Nzita Ili mu Ukraine Inalingisa Byakulya mu Kaye Bikehe Manene

Lya May 19, 2022, Munga ya United Nations Security Council yatambwile mizimbu kutunda ku bantwama ba fulumende ba kutubakana 75. Ngwabo “byakulya binakehele laja mwafwa ya mushongo wa COVID-19 na lilanga, co nzita ili mu Ukraine inabilingisa bikehe manene. Ngeci, kunasa kukala njala yakama mu mitambela imo ya kaye.” Munima ya simbu yaindondo, Magazini ya The Economist yendekele ngwayo “nzita ilingisa banu babangi mu kaye muje muli laja bukalu bukwabo bwabwingi balanduke ku njala.” Mbimbiliya yapolofwetele bya kukeha kwa byakulya muno mu matangwa etu. Oloni itukwasa lalo tukolese.

Mbimbiliya yapolofwetele kukeha kwa byakulya

• Yesu wapolofwetele ngwendi: ‘Lifuti limo likalwa nzita na lifuti likwabo, co bumwene bukalwisa bumwene bukwabo. Byakulya bikapwa byabindondo.’—Mateo 24:7.

• Mukanda wa Kujombolola unendeka bya banalume bawana baje banalondo tubalu. Umo wabo emanena binzita. Co namukaba emanena njala. Emanena simbu ya kukeha kwa byakulya na kulonda kwa bindando byabyo. Mukanda ngwawo: ‘Njakengele, co kwakele kabalu wa kuzibala. Uje walondeleho wakwatele cipeseleso mu liboko lyendi. Co njazibile lijwi . . . ngwalyo, “Lita ya tiliku inapu ngwe fweto ya litangwa lyoshe lya mutunu, co lalo malita atatu a mbale ya maumwa anapu fweto ya litangwa lyoshe lya mutunu.”’—Kujombolola 6:5, 6.

Obu bupolofweto bwa mu Mbimbiliya bwendeka bya kukeha kwa byakulya buli na kulishulisilila muno mu simbu iinatumbula Mbimbiliya ngwayo “matangwa a kukotoka.” (2 Timateo 3:1) Nga mushaka kuzibuka byabingi ha “matangwa a kukotoka” na baka-kulonda tubalu bawana babanendeka ku mukanda wa Kujombolola, kengeni vidio ya mutwe wa Kaye Kanatenguluka Kushwa mu 1914 na kutanda ñanda ya mutwe wa “Baka-kulonda Tubalu Bawana Bemanena Bika?”

Mbimbiliya itukwasa bati?

• Mu Mbimbiliya muli binangulo byabibwa bije byasa kutukwasa kukolesa nga tuliwana na bukalu, kwambateselela na kulonda kwa bindando nambe kukeha kwa byakulya. Moneni byakumwenako mu ñanda ya mutwe wa “How to Live on Less.”

• Mbimbiliya itukwasa lalo kulabelela ngwetu byuma bikala mwamubwa kulutwe. Ngwayo kulutwe ‘tiliku ikapwa yaingi mu lifuti,’ co banu boshe bakakala na byakulya bya kupwamo. (Myaso 72:16) Nga mushaka kuzibuka byabingi ha bikulaheso bituwana mu Mbimbiliya nebi bimunapande kubikulahelela, tandeni ñanda ya mutwe wa “Bika Bitulingisa Tukale na Lilabelelo lya Byuma Byabibwa Kulutwe?”