Watchtower LAIBRALI YA HA INTANETI
Watchtower
LAIBRALI YA HA INTANETI
Mbunda
  • MBIMBILIYA
  • MABULU
  • BIWANO
  • w23 December pp. 8-13
  • Byuma Byanamikulahesa Yehova Bilishulisilila

Haunanyateka kuhesi vidio.

Cabihya, kuli bukalu bunonowesa ei vidio kushokoloka.

  • Byuma Byanamikulahesa Yehova Bilishulisilila
  • Kaposhi Ka Kukengela Kali Na Bumwene Bwa Yehova (Kaposhi ka Kukengela ka Kulilongesa)—2023
  • Tumitwe twa Biñanda
  • Biñanda bya Kulifwa
  • LILABELELO LYETU LYALIBWA
  • MULYASA KUKANYAMENA LILABELELO
  • LILABELELO LYA KUKANYAMA
  • Twaleleleniho Kukanyamesa Lilabelelo Lyeni
    Kaposhi Ka Kukengela Kali Na Bumwene Bwa Yehova (Kaposhi ka Kukengela ka Kulilongesa)—2022
  • Kuli Kumwasa Kuwana Lilabelelo lya Busunga?
    Toneni! 2004
Kaposhi Ka Kukengela Kali Na Bumwene Bwa Yehova (Kaposhi ka Kukengela ka Kulilongesa)—2023
w23 December pp. 8-13

CILONGESA 51

Byuma Byanamikulahesa Yehova Bilishulisilila

“Lilabelelo kulituzibisa shwamwa.”—LOMA 5:5.

MWASO 142 Tutwalelelaho Kukala na Lilabelelo

BILI MUNO MU CILONGESAa

1. Mwafwa bika Abrahamu watwaleleleleho kukulahela ngwendi akala na mwana?

YEHOVA wakulahesele kabusamba kendi Abrahamu ngwendi akakala na mwana wa munalume, co miyati yoshe ikabezika mwafwa ya munendi. (Gene 15:5; 22:18) Abrahamu wakele na likulahelo lya kukanyama kuli Njambi. Ngeci, wakulahelele ngwendi byuma byamukulahesele bilishulisilila. Abrahamu mwakele na myaka 100, munakazi wendi wakele na myaka 90. Nameme ngoco, anga kubakele na mwana. (Gene 21:1-7) Mbimbiliya ngwayo: “Mwafwa ya lilabelelo, [Abrahamu] wakulahelele ngwendi apwa ishe ya baka-mafuti amangi kwesekesa nomu mwamulekele Njambi.” (Loma 4:18) Byuma byakulahelele Abrahamu byalishulisilile. Wakupwile ishe ya Isaki, mwana yabandamenene ha simbu yailaha. Bika byalingisile Abrahamu akulahele ngwendi Yehova ashulisilila cikulaheso cendi?

2. Bika byalingisile Abrahamu akulahele ngwendi byuma byakulahesele Yehova bilishulisilila?

2 Abrahamu wazibukile mwamubwa Yehova. Ngeci, “watabele bene ngwendi byuma byamukulahesele Njambi, Njambi wasele lalo kubilinga.” (Loma 4:21) Yehova wamwene Abrahamu kupwa muka-busunga mwafwa ya likulahelo lyendi. (Jems 2:23) Ngwe muumwesela mukanda wa Loma 4:18, Abrahamu wakele na likulahelo hamolika na lilabelelo. Tusimutwiyeni byuma byendekele kapositolo Paulu ha lilabelelo ku mukanda wa Loma capita 5.

3. Paulu walumbunwine bika ha lilabelelo?

3 Paulu walumbunwine byuma bitulingisa tukulahele ngwetu lilabelelo lyetu “kulituzibisa shwamwa.” (Loma 5:5) Watukwasele lalo tumone mutwasa kukanyamesela lilabelelo lyetu. Omwo tusimutwiya ha byuma bili ku mukanda wa Loma 5:1-5, moneni mulinakanyamena lilabelelo lyeni ha byuma byanatukulahesa Yehova kulutwe. Tusimutwiya lalo byuma bimunapande kulinga mangana mukanyamese lilabelelo lyeni. Tucisimutwiyeni tahi ha lilabelelo lyalibwa lyendekele Paulu ngwendi kulyasa kutuzibisa shwamwa.

