Kethi Mwechelele Tupenga Twa Vakweni Tumithzeyethe

1, 2. Mbimbiliya yapolofwetele vati vya kulivwethzelela kwa vanu va Yehova?

HANO ha kaye hakala mbunga ya vanu vaje vathzema Yehova, cho vashaka kumupangela. Ovo vanu vapwa Vakaleho va Yehova. Nameme vakala na tupenga, cho lalo vakathevuka, oloni Yehova akavatwamenena na sipilitu yendi ya kujela. Tumoneni vingila vimo vyanavavethzikithilamo.

² Mu 1914, kwakele vanu vavandondo lika vaka-kulemetha Yehova. Oloni Yehova navethzikitha chipangi cha kwambulula. Echi chinalingitha vanu vavangi valilongethe vuthunga vwa mu Mbimbiliya na kupwa Vakaleho vendi. Yehova walumbunwine oku kulivwethzelela omwo wendekele ngwendi: “Nameme nanga yove yaindondo na kulikehetha, oloni vakapwa muyati wakama wa ndthzili. Omwo thimbu ikaija, yange Kalunga njikalinga vyuma evi vwathi vwathi.” (Isaya 60:22) Tuli na kulimwena kulishulithilila kwovu vupolofweto ano matangwa. Vanu va Yehova vanapu ngwe mbunga yakama. Nambala ya Vakaleho va Yehova yapwa yakama kutuvakana ya vanu vakala mu mafuti amengi muje mwakala lika vanu vavandondo.

3. Vangamba va Njambi vanamwetha vati chithzemo?

³ Muno mu matangwa a kukotoka, Yehova nakwatha vanu vendi valithzeme manene umo na mukwavo. “Njambi wapwa chithzemo,” cho vakamutembwinina. (1 Yowano 4:8) Yesu washikile vaka-kumukavangeya ngwendi vanapande “kulithzema umo na mukwavo.” Wavalekele lalo ngwendi: “Nga mulithzema umo na mukwavo, athinoni voshe vakathzivuka ngechi mu vandongethi vange.” (Yowano 13:34, 35) Mu myaka inahu, vangamba va Yehova vanamwetha chithzemo kuli umo na mukwavo, nameme mafuti akele na kulilwitha. Chakumwenako, mu ndthzita ya kaye ya muchivali, kwathsile vanu va kukokela ku 55 milyoni. Oloni na umo wayi ivathsiyile vangamba va Yehova omwo mu ndthzita. (Tandeni Mika 4:1, 3.) Echi chavalingitha vajeneke kukala na “mulonga” wa maninga a vanu.—Vilinga 20:26.

4. Mwafwa vika kulivwethzelela kwa vanu va Yehova kukomoketha?

⁴ Vangamba va Njambi vali na kulivwethzelela, nameme vali na chitothzi wa ndthzili, Satana. Wapwa “njambi uje wa vuvi wa kano kaye.” (2 Kolinte 4:4) Satana ikeye ali na kwendetha vimbunga vya vupolitiki vya muno mu kaye na mithzimbu, ngechi ali na kuvipangetha mangana onowethe chipangi cha kwambulula muthzimbu wauvwa. Oloni katha kwonowetha echi chipangi. Oloni Satana ali na kwetheka mwathela mwoshe mangana atwonowethe kulemetha Yehova, mwafwa athzivuka ngwendi nathala lika na kathimbu kakandondo.—Kujombolola 12:12.

MUTWALELELAHO KULONGWA NGA VAKWENI VATHEVUKA NDI?

5. Mwafwa vika thimbu imo vakwetu vanatha kututhzivitha kuvihya ku mbunge? (Kengeni chikupulo ha liputa 21 .)

⁵ Vangamba va Njambi vakalilongetha ngwavo kunapu kwa theho manene kuthzema Njambi na vakwavo vanu. Yesu wendekele ngwendi: “‘Thzema Shukulu Kalunga Njambi yove na mbunge yove yoshe, na mwonyo wove woshe, na mana ove oshe. Eli likelyo lishiko lyakama lya kulivanga. Cho lishiko lya mu chivali lalo lya kufwa ngwe eli ngwalyo, unapande kuthzema mukweni ngwe muwalithzema yove vavenya.’” (Mateo 22:35-39) Oloni Mbimbiliya yamwetha ngwavo vanu voshe kuvathungamene mwafwa ya vuvi vwa Andama. (Tandeni Loma 5:12, 19.) Mukemwo thimbu imo vakwetu va mu chikungulukilo vanatha kwendeka nambe kulinga vyuma vije vituthzivitha kuvihya ku mbunge. Vika vitulinga nga tuliwana mu vukalu vwa chifwa echi? Tutwalelelaho kuthzema Yehova ndi? Tutwalelelaho kulongwa kuli ikeye na kuli vanu vendi ndi? Mbimbiliya ituleka vya vangamba va Njambi vamo vaje vendekele nambe kulinga vyuma vije vyathzivithile vakwavo kuvihya ku mbunge. Tumoneni vitwatha kulilongetha ku vyuma vyalingiwile kuli ava vanu.

