Kuma Kuli Fulumende Yasa Kuyula Mwamubwa Lino Lifuti-libu Ndi?—Bika Biyendeka Mbimbiliya?

Bifulumende mu kaye koshe bili na kuliwana na bukalu bwa kutenguluka kwa byuma. Nameme mu mafuti aje ali na kumoneka ngwe ali mu kwoloka, bifulumende bili na kuliwana na bukalu bwa kubalwisa ku bibunga bikwabo bya bupolitiki na baka-kutengulukila fulumende.

Mbimbiliya imwesa ngwayo kuli fulumende imo yaibwa. Co mwazibaho laja byei fulumende. Yesu Kristu wendekele byei fulumende mu lilombelo.

• “Munapande kulombela ngweni: ‘Tate yetu uli mwilu, lizina lyobe balijelese. Bumwene bwobe bwije. Cizango cobe cilingiwe hano hasi ngwe mucili na kulingiwa mwilu.’”—Mateo 6:9, 10.

Bika biyendeka Mbimbiliya hali obu Bumwene?

Obu Bumwene bunapu fulumende yaibwa

Obu Bumwene buli na kuyula mwilu.

• Yesu watumbwile ei fulumende ngwendi “Bumwene bwa mwilu.” (Mateo 4:17; 5:3, 10, 19, 20) Mukemwo wendekele ngwendi: “Bumwene bwange keti bwa muno mu kaye.”—Iwano 18:36.

Obu Bumwene bukenga bifulumende byoshe bya banu.

• Mbimbiliya ngwayo: “Obwo Bumwene . . . Bukatika na kunyongesa bumwene bwoshe obu, co bukebwo lika bukakalako myaka yoshe.”—Daniele 2:44.

Obu Bumwene bwakayula Yesu kubakabunyongesa.

• Mbimbiliya ngwayo: “Ciyulo cendi capwa ciyulo ca myaka yoshe cije kucikahu, co bumwene bwendi kubakabunyongesa.”—Daniele 7:13, 14.

Obu Bumwene bukanena kwoloka, kumukakala bushonde.

• Mbimbiliya ngwayo: “Umo na umo wabo akatumama mwisi ya muti wendi wa binyu na mwisi ya muti wendi wa mukuyu, Co naumo wahi akabazibisa lyoba.”—Mika 4:4.

Lilongeseni byabingi hali obu Bumwene

Yesu mwakele hano hasi wapangesele simbu yendi mu “kwambulula muzimbu waubwa wa Bumwene.” (Mateo 9:35) Wapolofwetele lalo ngwendi:

• “Co ou muzimbu waubwa wa Bumwene bakawambulula hasi hoshe, mangana upwe bukaleho ku mafuti oshe asinoni mamaneselelo akaija.”—Mateo 24:14.

Ano matangwa ou muzimbu waubwa wa Bumwene bwa Njambi bali na kuwambulula mu mafuti a kutubakana 240. Tulinakumilanya ngetu mulilongese byabingi hali ei fulumende na bubwa bumuwanamo.

Tumilomba mukenge vidio Bumwene bwa Njambi bwapwa buka?