Kuma Njambi Wakala Kwoshe-Kwoshe Ndi?
Biyendeka Mbimbiliya
Njambi akamono byuma byoshe, co lalo asa kulinga byoshe byashaka kwoshe-kwoshe kwanangula. (Visimo 15:3; Vahevelu 4:13) Oloni Mbimbiliya kuimwesa ngwayo Njambi wakala kwoshe-kwoshe nambe mu byuma byoshe. Imwesa ngwayo Njambi wapwa ngwe munu hendi, co wakala na mutambela kwakala.
Njambi wafwa bati? Njambi kakele na mubila wa situ. (Yowano 4:24) Ngeci, banu kubasa kumumona. (Yowano 1:18) Bimona bibanasoneka mu Mbimbiliya bimwesa ngwabyo Njambi wakala na mutambela kwakala. Kubimwesa ngwabyo wakala kwoshe-kwoshe.—Isaya 6:1, 2; Kujombolola 4:2, 3, 8.
Njambi wakala kuli? Njambi wakala mu mutambela wa “mwilu,” kuje kubasa kumona banu. (1 Vimyene 8:30) Mbimbiliya ngwayo simbu imo tungelo baile na “kulisholola ku mesho a Shukulu Kalunga.” Awa majwi amwesa ngwawo Njambi wakala na mutambela umo kwakala.—Yombi 1:6.
Nga Njambi kakele kwoshe-kwoshe, kuma asa kunjaka mbunge ndi?
Eyo. Njambi waka mbunge umo na umo wetu. Nameme wakala mwilu, akamono banu baje bashaka kumuzibisa kubwaha, co akabakwasa. (1 Vimyene 8:39; 2 Mizimbu 16:9) Tusimutwiyeni mwakamwesela Yehova ngwendi waka mbunge bangamba bendi:
Nga mulombela: Yehova asa kuziba lilombelo lyeni ha simbu oyo bene imulombela.—2 Mizimbu 18:31.
Nga munombwa: ‘Yehova ali muyehi na baje banazeye mu bimbunge, co amena baje banombwa.’—Myaso 34:18.
Nga kumuzibuka mwamubwa byakulinga: Yehova ‘amilongesa na kuminangula’ kupangesa Lijwi lyendi Mbimbiliya.—Myaso 32:8.
Biyongola bya kuhenga bije bimwesa ngwe Njambi wakala kwoshe-kwoshe
Biyongola bya kuhenga: Njambi wakala mu byuma byoshe bya kutanga.
Busunga: Njambi kakele hano hasi nambe mu cuma coshe-coshe citwasa kumona. (1 Vimyene 8:27) Bingongonosi na byuma bikwabo bya kutanga bili na kwambulula “bumpau bwa Njambi.” (Myaso 19:1) Nameme ngoco, Njambi kakele mu byuma byanatanga ngwe mwa muka-kusona uje kasa kukala mu cuma canasono. Oloni cuma ca kusona casa kutukwasa kuzibukako bimo hali owo nacisono. Mu ngila imolika, byuma byanatanga Njambi bije bitwasa kumona, bitukwasa kuzibuka “bifwa byendi bije kutwasa kumona,” bya kufwa ngwe nzili yendi, mana endi na cizemo cendi.—Loma 1:20.
Biyongola bya kuhenga: Njambi napande kukala kwoshe-kwoshe asina asa kuzibuka byuma byoshe na kupwa muka-nzili yoshe.
Busunga: Sipilitu ya Njambi ya kujela, ikeyo nzili yendi yakapangesa mu kulinga byuma. Njambi asa kupangesa sipilitu yendi ya kujela mu kuzibuka nambe kulinga byuma bimo ha simbu yoshe-yoshe, ku mutambela woshe-woshe nameme ikeye wahiko.—Myaso 139:7.
Biyongola bya kuhenga: Mukanda wa Myaso 139:8 uje wendeka ngwawo: “Nga njilonda mwilu, nobe muuli, nga njilala mu bukalo bwa batsi, nobe muuli,” umwesa ngwawo Njambi wakala kwoshe-kwoshe.
Busunga: Eci cisoneka kucendeka bya mutambela kwakala Njambi. Citukwasa kuzibuka ngwetu Njambi asa kutukwasa kwoshe-kwoshe kutuli, nameme kupwe kulako bati.