LILABELELO LYETU LYALIBWA

4. Byuma muka bibanendeka ku mukanda wa Loma 5:1, 2?

4 Tandeni Loma 5:1, 2. Paulu wasonekelele awa majwi cikungulukilo cakele mu Loma. Bandolome na bandokazi bomu mu cikungulukilo balilongesele bya Yehova na Yesu, babakulahelele, co bapwile baka-Kristu. Ngeci, Njambi wabapwisile “baka-kusungama mwafwa ya likulahelo,” co wababwabesele na sipilitu ya kujela. Co bakulahelele ngwabo byuma byabakulahesele Njambi bakabitambula.

5. Lilabelelo muka libali nalyo bakubwabesa?

5 Kutundaho, Paulu wasonekelele baka-Kristu ba kubwabesa ba mu Efeso bya lilabelelo lyabanene Njambi. Eli lilabelelo lyambateselele na “buswana bwa bakujela.” (Efeso 1:18) Kutundaho lalo, Paulu wamwesele kubakatambwila baka-Kolose cikandelela cabo. Wendekele ngwendi: “Mwafwa ya lilabelelo libanamitulikila mwilu.” (Kolo 1:4, 5) Ngeci, baka-Kristu ba kubwabesa bali na lilabelelo lya kusanguka na kukayoya mwilu myaka yoshe, muje mubakayula na Kristu.—1 Tesa 4:13-17; Kujo 20:6.

Ndolome Frederick Franz. Ku mukulo kuli majwi endeka ngwawo, “Lilabelelo libali nalyo baka-Kristu ba kubwabesa linapu lya busunga . . . nameme tulibandamene ha myaka yaingi.”

Ndolome F. W. Franz wamwesele mubakalizibila baka-Kristu ba kubwabesa ha lilabelelo libali nalyo (Taleni paragirafu 6)

6. Ndolome umo uje wapwile wa kubwabesa wendekele bika ha lilabelelo lyendi?

6 Baka-Kristu ba kubwabesa bamona eli lilabelelo kupwa lya seho. Umo wabo wapwile ndolome Frederick Franz uje wendekele kutundilila kwisi ya mbunge ngwendi: “Lilabelelo libali nalyo baka-Kristu ba kubwabesa linapu lya busunga, co bakubwabesa boshe ba kupwa 144,000 baje banapu butanga bwabundondo bakatambula cikandelela cabo. Lilabelelo lyetu lyapwa lyalibwa manene.” Munima ya kupangela Njambi ha myaka yaingi, mu 1991 ndolome Franz wendekele ngwendi: “Na simbu ino tucimona lilabelelo lyetu kupwa lya seho. . . . Omwo tuli na kubandamena kutambula cikandelela cetu, tuli na kutwalelelaho kukandelela kuli Yehova ha kutwana eli lilabelelo. Eli lilabelelo linapu lya seho manene, nameme tulibandamene ha myaka yaingi manene. Twazema manene lilabelelo lyetu.”

7-8. Lilabelelo muka libali nalyo bangamba ba Yehova babangi? (Loma 8:20, 21)

7 Banu babangi baje bali na kulemesa Yehova ano matangwa bali na lilabelelo lyeka. Linapu lilabelelo lyakele nalyo Abrahamu. Lilabelelo lya kuyoya myaka yoshe hano hasi mu Bumwene bwa Njambi. (Hebe 11:8-10, 13) Paulu wasonekele bya bibezikiso bibakawana baje bali neli lilabelelo lyalibwa. (Tandeni Loma 8:20, 21.) Mumwalilongesele Mbimbiliya hakulibanga, cikulaheso muka ca byuma bya kulutwe cimwashakele manene? Kuma mwabwahelelele manene mumwalilongesele ngweni kulutwe mukapwa bakulumbunuka ndi? Indi hamo mwabwahelelele manene mumwalilongesele ngweni babushoko bweni baje banatsi bakayoya lalo mu paradaisi ha lifuti-libu? Mwafwa ya lilabelelo lyanatwana Njambi, twabandamena kukalikuwa byuma byabibwa byabingi byanatukulahesa Njambi kulutwe.

8 Nameme tuli na lilabelelo lya kukayoya myaka yoshe mwilu nambe hano hasi, tubaboshe tuli na lilabelelo lyalibwa lije litulingisa tubwahelele. Co lalo lilabelelo lyetu lyasa kutwalelelaho kukanyama. Paulu wendekele byuma byasa kukanyamesa lilabelelo lyetu. Tucisimutwiyeni byuma byasonekele kutalesa ku lilabelelo lyetu. Byuma byasonekele bitukwasa tukulahele ngwetu byuma byoshe bitunalabelela bilishulisilila.

