CILONGESA 27
MWASO 79 Balongeseni Bakolese
Kwaseni Imukalilongesa Nendi Mbimbiliya Alyangwile Kupangela Yehova
“Kanyameni mu likulahelo . . pweni ba kukanyama.”—1 KORI 16:13, ftn.
BILI MUNO MU CILONGESA
Muno mu cilongesa tusimutwiya mutwasa kukwasela banu batukalilongesa nabo Mbimbiliya bakale na likulahelo na kupwa ba kusimpa mangana bemanene busunga.
1-2. (a) Bika bikalingisa banu bamo baje bacili na kulilongesa Mbimbiliya bakwate-kwate ku masinde kwimanenena busunga? (b) Bika bitusimutwiya muno mu cilongesa?
KUMA kuli bimo byamilingisile mulishoshomwene na kukwata-kwata ku masinde kupwa Mukaleho wa Yehova ndi? Hamo mwalishoshomwenene ngweni bamukapanga nabo, babusamba nambe baka-naanga yeni bamitengulukila nga mupwa Mukaleho wa Yehova. Nambe hamo mwasinganyekele ngweni kumikaluwila kulinga byoshe byatonda Yehova. Nga mukemwo, co mwasa kuzibisisa mubakalizibila baje bacili na kulilongesa Mbimbiliya na kuzibuka byuma byasa kubonowesa balyangwile kupwa Bakaleho ba Yehova.
2 Yesu wazibukile ngwendi lyoba lyasa kwonowesa munu kukola ku sipilitu. (Mate 13:20-22) Oloni kalikelele kukwasa baje bakele na kukwata-kwata ku masinde kumukabangeya. Ngeci Yesu wakwasele bandongesi bendi bazibuke byakele na kubonowesa kulyangwila kupangela Yehova, co lalo wabakwasele bazeme manene Yehova. Wabakwasele lalo bake Yehova mu mutamba wakulibanga na kubalongesa byuma bibapandele kulinga nga banu babalwisa. Twasa kutembwinina bati ngila yapangesele Yesu mu kulongesa, omwo tupangesa libulu lya Likuweni Kuyoya Myaka Yoshe! mangana tukwase munu itukalilongesa nendi Mbimbiliya emanene busunga?
KWASENI IMUKALILONGESA NENDI ANANGUKE BILI NA KUMWONOWESA KUPANGELA YEHOVA
3. Bika byesi kwonowesele Nikodema kupwa ndongesi ya Yesu?
3 Nikodema, wapwile muka-kuyula wa seho manene wa baJuda. Washakele kukabangeya Yesu oloni kwakele bimo byakele na kumwonowesa kulinga ngoco. Munima ya bingonde 6 kutunda hashangumukilile Yesu cipangi cendi ca kwambulula, Nikodema wanangukile ngwendi Yesu wapwile muka-kwimanenako Njambi. (Iwano 3:1, 2) Nameme ngoco, Nikodema waliwanene na Yesu ku bushweke mwafwa ‘wakele na kutewa Bajuda.’ (Iwano 7:13; 12:42) Hamo watewele ngwendi bamutundisa ha citwamo ca bulemu nga apwa ndongesi ya Yesu.a
4. Yesu wakwasele bati Nikodema azibuke byatondele Njambi ngwendi alinge?
4 Nikodema wazibukile mwamubwa Mashiko a Mosesa, oloni watondele bukwasi mangana azibuke byuma byatondele Yehova ngwendi alinge. Yesu wamukwasele bati? Yesu wasimutwiiye na Nikodema nameme wezile kuli ikeye butsiki. Yesu walekele Nikodema byuma byapandele kulinga mangana apwe ndongesi yendi. Wamulekele atenguluke ku bubi bwendi na kulyangwila kumumbwitika na kukala na likulahelo kuli Yesu Muna Njambi.—Iwano 3:5, 14-21.
5. Mwasa kukwasa bati munu imukalilongesa nendi Mbimbiliya ananguke byuma bili na kumwonowesa kulyangwila kupangela Yehova?
