Kupwa va Kulongwa Kuli Njambi Kukamuthzivitha Kuvwaha

1, 2. Chetheko muka chaliwanene nacho Njefeta na munendi wa mumbanda?

MUMBANDA washeshele ishe. Wavwahelelele manene mwamwene ishe eluka kutunda ku ndthzita. Kuhyana omu mu ndthzita kwamuthzivithile manene kuvwaha mukemwo wembile myatho na kukina. Oloni vyendekele na kulinga ishe mpamo vyamukomokethele. Watavwile vuthzalo vwendi na kutambakana ngwendi: “Ove munange, ulinakuvavaletha mbunge yange.” Wamulekele ngwendi vinjinakulahetha Yehova vitengulula kuyoya kwove kwoshe. Echi chikulahetho chalumbunwine ngwavo kakashombokaho nambe kukala na mwana. Oloni wakumbulwile vwathivwathi kushongangeya ishe mangana alinge vyanakulahetha Yehova. Kumbulwithi yendi yamwethele ngwavo wakulahelele ngwendi vyoshe vyamuleka Yehova vinapu vyavivwa. (Maako 11:34-37) Omwo ishe wamwene likulahelo lya munendi, wavwahelelele manene, mwafwa wathzivukile ngwendi kulyana kwa munendi kuthzivitha Yehova kuvwaha.

² Njefeta na munendi vakulahelele manene Yehova, nomwo mwakalingila vyuma vyendi. Vapwile va kulongwa nameme kulinga ngocho kwapwile kwakukalu. Vashakele kuthzivitha Yehova kuvwaha. Ocho chapwile chuma cha theho kutuvakana ñombelo yoshe yoshe.

3. Mwanja wa Njefeta na munendi wa mumbanda watha kutukwatha vati matangwa ano?

³ Kulongwa kuli Yehova kukwapwile kwakwathi. Tunapande “kutwalaho kulwila kukulahela.” (Yunda 3) Vyuma muka vitukwatha kulinga ngocho? Tulilongetheni kuli Njefeta na munendi wa mumbanda vaje vakanyamenene vyetheko vyavingi mu kuyoya kwavo. Vatwaleleleho vati kupwa va kulongwa kuli Yehova?

KUTWALELELAHO KULONGWA MU KAYE KA VILINGA VYAVIVI

4, 5. (a) Yehova wanene lishiko muka kuli vaisalele omwo vakovelele mu lifuti lyavakulahethele? (b) Mukanda wa Myatho 106, utuleka ngwavo vika vyalingiwile kuli vaIsalele omwo kuvononokele Njambi?

⁴ Litangwa na litangwa, Njefeta na munendi wa mumbanda, vakele na kwanuka vyuma vyalingiwile ku vaIsalele omwo kuvalongwele kuli Yehova. Myaka 300 kunima, Yehova washikile vaisalele kuthsiya vaka-kulemetha va makuli voshe vaje vakele mu lifuti lyavakulahethele, oloni kuvamwononokele. (Kwituluka mu Mashiko 7:1-4) Vwingi vwa vaisalele vashangumukile kutembwinina vakanana, vaje vakele na kulemetha vinjambi va makuli na futithi yaivi.—Tandeni Myatho 106:34-39.

⁵ Yehova kanyungilile vaIsalele ku vitothzi vavo omwo ya kujeneka kwononoka kwavo. (Maako 2:1-3, 11-15; Myatho 106:40-43) Ha thimbu ije, kwapwile kwakukalu ku vinanga vije vyathzemene Yehova kutwalelelaho kupwa va kulongwa. Oloni Mbimbiliya yatuleka ngwavo kuli vamo vapwile va kulongwa va kufwa ngwe Njefeta na munendi wa mumbanda na Elekana na Hana na Samwele. Valyangwilile kuthzivitha Yehova kuvwaha.—1 Samwele 1:20-28; 2:26.

