Kulaheleni Ngweni Yehova Namikonekela

1-2. Tukalizibi bati mutukazibuka ngwetu Yehova natukonekela bubi bwetu? (Taleni na cikupulo cili ha )

MWENE Devidi walizibile kubihya ku mbunge mwafwa ya byuma byabibi byalingile kunima. (Samu 40:12; 51:3, Majwi a helu ya capita) Nameme ngoco watengulukile mu busunga, co Yehova wamukonekelele. (2 Samwe 12:13) Devidi wabwahelelele manene mwazibukile ngwendi Yehova namukonekela.—Samu 32:1.

² Ngecilika mwa Devidi, netu tupwa ba kubwahelela nga tuzibuka ngwetu Yehova natutetela, co natukonekela bubi bwetu. Nameme tunalingi bubi bwakama, kutuzembeleka kuzibuka ngwetu Yehova atukonekela nga tutenguluka mu busunga na kulombela kuli ikeye mangana atukonekele na kulomba bukwasi ku bakulunu na kulinga mwoshe mutwasela kujeneka kwilukila bubi butunalingi. (Prov 28:13; Bili 26:20; 1 Iwa 1:9) Tukabwahelela manene kuzibuka ngwetu Yehova akatukonekela mu busunga. Co mwakatukonekela, kunapu lika ngwe buje bubi kutwabulingile.—Ezeki 33:16.

3-4. Ndokazi umo walizibile bati munima ya kumumbwitika, co bika bitusimutwiya muno mu cilongesa?

³ Bisimbu bimo, bamo kunasa kubakaluwila kukulahela ngwabo Yehova nabakonekela. Omu mukemwo mwalizibilile Jennifer. Bisemi bendi bamulongesele busunga te acili mwanike. Oloni mwapwile mumbanda washangumukile kulinga byuma byabibi, co wakele na kushwekela bisemi bendi bubi bwakele na kulinga. Oloni munima ya myaka watengulukile na kulikundika kuli Yehova, co walyangwilile kumumbwitika. Jennifer wendekele ngwendi: “Kunima njapwile muka-kulubala manene, muka-kunwa manene bwala, kulinga bupangala, co lalo njakele manene mbunge ku kutonda bimbongo. Njazibukile ngwange Mbimbiliya yendeka ngwayo, Yehova asa kukonekela bubi bwetu mwafwa ya ndando ya kupatula ya Yesu. Nameme njatengulukile na kulomba Yehova ngwange anjikonekele, kunjakulahelele ngwange Yehova nanjikonekela.”

⁴ Kuma simbu imo kukamikaluwila kukulahela ngweni Yehova namikonekela bubi bumwalingile kunima ndi? Nga mukemwo, co anukeni ngweni Yehova wapwa muka-kutetela. Mwene Devidi wakulahelele ngwendi Yehova namukonekela, co Yehova atonda ngwendi tulizibe ngwe mwalizibilile Mwene Devidi uje wabwahelele manene mwazibukile ngwendi Yehova namukonekela. Muno mu cilongesa, tusimutwiya ha seho ya kukulahela ngwetu Yehova natukonekela na byuma bitukwasa tukulahele ngoco.

MWAFWA BIKA KWAPWA KWA SEHO KUKULAHELA NGWETU YEHOVA NATUKONEKELA?

5. Satana atonda ngwendi tukulahele byuma muka? Endekeni cakumwenako.

⁵ Kukulahela ngwetu Yehova natukonekela kutukwasa tujeneke kuwila mu umo wa miheto ya Satana. Anukeni ngweni Satana alinga mwoshe mwasela mangana atwonowese kupangela Yehova. Cakumwenako, Satana nasa kweseka kutulingisa tukulahele ngwetu Yehova kasa kutukonekela bubi bwetu. Tucisimutwiyeni ha byuma byalingiwile kuli munalume wa mu Korinte uje ibatundisile mu cikungulukilo mwafwa ya kulinga bupangala. (1 Kori 5:1, 5, 13) Mu kwita kwa simbu uje munalume watengulukile mu busunga. Oloni Satana washakele baje bakele mu cikungulukilo bajeneke kumukonekela na kujeneka kumutambula mu cikungulukilo. Co lalo Satana watondele ngwendi uje munalume walingile bubi alizibe ngwendi kubasa kumukonekela, mangana ‘busiwa bwa kutubakanesa bumuhyane’ na kumulingisa alikele kupangela Yehova. Cilengo ca Satana kucatengulukile. Na ano matangwa atonda ngwendi tulizibe ngwetu Yehova kasa kukonekela bubi bwetu na kutulingisa tulikele kupangela Yehova. Oloni yetu tuzibuka mwakulwila na Satana mwafwa “tuzibuka milali yendi.”—2 Kori 2:5-11.

