Yesu akobela mu Yelusalema ha cimulu mu ngila ya kuhyana

Kuma Bupolofweto Buje Bwendekele bya Mesiya Bumwesa Ngwabwo Yesu Ikeye Mesiya Ndi?

Biyendeka Mbimbiliya

Eyo. Yesu mwezile hano hasi wakushulisilile bupolofweto bwabwingi buje bwendekele bya Mesiya, uje napu “Ntwama,” co lalo ‘Muyoyesi wa kaye.’ (Ndanyele 9:25; 1 Yowano 4:14) Co nameme munima ya kutsa kwendi, Yesu watwaleleleleho kushulisilila bupolofweto buje bwendekele bya Mesiya.—Myaso 110:1; Vilinga 2:34-36.

Lijwi lya Mesiya lilumbununa bika?

Lijwi lya Cihebelu lya Ma·shiʹach (Mesiya) na lijwi lya Cigriki lya Khri·stos (Kilistu) oshe alumbununa “Wakubwabesa.”Ngeci, endekesi ya “Yesu Kilistu” ilumbununa “Yesu wa Kubwabesa” nambe “Yesu Mesiya.”

Ha simbu ibakele na kusoneka Mbimbiliya, munu bamubwabesele na mazi nga bamwana cipangi cimo ca kulitila nambe moko. Bamwitilile owo mazi ha mutwe. (Valevi 8:12; 1 Samwele 16:13) Njambi ikeye wangwile Yesu kupwa Mesiya. Co ali na moko yakama. (Vilinga 2:36) Oloni Njambi kabwabesele Yesu na mazi, wamubwabesele na sipilitu ya kujela.—Mateo 3:16.

Kuma banu babangi basele kushulisilila bupolofweto buje bwendekele bya Mesiya ndi?

Embwe. Bupolofweto bwoshe bunalishulisilila buje bwendeka bya Mesiya nambe Kilistu bunatalesa lika ku munu umo. Nameme ngoco, Mbimbiliya inatunangula ngwayo ‘kukasholoka Bakilistu ba makuli na tupolofweto ba makuli baje bakamwesa bizibukiso na bikomokeso byakama mangana bakatangule nameme baje banangula Njambi nga citaba.’—Mateo 24:24.

Kuma Mesiya wapandele kusholoka simbu yeka kulutwe ndi?

Embwe. Mbimbiliya yamwesele ngwayo Mesiya akapwa mutekulwila wa Ndabiti, mwene wa Isalele. (Myaso 89:3, 4) Oloni biñanda bya kusañulu bya Bayunda bije bimwesa bya cikota ca Ndabiti byahi. Cisholoka ngwe byanyongele omwo Baloma bafungulwile Yelusalema mu 70 C.E.a Ngeci, banu kunabakaluwila kuwana bukaleho buje bumwesa ngwabwo Yesu wapwile wa mu naanga ya bumwene ya Ndabiti. Oloni mu simbu ya Yesu, ebi biñanda kubyakele. Co wahi wasele kubyana ngwendi wapwile wa mu cikota ca Ndabiti. Nameme bitozi bendi kubasele kulinga ngoco.—Mateo 22:41-46.

Bupolofweto bungahi buli mu Mbimbiliya buje bwendeka bya Mesiya?

Kutwasa kuwana mwamubwa nambala ya bupolofweto bwoshe bwendeka bya Mesiya. Nambala yobu bupolofweto inasa kuliseza nameme ha bupolofweto buje bulimonekela bene ngwabo bwendeka bya Mesiya. Cakumwenako, ku mukanda wa Isaya 53:2-7 kuli bupolofweto bwa kuliseza-seza bwendeka bya Mesiya. Bamo banasa kumona obu bupolofweto kupwa bumolika, bamoco banasa kubumona ngwabo bwabwingi.