5 Nameme munu itukalilongesa nendi Mbimbiliya azibuka mwamubwa Bisoneka, tunapande kumukwasa azibuke byuma bili na kumwonowesa kulyangwila kupangela Yehova. Cakumwenako, hamo cipangi cendi cikamwonowesa kuwana simbu ya kulinga byuma bya ku sipilitu, nambe hamo baka-naanga yendi kubashaka ngwabo apwe Mukaleho wa Yehova. Ngeci mwa Yesu, waneniko simbu ya kukwasa munu imukalilongesa nendi Mbimbiliya. Cakumwenako, mwasa kuya hamo nendi mu kupashala nambe kuwana simbu ya kusikama nendi. Nga mulinga ngoco, co mumukwasa ashubuluke kumileka bukalu bwali na kuliwana nabwo. Shongangeyeni munu imukalilongesa nendi Mbimbiliya atengululeko bimo mu kuyoya kwendi keti mu kushaka kumizibisa kubwaha, oloni mwafwa ya kuzema Yehova.
6. Mwasa kukwasa bati munu imukalilongesa nendi Mbimbiliya apangese byuma byali na kulilongesa? (1 Korinte 16:13)
6 Nga munu imukalilongesa nendi Mbimbiliya akulahela ngwendi Yehova amukwasa alinge byuma byabibwa, co apwa wa kusimpa na kupangesa byuma byali na kulilongesa. (Tandeni 1 Korinte 16:13.) Mulongesi wamubwa akalongesa muna-sikola mwakulingila byuma na kumukwasa alizibe ngwendi asa kulinga obyo byuma. Mu ngila imolika, mupwa mulongesi wamubwa nga mukwasa munu imukalilongesa nendi Mbimbiliya azibuke byatonda Yehova ngwendi alinge na kumukwasa akulahele ngwendi Yehova amukwasa atengululeko bimo mu kuyoya kwendi. Mwasa kulinga bati ngoco?
KWASENI IMUKALILONGESA NENDI AZEME MANENE YEHOVA
7. Yesu wakwasele bati banu bazeme manene Yehova?
7 Yesu wazibukile ngwendi kuzema Njambi kushongangeya bandongesi bendi bapangese byuma bibanalilongesa. Ngeci walongesele bandongesi bendi byuma bije byabakwasele bazeme manene Ishabo wa mwilu Yehova. Cakumwenako, wesekesele Yehova ku cisemi wa munalume uje akana bana bendi byuma byabibwa. (Mate 7:9-11) Banu bamo baje bakele na kutolilila kuli Yesu hamo kubakele na cisemi wa munalume uje wabazemene. Acisinganyekeni mubakele na kulizibila omwo Yesu watele cisimo ca cisemi wa munalume uje watambwile mwamubwa munendi uje wazimbalele mwelukile kuli ikeye. Yesu wakwasele banu bananguke ngwabo Yehova wabazema manene, co atonda kubakwasa.—Luka 15:20-24.
8. Mwasa kukwasa bati munu imukalilongesa nendi Mbimbiliya azeme manene Yehova?
8 Neni mwasa kukwasa munu imukalilongesa nendi Mbimbiliya azeme manene Yehova nga mumulongesa manene bifwa byakala nabyo Yehova. Ha simbu imulilongesa nendi, mukwaseni azibisise omwo byuma byanalilongesa bimwesa ngwabyo Yehova watuzema. Nga musimutwiya ha ndando ya kupatula, mukwaseni azibuke ngwendi Yehova wanene Munendi yazema umolika kwija na kututsila mwafwa wazema banu boshe hamolika na ikeye. (Loma 5:8; 1 Iwa 4:10) Nga munu imukalilongesa nendi Mbimbiliya azibuka ngwendi Yehova wamuzema manene, co nendi amuzema manene.—Gala 2:20.
