Vihula Vya Kutunda Kuli Vaka-kutanda

Munalume wambatele chithoneketho na vanalume vatanu na umo vaje vambatele vitwa vya vuthunga vamwene Ezekiyele mu chimona vemanena veya?

Vemanena vanu va mwilu vaje vavapangethele mu kunyongetha Yelusalema, cho lalo vachikavapangetha mu kunyongetha kaye kakavi ka Satana ha ndthzita ya Alamangindone. Oku kunapu kuthzivithitha kwakuha. Vika twatengulwila kuthzivithitha kwetu?

Thimbu mwaka wa 607 B.C.E., kanda wete, Yehova wamwethele Ezekiyele chimona cha vyuma vikalingiwa mu Yelusalema thimbu kanda vainyongethe. Ezekiyele wamwene vilinga vyavingi vya kujwala vilingiwa. Cho wamwene lalo vanalume vatanu na umo vanambata umo na umo “chitwa chendi cha vuthunga.” Cho hakati kavo hakele munalume “wathzalele vuthzalo vwa linyu, wambatele chithoneketho.” (Ezekiyele 8:6-12; 9:2, 3) Ou munalume vamulekele aye na kwita mu nganda na “kwaka chithzivukitho ha luholo lwa munu na munu uje alinyenga, cho ali na vuthiwa, omwo a vyuma vya vunyengwe vije vili na kulingiwa mu nganda.” Cho vaje vanalume vatanu na umo vakwatele vitwa vavalekele vathsiye vanu va mu nganda vaje kuvakele na chithzivukitho. (Ezekiyele 9:4-7) Vika vitulilongetha omu mu chimona, cho uje munalume muka-chithoneketho ikeye iya?

Ezekiyele wamwene echi chimona mu 612 B.C.E. Ovu vupolofweto vwalishulithilile ha kulivanga munima ya myaka itanu omwo Yehova watavethele mashwalale va vaMbambilone vanyongethe Yelusalema. Yehova wapangethele vaMbambilone mu kunyanyametha vanu vendi va kujeneka kwononoka. (Njelemiya 25:9, 15-18) Oloni vika vyalingiwile kuli vaYunda vavavwa vaje kuvalikovelethele mu vilinga vya kujwala vivakele na kulinga mu nganda? Yehova wavovwele.

Mu chimona, Ezekiyele kethi ikeye vene wafundikile vanu vithzivukitho nambe kulikwatathana na vaka-kunyongetha nganda. Oloni tungelo vakevo vatwamenenene vaje vanyongethele Yelusalema. Ngechi ovu vupolofweto vutukwatha tuthzivuke vikalingiwa mwilu. Yehova walekele tungelo vendi vavwahethe vya kunyongetha vavavi na kuwana ngila ya kwovwelamo vavavwa.a

Ovu vupolofweto vukalishulithilila na kulutwe. Twakele na kuthzivithitha ngwetu uje munalume wambatele chithoneketho wemanenene vanu vakuvwavetha vaje vachili na kuyoya hano hathi. Twakele na kuthzivithitha lalo ngwetu vanu vaje vatambula muthzimbu utwambulula vavafundika chithzivukitho cha kukovoka. Oloni mu myaka inahu twamwene ngwetu tunapande kutengulula mutulumbunwinamo ovu vupolofweto. Ku mukanda wa Mateo 25:31-33, twalilongetha ngwetu chipangi cha kwakula vanu vavavwa ku vavavi chapwa cha Yesu. Akalinga ngocho kulutwe ha thimbu ya ñavava yakama. Ha thimbu oyo, vaje vavakakula ngwavo vimanga vakevo vakovoka, cho vaje vavakakula ngwavo vimembe vakanyonga.

Cho vika vitulilongetha mu chimona cha Ezekiyele? Tulilongethamo vyuma vitanu:

1. Thimbu kanda vanyongethe Yelusalema, Ezekiyele na Njelemiya na Isaya vakele na kunangula vanu vathzivuke vikalingiwa mu nganda. Vapwile ngwe vaka-kunyunga. Ano matangwa Yehova ali na kupangetha vanu vavandondo va kuvwavetha vanangule vakwavo thimbu kanda ñavava yakama ishangumuke. Cho lalo vanu va Njambi nambe ngwetu vangamba va Kilisitu vali na kulinga echi chipangi.—Mateo 24:45-47.

2. Ezekiyele kethi ikeye wangwile vaje vapandele kwovoka. Na vanu va Njambi matangwa ano kuvethi kulinga ngocho. Vakambulula lika na kuleka vakwavo vyuma vikalingiwa kulutwe. Cho tungelo vakevo vali na kutwamenena chipangi cha kwambulula mu kaye mwoshe.—Kujombolola 14:6.

3. Vaje vovokele mu thimbu ya Ezekiyele kuvakele na mifunda ya vithzivukitho ha maholo avo. Mukemwo na matangwa ano, vaje vakovoka kuvakakala na mifunda ya vithzivukitho. Vika vivanapande kulinga vanu mangana vakovoke mu ñavava yakama? Omwo vathzivuka vuthunga vanapande kulilongetha kutembwinina Kilisitu. Vanapande kulikundika kuli Njambi na kukwatha vandolome va Kilisitu mu chipangi cha kwambululula muthzimbu wauvwa. (Mateo 25:35-40) Ha thimbu ya ñavava yakama, vakavafundika chithzivukitho kulumbununa kuvangwila kukovoka.

4. Munalume nambata chithoneketho emanena Yesu. Ha thimbu ya ñavava yakama, Yesu akafundika vithzivukitho ha maholo a vaka-mbunga yakama omwo akavakula kupwa vimanga. Cho vakayoya myaka yoshe hano hathi.—Mateo 25:34, 46.b

5. Matangwa ano, vanalume vatanu na umo vaje vambatele vitwa vya vuthunga vemanena mashwalale va mwilu vaje vali na kutwamenena Yesu. Ololo vanyongetha kaye ka Satana na vuvi vwoshe.—Ezekiyele 10:2, 6, 7; Kujombolola 19:11-21.

Vyuma vitulilongetha mu chimona echi, vitulingitha tukulahele ngwetu Yehova kakanyongetha vanu vavavwa hamo lika na vanu vavavi. (2 Petulu 2:9; 3:9) Cho lalo vitwanukitha ngwavo chipangi chituli na kulinga ano matangwa cha kwambulula chapwa cha theho manene. Vanu voshe vanapande kuthzivuka vikalingiwa kulutwe thimbu mamanethelelo kanda aije.—Mateo 24:14.