Mbimbiliya Ichili na Kutengulula Kuyoya Kweni Ndi?

1-3. (a) Vilinga muka vije vyatha kupwa vyavikalu kuvyechela munima ya kutumbwitika? (b) Vihula muka vitunatha kulihula nga tuwana vukalu vwa kwechela vilinga vimo? (Kengeni chikupulo chili ha liputa 23)

KEVIN wakele na kweha vweho vwa kulihyana na vakwavo na kuthipa na kunwa manene na kupangetha mambanda a kupendetha ha myaka yaingi.^[1] (Kengeni viñanda vya kushongo.) Kukapwa muje, washangumukile kulilongetha vya Yehova, cho washakele kulikuta vuthamba nendi. Oloni wapandele kutengulula kuyoya kwendi mangana alikute vuthamba na Njambi. Yehova wamukwathele kutenguluka hamo lika na ndthzili ya Lijwi lyendi.—VaHevelu 4:12.

² Munima ya kumumbwitika, Kevin wapandele kutwalelelaho kutengulula vunu vwendi mangana apwe muka-Kilisitu wamuvwa. (Efeso 4:31, 32) Chakumwenako, wapwile muka-kuluvalaluvala vwathi. Wakomokele manene omwo wathzivukile ngwendi akonwa kwilwitha vwathi mbunge yendi. Kevin wendekele ngwendi kwechela vilinga vyavivi vyakele na kulinga thimbu kanda vamumbwitike kwapwile kwakwathi, kutuvakana kulikela kuluvalaluvala. Oloni wathele kutenguluka omwo walombele vukwathi kuli Yehova na kulilongetha Mbimbiliya.

³ Vwingi vwetu thimbu kanda vatumbwitike twapandele kutengululako vyuma vimo vyakama mangana tuyoye mu kulitombola nevi yendeka Mbimbiliya. Oloni nameme thimbu ino tuthzivuka ngwetu tunapande kutengulukako kamandondo mangana tutembwinine Njambi na Kilisitu. (Efeso 5:1, 2; 1 Petulu 2:21) Chakumwenako, tunatha kunanguka ngwetu tukayayavala manene nambe kufweya vakwetu na kuvendeka mwamuvi. Nambe mpamo tunatha kulishoshomwa ha vyuma vivatha kututhinganyekela vakwetu, nambe ha kutwendeka ngwavo kutwethi kulinga vyuma vyavivwa. Hamo tunashwile laja kwetheka kwechela evi vyuma, oloni anga tuchivilinga. Ngechi tunatha kulihula ngwetu: ‘Mwafwa vika njili na kwonwa kwechela evi vyuma vyavindondo? Vika vinjinapande kulinga mangana njipangethe viyendeka Mbimbiliya na kutwalelelaho kutengulula vunu vwange?’

MWATHA KUTHZIVITHA NJAMBI KUVWAHA

4. Mwafwa vika kutwatha kulinga lika vyuma vije vithzivitha Yehova kuvwaha thimbu yoshe?

⁴ Twathzema Yehova, mukemwo tushaka kumuthzivitha kuvwaha kutundilila kwithi ya vimbunge vyetu. Oloni kutwatha kumuthzivitha kuvwaha thimbu yoshe mwafwa kutwalumbunukile. Tukalithzivi ngwe mwalithzivilile kapositolo Paulu uje wendekele ngwendi: “Muli yange muli lishungu lya kulinga vyavivwa, oloni kunjatha kulingamo.”—Loma 7:18; Yakomba 3:2.

5. Vilinga muka vitwechelele thimbu kanda vatumbwitike, oloni tupenga muka tutunatha kutwalelelaho kulifwita natwo?

⁵ Thimbu kanda tushangumuke kulikwatathana na chikungulukilo, twavangele kwechela vilinga vyathzinda Yehova. (1 Kolinte 6:9, 10) Oloni anga kutwalumbunukile. (Kolose 3:9, 10) Ngechi nameme muneti thimbu yailaha kutunda havatumbwitikilile, anga tukathevuka. Thimbu yoshe tunatha kupwa na mashungu amavi na vithinganyeka vyavivi, nambe hamo tunatha kwonwa kwechela kapenga katwakala nako. Tunatha kulifwita na kapenga ketu ha myaka yaingi.