MULYASA KUKANYAMENA LILABELELO

Bikupulo: Baka-Kristu bali na kuliwana na byeseko. 1. Ndokazi wa mumbanda uje ashaka kulombela simbu kanda alye byakulya bya mutanya ku sikola ananguka ngwendi kuli bambanda babali bali na kuyebeta kunima yendi. 2. Ndokazi ali na kumuyalumukila munalume wendi uje kapwile Mukaleho. 3. Ndolome ali na kubyana kutambula lizika-kanwa ku bipangi. 4. Ndolome ali na kutala hanja oku ali mu kamenga.

Baka-Kristu boshe baliwana na kayando mu bingila bya kuliseza-seza (Taleni paragirafu 9-10)

9-10. Byuma muka byaliwanene nabyo Paulu, bije bibanasa kuliwana nabyo baka-Kristu ano matangwa? (Loma 5:3) (Taleni na bikupulo.)

9 Tandeni Loma 5:3. Kayando kasa kulingisa lilabelelo lipwe lya kukanyama. Ei ñanda yasa kutukasamesa. Oloni tunapande kwanuka ngwetu baka-kukabangeya Kristu boshe baliwana na byeseko. Tucisimutwiyeni ha byuma byalekele Paulu baka-Kristu ba mu Tesalonika. Wendekele ngwendi: “Mwafwa mutwakele neni, twakele na kumilekela cimweja ngwetu tuliwana na tuyando, co ebi bikebyo binalingiwa ngwe mumuzibukila.” (1 Tesa 3:4) Co kuli baka-Korinte wasonekele ngwendi: “kutushaka ngwetu mukale kunzimba ha kayando katwaliwanene nako ku provinsi ya Asia. Twakele mu bukalu bwakama manene buje bwatubakanene nzili yetu, co kutwazibukile ngwetu tuyoya indi bati.”—2 Kori 1:8; 11:23-27.

10 Baka-Kristu ano matangwa nabo basa kuliwana na kayando. (2 Timo 3:12) Yenico? Kuma mwaliwana na kayando mwafwa ya kukulahela Yesu na kumukabangeya ndi? Hamo babushoko na babusamba beni bakamishendumuna. Hamo kubamilingile mwamubwa. Indi hamo mukulunu ku bipangi nambe bamukapanga nabo bali na kumiyandesa mwafwa ya kulyangwila kupwa ba kulongwa? (Hebe 13:18) Kuma baka-fulumende bali na kumilwisa mwafwa ya cipangi ca kwambulula ndi? Paulu wendekele ngwendi twasa kubwahelela nameme tuliwana na tuyando. Mwafwa bika?

11. Mwafwa bika tunapande kukolesa mu byeseko byoshe bituliwana nabyo?

11 Twasa kupwa ba kubwahelela nameme tuliwana na tuyando mwafwa tuzibuka ngwetu tuyando tutulingisa tukale na cifwa cimo ca seho manene. Mukanda wa Loma 5:3 ngwawo: “Tuyando tukanene kukolesa.” Baka-Kristu boshe baliwana na tuyando. Ngeci, banapande kukolesa. Mukemwo tunapande kukolesa mu tuyando twoshe tutuliwana natwo. Nga tulinga ngoco, co tukatambula cikandelela cetu. Kutushaka kupwa ngwe banu baje bakele mu biyongola bya Yesu mwakele na kwendeka bya mbuto ije yawililile ha libu lya mamanya. Hakulibanga batambwile lijwi mu kubwahelela, oloni mubaliwanene na “kayando nambe mapakeso” bazeyele. (Mate 13:5, 6, 20, 21) Kutwashakele kuliwana na tuyando. Oloni nga tukolesa na kutwalelelaho kupangela Yehova, tupwa ba kubwahelela. Mu ngila muka?

12. Kukolesa mu byeseko kutukwasa bati?

12 Jemusi ndongesi ya Yesu wamwesele bubwa bukatundu mu kukolesa mu byeseko. Wasonekele ngwendi: “Tabeseni kukolesa cimanese cipangi caco mangana mwase kupwa ba mutunu na kupwa balambwe mu byuma byoshe na kujeneka kukala na kapenga.” (Jems 1:2-4) Aha ha mukanda Jemusi namwesa ngwendi kukolesa kunapande kulinga cipangi cimo. Cipangi muka bene oco? Kukolesa kumikwasa mukale manene na bifwa bya kufwa ngwe mbunge ya kubandamena, likulahelo na kukulahela manene Njambi. Oloni kuli bubwa bukwabo lalo butunda mu kukolesa.

