Kuma Bumwene bwa Njambi Buli mu Mbunge Yeni Ndi?
Biyendeka Mbimbiliya
Embwe. Bumwene bwa Njambi kubwakele mu bimbunge bya baka-Kristu.a Mbimbiliya inamwesa kubwakala obu Bumwene muinabutumbula ngwayo “Bumwene bwa mwilu.” (Mateo 4:17) Tumoneni omwo Mbimbiliya inamwesela ngwayo Bumwene bwa Njambi bwapwa fulumende mpundu ije ili na kuyula mwilu.
Bumwene bwa Njambi buli na baka-kuyula, banu babukayula, mashiko, na cipangi ca kulingisa cizango ca Njambi cilingiwe mwilu na hano hasi.—Mateo 6:10; Kujombolola 5:10.
Bumwene bwa Njambi nambe ngwetu fulumende yendi ikayula “banu ba ku mafuti oshe na miyati yoshe ya banu na banu baka-kwendeka mu bindaka” bya kuliseza-seza. (Ndanyele 7:13, 14) Nzili yayo ya kuyula kuitundu ku banu baikayula, oloni itunda kuli Njambi.—Myaso 2:4-6; Isaya 9:7.
Yesu walekele tupositolo bendi ba kulongwa ngwendi bakayula hamo nendi mu Bumwene bwa mwilu na ‘kutumbama ha matanda.’—Luka 22:28, 30.
Obu Bumwene bwakala na bitozi baje babukanyongesa.—Myaso 2:1, 2, 8, 9; 110:1, 2; 1 Kolinte 15:25, 26.
Mbimbiliya kuimwesa ngwayo Bumwene bwa mwilu bwakala mu mbunge ya munu na kuyulilamo embwe. Nameme ngoco, imwesa ngwayo ‘majwi a Bumwene’ nambe ngwetu ‘muzimbu waubwa wa Bumwene’ unapande kutweta ku bimbunge.—Mateo 13:19; 24:14.
Majwi a kwendeka ngwawo “bumwene bwa Njambi buli mukati keni” alumbununa bika?
Mubananungulwila mukanda wa Luka 17:21 mu Bimbimbiliya bimo kunalingisa banu bamo bajeneke kuzibuka mwamubwa kubuli Bumwene bwa Njambi. Cakumwenako, Mbimbilliya ya King James Version ngwayo “bumwene bwa Njambi buli mukati keni.” Ha kulinga tuzibisise mwamubwa ei vesi, tunapande kuzibuka byakele na kulingiwa ha simbu ibendekele awa majwi.
Bumwene bwa Njambi kubwakele mu bimbunge bya bitozi ba Yesu baje bakele na bimbunge bya kuminina, na bukenya
Yesu wakele na kusimutwiya na Bafaliseo, baje bapwile cibunga ca bantwama ba bulombelo baje bakele na kumulwisa, co balikwatasanene na bakwabo mu kubwahesa ngwabo bamutsiye. (Mateo 12:14; Luka 17:20) Kuma kunapande kusinganyeka ngwetu Bumwene bwa Njambi bwakele mu bimbunge byabo bya kuminina ndi? Yesu wabalekele ngwendi: “mu bimbunge byeni munashulu na cibembulu na bubi.”—Mateo 23:27, 28.
Bimbimbiliya bimo binamwesa mwamubwa biwalumbununa majwi a Yesu ali ku mukanda wa Luka 17:21. Mbimbiliya ya Contemporary English Version ngwayo: “Bumwene bwa Njambi buli neni.” Co Mbimbiliya ya Libulu lya Shukulu Kalunga ngwayo: “Bumwene bwa Njambi muli nabwo hakati keni.” Bumwene bwa mwilu bwakele na Bafaliseo nambe “hakati” kabo mwafwa Yesu uje yanangula Njambi kupwa Mwene wakele hakati kabo.—Luka 1:32, 33.
a Mu biceci byabingi bakalongesa ngwabo Bumwene bwa Njambi bwakala mu mbunge ya munu. Cakumwenako, ceci ya Southern Baptist Convention ya mu America yendekele ngwayo Bumwene bwa Njambi buli na “kuyula mu mbunge na mu buyoye bwa munu.” Co lalo Popu Benedict XVI wasonekele mu libulu lyendi lya Jesus of Nazareth, ngwendi “Bumwene bwa Njambi bukayulu mu mbunge ya munu uje ononoka Njambi.”