6, 7. (a) Mwafwa vika twatha kulikuta vuthamba na Yehova nameme kutwalumbunukile? (b) Mwafwa vika kutwapandele kulikela kulomba Yehova atuthambethe?

⁶ Oloni nameme kutwalumbunukile, anga twatha kulikuta vuthamba na Yehova na kumupangela. Thimbu yoshe munapande kwanuka muvwashangumukilile vuthamba vweni na Yehova. Ikeye wamwene vuvwa kuli yeni, cho washakele mumuthzivuke. (Yowano 6:44) Wathzivukile ngwendi thimbu imo mwatha kulimbenja mwafwa muvakuthzeya cho mwakala na tupenga. Nameme ngocho, Yehova washakele ngwendi mupwe kavuthamba kendi.

⁷ Yehova watuthzemene manene, mukemwo watwanene vwana vwa kulitila. Watumine Munendi Yesu hano hathi mangana akwane mwonyo wendi kupwa ndando ya kutupatula. Nga tulinga vuvi, tunatha kulomba Yehova atuthambethe. Cho twakulahela ngwetu atuthambetha, cho lalo tutwalelelaho kupwa vavuthamba vendi mwafwa ya ndando ya kupatula. (Loma 7:24, 25; 1 Yowano 2:1, 2) Anukeni ngweni Yesu wathsililile vaka-vuvi vaje vatenguluka. Ngechi nameme tulithziva ngwetu tunalingi vuvi vwakama manene, kutwapandele kulikela kulomba Yehova atuthambethe. Nga kutumulombo atuthambethe, cho kunapu lika ngwe tuli na kuvyana kutana ku mavoko okuni kuli mathzilo. Twakandelela manene kuli Yehova omwo natutavetha kupwa vavuthamba vendi nameme kutwalumbunukile.—Tandeni 1 Timateo 1:15.

8. Mwafwa vika kutwapandele kwombwanetha tupenga twetu?

⁸ Kutwatha kwivala vuthzeye vwetu, nameme kuvushweka. Yehova natuleketha chifwa cha vanu vaje vanapande kulikuta nendi vuthamba. (Myatho 15:1-5) Ngechi nga tushaka kulikuta vuthamba nendi, cho tunapande kwetheka kumutembwinina na kutembwinina Munendi. Tunapande lalo kwechela mashungu amavi. Nameme tunambata thimbu yailaha kutunda havatumbwitikilile, oloni tunapande kutwalelelaho kutengulula vunu vwetu.—2 Kolinte 13:11.

9. Tuthzivuka vati ngwetu twatha kutwalelelaho kuthzala vunu vwavuha?

⁹ Kapositolo Paulu walekele vaka-Kilisitu ngwendi: “Ngechi vene, umbileni kuti vunu vweni vwa laja, vuje vwamilingithile ngechi muyoye ngwe muje mwayoyele, vunu vwalaja vuje vuya na kunyonga na mashungu avwo a makuli. Vimbunge vyeni na mana eni vinapande kupwa vyaviha, cho munapande [kutwalelelaho, NWT] kuthzala vunu vwavuha, vuje vuvanatanga mu chifwa cha Njambi, cho vunasholoka vukevwo vavenya mu mwonyo wa vuthunga uje wauvwa na kujela.” (Efeso 4:22-24) Echi chilumbununa ngwavo tunapande kupanga na ndthzili mangana tutenguluke na “kuthzala vunu vwavuha.” Ngechi nameme twapangela Yehova ha thimbu yailaha nambe yaindondo, twatha kulilongetha vyavingi ha vifwa vyendi. Mbimbiliya yatha kutukwatha tutwaleleleho kutengulula vunu vwetu mangana tumutembwinine.

MWAFWA VIKA KWAPWA KWAKUKALU?