6. Eli wonowele vati kunangula vana vendi?

⁶ Chakumwenako, Eli wapwile kapilisitu wakama wa vaIsalele, oloni vana vendi vavali kuvononokele mashiko a Yehova. Mbimbiliya ngwayo: “Vana va Eli vapwile vanu vavavi manene. Kuvakele na lyova kuli Shukulu Kalunga.” (1 Samwele 2:12) Eli wathzivukile ngwendi vana vendi vakele na kulinga vyuma vyavivi manene. Oloni nameme ngocho, kavahithile. Mu kwita kwa thimbu, Yehova wanyanyamethele Eli na vana vendi vavali. Kushwa vene oho, katavethele vana va Eli kupwa tupilisitu. (1 Samwele 3:10-14) Ngwe neni kumwakele, cho mwathzivukile ngweni Eli watavethele vana vendi kulinga vyuma vyavivi, ngwe mwathzeyele ndi? Echi chuma ngwe chathzeyethele likulahelo lyeni kuli Yehova na kulikela kumupangela ndi?

7. Ndaviti walingile vuvi muka vwakama, cho Yehova walingile vati?

⁷ Ndaviti wakele na vifwa vyavivwa, mukemwo Yehova wamuthzemene manene. (1 Samwele 13:13, 14; Vilinga 13:22) Oloni Ndaviti nendi walingile vyuma vyavivi manene. Uliya mwaile ku ndthzita, Ndaviti walalele na munakathzi wa Uliya Mbateshemba, cho wemitile. Ndaviti kashakele ngwendi vanu vathzivuke vyanalingile. Ngechi wathenene Uliya mangana akulimone nendi, cho wamushongangeyeye kuya ku njuvo yendi. Ndaviti washakele ngwendi Uliya akalale na Mbateshemba, mangana vanu vathinganyeke ngwavo ikeye vavenya chikute. Oloni Uliya kaile ku njuvo yendi. Mukemwo Ndaviti wavwahethele ngwendi Uliya vamuthsiye ku ndthzita. Ndaviti na nanga yendi vayandele manene, mwafwa ya vuvi vwakama vwalingile. (2 Samwele 12:9-12) Oloni Yehova wamuthzivilile ngothzi, cho wamuthambethele. Wathzivukile ngwendi Ndaviti washakele kulinga vyavivwa. (1 Vimyene 9:4) Ngwe neni kumwakele, ngwe mwalithzivile vati ha chuma chalingile Ndaviti? Ngwe mwalikelele kupangela Yehova ndi?

8. (a) Kapositolo Petulu wonowele vati kulinga vyakulahethele? (b) Mwafwa vika Yehova wathambethele Petulu na kutwalelelaho kumupangetha nameme waviyithile?

⁸ Mwanja ukwavo unapu wa kapositolo Petulu. Yesu wamwangwile apwe kapositolo. Oloni thimbu imo, Petulu wendekele na kulinga vyuma vyavivi. Chakumwenako, Petulu wendekele ngwendi kakathethze Yesu, nameme vakwavo voshe vakamuthethza. (Mako 14:27-31, 50) Oloni Yesu muvamukutile, tupositolo voshe vatewele, hamo lika na Petulu. Cho Petulu wendekele lutatu ngwendi kathzivuka Yesu. (Mako 14:53, 54, 66-72) Oloni munima, Petulu walithzivile vuvi ha chuma chalingile. Mukemwo Yehova wamuthambethele na kutwalelelaho kumupangetha. Ngwe neni mwapwile ndongethi ha thimbu oyo, na kuthzivuka vyalingile Petulu, ngwe mwatwaleleleho kukulahela Yehova ndi?

