Mwanuka Ndi?

Kuma munatanda mwamubwa Kaposhi ka Kukengela ka uno mwaka ndi? Nga mukemwo, co tumoneni indi mwasa kukumbulula bihula binatako:

Bika bikatushongangeya twane Yehova bumpau?

Tukalingi ngoco mwafwa twamuzema na kumusingimika manene. Tukana lalo Yehova bumpau mwafwa tushaka ngwetu bakwetu bamuzibuke.—w25.01, lipu. 3.

Twasa kukonekela bati munu uje natubiisila?

Kutwapandele kwombwanesa mutuli nakulizibila. Nga kututwalelelaho kulubala na kujeneka kukala na nkulundundu, co tupwa ba kubwahelela.—w25.02, lipu. 15-16.

Mwafwa bika ndongesi Maki napu mwanja waubwa ku bandolome ba bakwenje?

Maki wapangelelele bakwabo. Nameme bamulingile mwamubi, co wazibile kubabala ku mbunge, kalikelele kupangela bakwabo. Wakanyamesele busamba bwendi na Paulu hamolika na bakwabo ba kuhya ku sipilitu.—w25.04, lipu. 27.

Yesu walumbunwine bika mwalombelele ngwendi: “Njinabasholwela lizina lyobe”? (Iwano 17:26)

Bandongesi bendi bazibukile laja lizina lya Njambi. Nameme ngoco, Yesu wabakwasele bazibuke mwamubwa Njambi kwambateselela na cizango cendi, bipangi byendi na bifwa byendi.—w25.05, lipu. 20-21.

Bika bitunapande kunanguka nga twapwa bakulikehesa?

Nga tu ba kulikehesa tunanguka ngwetu kuli byuma bimo kutuzibuka. Cakumwenako, kutuzibuka simbu ikakanyonga kano kaye nambe byakalinga Yehova ha simbu oyo. Co lalo kutuzibuka bilingiwa imene nambe mwatuzibukila Yehova.—25.06, lipu. 15-18.

Bika byasa kutukwasa tuwane bukwasi ku ñanda nambe ku ñanda ya Mbimbiliya ya mbunga?

Twasa kulihula ngwetu: ‘Bukaleho muka bubanapangesa buje bukwasa banu bakulahele obu busunga bwa mu Mbimbiliya? Kuma kuli cakumwenako cacibwa cinjasa kupangesa mu kulongesa munu obu busunga bwa mu Mbimbiliya ndi? Iya asa kubwahelela kuziba obu busunga?’—w25.07, lipu. 19.

Bika bitulilongesa kuli Yehova mwakonekelelemo Devidi?

Nameme Devidi walingile bubi bwakama manene, Yehova wamukonekelele mwatengulukile mu busunga. (1 Bimye 9:4, 5) Njambi akakonekela mu kushula, co kesi kwanuka nambe kwana munu mulonga mwafwa ya bubi bwalingile kunima.—w25.08, lipu. 17.

Bika bimunapande kulinga nga imukalongesa nendi Mbimbiliya ali na kwonwa kuzibisisa simpi imo?

Nga ali na kwonwa kuzibisisa simpi imo imunamulumbunwina mwamubwa kupangesa Mbimbiliya, co mwasa kuiseza na kuilukila simbu yeka.—w25.09, lipu. 24.

Mbimbiliya inendeka ngwayo bubi bwakala na ‘nzili ya kungumuna.’ (Hebe 3:13) Mu ngila muka?

Bubi bwasa kutukokweya tulinge byuma byabibi. Bwasa lalo kutungumuna na kutulingisa tuuwasane indi Njambi watuzema.—w25.10, lipu. 16.

Byuma muka bitatu bije byasa kulingisa malombelo etu atushwenese kuyehi na Yehova?

Cakulibanga, singanyekeseseni ha bifwa byakala nabyo Yehova. Camucibali, singanyekeseseni ha byuma bimuli na kuliwana nabyo bimwasa kulomba Yehova amikwase, bya kufwa ngwe kukonekela munu. Camucitatu, mwasa kulombela simbu yailaha. Kulinga ngoco kumikwasa muleke Yehova mwoshe mumuli nakulizibila.—w25.10, lipu. 19-20.

Twasa kukwasa bati tukulukazi?

Twasa kubendela nambe kubatumina foni. Twasa lalo kubasindikiya ku cipatela. Nambe kupanga nabo mu lihya kupangesa bingila bya kuliseza-seza.—w25.11, lipu. 6-7.

Byuma muka bibanapande kulinga baka-Kristu mangana cilika cabo ca bulo cimwese kasingimiko kuli Yehova?

Kabangeyeni mashiko a fulumende kutalesa ku bulo. Moneni ngweni cilika ceni ca bulo cimwesa bushuka bwa sipilitu ya Njambi. Zalesi yeni inapande kumwesa ngwayo mu ba kulikehesa, co jenjukeni bilinga bya cisemwa bije kubilitombola na binangulo bya mu Mbimbiliya. Simutwiyeni mwamubwa omwo mulibwahesela bya cilika ceni ca bulo.—w25.12, lipu. 21-24.