10. Vika vitunapande kulinga mangana Lijwi lya Njambi litukwathe kutwalelelaho kutenguluka, cho vihula muka vitwatha kwihula?

¹⁰ Tuvavoshe tushaka kulinga viyendeka Mbimbiliya. Oloni nga tushaka kutwalelelaho kutenguluka, cho tunapande kupanga na ndthzili. Mwafwa vika tunapande kupanga na ndthzili? Yehova katha kutwathiwithila vyuma mangana tulinge lika vyavivwa ndi?

11-13. Mwafwa vika Njambi ashaka tupange na ndthzili mu kwechela tulingolingo twetu?

¹¹ Nga tutala vyuma vyoshe vyanatanga Yehova, tutava ngwetu ali na ndthzili ya kulinga vyuma vyoshe. Chakumwenako, natanga litangwa lije lyakala na ndthzili yakama manene. Mu sekondi na sekondi, litangwa likavwethzelelako ku cheke na kushaluka. Oloni ndthzili yaindondo ya litangwa ikeyo ikathiwitha kuyoya hano hathi. (Myatho 74:16; Isaya 40:26) Yehova akana vangamba vendi va hathi ndthzili nga vaitonda. (Isaya 40:29) Yehova ngwe nashaka, ngwe natwathiwithila vyuma mangana twechele tupenga twetu na kwechela mashungu amavi. Cho vika kalingilile ngocho?

¹² Yehova natwana ndthzili ya kulyangwila vitushaka. Natutavetha tulyangwile yetu vavenya kumwononoka, nameme kujeneka kumwononoka. Nga twangula kumwononoka na kulinga chithzango chendi, tumwetha ngwetu twamuthzema, cho tushaka kumuthzivitha kuvwaha. Satana akendeka ngwendi Yehova kapandele kuyula vanu. Oloni nga twononoka kuli Yehova, cho tumwetha ngwetu tushaka atuyule. Cho twakulahela ngwetu Tate yetu wa chithzemo akakandelela kulifwita kwetu ha kushaka kumwononoka. (Yombi 2:3-5; Vithimo 27:11) Nga twetheka kwechela tupenga twetu, nameme kulinga ngocho kethi kwakwathi, tupwa va kulongwa kuli Yehova, cho lalo tumwetha ngwetu tushaka atuyule.

¹³ Yehova ashaka tupange na ndthzili mangana tutembwinine vifwa vyendi. (Kolose 3:12; tandeni 2 Petulu 1:5-7.) Ashaka lalo ngwendi tupange na ndthzili mangana tutengulule vithinganyeka vyetu nomwo mutukalithzivila. (Loma 8:5; 12:9) Nga tulifwita na kutengululako vimo, tupwa va kuvwahelela manene.

TAVETHENI LIJWI LYA NJAMBI LITENGULULE KUYOYA KWENI

14, 15. Vika vitunapande kulinga mangana tukale na vifwa vyashaka Yehova? (Kengeni chipalo cha “Mbimbiliya na Kulombela Vyatengulwile Kuyoya Kwavo.”)

¹⁴ Vika vitunapande kulinga mangana tukale na vifwa vyashaka Yehova? Tunapande kutavetha Njambi atutwamenene, kutuvakana kulyangwila yetu vavenya vitushaka kutengulula. Ku Loma 12:2 ngwavo: “Kethi mulipwithe ngwe vanu va muno mu kaye, oloni echeleni Njambi atengulule viyongola vya mu vimbunge vyeni. Athinoni mukathzivuka cithzango cha Njambi, vije vyavivwa nevi vimuvwaheleletha nevi vya kuthungama.” Ngechi nga tushaka kuthzivuka vyashaka Yehova, cho tunapande kukulahela vyuma vyanatwana vije vitukwatha. Tunapande kutanda Mbimbiliya litangwa na litangwa na kuthinganyekethetha vitutanda na kulombela kuli Yehova atwane sipilitu yendi ya kujela. (Luka 11:13; Ngalatiya 5:22, 23) Nga tulingamo, Yehova atukwatha tuthzivuke vyuma vyashaka, cho lalo twatha kushangumuka kuthinganyeka mwakathinganyekela ikeye. Nga Yehova natukwatha, cho tuthinganyeka na kwendeka na kulinga vyuma vije vimuthzivitha kuvwaha, cho lalo tuthzivuka mwakwechelela tupenga twetu. Oloni nameme ngocho, tunapande kutwalelelaho kulifwita natwo.—Vithimo 4:23.