6. Vyuma muka vinalithala manene mu kaye matangwa ano, cho tunapande kulinga vika?

⁶ Matangwa ano, vanu vakathinganyeka na kulinga vyuma ngwe vaKanana. Kuyoya kwavo va chikundametha ha vukwithzi na vukenya na vimbongo. Oloni Yehova akatunangula mwamuvwa. Ashaka kutuvingilikiya ku vanu vavavi, ngechi lika mwalingilile kuli vaIsalele. Tunapande kulilongethako vimo ku vyuma vivalingile vaIsalele (1 Kolinte 10:6-11) Tunapande kulinga mwoshe mutwathela kujenjuka kuthinganyeka ngwe vaka-Kaye. (Loma 12:2) Tulinga ngocho ndi?

NJEFETA WATWALELELEHO KULONGWA NAMEME MU THIMBU YA VUKALU

7. (a) Vanu vayoyele navo Njefeta vamulingile vati? (b) Njefeta walingile vati?

⁷ Mu matangwa a Njefeta, vaFilisitiya na vaAmoni vayandethele Vaisalele mwafwa kuvononokele kuli Yehova. (Maako 10: 7, 8) Njefeta kakele lika na vitothzi va ku mafuti eka, oloni lalo waliwanene na vyetheko kutunda ku vavushoko vwendi na vakulunu va mu Isalele. Vavushoko vwendi vamushekele hembo na kumunyeka vikwata vyendi vyoshe mwafwa vamuthzivilile chipululu, cho lalo vamuthzindile. (Maako 11:1-3) Njefeta katavethele vilinga vyavo vyavivi kumwonowetha kupwa wa kulongwa kuli Njambi. Tuthzivuka vati ngocho? Mwafwa omwo vakulunu va mu Isalele vamulombele kuvakwatha, kakwata-kwatele ku mathinde. (Maako 11:4-11) Vika vyashongangeyeye Njefeta alinge vyuma vyalingile?

8, 9. (a) Vinangulo muka vyakele mu Lishiko lya Mosesa vije vyakwathele Njefeta? (b) Vyuma muka vyapwile vya theho manene kuli Njefeta?

⁸ Njefeta wapwile muka-kulwa wa ndthzili, wathzivukile mwamuvwa vya chikota cha Isalele na Mashiko a Mosesa. Kumona omwo Yehova walingililemo vanu vendi, kwamulongethele kuthzivuka omwo Njambi akamwenamo vuvi na vuvwa. (Maako 11:12-27) Njefeta wapangethele awa mana mu kwangula vya kulinga mu kuyoya kwendi. Wathzivukile mwakalithzivila Yehova ha kuluvala na kulinga shambandinga, cho lalo wathzivukile ngwendi Njambi ashaka vanu vendi valithzeme umo na mukwavo. Lishiko lyamulongethele mwakuyoyela mwamuvwa na vakwavo, nameme vaje vamuthzindile.—Tandeni Kutuhuka 23:5; VaLevi 19:17, 18.

⁹ Mwanja wa Yosefa hamo ukewo wa kwathele Njefeta. Hamo walilongethele kuli Yosefa uje wathzivililile vandolome vendi ngothzi vaje vamuthzindile. (Kushangumuka 37:4; 45:4, 5) Kuthinganyeka ha mwanja ou kwakwathele Njefeta kulinga vyuma vije vyathzivithile Yehova kuvwaha. Vyuma vivamulingile vavushoko vwendi vyamuthzivithile kuvavala ku mbunge. Oloni Njefeta watwamekele kujeletha lithzina lya Yehova na kulwila vanu vendi, kutuvakana vyuma vije vyakele na kumulingikila. (Maako 11:9) Washakele kutwalelelaho kulongwa kuli Yehova. Mu kulongwa kwendi, Yehova wamuvethzikithile na kuvethzikitha vaIsalele.—VaHevelu 11:32, 33.

10. Twatha kulinga vati mangana vinangulo vya mu Mbimbiliya vitukwathe kupwa vanu va kukanyama ku sipilitu matangwa ano?

¹⁰ Tulilongetha ku mwanja wa Njefeta ndi? Tulinga vati nga vandolome vetu vaka-Kilisitu vatuluvaletha nambe nga tulithziva ngwetu kuvatulingile mwamuvwa? Kutwapandele kuluvala na kulikela kupangela Yehova nambe kulikela kukunguluka na kulikela kulikwatathana na chikukungulukilo. Tutembwinineni Njefeta na kwononoka kuli Yehova. Echi chitukwatha tukanyamene vyetheko mangana netu tupwe mwanja wauvwa.—Loma 12:20, 21; Kolose 3:13.

