Tunalilongesa Kuli Mulongesi Wakama

MWANJA WA BISEMI BANGE

Mu mwaka wa 1957, bisemi bange bajalukile kutunda mu Italy kuya ku Kindersley mu Saskatchewan ku Canada. Kukwetile simbu yailaha bisemi bange balilongesele busunga, co bwapwile bwa seho manene mu kuyoya kwetu. Njanuka munjapwile nji mwanike twakele na kwambata simbu yaingi mu cipangi ca kwambulula na naanga yange, co kwapile lika ngwe njakele na kulinga bupainiya bwa kukwasa oku njili na myaka 8.

Bisemi bange bapwile tuhutu. Nameme ngoco, batwakelele mwanja waubwa wa kulyana kupangela Yehova. Cakumwenako, mu 1963, balandesele bitenga byabo mangana bawane bimbongo bibakwasa kuya ku ciwano ca mafuti cakeleko mu Pasadena ku California mu U.S.A. Mu 1972, twendele bungezi bwa makilomita akweta ku 1,000 kuya ku Trail mu British Columbia ku Canada, kukakwasa mu cipangi ca kwambulwila banu bakendeka ndaka ya Ciitaliani. Batate bakele na kupanga cipangi ca kujelesa na kubwahesa byuma mu cintolo. Babyanene bipangi bije byasele kubalingisa bawane bimbongo byabingi mangana bawane simbu yaingi ya kupangela Yehova.

Yange na ndolome yange na bandokazi bange babali, tukakandelela manene ku mwanja ubatwakelelele bisemi betu. Mwanja wabo waubwa wapwile cilongesa cakulibanga ku byuma binjalilongesele mu cipangi ca Yehova. Banjilongesele cilongesa ca seho manene cije kunjikebala mu buyoye bwange. Banjilongesele ngwabo nga njishakezeka tahi Bumwene, co Yehova atwalelelaho kunjinyunga.—Mate 6:33.

KUSHANGUMUKA CIPANGI CA SIMBU YOSHE

Mu 1980, njambatele Debbie ndokazi wamubwa uje wakele mbunge ku kupangela Yehova. Twashakele kukobela mu cipangi ca simbu yoshe. Ngeci Debbie washangumukile kulinga bupainiya munima ya bingonde bitatu kutunda ha twalyambatelele. Mukwetile mwaka umo kutunda ha twalyambatelele, twajalukilile mu cikungulukilo cacindondo muje mwakele bujene, co nange njakashangumukile kulinga bupainiya.

Mu kwita kwa simbu twazeyele, co twashakele kujaluka. Oloni simbu kanda tujaluke, twasimutwiiye na kanyungi wa kuzenguluka. Co watulekele busunga mu cizemo ngwendi: “Yeni babenya muli na kukaluwisa byuma. Muli na kwaka manene mbunge ku bukalu bwoshe bumuli na kuliwana nabwo. Oloni nga mwaka mbunge ku byuma byabibwa, mubiwana.” Eci capwile cinangulo cacibwa citwatondele. (Samu 141:5) Haje bene twatambwile cije cinangulo na kucipangesa, co twanangukile ngwetu kwakele byuma byabingi byabibwa. Kwakele bandolome na bandokazi babangi mu cikungulukilo baje bashakele kulinga byabingi mu cipangi ca Yehova, kwambateselela banike na baje bashombokele kuli baka-kujeneka kutaba. Cije capwile cilongesa ca seho manene kuli yetu. Twalilongesele kwaka mbunge ku byuma byabibwa na kukulahela ngwetu Yehova atukwasa tukolese mu bukalu bwoshe butuliwana nabwo. (Mika 7:7) Byuma byashangumukile kutwendela bwino, co twapwile lalo bakubwahelela.

Balongesi ba sikola yetu ya bupainiya yakulibanga, bapangelele mu mafuti eka. Omwo bakele na kutumwesa bikupulo na kutuleka bya bukalu bubaliwanene nabwo na bibezikiso bibalikuwile mwafwa ya kukapangela mu mafuti eka, kwatulingisile tushungwiye kupanga cipangi ca bumishinali. Co twalyakelele cilengo cakupwa bamishinali.

Mukushaka kushulisilila cilengo cetu, twajalukilile ku Quebec kuje kubakele na kupangesa ndaka ya Cifurenci, lifuti lije lyakele na makilomita akutubakana 4,000 kutunda ku British Columbia mu mwaka wa 1984. Mutwakele ku Quebec, twashangumukile kulilongesa cisemwa na ndaka yaiha, co lalo kutwakele na bimbongo byakupwamo. Simbu imo twayoyelele ha bukola butwakele na kwandulula mu lihya lya munalume umo libatutabesele. Munakazi wange wazibukile mwamubwa mwakutelekela bukola mu bingila byakuliseza-seza. Nameme twaliwanene nobu bukalu, twatwaleleleho kukolesa na kupwa bakubwahelela. Co twakulahelele ngwetu Yehova wakele na kutunyungilila.—Samu 64:10.

