Bika Biyendeka Mbimbiliya ha Kwana?
Biyendeka Mbimbiliya
Mbimbiliya ikatushongangeya kwana kutundilila kwisi ya mbunge yetu. Imwesa lalo ngwayo muka-kwana na muka-kutambula bapwa bakubwahelela. (Visimo 11:25; Luka 6:38) Yesu wendekele ngwendi: ‘Mu kwana muli kubwahelela kwakama kutubana mu kutambula.’—Vilinga 20:35.
Kwana kwa cifwa muka kukazibisa Njambi kubwaha?
Kwana kwapwa kwakubwa nga kutundilila kwisi ya mbunge. Mbimbiliya ngwayo, “Munu na munu alinge ngwe muje mwanayongwela mu mbunge yendi, keti kwana na bimbunge bibali nambe mu kumusindiya, mwafwa Njambi wazema uje ana mu kubwahelela.”—2 Kolinte 9:7, majwi a kwinikila.
Kwana kwa kutundilila kwisi ya mbunge kwapwa kulemesa kwakujela kwanatabesa Njambi. (Yakomba 1:27, majwi a kwinikila) Munu uje akalyana kukwasa bakwabo akazibisa Njambi kubwaha, co kulinga ngoco kukapu lika ngwe ali na kukolotesa Njambi. (Visimo 19:17) Mbimbiliya ngwayo Njambi ikeye akana fweto kuli baje bakwasa bakwabo.—Luka 14:12-14.
Kwana kwa cifwa muka kwazinda Njambi?
Nga twana na biyongola bya kuhenga. Cakumwenako:
Nga twana mangana batushangale.—Mateo 6:2.
Nga twana mangana netu batwaneko bimo.—Luka 14:12-14.
Nga tufweta bimbongo mangana tukoboke.—Myaso 49:6, 7.
Nga twana bwana mu kukundwiya byuma byazinda Njambi. Cakumwenako, kutwapendele kwana munu bimbongo mangana alikwasese ku bweho bwa linyanyamena nambe kulanda bwala nambe mambanda akupendesa. (1 Kolinte 6:9, 10; 2 Kolinte 7:1) Mu ngila imolika, kutwapandele kukwasa munu uje asa kupanga mangana awane byatonda, oloni shendi kulinga ngoco.—2 Tesalonika 3:10.
Nga twana na kwonowa kukwasa mwamubwa naanga yetu. Mbimbiliya ngwayo mitwe ya binaanga banapande kuwanena binaanga byabo bya kulikwasesa. (1 Timateo 5:8) Mutwe wa naanga kapandele kwana manene kupwa muje onowa na kukwasa mwamubwa naanga yendi. Mukemo Yesu wapayele banu baje babyanene kukwasa bisemi babo omwo balikwisile ngwabo byuma byabo byoshe “bya kundama kuli Njambi.”—Mako 7:9-13.