VYUMA VITUKALYANA KULINGA VIMWETHA LIKULAHELO LYETU

11, 12. Vika vyakulahethele Njefeta, cho vyuma muka vyalivungililemo?

¹¹ Njefeta wathzivukile ngwendi katha kupatula vaIsalele kuli vaAmoni kuvanga Njambi avakwathe. Ngechi wakulahethele Yehova ngwendi nga ahyana, cho akamwana chumu chikavanga kutuhuka mu njuvo yendi kupwa “ñombelo ya kwenyeka.” (Maako 11:30, 31) Echi chilumbununa vika?

¹² Njefeta kakele na kwendeka kukombelela vene munu, mwafwa tuthzivuka ngwetu Yehova wathzinda kukombelela vanu. (Kwituluka mu Mashiko 18:9, 10) Mu Mashiko a Mosesa, ñombelo ya kwenyeka yapwile vwana vwa kulitila vwatha kwana munu kuli Yehova. Ngechi Njefeta walumbunine ngwendi uje munu akamwana mangana akapangele mu mbalaka ya Njambi mu kuyoya kwendi kwoshe. Yehova watolililile kuli Njefeta na kumukwatha ahyane mu ndthzita. (Maako 11:32, 33) Njefeta nethi kwana iya kuli Yehova?

13, 14. Majwi a Njefeta ali ku Maako 11:35 amwetha vika ha likulahelo lyendi?

¹³ Thinganyekeni vitunavanga kwendeka ku maputukilo eyi ñanda. Omwo Njefeta welukile ku ndthzita munu wa kulivanga watuhukile mu njuvo yendi wapwile munendi wa mumbanda. Njefeta wakele lika na mwana umo. Njefeta walingile vyakulahethele ndi? Wanene munendi wa mumbanda umo lika ku mbalaka mangana akapangele Yehova mu kuyoya kwendi kwoshe ndi?

¹⁴ Vinangulo vya mu Mashiko a Njambi vyakwathele lalo Njefeta kwangula mwamuvwa vya kulinga. Hamo wanukile majwi ali ku kutuhuka 23:19 aje amwethele ngwavo vanu va Njambi vanapande kwana Yehova vyuma vyavivwa. Lishiko lyendekele ngwavo nga munu nalikumiya kwana chuma chimo kuli Yehova, “kapandele kupokola chikulahetho chendi, oloni napande kulinga vyuma vyoshe vije vyanakulahethele kulinga.” (Kulava 30:2) Njefeta washakele kushulithilila chikumiyo chendi ngwe mwalingile Hana wa kulongwa uje wayoyele mu thimbu yendi, nameme wathzivukile vinethi kutundamo. Wathzivukile ngwendi nga munendi akapangela ku mbalaka, cho kakala na mwana. Wahi nethi kushwana lithzina na livu lya Njefeta. (Maako 11:34) Nambe ngocho, Njefeta wendekele mu kulongwa ngwendi: “Njinalingi laja chikulahetho kuli Shukulu Kalunga, cho kunjatha kuchipokola lalo embwe.” (Maako 11:35) Yehova watambwile ñombelo ya Njefeta cho wamuvethzikithile. Ngwe yeni, ngwe mwapwile va kulongwa ngwe Njefeta ndi?

15. Chikumiyo muka chitunalikumiya vwingi vwetu, cho twatha kumwetha vati ngwetu twachinyungu?

¹⁵ Omwo twalikundikile kuli Yehova, twamukulahethele ngwetu tulinga chithzango chendi nameme tuliwana mu vukalu. Twathzivukile ngwetu kulinga ngocho kethi kwakwathi. Tukalingi vati nga vatulomba kulinga chuma chije kutwashakele? Nga tulyana kwononoka kuli Njambi wetu, cho tumwetha ngwetu twanyungu chikulahetho chetu. Thimbu imo tunatha kuliwana mu vukalu omwo ya kulyana kwetu, oloni Yehova atuvethzikitha mwakama. (Malakiya 3:10) Muna Njefeta wa mumbanda cho? Vika vya lingile ha chikulahetho chalikumiyiye ishe?

