Jelemiya
46 Ebi bikebyo byanendeka Yehova kuli kapolofweto Jelemiya kutalesa ku mafuti. Nendeka ngwendi: 2 Awa akewo majwi a Njambi hali Ijipiti kutalesa ku maswalale ba Falo Niko mwene wa Ijipiti, uje wakele ku Ndonga ya Yufreti, uje lalo ibafungulwilile ku Kakemishi kuli Mwene Nebukadineza* wa Babiloni, mu mwaka wamuciwana wa ciyulo ca Jehoyakimu muna Josiya, mwene wa Juda, ngwendi:
3 “Bwaheseni bintelo byeni byabindondo* na bintelo byeni byakama,
Co yeni ku nzita.
4 Eni baka-kulonda tubalu, bwaheseni tubalu na kulondaho.
Libwaheseleni, co zaleni bitepa byeni bya buswalale.
Otoleni makunga na kuzala bizalo byeni bya nzita.
5 ‘Mwafwa bika bali na kusholoka lyoba-lyoba?
Bika bibali na kwilukila munima? Maswalale babo banabahyana.
Banatewe mu kupupuzuka, co maswalale babo banonowa nambe kukenga kunima.
Banu boshe bali mu lyoba,’ mukemwo mwanendeka Yehova.
6 ‘Baka-lumbisi kubasa kushatuka, co baka-kulwa kubasa kutewa.
Banatanuka na kuwa ku kunto,
Ku ngenge ya Ndonga ya Yufreti.’
7 Iyowo ali na kwija ngwe Ndonga ya Nailo,
Ngwe ndonga ya mankimba?
8 Lifuti lya Ijipiti lili na kwija ngwe Ndonga ya Nailo,
Lili na kwija ngwe bindonga bili na mankimba,
Co lyendeka ngwalyo, ‘Njiya na kungumbula lifuti-libu.
Njikanyongesa nganda na baje balimo.’
9 Eni baka-kulonda tubalu, yeni ku nzita.
Eni baka-kwendesa matemba, shatukeni lumbisi lwa kutewesa.
Maswalale, yeni lutwe,
Neni baKushi na baPuti baje bazibuka kupangesa mwamubwa bintelo,
Neni baLudimu baje bazibuka kupangesa mwamubwa buta bwa lusipa na kubunana, yeni lutwe.
10 Lije litangwa linapu lya Mwata Wahakamwa ya Byoshe, Yehova wa maswalale. Linapu litangwa lya kulinga shambandinga mangana elwisile bubi bitozi bendi. Co mukwale ukalya banu, co ukakuta na kumanesa lihwila lyawo lya maninga abo mwafwa Mwata Wahakamwa ya Byoshe, Yehova wa maswalale ana mulambu ku lifuti lya ku kunto ku Ndonga ya Yufreti.
11 Obe muna Ijipiti wa munakazi,
Ya ku Giliyadi ukambate bosamu.
Walisini ngoco kutumisa mambanda obe,
Mwafwa mushongo wobe kuwesi na bumbanda.
12 Mafuti anazibi bya kushauka kwobe,
Co miteto yobe inai mu lifuti.
Banaizibi mu lifuti, mwafwa maswalale bali na kutanuka hali umo na mukwabo,
Co boshe bawila hamo.”
13 Eli likelyo lijwi lyendekele Yehova kuli kapolofweto Jelemiya kutalesa ku kwija kwa Mwene Nebukadineza wa Babiloni omwo akulwisa lifuti lya Ijipiti. Wendekele ngwendi:
14 “Ambululeni eli lijwi mu Ijipiti, lyendekeni mu Migido.
Lyambululeni mu Nofu* na mu Tapanesi.
Balekeni ngweni: ‘Imaneni mu myela yeni, co libwaheseleni,
Mwafwa mukwale ukaija na kunyongesa boshe baje banamizengeleka.
15 Mwafwa bika banalume beni boshe ba nzili banabanyongesa?
Kubemanene na nzili,
Mwafwa Yehova nabandumuna.
16 Bwingi bwabo bali na kutanuka na kuwa.
Bali na kwendeka kuli umo na mukwabo ngwabo:
“Katukeni, twilukeni ku banu betu na ku lifuti lyetu
Mwafwa bali na kupangesa mukwale mu kukenyuka.”’
17 Co bambulwile kuje ngwabo,
‘Falo mwene wa Ijipiti muka-kumbamba lika ngoco, oloni byahi byakalingi,
Necelela byuma* bimwite.’
18 Mwene wa lizina lya Yehova wa maswalale nendeka ngwendi, ‘Njilisinga ha kuyoya kwange ngwange,
Akaija, co akasholoka ngwe munkinda wa Taboli mukati ka minkinda.
Co lalo akasholoka ngwe munkinda wa Kameu uli ku kalunga-ndonga.
19 Obe mwana wa munakazi uli mu Ijipiti,
Kuta-kuta biputu byobe biuya nabyo mu bufunge,
Mwafwa Nofu* ikapwa cuma ca kukomokesa.
Bakayenyeka, co wahi akasalamo.
20 Ijipiti napu ngwe muna-ngombe wa lwabo uje asholoka mwamubwa.
Oloni mazimbe* bakaija na kumushuma kutunda ku kunto.
21 Nameme maswalale bendi baje banakumuna banapu ngwe bana ba bingombe ba kununa,
Oloni nabo banaminguluka na kutewa.
Kubasele kwimana na kulwa,
Mwafwa litangwa lya bukalu linabezila.
Simbu ya kubelwisila bubi bwabo inete.’
22 Miyoyo yendi izibika ngwe ya linyoka uje ali na kutewa,
Mwafwa banamujemukila na nzili na bingimbu,
Ngwe banalume baje bali na kushinja miti.*
23 Bakashinja shwata yendi,’ mukemwo mwanendeka Yehova, ‘nameme yasholokele ngwe yazikile manene.
Mwafwa banapu babangi manene ngwe bimbimba baje kubabwaha kubatanda.
24 Muna Ijipiti wa munakazi akaziba shwamwa.
Bakamwana mu maboko a banu ba ku kunto.’
25 “Yehova wa maswalale, Njambi ya Isalele nendeka ngwendi: ‘Hano njitengulukila kuli Amoni wa ku No,* na kuli Falo, na kuli Ijipiti, ku binjambi bendi na ku bimyene bendi. Eyo kuli Falo na kuli boshe baje banamukulahela mangana njibane kashitiko.’
26 Co njikabana mu maboko a baje bashaka kubatsiya, mu maboko a Mwene Nebukadineza* wa Babiloni na bangamba bendi, oloni munima, banu bakatunga mu Ijipiti ngwe mubalingile kunima,’ mukemwo mwanendeka Yehova.
27 ‘Ngeci, yobe ngamba yange Jakobu, keti uzibe lyoba,
Co keti utewe obe Isalele,
Mwafwa njikakwobola ku lifuti lya kulako,
Co bana bobe njikabobola mu lifuti mubanai mu bufunge.
Jakobu akeluka, akakala mu kwoloka, co wahi akamupindisa.
Naumo wahi akamuzibisa lyoba.
28 Ngeci, keti uzibe lyoba, obe ngamba yange Jakobu,’ mukemwo mwanendeka Yehova, ‘mwafwa njili hamo nobe.
Njikanyongesa miyati yoshe kuje kunjinashandwela banu bobe,
Oloni yobe kunjikakunyongesa.
Njikakwolola mu ngila inakupande,
Oloni kunjikakuseze ngoco kwa kujeneka kukwana kashitiko.’”