Litangwa limo, twatambwile foni ije kutwabandamenene ya kutulanya kukapangela ha Betheu mu Canada. Ha simbu ei te twashulisilila laja mafomu a kulomba kuya ku sikola ya Giliyadi. Nameme twabwahelelele mubatulanyele kukapangela ha Betheu, twashakele kuya ku sikola ya Giliyadi. Nameme ngoco, twatambwile cije cilanyo. Mutwetele ha Betheu twehwile ndolome Kenneth Little wa mu Komiti ya Munango, ngwetu: “Tulinga bati nga batulanya kuya ku sikola ya Giliyadi?” Watukumbulwile ngwendi: “Obyo tubimona bwino nga bamilanya.”

Mukwetile calumingo cimo, yange na munakazi wange Debbie batulanyele ku sikola ya Giliyadi. Ngeci twapandele kwangula byakulinga. Ndolome Little watulekele ngwendi: “Nameme mwangule byuma byakufwa bati, bisimbu bimo hanga mukaliziba ngwe mwangwile byuma byeka. Yehova asa kubezikisa byoshe-byoshe bimwangula.” Ngeci twaile ku sikola ya Giliyadi. Ha myaka yaingi twalimwena busunga bwa majwi a ndolome Little. Ha bisimbu byabingi, twapangesele majwi a ndolome Little mu kukwasa bakwetu baje bashakele kwangula cipangi cibalinga mu munga ya Yehova.

BUYOYE BWETU MU CIPANGI CA BUMISHINALI

Twabwahelelele manene kukala mu kilasi ya bu 83 ya sikola ya Giliyadi, muje mwakele bana ba sikola ba kupwa 24. Twakobelele ei sikola mu April 1987, ku Brooklyn mu New York. Ndolome Ulysses Glass na Jack Redford bakebo bapwile balongesi betu bakama. Munima ya bingonde 5, lya 6 September, 1987 twamanesele ei sikola. Batutumine kukapangela ku Haiti hamo lika na John na Marie Goode.

Mu 1962, bamishinali baje basalele mu lifuti lya Haiti babashekele. Co kutunda bene haje kukwakele kamishinali wa kutunda ku Giliyadi ibatumine muje mu lifuti. Mukwetile byalumingo bitatu kutunda hatwamaneselele sikola ya Giliyadi, twashangumukile kupangela mu Haiti mu cikungulukilo cije cakele kwimbo muje mwakele baka-kwambulula bakupwa 35. Ha simbu ije kutwazibukile byuma byabingi, co lalo twakele likalyetu mu njibo ya bamishinali. Banu ba muje mu citingitingi bapwile tuhutu, co lalo bwingi bwabo kubazibukile kutanda. Mu kwita kwa simbu, banu bamu Haiti bashangumukile lwozi mwafwa ya biñanda bya bupolitiki. Banu bashakele kulwisa fulumende, co kwakele bimpindangano na nyonzi ya lihunzi lyakama.

Twalilongesele byabingi ku kukolesa na kubwahelela kwa bandolome na bandokazi ba mu Haiti. Bwingi bwabo bakele na kuliwana na bukalu bwa kuliseza-seza. Nameme ngoco, bazemene manene Yehova na cipangi ca kwambulula. Ndokazi umo wa kakulukazi kazibukile kutanda, oloni wakwatele bisoneka bya kweta ku 150 mu mutwe. Bukalu bubakele na kuliwana nabwo banu muje mu citingitingi, bwatushongangeyeye tubambulwile manene bya Bumwene bwa Njambi buje bukamanesa tuyando twoshe tubali na kuliwana natwo banu. Twabwahelelele manene mutwamwene banu batwashangumukile kulilongesa nabo Mbimbiliya muje mu citingitingi, bapwa bapainiya ba simbu yoshe na bapainiya ba kulitila na bakulunu mu bikungulukilo.

Munjakele mu Haiti, njaliwanene na mukwenje wa lizina lya Trevor uje wapwile kamishinali wa bulombelo bwa Mormon. Ngeci bisimbu byabingi, njawanene simbu ya kusimutwiya nendi bya mu Mbimbiliya. Munima ya myaka njatambwile mukanda wa kutunda kuli ikeye uje kunjabandamenene. Wasonekele ngwendi: “Banjimbwitika ha ciwano cili na kwija. Njishaka kwiluka ku Haiti na kukalinga bupainiya bwa kulitila, mu citingitingi muje bene mu njapwile kamishinali wa bulombelo bwa Mormon.” Co ebi bikebyo byalingile ha myaka yaingi hamolika na munakazi wendi.

