“Hano Njinalikele Bukenya”

BUYOYE BWANGE BWA KUNIMA

Njasemukilile mu nganda ya Calgary mu Alberta, mu Canada. Munjapwile mbututu, bulo bwa bisemi bange bwatsile, co nange na banana twajalukilile kuli bakuku. Bakuku batuzemene nange na banana, co njapwile mwanike wa kubwahelela manene. Njicikanuka ije myaka ya ku bwanike injakele mu kwoloka, co munjikayanuka, na ku mbunge too.

Munjakele na myaka 7, buyoye bwange bwakaluwile banana mubalilwisile na batate, co twajalukilile ku St. Louis, mu Missouri, mu America. Njanangukile ngwange batate bapwile ba kukenyuka manene. Cakumwenako, litangwa lyakulibanga munjelukile ku njibo kutunda ku sikola, batate bazibile ngwabo bakwetu banjishendumwine, oloni byahi binjabalingile. Balubalele manene, co banjihumwine kutubakana nomu mubanjipupilile bakwetu ku sikola. Njamwene ngwange njapandele kulingako bimo, co njashangumukile kukala na lwozi munjakele lika na myaka 7.

Kulubala-lubala kwa batate kwabisile banana, co bakele na kulicokota kushwa kumo. Munjakele na myaka 11, njashangumukile kupangesa bumbanda bwa kupendesa na kunwa manene bwala. Njakele manene na lwozi, co kakangi njakele na kulwa na banu kwoshe kunjakele na kwendela. Ha simbu injamanesele sikola, njapwile wa kukenyuka manene.

Munjakele na myaka 18, njalisonekesele kupwa umo wa maswalale ba America baje bakalwila mu mema. Co njalilongesele na mwakutsiila munu. Munima ya myaka itanu, njecelele buswalale na kushangumuka kulilongesa mubakasinganyekela banu omwo njashakele kupangela hamo na cibunga ca baka-kutondesesa biñanda mu America (Federal Bureau of Investigation). Njashangumukile ebi bilongesa ha yuniveziti mu America, co njatwaleleleleho nabyo munjelukile mu Canada.

Munjakele ha yuniveziti, njecelele kukulahela banu. Banu bamonekele ngwabo banaka mbunge ku byabo lika, byuma byoshe mu kaye byamonekele ngwe byangoco lika, co kwamonekele ngwe byahi byasa kumanesa bukalu bubali na kuliwana nabwo banu. Njecelele kukulahela ngwange banu basa kubwahesa byuma mu kaye.

Kunjamwene seho ya kuyoya. Ngeci, njakele na kunwa manene bwala, kupangesa bumbanda bwa kupendesa, kushaka manene bimbongo hamolika na mesho-mesho. Njalingile cilika coshe cikalako, nange kubanga njikaleko, kutunda ku munakazi ou kuya ku munakazi mukwabo. Bilongesa bya buswalale byanjilingisile njilwe na banu kushwa kumo. Njasinganyekele ngwange njakele na lisesa lya kuzibuka byuma byabibwa nebi byabibi, co njakele na kulwisa woshe injamwene ngwange kakele na kulinga bakwabo mwamubwa. Oloni oku kwanjilingisile njipwe manene cikenya.

MBIMBILIYA MUYATENGULWILILE BUYOYE BWANGE

Litangwa limo twapendele bumbanda bwa kupendesa na kabusamba kange mu mulili wa hasi mu njibo yange oku tuli na kulibwahesela kulandesa lyamba. Kabusamba kange wanjihwile indi njakulahela Njambi. Njamukumbulwile ngwange, “Nga Njambi ikeye nanene tuyando mu kaye, co binjilisinina kumukulahela bika?” Lya mukwabo munjashangumukile cipangi caciha, umo wa banu banjakele na kupanga nabo uje wapwile Mukaleho wa Yehova wanjihwile ngwendi, “Kuma Njambi ikeye nanene tuyando mu kaye ndi?” Njalihwile ngwange, ‘Kuneja batyoni mangana cihula cananjihula cilitombole na byuma bitunasimutwiiye izau?’ Ngeci, njashakele kuzibuka byabingi. Ha bingonde 6 byateleko, twasimutwiiye ha byuma byabingi, co wapangesele Mbimbiliya mu kukumbulula bihula bimo byabikalu manene binjakele nabyo ha buyoye.

Lipangala lyange injakele na kukala nendi ha simbu oyo kashakele ngwendi njimulekeko binjakele na kulilongesa. Litangwa limo Lyacalumingo, njamulekele ngwange njalanyele Bakaleho baije ku njibo yetu mangana bakulilongese netu Mbimbiliya. Lya mukwabo munjelukile kutunda ku bipangi, njakuwanene nalongekeya byoshe byakele mu njibo na kuliila. Njatuhukile hanja na kushangumuka kulila. Co njalombelele kuli Njambi ngwange anjikwase. Olu lwapwile lwakulibanga kutumbula lizina lya Yehova mu lilombelo.—Samu 83:18.