13-14. Byuma muka bitundamo nga tukolesa, co lilabelelo lyetu lifwa bati? (Loma 5:4)

13 Tandeni Loma 5:4. Paulu wendekele ngwendi nga tukolesa ‘tuzibisa Njambi kubwaha.’ Yehova abwahelela nga tukolesa. Oku kukulumbununa ngwabo Yehova akalizibi kubwaha kutumona oku tuyanda. Mukazibisa Njambi kubwaha. Kutakamesa manene kuzibuka ngwetu nga tukolesa tuzibisa Yehova kubwaha!—Samu 5:12.

14 Anukeni ngweni nameme Abrahamu waliwanene na byeseko, oloni watwaleleleleho kupangela Yehova mu kubwahelela. Mwalingile ngoco wazibisile Yehova kubwaha. Yehova wamupwisile kabusamba kendi, co lalo wamumwene ngwendi wapwile munu wa kusungama. (Gene 15:6; Loma 4:13, 22) Netu Yehova asa kutubezikisa, ngwe mwabezikisilile Abrahamu. Bwingi bwa bipangi bitulinga mu munga yendi keti bikebyo bilingisa tuzibise Yehova kubwaha. Kupwa ba kulongwa nameme tuliwana na byeseko bikebyo bilingisa Yehova alizibe kubwaha. Tubaboshe twasa kukolesa nameme bukangule, myaka na cashu cituli naco byaliseza-seza. Kuma kuli ceseko cimuli na kuliwana naco ha simbu ino, oloni muli na kutwalelelaho kupangela Yehova mu kulongwa ndi? Nga mukemwo, anukeni ngweni muli na kuzibisa Yehova kubwaha. Kuzibuka ei ñanda kutuzembeleka manene. Co kwasa kukanyamesa lilabelelo lyetu.

LILABELELO LYA KUKANYAMA

15. Paulu wendekele byuma muka ku mukanda wa Loma 5:4, 5, co bamo basa kulihula cihula muka?

15 Ngwe mwendekelele Paulu, Yehova aliziba kubwaha nga tutwalelelaho kupwa ba kulongwa na kukolesa nga twaliwana na byeseko. Watwaleleleleho kwendeka ngwendi: “Kuzibisa Njambi kubwaha kutulingisa tukale na lilabelelo, co lilabelelo kulituzibisa shwamwa.” (Loma 5:4, 5) Awa majwi a Paulu hamo asa kukomokesa bamo. Mwafwa bika? Mwafwa hakulibanga ku mukanda wa Loma 5:2, Paulu wendekele ngwendi baje baka-Kristu bakele mu Loma bakele na lilabelelo: “lilabelelo lya kutambula bumpau bwa kutunda kuli Njambi.” Ngeci, bamo banasa kwihula ngwabo, ‘Nga baje baka-Kristu bakele laja na lilabelelo, mwafwa bika Paulu wabasonekelele lalo bya lilabelelo?’

Bikupulo: Bandolome na bandokazi babanabanga kumwesa. 1. Uje ndokazi wa mumbanda ali na kwambulwila mukwabo yakakobela nendi sikola. 2. Uje ndokazi nashomboka ali na kusinganyekesesa ha byuma byanatanda mu Mbimbiliya. 3. Uje ndolome nabyanene lizika-kanwa ali na kukumbulula ku biwano. 4. Uje ndolome ali mu kamenga ali na kulombela.

Mu kwita kwa simbu mwalimwena ngweni byuma byanatukulahesa Njambi bilishulisilila, co oku kwamilingisa mushungwiye manene kukamona byuma byanatukulahesa (Taleni paragirafu 16-17)

16. Lilabelelo lyali nalyo munu lyasa kukola bati? (Taleni na bikupulo.)

16 Twasa kuzibisisa byendekele Paulu nga twanuka ngwetu lilabelelo linapande kukola. Cakumwenako: Kuma mucanuka mumwalizibilile lwakulibanga mumwazibile bya muzimbu waubwa uli mu Lijwi lya Njambi uje utukwasa tukale na lilabelelo? Hamo mwasinganyekele ngweni kuyoya myaka yoshe hano hasi mu paradaisi, muzimbu waubwa, oloni kumwakulahelele ngweni ebi byuma byasa kulingiwa. Oloni mumwalilongesele manene bya Yehova na bikulaheso byendi bili mu Mbimbiliya, mwakanyamesele manene lilabelelo lyeni.