KUTUNDA KU EUROPE NA KUYA KU AFRICA

Batutumine kukapangela ku mutambela umo wa Europe kuje kubashangumukile kutabesa cipangi cetu ca kwambulula. Mu 1992, twetele mu Ljubljana ku Slovenia, kuyehi na mwela kubakolelele bisemi bange simbu kanda bajalukile ku Italy. Ha simbu ei, kwakele nzita mu bitingitingi bya mu mwela ubasanene ngwabo Yugoslavia. Munango wa ku Vienna mu Austria, hamolika na ma ofisi a munango amu Zagreb mu Croatia na amu Belgrade mu Serbia, akele na kutwamenena cipangi ca kwambulula muje mu mutambela. Munga yayongwele ngwayo awa mafuti akale na minango ya kulimanena.

Ngeci twapandele kulilongesa ndaka yeka na kwizilila cisemwa caciha. Banu ba muje mu citingitingi bashakele manene kwendeka ngwabo “Jezik je težek,” kulumbununa ngwabo “Ndaka yaikalu.” Mwa busunga, ei ndaka yapwile yaikalu. Twabwahelelele mutwamwene bandolome na bandokazi ba kulongwa baje balibwaheselele kukundwiya kutenguluka kwa munga. Co twalimwenenene Yehova mwababezikisililemo. Twalimwenenene lalo Yehova mwakabwahesela byuma mu cizemo ha simbu inapande. Twalilongesele byuma byabingi mu Slovenia. Co byuma bitwalilongesele omu mu lifuti na byuma bitwalilongesele kunima, byatukwasele tukolese mu bukalu butwaliwanene nabwo mu Slovenia.

Nameme ngoco, byuma byatwaleleleho kutenguluka mu kuyoya kwetu. Mu 2000, batutumine kukapangela mu Côte d’Ivoire ku West Africa. Mu November 2002, batujalwisilile ku Sierra Leone mwafwa ya nzita yakele mu Côte d’Ivoire. Ha simbu ei, nzita yakele mu Sierra Leone ije yambatele myaka yakupwa 11 te mu kuhwa. Kukwapwile kwakwasi kutunda bwasi-bwasi mu Côte d’Ivoire. Nameme ngoco, byuma bitwalilongesele byatukwasele tutwaleleleho kupwa bakubwahelela.

Twakele mbunge ku kukwasa banu baje bashakele kulilongesa busunga na kuli bandolome na bandokazi baje batwaleleleho kukolesa nameme baliwanene na nzita ha myaka yaingi. Bapwile tuhutu, oloni bashakele kwana bakwabo byuma bibakele nabyo. Ndokazi umo wanene Debbie bizalo. Ha kulibanga Debbie washakele kubyana, oloni uje ndokazi wamulekele ngwendi: “Ha simbu ya nzita bandolome ba ku mitambela yeka batukwasele, ngeci ha simbu ino netu tunapande kukwasa bakwetu.” Twalyakelelele cilengo ca kutembwinina mwanja wabo.

Twelukile ku Côte d’Ivoire, oloni biñanda bya bupolitiki byakele muje mu lifuti byakatwile lwozi lalo. Ngeci mu November 2004 batujalwisile lalo kupangesa likopita, co umo na umo wetu wambatele lika ngonga imo. Twakalalele hasi mu cilombo ca maswalale ba Cifurenci, co mulyakile batutwalele na likopita ku Switzerland. Mutwetele ha munango hakati ka butsiki, bandolome ba mu Komiti ya Munango na balongesi ba sikola ya kulongesa bipangi bya mu munga na banakazi babo batutambwile mwamubwa na kutubumbateya, co batwanene byakulya na cokuleti ya ku Switzerland. Oku kwatulingisile tulizibe ngwetu batuzema manene.

Batutumine kukapangela ku Ghana ha simbu yaindondo, co twelukile ku Côte d’Ivoire nzita muyatepulukile. Ngozi ya bandolome na bandokazi yatukwasele tukolese mutwakele na kujalozoka nomu mubakele na kutwana bipangi bya kuliseza-seza. Twazibukile ngwetu bandolome na bandokazi mu munga ya Yehova bapandele kulizema. Nameme ngoco, kutwombwanesele cizemo cibatumwesele. Mu kwita kwa simbu, twanangukile ngwetu byuma bitwaliwanene nabyo byatulongesele byuma byabingi.

