Byuma byalingile Yesu bitulongesa ngwabyo nameme tunazezama bati, tunapande kuwana-wanako simbu ya kulombela. Ngwe mwa Yesu, netu tunapande kunoneka simbu ya kulombela. Twasa kulinga ngoco mutondo-tondo nameme mangwezi. Nga tulinga ngoco, co tumwesa ngwetu twakandelela manene kuli Yehova ha kututabesa kulombela kuli ikeye. Ndokazi wa lizina lya Lynne acanuka mwalizibilile lwakulibanga mwazibukile ngwendi asa kulombela kuli Yehova. Wendekele ngwendi: “Kuzibuka ngwange njasa kulombela kuli Yehova ha simbu yoshe-yoshe kwanjikwasele njimumone kupwa kabusamba kange uje wanjizema manene, co lalo kwanjikwasele njibwezelele ku butongwe bwa malombelo ange.” Tubaboshe tukalizibi ngoco bene. Tusimutwiyenioni ha byuma bitanu bitwasa kwendeka mu malombelo etu.

BYUMA BITANU BITUNAPANDE KWENDEKA MU MALOMBELO ETU

6. Kwesekesa na mukanda wa Kujombolola 4:10, 11, Yehova napande kutambula bika?

⁶ Shangazaleni Yehova. Mu cimona camwene kapositolo Iwano, wamwene bakulunu 24 bali na kulemesa Yehova mwilu. Baje bakulunu bashangazalele Yehova na kwendeka ngwabo napande kutambula “bumpau na kasingimiko na nzili.” (Tandeni Kujombolola 4:10, 11.) Tungelo ba kulongwa nabo banapande kushangazala Yehova. Bamuzibuka mwamubwa mwafwa bakala nendi mwilu. Banalimwena bifwa byakala nabyo kwitila mu byuma byanalingi. Kumona mwakalingila byuma Yehova kukabashongangeya bamushangazale.—Yombi 38:4-7.

7. Bika bitulingisa tushangazale Yehova?

⁷ Netu tunapande kushangazala Yehova mu malombelo etu. Twasa kulinga ngoco nga tumuleka bitwamuzemena nebi bikatulingisa tumusingimike. Omwo mutanda na kulilongesa Mbimbiliya, waneni bifwa bya Yehova bije bikamyete manene ku mbunge.(Yombi 37:23; Loma 11:33) Kutundaho, lekeni Yehova mumuli na kulizibila ha bifwa obyo. Tunapande lalo kushangazala Yehova mwafwa akatukwasa hamolika na bandolome na bandokazi betu, watwaka mbunge, co lalo ali na kutunyungilila simbu yoshe.—1 Samwe 1:27; 2:1, 2.

8. Byuma muka bikwabo bikatulingisa tukandelele kuli Yehova? (1 Tesalonika 5:18)

⁸ Kandeleleni Yehova. Kuli byuma byabingi bitulingisa tukandelele Yehova mu malombelo etu. (Tandeni 1 Tesalonika 5:18.) Twasa kukandelela kuli ikeye ha byuma byoshe byabibwa bituli nabyo, mwafwa byuma byoshe byabibwa byatunda kuli ikeye. (Jems 1:17) Cakumwenako, twasa kumukandelela ha kutwana lifuti-libu lyalibwa na byuma byoshe byabibwa biliho. Twasa lalo kukandelela kuli ikeye ha kutwana kuyoya, kutwana naanga yetu, babusamba na lilabelelo. Twasa lalo kukandelela kuli Yehova ha busamba bwetu nendi buje bunapu bwa kulitila.

9. Mwafwa bika tunapande kumwesa kukandelela kuli Yehova?

⁹ Tunapande kulifwita kusinganyeka ha byuma bije bitulingisa tukandelele kuli Yehova. Tuli mu kaye muje banu kubesi na sipilitu ya kumwesa kukandelela. Banu banaka lika mbunge ku kutonda bibashaka, co kubesi kumwesa kukandelela ku byuma bibali nabyo. Nga netu tumona byuma mu ngila ei, co malombelo etu apwa-apwa lika a kulomba bukwasi. Tunapande kutwalelelaho kumwesa kukandelela ku byuma byoshe byanatulingila Yehova nga tushaka ngwetu tulinge byuma mu ngila inapande.—Luka 6:45.