Bupolofweto bumo bwashulisilile Yesu buje bwendekele bya Mesiya

Bupolofweto	Mukanda kubuwaniwa	Kulishulisilila
Mutekulwila wa Abilahama	Kushangumuka 22:17, 18	Mateo 1:1
Mutekulwila wa Isake muna Abilahama	Kushangumuka 17:19	Mateo 1:2
Akasemukila mu muyati wa Yunda	Kushangumuka 49:10	Mateo 1:1, 3
Akasemukila mu cikota ca bumwene bwa Mwene Ndabiti	Isaya 9:7	Mateo 1:1
Akasemuka kuli mumbanda uje kanda alilaleho na munalume	Isaya 7:14	Mateo 1:18, 22, 23
Akasemukila mu Mbetelehema	Mika 5:2	Mateo 2:1, 5, 6
Bakamuluka ngwabo Manuweleb	Isaya 7:14	Mateo 1:21-23
Akasemukila mu naanga ya kuhutwa	Isaya 53:2	Luka 2:7
Banike babandondo bakabatsiya munima ya kusemuka kwendi	Njelemiya 31:15	Mateo 2:16-18
Bakamutundisa mu Ingito	Hoziya 11:1	Mateo 2:13-15
Bakamutumbula ngwabo muka-Nazaletac	Isaya 11:1	Mateo 2:23
Kukakala muluwa akalibanga kulutwe lwendi	Malakiya 3:1	Mateo 11:7-10
Bakamubwabesa na kupwa Mesiya mu 29 C.E.d	Ndanyele 9:25	Mateo 3:13-17
Njambi akamutumbula ngwendi Munendi	Myaso 2:7	Vilinga 13:33, 34
Akazema manene njibo ya Njambi	Myaso 69:9	Yowano 2:13-17
Akambulula muzimbu waubwa	Isaya 61:1	Luka 4:16-21
Akatwa ceke cakama omwo akambulwila mu Ngalileya	Isaya 9:1, 2	Mateo 4:13-16
Akalinga bikomokeso ngwe Mosesa	Kwituluka mu Mashiko 18:15	Vilinga 2:22
Ngwe mwa Mosesa, nendi akendeka biyongola bya Njambi	Kwituluka mu Mashiko 18:18, 19	Yowano 12:49
Akakangwisa banu babangi	Isaya 53:4	Mateo 8:16, 17
Kakalijundula	Isaya 42:2	Mateo 12:17, 19
Akazibila mema ku mbunge baje bayanda	Isaya 42:3	Mateo 12:9-20; Mako 6:34
Akamwesa ngwendi Njambi akakula mu busunga	Isaya 42:1, 4	Mateo 12:17-20
Muka-kunangula wamubwa	Isaya 9:6, 7	Yowano 6:68
Akambulula bya lizina lya Yehova	Myaso 22:22	Yowano 17:6
Akapangesa byakumwenako	Myaso 78:2	Mateo 13:34, 35
Ntwama	Ndanyele 9:25	Mateo 23:10
Banu babangi kubakakulahela muli ikeye	Isaya 53:1	Yowano 12:37, 38
Limanya lya kutanwisa banu	Isaya 8:14, 15	Mateo 21:42-44
Banu bakamubyana	Myaso 118:22, 23	Vilinga 4:10, 11
Bakamuzinda kwa kujeneka mulonga	Myaso 69:4	Yowano 15:24, 25
Akakobela mu Yelusalema mu ngila ya kuhyana oku ali ha cimulu	Zakaliya 9:9	Mateo 21:4-9
Banike bakamushangazala	Myaso 8:2	Mateo 21:15, 16
Akaija mu lizina lya Yehova	Myaso 118:26	Yowano 12:12, 13
Kabusamba kendi yakulahela akamwenda bungungu	Myaso 41:9	Yowano 13:18
Bakamwenda bungungu na mabundungulu 30 a silivae	Zakaliya 11:12, 13	Mateo 26:14-16; 27:3-10
Babusamba bendi bakamuyengula	Zakaliya 13:7	Mateo 26:31, 56
Bakaleho ba makuli bakamubangeya biñanda	Myaso 35:11	Mateo 26:59-61
Akoloka kulu omwo bakamukutiiya milonga	Isaya 53:7	Mateo 27:12-14
Bakamujekwila mate	Isaya 50:6	Mateo 26:67; 27:27, 30
Bakamupupa ku mutwe	Mika 5:1	Mako 15:19
Bakamupupa makote	Isaya 50:6	Yowano 19:1
Kakalwisi bakamupupa	Isaya 50:6	Yowano 18:22, 23
Bantwama ba fulumende bakalizibasana kumulinga mwamubi	Myaso 2:2	Luka 23:10-12
Bakamupameya ha citi mu maboko na ku mendi	Myaso 22:16	Mateo 27:35; Yowano 20:25
Bakatela bizalo byendi ñela	Myaso 22:18	Yowano 19:23, 24
Bakamutandela ku baka-bubi	Isaya 53:12	Mateo 27:38
Bakamushaula na kumutuka	Myaso 22:7, 8	Mateo 27:39-43
Akayandela baka-bubi	Isaya 53:5, 6	1 Petulu 2:23-25
Akamoneka ngwe Njambi namuyengula	Myaso 22:1	Mako 15:34
Bakamwana binyu bya kukumbasana na nyanga ngwabo anwe	Myaso 69:21	Mateo 27:34
Akatsa lihwila simbu kanda atse	Myaso 22:15	Yowano 19:28, 29
Akakundika sipilitu yendi mu maboko a Njambi	Myaso 31:5	Luka 23:46
Akana mwonyo wendi	Isaya 53:12	Mako 15:37
Akana ndando ya kupatula banu ku bubi	Isaya 53:12	Mateo 20:28
Bitsiya byendi kubakabipokola	Myaso 34:20	Yowano 19:31-33, 36
Bakamutiba	Zakaliya 12:10	Yowano 19:33-35, 37
Bakamutsinda na baka-kufuka	Isaya 53:9	Mateo 27:57-60
Bakamusangula ku batsi	Myaso 16:10	Vilinga 2:29-31
Akamwenda bungungu bakamwinga	Myaso 109:8	Vilinga 1:15-20
Njambi akamwaka ku liboko lyendi lya cilyo	Myaso 110:1	Vilinga 2:34-36