9. Bika byakwasele Michael atengululeko bimo mu kuyoya kwendi na kulyangwila kupangela Yehova?
9 Tucisimutwiyeni hali Michael wa ku Indonesia. Michael wazibukile busunga te acili mwanike oloni kalyangwilile kumumbwitika. Mwakele na myaka 18, waile ku lifuti lyeka na kukakobela cipangi ca kwendesa bimota byakama. Mu kwita kwa simbu, welukile ku Indonesia na kukambata munakazi. Munima ya kwambata, wasezele munakazi wendi na munendi na kukapangela ku lifuti lyeka, kulako na naanga yendi. Simbu wacikele kuje, munakazi wendi na munendi wa munakazi bashangumukile kulilongesa Mbimbiliya na kupangesa byuma bibakele na kulilongesa. Baina mubatokele, Michael welukile kwimbo mangana akanyunge baishe, co washangumukile kulilongesa Mbimbiliya. Mubakele na kusimutwiya ha mutamba wa “Tondeseseni” mu cilongesa 27 ca libulu lya Likuweni Kuyoya Myaka Yoshe! Byuma bibasimutwiye byetele Michael ku mbunge. Mwasinganyekesesele mwalizibilile Yehova kumona Munendi ayanda, Michael walilile. Co mwazibukile ngwendi Yehova na Yesu bamuzema manene, wakandelele manene. Ngeci watengulwileko bimo mu kuyoya kwendi na kulyangwila kumumbwitika.
KWASENI IMUKALILONGESA NENDI AKE YEHOVA MU MUTAMBA WAKULIBANGA
10. Bika byalingile Yesu mu kukwasa bandongesi bendi batengululeko bimo mu kuyoya kwabo mangana bapangele Yehova? (Luka 5:5-11) (Taleni na cikupulo.)
10 Bandongesi bakulibanga banangukile bwasi ngwabo Yesu ikeye Mesiya ibakulahesele, oloni batondele bukwasi mangana bake cipangi ca kwambulula mu mutamba wakulibanga. Pita na Andru bapwile laja bandongesi omwo Yesu wabalanyele ngwendi bamukabangeye. (Mate 4:18, 19) Bakele na kupangela hamo na Jemusi na Iwano mu kulinga mingoso ya bisi, co mingoso yabo yakele na kwenda mwamubwa. (Maki 1:16-20) Nameme ngoco, Pita na Andru “basezele manda abo” mangana bakabangeye Yesu. Nameme bangwile kukabangeya Yesu, balingile mwoshe mubaselele mangana bawanene binaanga byabo byuma bya ku mubila. Bika byabakwasele bamone cipangi ca kwambulula kupwa ca seho manene kutubakana kukala na bimbongo byabingi? Muzimbu wa Luka umwesa ngwawo Yesu walingile cikomokeso cije cabakwasele bakulahele manene ngwabo Yehova asa kubana byuma bya ku mubila bibatondele.—Tandeni Luka 5:5-11.
Bika bitulilongesa kuli Yesu mwakwaselele bandongesi bendi bake bya Yehova mu mutamba wakulibanga? (Taleni paragirafu 10)b
11. Mwasa kupangesa bati bimunaliwana nabyo mu kukwasa imukalilongesa nendi Mbimbiliya akanyamese likulahelo lyendi?
11 Kutwasa kulinga bikomokeso ngwe mwalingilile Yesu. Oloni twasa kwendeka byakuliwana nabyo bije bimwesa Yehova mwakakwasela baje bakaka byendi mu mutamba wakulibanga. Cakumwenako, kuma mwanuka mwamikwaselele Yehova mu mwashangumukile kukunguluka ndi? Mwalizibile bati mu mwalekele mukulunu weni wa bipangi ngweni kumwasa kutwalelelaho kupanga munima ya kulembuka mwafwa ya kushaka kuwana simbu ya kukunguluka? Lumbunwineni imukalilongesa nendi Mbimbiliya mulyakanyamenene likulahelo lyeni mu mwamwene mwamikwaselele Yehova mwafwa ya kwaka byendi mu mutamba wakulibanga.
12. (a) Mwafwa bika munapande kulanya bandolome na bandokazi ba kuliseza-seza ha cilongesa ca Mbimbiliya? (b) Byuma muka bikwabo bimwasa kupangesa mu kukwasa munu imukalilongesa nendi Mbimbiliya ake bya Yehova mu mutamba wakulibanga? Endekeni cakumwenako.