¹⁵ Oloni kethi kutanda lika Mbimbiliya. Tunapande lalo kulilongetha Mbimbiliya kupangetha mavulu etu a kufwa ngwe Kaposhi ka Kukengela na Toneni! Vilongetha vyavingi vyomu mu mangazini, vikatulongetha omwo twatha kutembwinina vifwa vya Yehova na mwakwechelela tupenga twetu. Tunatha kuwanamo vilongetha na vithoneka vije vyatha kutukwatha. Twatha kuthoneka awa mavesi na vilongetha mangana tuvitandetande thimbu yoshe.

16. Mwafwa vika kutwapandele kuthzeya nga tuli na kuwana vukalu vwa kwechela vilinga vimo?

¹⁶ Twatha kulilongetha kutembwinina vifwa vya Yehova kamandondo-kamandondo. Ngechi nga mulithziva ngweni munonwa kwechela vilinga vimo vimunashakele kwechela, kethi muthzeye. Hamo ha kulivanga, munapande kulithindiya yeni vavenya kulinga vyuma viyendeka Mbimbiliya. Oloni omwo mutwalelelaho kuthinganyeka na kulinga vyuma vyashaka Yehova, kumipwila kwakwathi kuthinganyeka mwakathinganyekela ikeye na kulinga vyavivwa.—Myatho 37:31; Vithimo 23:12; Ngalatiya 5:16, 17.

THINGANYEKENI VUVWA VUTUKAMONA KULUTWE

17. Nga tupwa va kulongwa kuli Yehova, vuvwa muka vutukawana kulutwe?

¹⁷ Tunavandamena thimbu ije itukapwa va kulumbunuka na kupangela Yehova haya myaka. Ha thimbu oyo kutembwinina Yehova kukapwa kwakwathi mwafwa kutukalipiki na tupenga. Oloni nameme ino thimbu twatha kulemetha Yehova mwafwa natwana vwana vwa ndando ya kupatula. Nameme kutwalumbunukile, twatha kumuthzivitha kuvwaha nga tutwalelelaho kupanga na ndthzili mu kutengulula vunu vwetu na kupangetha vyakatulongetha mu Mbimbiliya.

18, 19. Tuthzivuka vati ngwetu Mbimbiliya yatha kutukwatha tutwaleleleho kutengulula kuyoya kwetu?

¹⁸ Kevin wethekele mwathela mwoshe kwechela kuluvalaluvala. Wathinganyekele vyalilongethele mu Mbimbiliya, cho watengulwileko vyuma vimo mu kuyoya kwendi. Cho lalo walingile vivamunangwile vakwavo vaka-Kilisitu. Nameme Kevin katengulukile oho vene, oloni mu kwita kwa thimbu, wapwile muka-kupangela mu chikungulukilo. Cho lalo napu Mukulunu mu chikungulukilo ha myaka 20. Oloni nameme hano vene, Kevin athzivuka ngwendi napande kutwalelelaho kulipika na tupenga twendi.

¹⁹ Netu twatha kutwalelelaho kutengulula vunu vwetu ngwe Kevin. Nga tulinga ngocho, tutwalelelaho kukanyametha vuthamba vwetu na Yehova. (Myatho 25:14) Kutundoho, nga twetheka mutwathela mwoshe kulinga vyuma vyashaka, cho atukwatha kutengulula vunu vwetu. Twatha kukulahela ngwetu Mbimbiliya yatha kutukwatha tutwaleleleho kutengulula kuyoya kwetu.—Myatho 34:8.