Matangwa abali kutundoho, njashangumukile kulilongesa Mbimbiliya na Bakaleho babali, munu na muka-limbo lyendi. Mubaile, njatwaleleleleho kutanda libulu litwapangesele mu kulilongesa lya Wa Kona Ku Pila Ku Ya Ku Ile mwa Paradaisi fa Lifasi-mubu, co njalitandele lyoshe lije bene litangwa butsiki.a Binjalilongesele hali Yehova Njambi na Munendi Yesu Kristu byanjetele ku mbunge. Njamwene ngwange Yehova wakala na mema ku mbunge, co akazibi kubabala ku mbunge nga tuyanda. (Isaya 63:9) Cuma canjetele manene ku mbunge capwile kumona mwanjizemena Njambi nomu muunjikwasela mulambu wa Munendi uje walyanene mwafwa yange. (1 Iwano 4:10) Njamwene ngwange Njambi wanjimwesele mbunge ya kubandamena “mwafwa kashaka ngwendi kukanyonge nambe umo, oloni ashaka ngwendi boshe batenguluke.” (2 Pita 3:9) Njamwene ngwange Yehova wakele na kunjikoka mangana njipwe kabusamba kendi.—Iwano 6:44.

Njashangumukile kukunguluka oco bene calumingo. Njakele na binkambu byabilaha na masikiyo, co lalo sholwesi yange yakele na kutewesa banu. Oloni Bakaleho banjilingile ngwe njapwile kabushoko kabo uje ibamwene laja. Basholokele kupwa baka-Kristu ba busunga. Njalizibile ngwe njelukile kwimbo kuli bakuku, oloni ku mwela waubwa manene.

Mu simbu yaindondo lika, byuma binjakele na kulilongesa mu Mbimbiliya byashangumukile kutengulula buyoye bwange. Njatehwile binkambu byange, njecelele kukala na mesho-mesho na kwecela kupangesa bumbanda bwa kupendesa na kunwa manene bwala. (1 Korinte 6:9, 10; 11:14) Njashakele kuzibisa Yehova kubwaha. Ngeci, munjanangukile ngwange kashakele binjakele na kulinga, kunjakele na kulyamena. Co kakangi bilinga byange byakele na kunjizibisa kubabala ku mbunge. Ngeci, njakele na kulyendekesa ngwange, ‘Kunjishaka kulinga ebi byuma lalo.’ Co oho bene njakele na kweseka kutengulula bisinganyeka na bilinga byange. Ngeci, njashangumukile kumona bubwa butunda mu kulinga byuma byashaka Yehova. Munima ya bingonde 6 kutunda hanjashangumukilile kulilongesa Mbimbiliya banjimbwitikile, lya 29 July 1989, co njapwile umo wa Bakaleho ba Yehova.

BUKWASI BUNJINAWANA

Mbimbiliya inanjikwasa kutengulula futisi yange. Kunima, kakangi njakele na kulubala manene nga njalipyakana na munu. Oloni hano njili na kulinga mwoshe munjasela kukala “mu kwoloka na banu boshe.” (Loma 12:18) Kunjilishasha, oloni njikandelela kuli Yehova mwafwa ya nzili ya Lijwi lyendi ya kutengulula banu hamolika na bukwasi bwa sipilitu yendi ya kujela.—Galatiya 5:22, 23; Bahebelu 4:12.

Kutubakana kupangesa bumbanda bwa kupendesa na kupwa cikenya na kukala na bisinganyeka bya kulinga bupangala, hano njili na kulinga mwoshe munjasela kuzibisa Yehova Njambi kubwaha na kumupangela. Oku kunambateselela kukwasa bakwetu bamuzibuke. Myaka yaindondo kutunda habanjimbwitikilile, njajalukilile ku mutambela weka wa kaye kuje kwakele manene bujene bwa baka-kwambulula mangana njikakwaseko. Ha myaka ineti, njinapu wa kubwahelela mwafwa ya kukwasa banu babangi balilongese Mbimbiliya na kulimwena muinatengulwila buyoye bwabo kubupwisa bwabubwa. Njabwahelela lalo mwafwa banana nabo bapwile Bakaleho ba Yehova. Co cuma cimo cabakwasele capwile kumona muyatengulukilile futisi yange nomu munjashangumukilile kumona byuma mu ngila yeka.

Mu 1999, njakobelele sikola ibatumbula ano matangwa ngwabo Sikola ya Baka-kwambulula bya Bumwene, mu El Salvador. Oku ku sikola, njalilongesele mwakutwamenena mu cipangi ca kwambulula na kulongesa na mwakunyungila cikungulukilo. Kutundaho, mu mwaka ou bene, njambatele mwebwange injazema, Eugenia. Co tuli na kupangela hamo mu cipangi ca simbu yoshe ca kwambulula mu Guatemala.

Co hano kutubakana kumona buyoye kupwa bwangoco, njinabwahelela manene. Kupangesa binjinalilongesa mu Mbimbiliya kunanjilingisa njecele kukala na mesho-mesho na kwecela bukenya, co kunanjikwasa njikale na cizemo ca busunga na kukala mu kwoloka.