6. Bika byasa kutukwasa tujeneke kuliziba kukala manene na mulonga?

⁶ Nga tukulahela ngwetu Yehova natukonekela, co kutulizibi kukala manene na mulonga. Mutukalingi bubi, tukalizibi kubabala ku mbunge. (Samu 51:17) Kukwabihile kuliziba ngoco. Mwafwa kunanguka ngwetu tunalingi byuma byabibi, kutulingisa tutenguluke na kulinga byuma byabibwa. (2 Kori 7:10, 11) Nameme ngoco, kutwalelelaho kuliziba kukala manene na mulonga, kutulingisa tuzeye na kulikela kupangela Yehova. Oloni nga tukulahela ngwetu Yehova natukonekela, co kututwalelelaho kuliziba kukala manene na mulonga. Nga tulinga ngoco, co tupangela Yehova mukubwahelela na citaku-taku ca kujela ngwe mwatondela. (Kolo 1:10, 11; 2 Timo 1:3) Oloni twasa kukulahela bati ngwetu Yehova natukonekela?

BIKA BYASA KUTUKWASA TUKULAHELE NGWETU YEHOVA NATUKONEKELA?

7-8. Yehova walekele bika Mosesa kutalesa kuli Ikeye, co byuma byendekele bitukwasa tukulahele bika? (Ekizoda 34:6, 7)

⁷ Singanyekeseseni ha byuma byanendeka Yehova hali ikeye babenya. Cakumwenako, nangukeni byendekele kuli Mosesa ha Munkinda wa Sinai.a (Tandeni Ekizoda 34:6, 7.) Yehova wakala na bifwa byabibwa byabingi, oloni walekele Mosesa ngwendi wapwa “Njambi muka-kutetela na mema ku mbunge.” Kuma Njambi wa cifweci asa kwonowa kukonekela ngamba yendi uje natenguluka mu busunga ndi? Embwe. Yehova kasa kulinga ngoco, mwafwa nga alinga ngoco, co amwesa ngwendi kapwile muka-kutetela, co lalo wapwa wakuminina mbunge.

⁸ Yehova kesi kukwisa, co twasa kumukulahela mwanendeka ngwendi wapwa muka-kutetela, mwafwa simbu yoshe akendeka busunga. (Samu 31:5) Ngeci twasa kukulahela byoshe byakendeka. Nga kuli na kumikaluwila kwecela kuliziba kukala manene na mulonga mwafwa ya bubi bumwalingile kunima, co lihuleni ngweni: ‘Kuma njakulahela ngwange Yehova wapwa muka-kutetela, co wakala na mema ku mbunge, co lalo kasa kwonowa kukonekela munu woshe-woshe uje atenguluka ku bubi bwendi ndi? Nga mukemwo, co kuma kunjapandele kukulahela ngwange nanjikonekela ndi?’

9. Kutukonekela bubi bwetu kulumbununa bika? (Samu 32:5)

⁹ Singanyekeseseni ha byuma byanendeka Yehova mu Mbimbiliya kutalesa ku ngila yakatukonekelamo. Cakumwenako, tucisimutwiyeni byasonekele Devidi kutalesa kukukonekela kwa Yehova. (Tandeni Samu 32:5) Devidi wendekele ngwendi: “ Wanjikonekelele kusebuka kwange na bubi bwange.” Lijwi lya Cihebelu libananungulula ngwabo “kukonekela” omu mu mavesi, lilumbununa lalo “kujundula” nambe “kwambata”. Omwo Yehova wakonekelele Devidi, Devidi walizibile ngwe Yehova namutulu citele ca kulema cambatele. Devidi wabwahelele mwazibukile ngwendi Yehova namukonekela mu kushula. (Samu 32:2-4) Netu twasa kuliziba ngwe mwalizibilile Devidi. Nga tunatenguluka mu busunga ku bubi bwetu, kutwapandele kutwalelelaho kwambata citele ca kulema ca kuliziba kukala manene na mulonga mwafwa ya bubi butwalingile kunima. Oloni tunapande kupwa ba kubwahelela mwafwa Yehova natutulu citele cetu ca kulema.