12 Munu imukalilongesa nendi Mbimbiliya asa kuwana bukwasi nga bandolome na bandokazi bamuleka mubanatengulwila byuma bimo mu kuyoya kwabo mangana bake Yehova mu mutamba wakulibanga. Ngeci lanyeni bandolome na bandokazi ba kuliseza-seza ha cilongesa ca Mbimbiliya. Balombeni bendeke mubezilile mu busunga na byuma bibanalingi mangana bake bya Yehova mu mutamba wakulibanga mu kuyoya kwabo. Kutundaho, waneniko simbu ya kukenga mavidio na munu imukalilongesa nendi, aje ali ha mutamba wa “Tondeseseni” nambe mutamba wa “Waneni Bikwabo” mu libulu lya Likuweni Kuyoya Myaka Yoshe! Cakumwenako, nga muli na kulilongesa cilongesa 37, munasa kukanyamesa bisimpi bili mu vidio ya Yehova Atukwasa Tuwane Byuma Bitutonda.
KWASENI IMUKALILONGESA NENDI AZIBUKE BYA KULINGA NGA BAMULWISA
13. Yesu wakwasele bati bandongesi bendi balibwahesele kubalwisa?
13 Yesu welukilile-elukilile kuleka bandongesi bendi kushwa kumo ngwendi bakabalwisa kuli babushoko bwabo nambe banu beka. (Mate 5:11; 10:22, 36) Mukwasalele simbu yaindondo mangana atse, Yesu walekele bandongesi bendi ngwendi banasa kubatsiya mwafwa ya kulyangwila kupangela Yehova. (Mate 24:9; Iwano 15:20; 16:2) Wabanangwile ngwendi bapwe ba kunyanyama omwo bapanga cipangi ca kwambulula. Cakumwenako, wabalekele ngwendi keti balinge bimata na munu woshe-woshe uje alwisa byuma bibakulahela. Co lalo wabalekele ngwendi banyanyame na byuma bibendeka na kulinga mangana batwaleleleho kupanga cipangi ca kwambulula.
14. Twasa kukwasa bati munu itukalilongesa nendi Mbimbiliya alibwahesele mapakeso? (2 Timothi 3:12)
14 Ngeci mwa Yesu, netu twasa kulumbunwina munu itukalilongesa nendi Mbimbiliya byuma byanasa kwendeka nambe kulinga banu bakapanga nabo na babusamba na babushoko bwendi mwafwa ya kulyangwila kulilongesa Mbimbiliya. (Tandeni 2 Timothi 3:12.) Bakapanga nabo banasa kumujola mwafwa ya kuyoya mu kulitombola na mashiko amu Mbimbiliya, co banu beka nambe babushoko bwendi banasa kubyana kulitombola na byuma byakalilongesa mu Mbimbiliya. Kunapu kwa seho kulekela cimweja munu itukalilongesa nendi Mbimbiliya bya mapakeso anasa kuliwana nawo. Nga mulinga ngoco, co mumukwasa alibwahesele na kuzibuka bya kwendeka nambe kulinga nga bakamulwisa simbu imo kulutwe.
15. Bika byasa kukwasa munu itukalilongesa nendi Mbimbiliya akolese nga baka-naanga yendi bamulwisa?
15 Nga munu imukalilongesa nendi Mbimbiliya bali na kumulwisa kuli baka-naanga yendi, co mukwaseni asinganyekesese ha byuma binalingisa baka-naanga yendi balubale mwanangula kulilongesa Mbimbiliya na Bakaleho ba Yehova. Hamo baka-naanga yendi bali na kusinganyeka ngwabo Bakaleho ba Yehova bakalongesa makuli nambe kusinganyeka ngwabo bapwa banu bababi. Nameme baka-naanga ya Yesu bamo nabo basinganyekele ngwabo nazaluka mubamwene byuma byakele na kulinga. (Maki 3:21; Iwano 7:5) Kwaseni munu imukalilongesa nendi Mbimbiliya amwese mbunge ya kubandamena kuli baka-naanga yendi na banu beka na kwendeka nabo mu cizemo.