10. Kumwesa sipilitu ya kukandelela kwakwasele bati ndokazi umo? (Taleni na cikupulo.)

¹⁰ Kukala na sipilitu ya kukandelela kutukwasa tukolese nga tuliwana na byeseko. Tusimutwiyeni byaliwanene nabyo Kyung-sook bije bili mu Kaposhi ka Kukengela ka Silozi ka January 15, 2015. Ou ndokazi bamuwanene na mushongo wa kansa ya ku mashapala. Ou ndokazi ngwendi: “Ou mushongo wanjizeyesele manene. Njalizibile ngwe njazimbalesa byuma byoshe binjakele nabyo, co njalishoshomwenene manene.” Bika byamukwasele akolese? Wendekele ngwendi ha butsiki na butsiki simbu kanda alale wakele na kuya ha mulili wa hakamwa ya njibo yendi na kulombela mu kutambeka, kwendeka byuma bitanu byakandelelele kuli Yehova litangwolyo. Oku kwamulingisile azeme manene Yehova na kujeneka kulishoshomwena manene. Walimwenenene mwakakwaselamo bangamba bendi ba kulongwa nga banaliwana mu bukalu, co lalo wanangukile ngwendi bibezikiso bitukalikuu mu kuyoya byapwa byabingi, kutubakana byeseko bitukaliwana nabyo. Ngwe mwa Kyung-sook netu kuli byuma byabingi binapande kutulingisa tukandelele kuli Yehova nameme tuli mu ceseko. Kumwesa kukandelela kuli Yehova mu malombelo etu kutukwasa tukolese na kutwalelelaho kupwa ba kubwahelela.

11. Mwafwa bika bandongesi ba Yesu bapandele kupwa ba kusimpa Yesu mwelukile mwilu?

¹¹ Lombeni Yehova amikwase kupwa ba kusimpa omwo mulinga cipangi ca kwambulula. Simbu kanda eluke kwilu, Yesu wanukisile bandongesi bendi bya cipangi ca seho ca kwana bukaleho hali ikeye “mu Jelusalema na mu Judeya mwoshe na mu Samaliya na ku mitambela ya kulako ya lifuti-libu.”(Bili 1:8; Luka 24:46-48) Munima ya simbu yaindondo bantwama ba Bajuda bakutile kapositolo Pita na Iwano na kubatwala ku nkuta ya Sanihedrini, co bajujwisile aba banalume ba kulongwa na kubaleka ngwabo balikele kwambulula muzimbu waubwa. (Bili 4:18, 21) Pita na Iwano balingile bika?

12. Kwesekesa na mukanda wa Bilinga 4:29, 31, bika bibalingile bandongesi ba Yesu?

¹² Bantwama ba bulombelo bwa Bajuda mubajujwisile tupositolo, Pita na Iwano bendekele ngwabo: “Akuleni yeni babenya, nga cacibwa ku mesho a Njambi kutolilila yeni kutubakana kutolilila Njambi. Oloni yetuni, kutwasa kulikela kwendeka byuma bitunalimwena, nebi bitunalizibila.” (Bili 4:19, 20) Pita na Iwano mubabatundisile mu kamenga balombelele kuli Yehova mu kutambeka ngwabo abakwase kutwalelelaho kulinga cizango cendi. Balombelele ngwabo: “Kwasa bindungo bobe batwaleleleho kwendeka lijwi lyobe mu kusimpa.” Yehova wakumbulwile lilombelo lyabo lya kutundilila kwisi ya mbunge.—Tandeni Bilinga 4:29, 31.

13. Bika bitulilongesa kuli Jin-hyuk?

¹³ Twasa kutembwinina bandongesi ba Yesu nga tutwalelelaho kwambulula nameme nga baka-fulumende bashaka kushoka cipangi cetu ca kwambulula. Tucisimutwiyeni ha cakumwenako ca ndolome Jin-hyuk uje ibakele mu kamenga mwafwa ya kubyana kukobela buswalale. Bakamwanene cipangi ca kunyunga mapanditi baje babakutilile mu milili ya likalyabo. Oloni kubamutabesele kwendeka nabo biñanda byeka bije kubyakundamene ku cipangi cendi, cakumwenako kwendaka ha Mbimbiliya. Walombele Yehova amukwase kupwa wa kusimpa na kunyanyama na kwambulula muzimbu waubwa hoshe hawanenene simbu. (Bili 5:29) Wendekele ngwendi: “Yehova wakumbulwile malombelo ange, wanjikwasele njipwe wa kusimpa, wanjanene mana, co njasimutwiiye na mapanditi baje babakutilile mu milili ya likalyabo na kushangumuka bilongesa bya Mbimbiliya byabingi, bije byakele na kwambata-ambata minutu itanu. Mangwezi njakele na kusoneka mikanda ije injakele na kwana bakwetu mapanditi lya mukwabo.” Netu twasa kukulahela ngwetu Yehova atukwasa tulinge mwamubwa cipangi ca kwambulula. Ngwe mwa Jin-hyuk, netu twasa kulomba Yehova mana na kumulomba atukwase kupwa ba kusimpa.

14. Bika byasa kutukwasa nga tuli na kulifwita na bukalu? (Myaso 37:3, 5)

¹⁴ Lombeni Yehova amikwase mukolese nameme muliwana na bukalu. Bwingi bwetu tuli na kuliwana na bukalu bwa kuliseza-seza bwa kufwa ngwe kubinja, kutsisa munu itwazema, bukalu bwa mu naanga, mapakeso na bukalu bukwabo, co byuma bya kufwa ngwe mishongo ya kulitambwisa na binzita nabyo binabwezelela ku bukalu bubali na kuliwana nabwo banu. Lekeni Yehova bukalu bweni bwoshe mu lilombelo. Mulekeni bukalu bweni ngwe mumunasa kulingila kuli kabusamba keni wa ha mbunge. Kulaheleni ngweni Yehova ‘amikwasa.’—Tandeni Myaso 37:3, 5.

