Bakaleho ba Yehova Bamona Bati Kutsiya Bulo?

Tukakabangeya binangulo bya mu Mbimbiliya bije byendeka ha bulo. Njambi wabwahesele ngwendi munalume na munakazi baje bali mu bulo batwaleleleho kukala hamo ku myaka yoshe. Mbimbiliya inatabesa lika kutsiya bulo nga umo wabo alinga bupangala.—Mateu 19:5, 6, 9.

Kuma Bakaleho bakakwasa baje bali na kuliwana na bukalu mu bulo ndi?

Eyo, bakalingi ngoco mu bingila bya kuliseza-seza

• Mabulu. Biñanda bibakasoneka kushwa kumo omu mu mabulu bikakanyamesa malo a banu nameme aje ashaka kutsa. Cakumwenako, taleni ñanda ya mutwe wa “Twaleleleniho Kupwa ba Kulongwa mu Bulo” na ya “Byuma Byasa Kutukwasa Tukonekele Itunalyambata Nendi,” na ya “Byuma Bitukwasa Tukulahele Lalo Munu Itunalyambata Nendi.”

• Biwano. Ku biwano byetu bya cikungulukilo na biwano bya citingitingi na biwano bya mutambela, tukalilongesa binangulo bya mu Mbimbiliya bije byasa kukwasa baje bali mu bulo.

• Bakulunu mu Cikungulukilo. Bakulunu mu Cikungulukilo bakendela na kukwasa baje bali mu bulo mangana bapangese bisoneka bya kufwa ngwe Efeso 5:22-25.

Kuma Bakulunu mu Cikungulukilo bakebo banapande kutabesa ngwabo mukaleho atsiye bulo ndi?

Embwe. Nameme bakulunu bakakwasa baje bali na kuliwana na bukalu mu bulo, kubesi na moko ya kubaleka byakulinga. (Galatiya 6:5) Oloni munu uje angula kutsiya bulo kwa kujeneka mulonga wa bupangala, kazitukile kwambata nambe kushomboka.—1 Timothi 3:1, 5, 12.

Bakaleho bamona bati kulitepa?

Mbimbiliya ishongangeya baje banalyambata kukala hamo nameme nga byuma kubyesi mwamubwa mu bulo bwabo. (1 Korinte 7:10-16) Bukalu mu bulo bwasa kuhwa kwitila mu kulombela kutundilila kwisi ya mbunge na kupangesa binangulo bya mu Mbimbiliya na kulimwesa cizemo.—1 Korinte 13:4-8; Galatiya 5:22.

Oloni baka-Kristu bakangula kulitepa na munu ibanalyambata nendi nga kusholoka bukalu bwakama bunatako:

• Nga munalume kashakele kukwasa naanga yendi.—1 Timothi 5:8.

• Nga kuli lwozi kushwa kumo.—Bisamu 11:5.

• Nga munu yanalyambata nendi amubindika kulinga byuma bya ku sipilitu. Cakumwenako, nga munu yanalyambata nendi amusindiya kupokola mashiko a Njambi, co asa kwangula kulitepa nendi mwafwa ikeyo lika ngila yasa “kwononoka Njambi ha kupwa ikeye muka-kuyula kutubakana kwononoka banu.”—Bilinga 5:29.