Waneni Bukwasi ku Mulambu wa Yesu
Lumo ha mwaka, Bakaleho ba Yehova na banu babakalanya, bakalikungulwila hamo na kulinga Cilika ca kwanuka kutsa kwa Yesu ngwe mwashikilile. (Luka 22:19) Kulinga eci cilika kukatulingisa tumwese ngwetu twamona byuma byatulingilile Yesu kupwa bya seho omwo wanene mwonyo wendi kupwa mulambu. Kukatukwasa lalo kumona byuma byabibwa bituwana mwafwa ya mulambu wa Yesu ha simbu ino na kulutwe.—Iwano 3:16.
Nameme kumunakele ku Canukiso uno mwaka nambe embwe, mwasa kuwana bati bukwasi ku mulambu wa Yesu? Yesu wendekele ngwendi tunapande kulinga byuma bibali bya seho:
1. Tunapande kulilongesa bya Njambi na Yesu. Yesu mwalombelele kuli Ishe wendekele ngwendi: “Baje bakawana kuyoya kwa myaka yoshe banapande kutwalelelaho kuzibuka yobe Njambi umolika wa busunga na kuzibuka uje iwatumine, Yesu Kristu.”—Iwano 17:3.
2. Tunapande kupangesa bituli na kulilongesa. Yesu wendekele ngwendi tunapande kupangesa bilongesa byendi mu kuyoya kwetu. Cakumwenako, omwo wakele na kubunda Ñanda ya ha Munkinda washangalele woshe uje ‘aziba majwi endi na kuwakabangeya.’ (Luka 6:46-48) Simbu imo lalo wendekele ngwendi: “Nga mwazibuka ebi byuma, mubwahelela nga mubilinga.”—Iwano 13:17.
Kuma mushaka kuzibuka byabingi hali Njambi na Yesu ndi? Kuma mushaka kuzibuka mwakupangesela bimuli na kulilongesa ndi? Byuma binatako byasa kumikwasa.
Kulilongesa Mbimbiliya
Bilongesa bya Mbimbiliya bitukakala nabyo na banu kwa kujeneka kufweta binakwasa banu babangi kumona biyendeka Mbimbiliya na kubipangesa.
Yeni ha webusaiti yetu Bakaleho ba Yehova ha mutamba wa Bilongesa bya mu Mbimbiliya mangana muzibe byabingi.
Kengeni vidio ya Twamitambula ku Cilongesa ca Mbimbiliya mangana mumone mubakalilongesela Mbimbiliya Bakaleho ba Yehova na banu.
Biwano bya Bakaleho ba Yehova
Bakaleho ba Yehova bakakunguluka lubali calumingo na calumingo ku myela ibatumbula ngwabo Njibo ya Bumwene. Oku ku biwano, tukasimutwiya biñanda bya mu Mbimbiliya nomu mutwasa kubipangesela mu kuyoya kwetu.
Ebi biwano binapu bya banu boshe, keti ngwabo kubanga mupwe Bakaleho ba Yehova asina mwasa kukunguluka oku ku biwano. Kwesekesa nomu mubinafwila byuma, mwasa kuya bene ku Njibo ya Bumwene nambe kukungulukila ha makina.
Kengeni vidio ya Bika Bikalingiwa ku Njibo ya Bumwene? mangana mumone mubikendela biwano bya Bakaleho ba Yehova.
Nga mushaka kuzibuka kumwasa kukungulukila hayehi neni, yeni ha webusaiti yetu ha mutamba wa Biwano bya cikungulukilo bya Bakaleho ba Yehova.
Mavidio na biñanda bya ha webusaiti
Mavidio na biñanda byabingi bili ha webusaiti yetu byasa kumikwasa mulilongese byabingi ha bilongesa bya Yesu na bubwa butuwana mwafwa ya kwana mwonyo wendi kupwa mulambu.
Cakumwenako, nga mushaka kuzibuka omwo kutsa kwa munu umolika kunakwasela banu babangi, tandeni ñanda ya “Yesu Atwobola Bati?” na ya “Vika Yesu Vyayandelele na Kuthsa?” nambe kukenga vidio ya Bika Byatsililile Yesu?