16. Muna Njefeta walingile vati omwo wathzivile vyakulahethele ishe? (Kengeni chikupulo ha liputa 3)

¹⁶ Chikumiyo cha Njefeta chalithezele na cha Hana. Hana walikumiyiye kwana munendi wa mukwenje akapwe kaNazalite mu mbalaka. (1 Samwele 1:11) KaNazalite wakele na kwambata na kukita vana. Oloni muna Njefeta wa mumbanda ikeye wamwanene kupwa ngwe “ñombelo ya kwenyeka” mwafwa ikeye kapandele kushomboka na kukita vana. (Maako 11:37-40) Muna Njefeta wa mumbanda, nethi kushomboka ku munalume wamuvwa mwafwa ishe wapwile ntwama mu Isalele. Oloni ikeye wapwile ngamba wa kulikehetha mu mbalaka. Ou mumbanda walingile vati? Wamwethele ngwendi kupangela Yehova chikecho chuma cha theho kuli ikeye omwo walekele ishe ngwendi: “linga kuli yange chuma chije chiwunakulahetha.” (Maako 11:36) Wanene lishungu lyendi lya kushomboka na kukita vana mangana apangele Yehova. Twatha kutembwinina vati kulyana kwendi?

17. (a) Twatha kutembwinina vati kukulahela kwa Njefeta na munendi wa mumbanda? (b) VaHevelu 6:10-12 itushongangeya vati tupwe na mbunge ya kulyana?

¹⁷ Vwingi vwa vakwenje na vambanda vaka-Kilisitu vanalyana kujeneka kukovela mu vulo nambe kukita vana, mu thimbu ino. Mwafwa vika? Mwafwa vashaka kupangela Yehova thimbu yoshe. Vakulunu vamo navo vanalyangwila kujeneka kukala na vana vavo nambe vatekulu. Oloni vanalyana thimbu yavo na ndthzili yavo mu kupangela Yehova. Vamo vali na kupanga mu kutunga myela ya kulemethela nambe kuya ku Sikola ya Vaka-kwambulula Vumwene nambe kuya kuje kuli vujene vwakama vwa vaka-kwambulula. Veka vakathinganyeka vya kupangela Yehova na ndthzili mu vingonde vya chanukitho. Njambi kakevala chithzemo chivanamwetha vangamba vendi voshe va kulongwa. (Tandeni VaHevelu 6:10-12.) Yeni cho? Neni mulyana kupangela Yehova na ndthzili ndi?

VIKA VITUNALILONGETHA?

18, 19. Twalilongetha vika ku ñanda ya mu Mbimbiliya ya Njefeta na munendi wa mumbanda, cho twatha kuvatembwinina vati?

¹⁸ Vyuma muka vyakwathele Njefeta ahyane vukalu vwavwingi? Watavethele Yehova amutwamenene mu kwangula vya kulinga mu vuyoye vwendi. Katavele vanu vavavi vaje vamuthzengelekele ngechi vamungumune. Cho lalo watwaleleleho kupwa wa kulongwa nameme vakwavo vamulingile mwamuvi. Yehova wavethzikithile Njefeta na munendi wa mumbanda mu kulyana kwavo, cho wavapangethele mukukundwiya kulemetha kwa vuthunga. Nameme vanu voshe valikelele kulinga vyavivwa, oloni Njefeta na munendi vatwaleleleho kulongwa kuli Yehova.

¹⁹ Mbimbiliya ngwayo: Tembwinineni “vaje vaka-kukulahela na kuthimpa, cho mutambule vije vyanamikulahetha Njambi.” (VaHevelu 6:12) Tutembwinineni Njefeta na munendi wa mumbanda, mwafwa tuthzivuka ngwetu nga tupwa va kulongwa kuli Yehova, cho akatuvethzikitha.