KU MIDDLE EAST

Mu 2006, twatambwile mukanda kutundilila ku Cikota ca Bakaleho ba Yehova ca mu kaye koshe, wakututuma kukapangela ku Middle East. Kuje ku lifuti twakaliwanene lalo na byuma bikwabo, bukalu bwa kuliseza-seza, kulilongesa ndaka na kwizilila bisemwa bya muje mu lifuti. Twalilongesele byabingi omu mu lifuti muje mwakele bukalu bwabwingi buje bwezile mwafwa ya bupolitiki na bulombelo. Twazemene manene bindaka bya kuliseza-seza bije byakele mu bikungulukilo. Co twalimwenenene likwatasano likatundu mu kukabangeya mashiko atukatambula mu munga ya Yehova. Twabwahelelele manene kumona bandolome na bandokazi baje basimpile na kukolesa, nameme bakele na kubalwisa kuli baka-naanga yabo, babakakobela nabo sikola, babakapanga nabo na banu babatunga nabo.

Mu 2012 twakakungulukile ku ciwano cakama cije cakeleko mu Tel Aviv ku Israel. Cije ciwano capwile cakulibanga ku banu ba Yehova kukunguluka mu bwingi muje mu mutambela kutunda ha Pentekosti ya 33 C.E. Kutukebala cije ciwano.

Ha simbu ije, batutumine kukapangela mu lifuti muje mubashokele cipangi cetu. Twaile na mabulu etu amo, twakalingile cipangi ca kwambulula, co twakungulukile ku biwano byabindondo bya citingitingi. Maswalale baje bakele na bitwa bya kutewesa bakele na kwimana ha ma cekipointi. Co kutwakele na kuziba lyoba mwafwa twakele na kwenda mu kunyanyama na baka-kwambulula babandondo.

KWILUKA KU AFRICA

Mu 2013, batwanene cipangi ceka ca kukapangela ha munango wa Kinshasa mu Congo. Eli lifuti lyapwa lyakama, co lyalibwa. Oloni mwakele manene buhutu na binzita. Ha kulibanga twasinganyekele ngwetu “tuzibuka mwamubwa Africa, co twalibwahesela kukapangelamo.” Oloni kwakele byuma byabingi bitwapandele kulilongesa, maneneni mwakwendela mu mitambela muje kumwakele bitapalo na byabu. Twakele mbunge ku byuma byabibwa byakufwa ngwe, kukolesa na kubwahelela kubakele nakwo bandolome na bandokazi nameme bakele na kuliwana na bukalu. Bazemene kwambulula, co bakele na kulinga mwoshe mubasela kuya ku biwano bya cikungulukilo na biwano bya citingitingi. Twalimwenenene Yehova mwabezikisilile cipangi ca kwambulula na kucilingisa ciye lutwe. Ha myaka yaingi itunapanga cipangi ca simbu yoshe mu Congo twalilongesele byuma bya seho, co twawanene na ba busamba babangi baje banapu ngwe naanga yetu.

Kumamaneselelo a mwaka wa 2017, batwanene cipangi ceka lalo ku South Africa. Ha minango yoshe hatunapangela ou wapwile munango wakama, co lalo cipangi cibatwanene kanda tucipangeho. Twapandele kulilongesa byuma byabiha. Nameme ngoco, twapangesele byuma bitwalilongesele mu bipangi bitwapangele kunima. Twazema bandolome na bandokazi betu babangi baje banatwalelelaho kukolesa ha myaka yaingi. Co lalo tukabwahelela manene kumona baka-naanga ya Betheu bapanga mu kulikwatasana nameme batunda ku bisemwa na miyati ya kuliseza-seza. Tuli na kulimwena Yehova mwali na kubezikisila banu bendi ha kubakwasa bakale mu kwoloka mubali na kuzala bunu bwabuha na kupangesa binangulo bya mu Mbimbiliya.

Ha myaka yaingi yange na Debbie twapangele bipangi byabibwa bya kuliseza-seza. Co twalilongesele bisemwa na bindaka byabiha. Keti kwakwasi kulinga ngoco, oloni twalimwena Yehova mwanapangesela munga yendi na bandolome na bandokazi mu kutumwesa cizemo cije kucesi kutenguluka. (Samu 144:2) Byuma byabingi bitunalilongesa mu cipangi ca simbu yoshe, binatukwasa tupwe bangamba ba Yehova bababwa.

Njikakandelela manene ku byuma bibanjilongesele bisemi bange na ku bukwasi bwa munakazi wange injazema Debbie na myanja yaibwa ya bandolome na bandokazi betu bamu kaye koshe. Omwo tubandamena byuma bija kulutwe, tutwalelelaho kulilongesa kuli Mulongesi Wakama.