15. Lilombelo lyasa kumikwasa bati mukolese nga muli mu tuyando? Endekeni cakumwenako.

¹⁵ Kutwalelelaho kulombela kutukwasa ‘tukolese nga tuli mu tuyando.’ (Loma 12:12) Yehova azibuka bibali na kuliwana nabyo bangamba bendi. Co ‘akazibi mitambi yabo.’ (Myaso 145:18, 19) Ndokazi Kristie uje wapwa painiya wa myaka 29 walimwenenene busunga bwawa majwi. Washangumukile kubinja ha simbu ije kabandamenene, co oku kwamulingisile ashangumuke kwombwa manene. Mu kwita kwa simbu baina babawanene na mushongo uje wasele kubatsiya ha simbu yoshe-yoshe. Kristie ngwendi: “Njalombelele manene kuli Yehova mangana anjane nzili ya kukolesa ha litangwa na litangwa. Njatwaleleleleho kuwaniwa ku biwano simbu yoshe na kulinga cilongesa ca munu endilika.” Ou ndokazi wendekele lalo ngwendi: “Kulombela kwanjikwasele njitwaleleleho kukolesa ha simbu ei yaikalu. Kuzibuka ngwange Yehova ali nange simbu yoshe kwanjizembelekele manene. Nameme bukalu bwange kubwahwile oho bene, Yehova wakumbulwile malombelo ange ha kunjana kwoloka kwa mu bisinganyeka na kunjizembeleka.” Simbu yoshe anukeni ngweni: “Yehova azibuka mwakwobwela mu byeseko banu baje banalyana kumupangela.”—2 Pita 2:9.

16. Mwafwa bika tutonda bukwasi bwa Yehova mu kuhyana byeseko?

¹⁶ Lombeni Yehova amikwase kuhyana byeseko. Ha kupwa banu ba kujeneka kulumbunuka, simbu yoshe tunapande kulifwita mangana keti tulinge byuma byabibi. Satana ali na kweseka mwoshe mwasela mangana atwonowese kulinga byuma byabibwa. Asa kungumuna bisinganyeka byetu ha kutulingisa tulizime buli na byuma bya kujwala. Bisinganyeka bya kujwala byasa kutulingisa tujeneke kupwa bakujela ku mesho a Yehova na kutulingisa tulinge byuma byabibi.—Maki 7:21-23; Jems 1:14, 15.

17. Munima ya kulombela tunapande kulinga bika mangana tuhyane byeseko? (Taleni na cikupulo.)

¹⁷ Tunapande kulomba Yehova atukwase kuhyana ceseko ca kulinga byuma byabibi. Mu lilombelo lya kutalela Yesu wendekele ngwendi: “Keti utwecelele tukobele mu ceseko, oloni tunyungilile kuli uje wamubi.” (Mate. 6:13) Yehova atonda kutukwasa, oloni tunapande kumulomba alinge ngoco. Munima ya kulombela tunapande kulinga mwoshe mutwasela kujenjuka ku byuma bije byasa kutukobelesa mu byeseko. Tunapande kulinga mwoshe mutwasela kwecela kutanda nambe kutolilila ku byuma byabibi bije binalisala muno mu kaye ka Satana. (Myaso 97:10) Nga tutanda na kulilongesa Mbimbiliya simbu yoshe, co tukala na bisinganyeka byabibwa. Kuya ku biwano na kuya na kwambulula kunyungilila bisinganyeka byetu. Yehova natukulahesa ngwendi katwecelela tuliwane na ceseko cije kutwasa kukolesela.—1 Kori 10:12, 13.

18. Malombelo etu anapande kufwa bati?

¹⁸ Tuli na kuyoya mu matangwa a kukotoka. Ngeci, umo na umo wetu napande kutwalelelaho kulombela kuli Yehova mangana atwaleleleho kupwa wa kulongwa. Ha litangwa na litangwa waneni simbu ya kulombela kuli Yehova kutundilila kwisi ya mbunge. Yehova ashaka ngwendi ‘mumuleke bukalu bweni bwoshe’ kwitila mu lilombelo. (Myaso 62:8) Shangazaleni Yehova na kukandelela kuli ikeye ha byuma byoshe byanalingi. Mulombeni mangana amikwase kupwa ba kusimpa omwo mulinga cipangi ca kwambulula. Mulombeni amikwase mukolese omwo muliwana na bukalu na kumikwasa muhyane byeseko bije bimuli na kuliwana nabyo. Keti mutabese munu nambe cuma coshe-coshe kumyonowesa kulombela kuli Yehova. Yehova akakumbulula bati malombelo etu? Tukumbulula eci cihula ca seho mu cilongesa cinatako.