10-11. Majwi a kwendeka ngwawo ‘nalibwahesela kutukonekela’ atuleka bika hali Yehova? (Samu 86:5)

¹⁰ Tandeni Samu 86:5. Devidi wendekele ngwendi Yehova ‘nalibwahesela kukonekela.’ Oku kulumbununa ngwabo Yehova kesi kuzambwila kulubala nga twasebuka, co simbu yoshe washaka kukonekela baje banatenguluka mu busunga. Mwafwa bika Yehova akalingi ngoco? Majwi anatako omu mu mukanda endeka ngwawo: “Ukamwesa manene cizemo cije kucesi kutenguluka kuli baje bali na kutambeka kuli yobe.” Mu cilongesa cinahu twalilongesele ngwetu Yehova nakulahesa kumwesa cizemo cije kucesi kutenguluka kuli baje bamuzema. Co lalo kakabombila kuti. Mwafwa ya cizemo cendi cije kucesi kutenguluka, Yehova ‘akakonekela kutundilila kwisi ya mbunge’ munu woshe uje atenguluka mu busunga. (Isaya 55:7, ftn.) Nga kuli na kumikaluwila kukulahela ngweni Yehova namikonekela, co mwasa kulihula ngweni: ‘Kuma njakulahela ngwange Yehova wapwa muka-kukonekela, co nalibwahesela kukonekela boshe baje batambeka kuli ikeye mangana abatetele ndi? Kuma kunjapandele kukulahela ngwange Yehova nanjikonekela munjinalombele kuli ikeye mangana anjitetele ndi?’

¹¹ Mbimbiliya inatuleke lalo ngwayo Yehova akatuzibisisa, azibuka mwamubwa ngwendi twapwa ba kujeneka kulumbunuka. Co kuzibuka ngoco, kukatuzembeleka. (Samu 139:1, 2) Tucisimutwiyeni ha byuma bikwabo byendekele Devidi bije bimwesa ngwabyo Yehova atonda kutukonekela.

KETI MWIBALE BYAKANUKA YEHOVA

12-13. Kwesekesa na mukanda wa Samu 103:14, byuma muka byakanuka Yehova hali yetu, co bikamushongangeya alinge byuma muka?

¹² Tandeni Samu 103:14. Devidi wendekele cuma cimo cije cikalingisa Yehova akonekele baje banatenguluka ku bubi bwabo, wendekele ngwendi Yehova “akanuka ngwendi tulikungu.” Kulumbununa ngwabo Yehova azibuka ngwendi kutwalumbunukile. Tucisimutwiyeni ha byuma byendekele Devidi.

¹³ Devidi wendekele ngwendi Yehova “azibuka mwamubwa cifwa cetu.” Yehova watangele Adama “kutunda ha likungu lya hasi,” ngeci azibuka mwamubwa banu na byuma bibatonda. Cakumwenako, azibuka ngwendi batonda kulya na kulala na kuhwima. Nameme banu bakulumbunuka nabo batonda ebi byuma. (Gene 2:7) Hakuwana ngwe Adama na Eva balingile bubi, banu bapwa likungu lya hasi mu ngila ikwabo. Ha kupwa bana babo tunatambula bubi buje bukatulingisa tulinge byuma byabibi. Yehova azibuka mwamubwa ngwendi kutwalumbunukile, co lalo Devidi wendekele ngwendi Yehova ‘akanuka’ ngwendi tu likungu. Oku kulumbununa lalo ngwabo Yehova azibuka mwamubwa ngwendi twapwa tu baka-bubi. Ngeci simbu yoshe akatumwesa mema ku mbunge. Mubwihi Devidi walumbunwine ngwendi Yehova azibuka ngwendi bisimbu bimo twasa kusebuka, co mutukasebuka Yehova akatutetela na kutukonekela mwafwa tunatenguluka mu busunga.—Samu 78:38, 39.

14. (a) Byuma muka byendekele Devidi kutalesa ku ngila yakatukonekelamo Yehova? (Samu 103:12) (b) Bika bitulilongesa kuli Yehova mwakonekelele Devidi? (Taleni cipalo ca “Yehova Akakonekela na Kwibala Bati Bubi Bwetu?”)

¹⁴ Byuma muka bikwabo byasa kutukwasa tukulahele ngwetu Yehova natukonekela? (Tandeni Samu 103:12.) Devidi wendekele ngwendi Yehova mwakatukonekela, akaka bubi bwetu kulako “ngwe butuhukilo bwa litangwa mubwakela kulako na bulahukilo bwa litangwa.” Butuhukilo bwa litangwa na bulahukilo bwa litangwa byakala manene kulako, co kubyasa kuliwana. Oku kulumbununa ngwabo nga Yehova nakonekela bubi bwetu kunapu lika ngwe nabutwala kulako netu, co kukwesi byasa kumulingisa anuke lalo bubi bwetu nambe kutwana kashitiko mwafwa ya bubi bwetu.—Ezeki 18:21, 22; Bili 3:19.

