Mwafwa Vika Tunapande Kukunguluka mu Kulemetha Njambi?

1-3. (a) Vaka-Kilisitu vanamwetha vati ngwavo vashaka kulikungulula hamo? (Kengeni chikupulo ha liputa 15.) (b) Vika vituthimutwiya omu mu chilongetha?

CORINNA mwakele na myaka 17, vaina vavakutile, cho vavatwalele mu kamenga ka kulako manene. Cho lalo, Corinna nendi vamutwalele kulako manene ku Siberia. Vakamupangethele mu lihya, cho vakamuyandethele manene ngwe ndungo. Thimbu imo vakele na kumuthindiya kupangela hanja mu lithika oku kethi na vuthzalo vwa lithika. Nameme ngocho, Corinna na ndokathzi mukwavo valingile muvathelele mwoshe kuthethza olyo lihya na kuya ku viwano.

² Corinna wendekele ngwendi: “Twakatukile ha lihya mangwethzi na kushangumuka kwenda vungendthzi vwa makilomita 25 kuya kuvikemanena vikumboyo. Kumboyo yakatukile mangulu-ngengu na thimbu ya 2 kiloko, cho yendele maola 6. Omwo twashulukile, cho twendele makilomita likumi kuya ku Njuvo ya Vumwene.” Corinna wavwahelelele manene ha kwatha kuya ku viwano. Wendekele ngwendi: “Omwo twakele ku viwano, twalilongethele Kaposhi ka Kukengela na kwimba myatho ya Vumwene. Vyatushongangeyeye na kukanyametha likulahelo lyetu.” Munima ya matangwa atatu, ava vandokathzi vavali velukile ku lihya, oloni vavenya lihya kathzivukile ngwendi vanatundileho.

³ Vanu va Yehova vashaka kulikungulula na vakwavo thimbu yoshe. Chakumwenako, vaka-Kilisitu va kulivanga vashakele kulikungulula hamo mu kulemetha Yehova na kulilongetha vyendi. (Vilinga 2:42) Hamo neni mwashaka kuya ku viwano. Oloni hamo kukamikaluwila kuyako thimbu yoshe, ngwe vandolome na vandokathzi veni voshe. Mpamo mukonwa mwafwa ya kupanga maola amangi nambe kukala na vyavingi vya kulinga nambe kujuka manene. Vika vyatha kutukwatha tupange na ndthzili mangana tuye ku viwano?^[1] (Kengeni viñanda vya kushongo.) Twatha kushongangeya vati vanu vatukalongetha Mbimbiliya na vakwavo vaye ku viwano thimbu yoshe? Echi chilongetha chitulumbunwina omwo kuya ku viwano (1) kutukwathela, nomwo (2) kukwathela vakwetu, nomwo (3) kwatha kuthzivithila Yehova kuvwaha ku mbunge.^[2]—Kengeni viñanda vya kushongo.

VIWANO VIKATUKWATHA

4. Kulikungulula hamo kukatukwatha vati tulilongethe vya Yehova?

⁴ Viwano vikatulongetha. Viwano vyoshe vikatukwatha tulilongethe vyavingi hali Yehova. Chakumwenako, vikungulukilo vyavingi vinakala na kulilongetha mu livulu lya Mu Sutelele ku Jehova, mu Chilongetha Cha Mbimbiliya Cha Chikungulukilo. Mwalithzivile vati omwo twalilongethele vifwa vya Yehova, na kuthziva vandolome veni vendeka muvakalithzivila hali ikeye? Echi chamilingithile muthzeme manene Yehova. Ku viwano tukalilongetha lalo vyavingi vya mu Mbimbiliya, kwitila mukutolilila ku viñanda na vimwetho na kutanda Mbimbiliya. (Nehemiya 8:8) Kutundaho lalo, tukalilongetha vyavingi chalumingo na chalumingo omwo tukalivwahethela kutanda Mbimbiliya na kuthziva vivanalilongethako vakwetu.

5. Viwano vya vaka-Kilisitu vyamikwatha vati kupangetha vinangulo vya mu Mbimbiliya na kuvwethzelela ku vutongwe vweni vwa kwambulula?