16. Twasa kukwasa bati itukalilongesa nendi Mbimbiliya endeke bya likulahelo lyendi mu ngila yaibwa?
16 Nga baka-naanga ya munu imukalilongesa nendi Mbimbiliya bashaka kuzibuka byabingi mu Mbimbiliya, kapandele kubalumbunwina byuma byabingi ha simbu imolika. Nga alinga ngoco, co nasa kubafutula ku mbunge na kubalingisa bakabyane kutolilila kuli ikeye mwakabaleka bya likulahelo lyendi simbu yeka. Ngeci shongangeyeni munu imukalilongesa nendi Mbimbiliya asimutwiye bya likulahelo lyendi mu ngila yayasi. Kulinga ngoco, kukwasa baka-naanga yendi bakamutolilile mwakabaleka bya likulahelo lyendi simbu yeka. (Kolo 4:6) Nasa kuleka baka-naanga yendi bakobele ha webusaiti yetu ya jw.org. Oku kubakwasa balilongese byabingi ha Bakaleho ba Yehova ha simbu yoshe-yoshe ibashaka.
17. Mwasa kukwasa bati munu imukalilongesa nendi Mbimbiliya azibuke mwakukumbulwila bihula bibanasa kwihula banu kutalesa ku Bakaleho ba Yehova? (Taleni na cikupulo.)
17 Mwasa kupangesa biñanda bya kuliseza-seza bya ha jw.org ha mutamba wa “Bihula Bibakehula Manene Banu” mangana mukwase imukalilongesa nendi Mbimbiliya awane bikumbululo byabyasi ku bihula bibanasa kumwihula babushoko nambe banu bakapanga nabo. (2 Timo 2:24, 25) Kumamaneselelo a cilongesa na cilongesa, itulukeni ha mutamba wa “Bamo Bakendeka Ngwabo,” mu libulu lya Likuweni Kuyoya Myaka Yoshe! Kwaseni imukalilongesa nendi Mbimbiliya alibwahesele mwanasa kulumbunwina banu byuma byakulahela. Nga citaba mukwaseni awane ngila ya mwakulingila ngoco. Nga mulinga ngoco, co mukwasa munu imukalilongesa nendi Mbimbiliya emanene likulahelo lyendi mu kusimpa.
Kwaseni munu imukalilongesa nendi Mbimbiliya ambulule ha kumumwesa mwa kwambulwila ha simbu imulilongesa nendi (Taleni paragirafu 17)c
18. Mwasa kukwasa bati munu imukalilongesa nendi Mbimbiliya apwe muka-kwambulula wa kujeneka kumbwitika? (Mateu 10:27)
18 Yesu washikile bandongesi bendi bambulule muzimbu waubwa ku banu. (Tandeni Mateu 10:27.) Nga munu imukalilongesa nendi Mbimbiliya ashangumuka kuleka bakwabo bya likulahelo lyendi, co akulahela manene Yehova. Mwasa kukwasa bati munu imukalilongesa nendi Mbimbiliya alyakele eci cilengo? Nga mu citingitingi ceni mukala kampeni ya kwambulula, co kwaseni munu imukalilongesa nendi azibuke bya napande kulinga mangana apwe muka-kwambulula. Mulekeni ngweni kwapwa kwakwasi kwambulula ha simbu ya kampeni. Co lalo nasa kuwana bukwasi nga alyakela cilengo ca kushangumuka kwendeka biñanda mu biwano bya mukati ka calumingo. Kushulisilila eci cilengo kumukwasa alilongese mwanasa kulumbunwina banu bya likulahelo lyendi mu kusimpa.
MWESENI NGWENI MWAKULAHELA IMUKALILONGESA NENDI
19. Yesu wamwesele bati ngwendi wakulahelele bandongesi bendi, co twasa kumutembwinina bati?
19 Simbu kanda Yesu aye mwilu, walekele bandongesi bendi ngwendi akakala hamo nabo lalo. Kubazibukile ngwabo Yesu wakele na kulumbununa ngwendi bakaya mwilu. Nameme kubazibisisile byuma byoshe, Yesu wakulahelele ngwendi bandongesi bendi bashakele kuzibisa Yehova kubwaha. (Iwano 14:1-5, 8) Wazibukile ngwendi kwatondekele simbu mangana base kuzibisisa byuma bimo bya kufwa ngwe lilabelelo lya kuya mwilu. (Iwano 16:12) Ngeci mwa Yesu, netu twasa kumwesa ngwetu twakulahela ngwetu batukalilongesa nabo Mbimbiliya bashaka kuzibisa Yehova kubwaha.