15. Bika bitwasa kulinga nga tutwalelelaho kuliziba kukala manene na mulonga mwafwa ya bubi butwalingile kunima?

¹⁵ Majwi a Devidi aje ali ku mukanda wa Samu 103, atukwasa bati nga kuli na kutukaluwila kukulahela ngwetu Yehova natukonekela? Acisinganyekeni mwakalizibila Yehova. Yehova akanuka ngwendi twapwa tu baka-bubi, co akakonekela boshe baje bakalizibi kubihya ku mbunge mwafwa ya byuma byabibi bibalingile kunima na kutenguluka. Co neni, bikebyo bene bimunalingi. Anukeni lalo ngweni, Yehova kashaka kwanuka nambe kumyanukisa bubi bwanamikonekela laja. Ngeci kakamyana kashitiko mwafwa ya bubi bwanamikonekela laja. Yehova kesi kwaka mbunge ku bubi bwetu butwalingile kunima, netu kutwapandele kulinga ngoco. (Samu 130:3) Nga tukulahela ngwetu Yehova natukonekela, co tulikela kuliziba kukala manene na mulonga, co lalo tutwalelelaho kupangela Yehova.

16. Aneni cakumwenako cije cimwesa bukalu bwasa kutundamo, nga tutwalelelaho kuliziba kukala manene na mulonga mwafwa ya bubi butwalingile kunima. (Taleni na cikupulo.)

¹⁶ Tucisimutwiyeni hali eci cakumwenako. Nga munu ali na kwendesa mota nasa kutala ha ciponi mangana amone byuma bili na kwija kunima. Nasa kulinga ngoco kushwa kumo, oloni nga atalelela ha ciponi, co nasa kukobela mu bukalu. Hakulinga mangana ase kwendesa mwamubwa mota, napande kutwalelelaho kukenga kulutwe. Mu ngila imolika, kwapwa kwakubwa kusinganyeka ha bubi butwalingile kunima, mwafwa kwasa kutukwasa tujeneke kubwilukila. Oloni kutwalelelaho kwanuka bubi bwa natukonekela Yehova, kutulingisa tujeneke kupwa bakubwahelela na kujeneka kupangela mwamubwa Yehova. Ngeci tutwaleleleniho kwaka mbunge ku kupangela Yehova na kusinganyeka ha byuma bya natukulahesa kulutwe omwo byuma byabibi byoshe ‘kutukabyanuka.’—Isaya 65:17; Prov 4:25.

TWALELELENIHO KUSIMPISA BIMBUNGE BYENI

17. Mwafwa bika tunapande kutwalelelaho kusimpisa bimbunge byetu ngwetu Yehova watuzema, co lalo akatukonekela?

¹⁷ Tutwaleleniho kusimpisa bimbunge byetu ngwetu Yehova watuzema, co akatukonekela. (1 Iwa 3:19, ftn.) Mwafwa bika? Mwafwa Satana eseka mwoshe mwasela kutulingisa tulizibe ngwetu Yehova katuzemene, co lalo kasa kutukonekela. Satana akapangesa ebi bingila mu kutwonwowesa kupangela Yehova. Satana eseka mwoshe mwasela kutwonwowesa kupangela Yehova mwafwa azibuka ngwendi nasala lika na simbu yaindondo. (Kujo 12:12) Oloni tunapande kulwisa Satana na kutwalelelelaho kupangela Yehova mu kulongwa.

18. Bika bimwasa kulinga mangana mukulahele ngweni Yehova wamizema, co namikonekela?

¹⁸ Mwasa kukulahela ngweni Yehova wamizema nga mupangesa byuma bitunasimutwiya mu cilongesa cinahu. Muno mu cilongesa, tunalilongesa byasa kutulingisa tukulahele ngwetu Yehova natukonekela. Tunalilongesa ngwetu tunapande kwanuka byanendeka Yehova hali ikeye babenya na kuwana simbu ya kusinganyekesesa manene ha byuma biinendeka Mbimbiliya kutalesa ku ngila yakatukonekela Yehova. Anukeni ngweni Yehova azibuka mwamubwa ngwendi kutwalumbunukile, co akatutetela. Co anukeni lalo ngweni Yehova akakonekela mu kushula. Nga mulinga ngoco, co mupwa bakubwahelela na kukulahela ngweni Yehova namitetela, co mwasa kwendeka ngwe mwendekelele Devidi uje wendekele ngwendi: “Njakandelela Yehova ha kunjikonekela “kusebuka kwange na bubi bwange.”—Samu 32:5.