⁵ Viwano, vikatulongetha mwa kupangethela vitulilongetha mu Mbimbiliya mu kuyoya kwetu. (1 Tesalonika 4:9, 10) Chakumwenako, Mwalilongethaho laja Kaposhi ka Kukengela kaje kamishongangeyeye kulinga vyavingi mu chipangi cha Yehova nambe kulombela malombelo amavwa nambe kuthambetha ndolome nambe ndokathzi yeni ndi? Viwano vya mukati ka chalumingo vikatulongetha mwakwambulwila muthzimbu wauvwa na mwakukwathela vakwetu vathzivithithe vuthunga vwa mu Mbimbiliya.—Mateo 28:19, 20.

6. Viwano vikatukanyametha na kutushongangeya vati?

⁶ Viwano vikatushongangeya. Kaye ka Satana kashaka kuthzeyetha likulahelo lyetu, cho katha kutunenela vishoti na kututhzeyetha. Oloni viwano vyetu vikatushongangeya na kutwana ndthzili ya kutwalelelaho kupangela Yehova. (Tandeni Vilinga 15:30-32.) Kakangi tukalilongetha omwo muvunalishulithilila vupolofweto vwa mu Mbimbiliya. Echi chikatulingitha tukulahele ngwetu vyuma vya kulutwe vyanatukulahetha Yehova tangwa vikalishulithilila. Vandolome na vandokathzi vetu vakatushongangeya omwo vakana viñanda nomwo vakashangathzala Yehova mu kwimba kutunda ku mbunge. (1 Kolinte 14:26) Cho lalo kuthimutwiya navo thimbu kanda viwano vishangumuke na munima ya viwano, kukatukanyametha mwafwa tukalithzivi ngwetu twakala na vavuthamba vavangi vaje vatuthzema.—1 Kolinte 16:17, 18.

7. Mwafwa vika kwapwa kwa theho kuya ku viwano vyetu?

⁷ Ku viwano, tukatambula vukwathi vwa sipilitu ya Njambi ya kujela. Yesu akapangetha eyi sipilitu ya kujela mu kutwamenena vikungulukilo. Watulekele ngwendi tunapande ‘kutolilila vije vyali na kwendeka sipilitu ku vikungulukilo.’ (Kujombolola 2:7) Sipilitu ya kujela yatha kutukwatha tukanyamene vyetheko na kwambulula mu kuthimpa. Yatha lalo kutukwatha twangule mwamuvwa vya kulinga. Mukemwo tunapande kulinga mutwathela mwoshe kuya ku viwano vyetu mangana tukatambule vukwathi vwa sipilitu ya kujela ya Njambi.

NGA TUYA KU VIWANO TUKAKWATHA VAKWETU

8. Omo tuya ku viwano na kukumbulula na kwimba kukakwatha vati vandolome vetu? (Kengeni na chipalo cha “Akalithzivi Mwamuvwa Thimbu Yoshe .”)

⁸ Nga tuli ku viwano, ikeyo thimbu ya kumwetha vandolome na vandokathzi vetu ngwetu twavathzema. Vanu vavangi mu vikungulukilo vali na kulifwita na vukalu vwakama. Kapositolo Paulu wathonekele ngwendi: “Tuliyongoleni umo na mukwavo.” (VaHevelu 10:24, 25) Tumwetha ngwetu twathzema vandolome na vandokathzi vetu ha kuya ku viwano na kulishongangeya umo na mukwavo. Omwo tuya ku viwano, tumwetha vandolome vetu ngwetu tushaka kukala navo na kuthimutwiya navo, cho tushaka kuthzivuka muvali na kulithzivila. Kutundaho lalo, tukavakanyametha omwo vatuthziva tukumbulula na kwimba kutunda kwithi ya mbunge.—Kolose 3:16.

9, 10. (a) Lumbununeni omwo majwi a Yesu ali ku Yowano 10:16 atushongangeya kulikungulula na vandolome vetu. (b) Nga tuya ku viwano thimbu yoshe, twatha kukwatha vati vaje vavanayengula kuli vavushoko vwavo?