Nga munu imukalilongesa nendi Mbimbiliya ashangumuka kuleka bakwabo bya likulahelo lyendi, co akulahela manene Yehova
20. Ndokazi umo wa ku Malawi wamwesele bati ngwendi wakulahelele munu yakalilongesa nendi Mbimbiliya?
20 Tunapande kutwalelelaho kukulahela ngwetu munu itukalilongesa nendi Mbimbiliya ashaka kulinga byuma byabibwa. Tucisimutwiyeni ha cakumwenako ca ndokazi Chifundo wa ku Malawi. Washangumukile kulilongesa Mbimbiliya kupangesa libulu lya Likuweni Kuyoya Myaka Yoshe! na munakazi wa Katolika wa lizina lya Alinafe. Munima ya kusimutwiya ha cilongesa 14, Chifundo wehwile munu yakalilongesa nendi Mbimbiliya mwamwena kupangesa tuponya mu kulemesa. Alinafe walubalele na kwendeka ngwendi: “Munu na munu ali na lisesa lya kulyangwila ngila yapangesa mu kulemesa!” Munima yebi, Chifundo wasinganyekele ngwendi Alinafe alikela kulilongesa Mbimbiliya. Nameme ngoco, wamumwesele mbunge ya kubandamena na kutwalelelaho kulilongesa nendi, co wakulahelele ngwendi Alinafe akazibisisa ngwendi kupangesa tuponya mu kulemesa kunapu kwakubi. Munima ya bingonde byabindondo, Chifundo wehwile Alinafe cihula cili mu cilongesa 34, ngwendi: “Kulilongesa Mbimbiliya na kuzibuka Njambi wa busunga kunakukwasa bati?” Chifundo wendekele mwamukumbulwilile Alinafe, ngwendi: “Wendekele ngwendi, Bakaleho ba Yehova kubesi kulinga byuma byabibi biinabindika Mbimbiliya. Co wendekeleko na bisimpi bikwabo byabingi.” Munima ya simbu yaindondo, Alinafe walikelele kupangesa tuponya mu kulemesa, co bamumbwitikile.
21. Twasa kukwasa bati munu itukalilongesa nendi Mbimbiliya alyangwile kupangela Yehova?
21 Yehova ikeye ‘akakolesa mbuto.’ Nameme ngoco, netu tuli na cipangi ca kukwasa munu itukalilongesa nendi Mbimbiliya akole ku sipilitu. (1 Kori 3:7) Tukamulongesa alinge byatonda Yehova kuli ikeye na kumulongesa amuzeme manene. Co lalo tukamushongangeya amwese ngwendi wazema Yehova ha kwaka Byendi mu mutamba wakulibanga na kumulongesa akulahele Yehova nga bamulwisa. Nga tumwesa itukalilongesa nendi Mbimbiliya ngwetu twamukulahela, co tumukwasa akulahele ngwendi asa kuyoya mu kulitombola na mashiko a Yehova na kulyangwila kumupangela.
MWASO 55 Keti Mutewe Bitozi Beni!
a Mukwetile myaka ibali na hafu kutunda haliwanene na Yesu, Nikodema wacipwile mukulunu mu nkuta yakama ya BaJuda. (Iwano 7:45-52) Baka-kutondesesa biñanda bya kunima bamo, bakasinganyeka ngwabo Nikodema wakupwile muka-kukabangeya Yesu munima ya kutsa kwendi.—Iwano 19:38-40.
b KULUMBUNUNA BIKUPULO BILI HA : Pita na baka-kutsiya bisi bakwabo baseza mingoso yabo ya kutsiya bisi mangana bakabangeye Yesu.
c KULUMBUNUNA CIKUPULO: Ndokazi ali na kukwasa munu yakalilongesa nendi Mbimbiliya azibuke mwakwambulwila.