9. Mwafwa vika mukulahela ngweni Yehova akakula mu kuthungama?

⁹ Eyi myanja imwetha ngwavo vangamba va Yehova vamo vanalingi vyuma vyavivi na kuthzivitha manene vakwavo kuvihya ku mbunge. Nga neni mumona vyuma vya kulifwa nevi, mulinga vati? Mulikela kuya ku viwano nameme kutengulukila Yehova na vanu vendi ndi? Mwanuka ngweni Yehova wakala na ngothzi cho lalo natha kwana munu thimbu ya kutenguluka ndi? Oloni thimbu imo vanu vamo vaje vakalingi vuvi vwakama kuvethi kumona ngwavo vanaviyitha. Mukulahela ngweni Yehova ali na kumona vili na kulingiwa, cho akalingaho chimo nga thimbu yeta ndi? Natha kutunditha vanu va kufwa ngocho mu chikungulukilo. Mutava ngweni Yehova atwalelelaho kulinga vyavivwa nevi vya kuthungama ndi?

TWALELENIHO KUPWA VA KULONGWA

10. Yesu walingile vati ha tupenga twa Yundasa Isikalyote na Petulu?

¹⁰ Mbimbiliya ituleka lalo vya vanu vavangi vaje vapwile va kulongwa kuli Yehova na kuli vanu vendi nameme vayoyele mukati ka vanu vaje valingile vuvi vwakama. Yesu ikeye napu mwanja wakama. Munima ya kulomba vukwathi kuli Ishe vuthsiki vwoshe, wangwile tupositolo va kupwa 12. Oloni umo wavo, Yundasa Isikalyote wamwendele vungungu. Kapositolo Petulu lalo nendi wendekele ngwendi kathzivukile Yesu. (Luka 6:12-16; 22:2-6, 31, 32) Yesu kanene Yehova mulonga nambe vandongethi vendi nameme vamo mukati kavo vamutengulukilile. Oloni watwaleleleho kulikwatathana na Ishe na kumupangela mu kulongwa. Mukemwo Yehova wavethzikithile Yesu ha kumuthangula, cho mu kwita kwa thimbu, wamupwithile Mwene wa Vumwene vwa mwilu.—Mateo 28:7, 18-20.

11. Mbimbiliya yapolofwetele vika kukundama ku vangamba va Yehova matangwa ano?

¹¹ Mwanja wa Yesu utulongetha kupwa va kulongwa kuli Yehova na kuli vanu vendi. Cho kuli vimo vitunapande kulingila ngocho. Tuli na kulimwena omwo Yehova ali na kutwamenena vanu vendi muno mu matangwa a kukotoka. Ali na kuvakwatha vambulule vuthunga mu kaye mwoshe, cho vakevo lika vali na kulinga echi chipangi. Cho lalo vapwa va kulikwatathana na kuvwahelela mwafwa ya vyuma vyali na kuvalongetha Yehova. Yehova walumbunwine echi chuma omwo wendekele ngwendi: Vangamba vange “vakaimba na kujolela.”—Isaya 65:14.

12. Tunapande kulinga vati nga kuli umo natuviyithila?

¹² Tunavwahelela mwafwa Yehova ali na kututwamenena na kutukwatha mu kulinga vyuma vyavivwa vyavingi. Oloni vanu vali muno mu kaye ka Satana kuvapwile va kuvwahelela, cho kuvethi na lilavelelo lya vyuma vya kulutwe. Ngechi munu kapandele kutengulukila Yehova na vanu vendi mwafwa lika ngwavo kuli umo mu chikungulukilo nalingi nambe kwendeka vyuma vyavivi. Oloni tunapande kutwalelelaho kupwa va kulongwa kuli Yehova na kukavangeya kutwamenena kwendi. Tunapande lalo kuthzivuka omwo tunapande kumwenamo tupenga twa vakwetu na mwakulingila.

MUNAPANDE KULINGA VATI?

13, 14. (a) Mwafwa vika kutwapandele kuluvala vwathi? (b) Chikulahetho muka chitunapande kwanuka?

¹³ Vika vimunapande kulinga nga ndolome yeni Endeka nambe kulinga chuma chije chimithzivitha kuvihya ku mbunge? Mbimbiliya yanangula ngwavo: “Kethi uluvale vwathi embwe, omwo vukalu vwakala mu vimbunge vya vilema.” (Muka-kwambulula 7:9) Tuvavoshe kutwathungamene, cho tukathevuka. Ngechi kutwapandele kukulahela ngwetu vandolome vetu vendeka na kulinga vyuma vyavivwa lika thimbu yoshe. Cho lalo kutwapandele kutwalelelaho kuthinganyeka ha tupenga twavo. Nga tulingamo, cho kutwatha kupangela Yehova mu kuvwahelela. Maneneni tunatha kuthzeyetha likulahelo lyetu, cho tunatha kutengulukila mbunga ya Yehova. Tulikela kupangela Yehova, cho lalo kutukala na lilavelelo lya kukayoya mu kaye kakaha.