a Libulu lya McClintock and Strong’s Cyclopedia ngwalyo: “Kuli bukaleho bumwesa ngwabwo mabulu mubasonekele bikota na binaanga bya Bayunda anyongele ha simbu ibanyongesele Yelusalema, keti simbu kanda bainyongese.”

b Lizina lya Cihebelu lya Manuwele lilumbununa ngwabo “Njambi Ali Netu,” co limwesa mwamubwa cipangi ca Yesu ha kupwa Mesiya. Kukala kwendi hano hasi hamolika na bipangi byapangele byamwesele ngwabyo Njambi ali hamo na bangamba bendi.—Luka 2:27-32; 7:12-16.

c Cisholoka lijwi lya “Nazaleta” lyatunda ha lijwi lya Cihebelu lya neʹtser lije lilumbununa ‘kujobelela.’

d Nga mushaka kuzibuka byabingi ha kulikaba kwa byuma kunena mu mwaka wa 29 C.E uje wapwile mwaka wapandele kusholoka Mesiya, taleni ñanda yamucibali ku Biñanda bya Kushongo mu libulu lya Likuweni Kuyoya Myaka Yoshe! ije ili na mutwe wa “Mesiya Wapandele Kwija Mwaka Uka?”

e Nameme obu bupolofweto buli ku mukanda wa Zakaliya, Mateo wendekele ngwendi babwendekele kwitila muli kapolofweto Njelemiya. (Mateo 27:9) Cisholoka bisimbu bimo bakele na kushangumukila mukanda wa Njelemiya mu mutamba wa Bisoneka ubatumbula ngwabo “Tupolofweto.” (Luka 24:44) Co cisholoka ngwe Mateo mwatumbwile “Njelemiya,” walumbunwine mutamba woshe wei mikanda ije yambateselele na mukanda wa Zakaliya.