⁹ Omwo tuya ku viwano, tukwatha chikungulukilo chipangele hamo. (Tandeni Yowano 10:16.) Yesu walyethekethele kuli kanyungi, na kwetheketha vaka-kumukavangeya ku vutanga vwa vimanga. Thinganyekeni eyi ñanda. Nga vimanga vavali vali ha munkinda, vavali vali mu chimbongo, umo cho ali kwalikalyendi lalo, muthinganyeka ngweni ovo vimanga vanapu vutanga vumo ndi? Embwe, mwafwa vimanga vaje vali mu vutanga vumo vakende hamo na kuya kuje kwavapangwila kanyungi. Mu ngila imo lika, netu kutwapandele kulyangununa kuli vandolome vetu ha kujeneka kuya ku viwano. Tunapande kukunguluka mangana tukundame ku “vutanga vumo” na kukavangeya “kanyungi lalo umo.”

¹⁰ Viwano vyetu vikatukwatha tulikwatathane ha kupwa nanga ya kulithzema. (Myatho 133:1) Vamo mu chikungulukilo vanavayengula kuli vaka-nanga yavo, va kufwa ngwe vithemi nambe vayayavo nambe vishongo vavo. Oloni Yesu wakulahethele kuvana nanga ije ivathzema na kuvanyunga. (Mako 10:29, 30) Omwo muya ku viwano thimbu yoshe, munatha kupwa ngwe tate nambe nana nambe ndolome nambe ndokathzi kuli munu umo mu chikungulukilo. Kwanuka echi chuma kutulingitha tupange na ndthzili mangana tuye ku viwano vyoshe.

TUTHZIVITHA YEHOVA KUVWAHA KU MBUNGE

11. Kuya ku viwano kukatukwatha vati twane Yehova vinamupande?

¹¹ Omwo tuya ku viwano, twana Yehova vije vinamupande. Yehova wapwa Ishamatanga wetu, ngechi tunapande kukandelela kuli ikeye na kumuthingimika na kumushangathzala. (Tandeni Kujombolola 7:12.) Twatha kulinga ngocho ku viwano omwo tulombela kuli Yehova na kumwimbila na kuthimutwiya vyendi. Chalumingo na chalumingo tukakala na thimbu ya kulemetha Yehova.

12. Yehova akalithzivi vati nga twononoka lishiko lyendi lya kuya ku viwano?

¹² Tunapande kwononoka kuli Yehova mwafwa ikeye watutangele. Watushika ngwendi tutwaleleleho kulikungulula hamo, maneneni omwo thimbu ya kukotoka inashwene muyehi. Nga twononoka eli lishiko, cho tuthzivitha Yehova kuvwaha ku mbunge. (1 Yowano 3:22) Athzivuka ngwendi twashaka kuya ku viwano, cho akamono vitukalifwiti ngechi tuyeko.—VaHevelu 6:10.

13, 14. Tukashwenye vati kuyehi na Yehova na Yesu ku viwano?

¹³ Omwo tuya ku viwano, tumwetha Yehova ngwetu tushaka kulikuta vuthamba nendi na Munendi. Ku viwano, Yehova akatulongetha kwitila mu Mbimbiliya vyuma vitunapande kulinga, nomwo tunapande kuyoyela. (Isaya 30:20, 21) Nameme vaje kuvapwile vaka-kulemetha Yehova muvakaija ku viwano, vakananguka ngwavo Njambi ali na kututwamenena. (1 Kolinte 14:23-25) Vitukalilongetha ku viwano vikatundu kuli Yehova, mwafwa ikeye akatwamenena viwano vyetu kupangetha sipilitu ya kujela. Ngechi mutukakala ku viwano, tukatolilila kuli Yehova cho tuthzivuka mwatuthzemena. Echi chikatulingitha tushwenye kuyehi nendi.