¹⁴ Vika vyatha kumikwatha mutwaleleleho kupangela Yehova mu kuvwahelela nameme vakweni vamilinga mwamuvi? Thimbu yoshe anukeni chikulahetho chendi cha kuthzembeleka. Nakulahetha ngwendi: “Njitanga kaye kakaha na melu amaha. Vyuma vya laja vikahwa, cho vakavivala.” (Isaya 65:17; 2 Petulu 3:13) Nga mutwalelelaho kupwa va kulongwa kuli Yehova, cho akamyana evi vivethzikitho.

15. Yesu wendekele ngwendi tunapande kulinga vika nga vakwetu vatuviyithila?

¹⁵ Kanda tukovele mu kaye kakaha. Ngechi nga mukwetu natuviyithila, tunapande kuthinganyeka vyashaka Yehova ngwendi tuvilinge. Chakumwenako, Yesu wendekele ngwendi: “Nga muthambetha vakweni ku milonga yavo, Ishweni ali mwilu akamithambetha neni lalo. Oloni nga kumuthambetha vakweni ku milonga yavo, cho Ishweni lalo kakamithambetha ku milonga yeni.” Cho omwo Petulu wehwile Yesu nga tunapande kuthambetha “vithimbu vitanu na vivali,” Yesu wamukumbulwile ngwendi: “Kunjikuleka ngwange vithimbu vitanu na vivali embwe, oloni vithimbu makumi atanu na avali na vithimbu vitanu na vivali.” Yesu watulongethele ngwendi tunapande kuthambetha vakwetu thimbu yoshe.—Mateo 6:14, 15; 18:21, 22.

16. Yosefa watwakelele mwanja muka wauvwa?

¹⁶ Mwanja wa Yosefa utulongetha vitunapande kulinga nga vakwetu vanatuviyithila. Yosefa na shongo yendi vakevo lika vapwile vana va Yakomba va kukitila kuli Lakele. Yakomba wakele na vana vakwavo likumi, oloni wathzemene manene Yosefa kutuvakana vakwavo voshe. Vikevyo vyalingithile vandolome va Yosefa vamuthzivilile chipululu. Vamuthzindile manene, mukemwo vamulandethele mu vundungo, cho vamutwalele ku Ingito. Mukwetile myaka yaingi, mwene wa mu Ingito wangwile Yosefa apwe mwata wa ndthzili, mwafwa wathzemene manene vipangi vya Yosefa vyavivwa. Kukapwa muje, vandolome va Yosefa vaile ku Ingito kukalanda vyakulya, mwafwa ya njala ya lyangengela. Omwo vakawanene Yosefa, kuvamuthzivukile, oloni ikeye wavathzivukile. Nameme vandolome va Yosefa vamuyandethele, ikeye kavahithile. Oloni wavethekele mangana amone indi chili vene vanatenguluka. Omwo wanangukile ngwendi vanatenguluka, wavalekele ngwendi ikeye ndolome yavo, cho wavathzembelekele. Cho lalo wavathzembelekele ngwendi: “Kethi muthzive lyova embwe. Njikaminyunga hamo na vana veni vavandondo.”—Kushangumuka 50:21.

17. Mushaka kulinga vika nga vakweni vathevuka?

¹⁷ Anukeni ngweni neni munatha kuviyithila vakweni, mwafwa munu na munu wakala na kapenga kendi. Ngechi nga munanguka ngweni kuli umo imunaluvaletha, kavangeyeni viyanangula Mbimbiliya. Mulombeni amithambetha, cho ethekeni kukala nendi mu kwoloka. (Tandeni Mateo 5:23, 24.) Tukashaka ngwetu vakwetu vatuthambethe. Mukemwo netu tunapande kuthambetha vakwetu. Ku Kolose 3:13 vatuleka ngwavo: “Pweni vaka-kulimanena umo na mukwavo, cho lithambetheni umo na mukwavo nga umo weni ali na kulinyenga hali mukwavo. Munapande kulithambetha umo na mukwavo ngwe mwanamithambetha Mwene.” Nga twathzema vandolome vetu, cho kutwatha kutwalelelaho kuvaluvalela mwafwa ya chuma chivalingile kunima. (1 Kolinte 13:5) Cho nga tuthambetha vakwetu, netu Yehova atuthambetha. Ngechi, nga vakwetu vathevuka, tuvamwetheni ngothzi ngwe Tate yetu Yehova uje akatumwetha ngothzi.—Tandeni Myatho 103:12-14.