17. Lilabelelo likatwalelelaho bati kukola nga munu nalikundika kuli Njambi na kumumbwitika?

17 Kutunda hamwalikundikilile kuli Yehova na kumimbwitika, lilabelelo lyeni linatwalelelaho kukanyama mumunalilongesa byuma byabingi hali Yehova na kukola ku sipilitu. (Hebe 5:13–6:1) Mwalimwena busunga bwa majwi ali ku mukanda wa Loma 5:2-4. Mwaliwana na bukalu bwabwingi, oloni mwakolesa, co mwalimwena mwamizemena Yehova. Ha kuwana ngwe mwalimwena ngweni Yehova wamizema, oku kwamilingisa mushungwiye manene kubandamena kutambula byuma byanamikulahesa. Hanwoni lilabelelo lyeni linakanyama manene kutubakana mulyapwililile hakulibanga. Linapu manene lya busunga. Lyamikundamoni manene. Linatengulula mumuli na kulingilamo baka-naanga yeni, mumuli na kwangwilamo byuma, nomu mumuli na kupangeselamo simbu yeni.

18. Yehova natukulahesa byuma muka?

18 Kapositolo Paulu wendekele ha cuma cikwabo ca seho ha lilabelelo lituli nalyo omwo tuli na kuzibisa Njambi kubwaha. Wendekele ngwendi lilabelelo lyeni lilishulisilila. Mwafwa bika munapande kukulahela awa majwi? Paulu wendekele awa majwi atunda kuli Njambi ngwendi: “Lilabelelo kulituzibisa shwamwa, mwafwa cizemo ca Njambi banacishulisa mu bimbunge byetu kwitila mu sipilitu ya kujela ije ibatwanene.” (Loma 5:5) Ngeci, munapande bene kukulahela ngweni Njambi akashulisilila byuma byanamikulahesa.

19. Byuma muka binapande kumishongangeya kukanyamesa lilabelelo lyeni?

19 Singanyekeseseni ha byuma byakulahesele Yehova Abrahamu, nebi byalingisile amumone kupwa muka-kusungama na kumumona kupwa kabusamba kendi. Byuma byakulahelele Abrahamu byalishulisilile. Mbimbiliya ngwayo: “Abrahamu mwamwesele mbunge ya kubandamena, watambwile eci cikulaheso.” (Hebe 6:15; 11:9, 18; Loma 4:20-22) Byuma byakulahelele kubyamuzibisile shwamwa. Neni kulaheleni ngweni nga mutwalelelaho kupwa ba kulongwa mukatambula cikandelela mwafwa ya lilabelelo lyeni. Munapande kubwahelela mwafwa lilabelelo lyeni lya busunga. Kumakazibi shwamwa. (Loma 12:12) Paulu wasonekele ngwendi: “Njambi uje akana lilabelelo amishulise na kubwahelela kwoshe na kwoloka mwafwa mwamukulahela, mangana lilabelelo lyeni lyame kwitila mu nzili ya sipilitu ya kujela.”—Loma 15:13.

MWASA KUKUMBULULA BATI?

  • Ngwe muumwesela mukanda wa Loma 5:2, Paulu wakele na kwendeka bya lilabelelo muka?

  • Byuma muka bibanendeka ku mukanda wa Loma 5:3, 4 bije bikalingiwa kuli baka-Kristu?

  • Lilabelelo limuli nalyo hano linaliseze bati na lilabelelo limwakele nalyo mumwalilongesele busunga hakulibanga?

MWASO 139 Lingeni Ngwe Muli mu Kaye Kakaha

a Muno mu cilongesa tusimutwiya ha lilabelelo lituli nalyo yetu baka-Kristu na byuma bitulingisa tukulahele ngwetu likalishulisilila. Mukanda wa Loma capita 5 utukwasa kumona mulinalisezela lilabelelo lituli nalyo ha simbu ino na lilabelelo litwakele nalyo hakulibanga mutwalilongesele busunga.

    Mabulu a Mbunda (1987-2025)
    Tundaho
    Kobela
    • Mbunda
    • Anako bakweni
    • Biushaka
    • Copyright © 2025 Watch Tower Bible and Tract Society of Pennsylvania
    • Mashiko a Mwakuipangesela
    • Mwakupangesela Mizimbu Yobe
    • Mwakunonekela Mizimbu Yobe
    • JW.ORG
    • Kobela
    Anako Bakweni