¹⁴ Yesu Mutwe wa chikungulukilo wendekele ngwendi: “Kuje kunakungulukila vanu vavali nameme vatatu mu lithzina lyange, nange lalo Njili hakati kavo.” (Mateo 18:20) Mbimbiliya yendeka lalo ngwavo Yesu “ali na kwendangana” mu vikungulukilo. (Kujombolola 1:20–2:1) Yehova na Yesu vali hamo netu, cho vakatukanyametha ku viwano. Muthinganyeka ngweni Yehova akalithzivi vati omwo amimona mushaka kulikuta vuthamba nendi na Munendi?

15. Nga tuya ku viwano tumwetha vati ngwetu tushaka kwononoka kuli Njambi?

¹⁵ Omwo tuya ku viwano, tumwetha Yehova ngwetu tushaka kwononoka kuli ikeye. Yehova kethi kututhindiya kumwononoka. (Isaya 43:23) Oloni nga twononoka lishiko lyendi lya kuya ku viwano, cho tumwetha ngwetu twamuthzema, cho lalo twakulahela ngwetu ikeye napande kutuleka vya kulinga. (Loma 6:17) Chakumwenako, twatha kulinga vati nga mukulunu wa vipangi ashaka ngwendi tupange lika na kujeneka kuya ku viwano? Hamo fulumende ya mu lifuti lyeni yashika ngwavo nga vanu valikungulula mu kulemetha Yehova, cho vanapande kufweta nambe kuvakuta mu kamenga nambe kuvana kashitiko. Hamo nawa yetu vavenya twayongola kujeneka kuya ku viwano ngechi tupange vyeka. Mu vingila vyoshe evi, tunapande kulyangwila vya kulinga yetu vavenya. (Vilinga 5:29) Oloni nga twangula kwononoka Yehova, tumuthzivitha kuvwaha ku mbunge.—Vithimo 27:11.

TWALELENIHO KULIKUNGULULA NA VANDOLOME VENI

16, 17. (a) Tuthzivuka vati ngwetu viwano vyapwile vya theho kuli vaka-Kilisitu va kulivanga? (b) Ndolome George Gangas walithzivile vati ha viwano vya vaka-Kilisitu?

¹⁶ Munima ya kulikungulula ku Pentekosita ya mu mwaka wa 33, vaka-Kilisitu vatwaleleho kulikungulula mu kulemetha Yehova. “Vakakateyeye kulilongetha kuli miluwa na mu kulitombola.” (Vilinga 2:42) Kuvalikelele kulikungulula hamo nameme muvavayandethele ku fulumende ya vaLoma na vantwama va mu vulombelo vwa vaYunda. Valingile muvathela mwoshe mangana valikungulule hamo, nameme kulinga ngocho kukwapwile kwakwathi.

¹⁷ Na vangamba va Yehova matangwa ano, vakakandelela manene viwano, cho vakalithzivi vwino muvakakalako. Ndolome George Gangas uje wapwile mu Munga ya Kutwamenena ha myaka ya kutuvakana 22 ngwendi: “Yange njamono ngwange kukunguluka hamo na vandolome kukanene kuvwahelela kwakama mu vuyoye, cho lalo yapwa ngila imo yakulishongangeya. Nange njashaka kulivanga ku viwano na kuthalelako nga chitava. Njikathzivi kuvwahelela ku mbunge munjikathimutwiya na vanu va Njambi. Omwo njikakala navo, njikalithzivi kushuvuluka ngwe njili na nanga yange mu palandaisi ya ku sipilitu.” Wendekele lalo ngwendi: “Njashaka manene kuya ku vikungulukilo.”

18. Mukalithzivi vati ha viwano vyetu, cho mwalyangwila kulinga vika?

¹⁸ Neni mukemwo mumukalithzivila ha kulemetha Yehova ndi? Nga ngocho, cho munapande kwetheka mumwathela mwoshe mangana mulikungulule hamo na vandolome veni ku viwano, nameme kulinga ngocho kwakukalu. Mwetheni Yehova ngweni neni mukalithzivi mwalithzivilile Mwene Ndaviti uje wendekele ngwendi: “Njithzema njuvo yove muje muwakala yove Shukulu Kalunga.”—Myatho 26:8.