Jelemiya
48 Yehova wa maswalale, Njambi ya Isalele nendeka kutalesa kuli Mowabi ngwendi:
“Lubinda lwa Nebo mwafwa banamunyongesa.
Kiliyathaimu banamushaula na kumufungulula.
Butewelo bwa kukola banabushaula na kubunyongesa.
2 Banecela kushangazala Mowabi.
Banayongola kumunyongesa mu Heshiboni.
Bali na kwendeka ngwabo: ‘Ijeni tumunyongese, muyati wendi uziluke.’
Nobe Madimeni oloka kulu
Mwafwa mukwale uli na kukukaba.
3 Ku Holonaimu kuli miyoyo ya banu bali na kulila,
Mwafwa banainyongesa, co kunyonga kwayo kunapu kwakama.
4 Mowabi banamunyongesa.
Bana bendi babandondo bali na kulila.
5 Bali na kutwalelelaho kulila mubali na kukanduka ha mukanduko wa Luhithi.
Co mubali na kusikumuka kutunda ku Holonaimu, bali na kuziba miteto ya banu bali na kulila mwafwa ya bukalu buliko.
6 Teweni, oboleni myonyo yeni!
Munapande kupwa ngwe muti wa junipa uje uli mu mambo.
7 Omwo munakulahela bipangi bya maboko eni na bufuko bweni,
Neni bakamikwata.
Co Kemoshi aya mu bufunge,
Hamolika na tupilistu bendi na bamyata bendi.
8 Muka-kunyongesa aija na kulwisa binganda byoshe,
Co kukwesi nganda ikoboka.
Cingulunga cikanyonga,
Co mwela wa kusalama bakaunyongesa ngwe mwanendeka Yehova.
9 Shimbikeni cizibukiso ca Mowabi,
Mwafwa mubakanyongesa binganda byendi, banu bendi bakatewa,
Co binganda byendi bikapwa cuma ca kukomokesa,
Kumukakala munu.
10 Munu uje apanga cipangi ca Yehova kwa kujeneka kwakako mbunge napu wa kusinga.
Munu uje unowa kwitila maninga na mukwale wendi napu wa kusinga.
11 BaMowabi kubabapindisile kushwa ku bwanike bwabo,
Banapu ngwe binyu bije binalikendeka.
Kubabanungulwile kutunda mu njaba imo kuya mu njaba ikwabo,
Kanda bayeho mu bufunge.
Mukemwo butobalesi bwabo anga bumolika,
Co lwengo lwabo kulwatengulukile.
12 “‘Ngeci matangwa ali na kwija,’ mukemwo mwanendeka Yehova, ‘omwo njikatuma banu bakubandumune. Bakubatsilimika na kwitila binjaba byabo na kubwabwanya binjaba byabo byakama. 13 Co baMowabi bakaziba shwamwa mwafwa ya Kemoshi ngwe bakunjibo baIsalele mubali na kuziba shwamwa mwafwa ya Betheu ije ibakulahelele.
14 Mwasa kulishasha bati ngweni: “Yetu tu baka-kulwa ba nzili baje banalibwahesela kulwa”?’
15 Mowabi banamunyongesa,
Binganda byendi banabikobelela,
Co banatsii bakwenje bendi bababwa manene,’
Ngwendi Mwene wa lizina lya Yehova wa maswalale.
16 Bukalu buje buli na kwizila baMowabi ololo bubawana,
Co kunyonga cabo cili na kwija bwasi-bwasi.
17 Boshe baje bazibuka lizina lyabo,
Baje banabazengeleka, bakabazibila mema ku mbunge.
Baleke ngwobe: ‘Mulamu wa nzili banaupokola, uje bene mulamu wa bumpau.
18 Obe mwana wa munakazi uli mu Diboni,
Tunda mu bumpau bwobe, utumame hasi oku unatsi lihwila.*
Mwafwa muka-kunyongesa Mowabi naija na kukulwisa,
Co anyongesa myela yobe ya kukola.
19 Obe wakala mu Aloe, imana ku ngila mangana umone bili na kulingiwa.
Ihula munakazi uje ali na kutewa na munakazi uje ali na kubomboloka ngwobe, ‘Bika binalingiwa?’
20 Mowabi banamuzibisa shwamwa na kumuzibisa lyoba.
Mbolozokeni na kulila.
Ambululeni mu Anoni ngweni Mowabi banamunyongesa.
21 Njambi nasompo lifuti lya kusalama, nasompo Holoni na Jahazi na Mefathi. 22 Nasompo Diboni na Nebo na Bethi-dibulataimu. 23 Nasompo Kiliyathaimu na Bethi-gamu na Bethi-meoni. 24 Nasompo Keliothi na Bozila na binganda byoshe bya mu lifuti lya Mowabi bya kulako nebi bya hayehi.
25 ‘Nzili ya Mowabi banaimanesa,
Liboko lyendi banalipokola,’ mukemwo mwanendeka Yehova.
26 ‘Mupendese mwafwa nalijundula ku mesho a Yehova.
Mowabi ali na kulyalanga mu bishanjo byendi,
Co bali na kumushendumuna.
27 Kuma kuwakele na kushendumuna Isalele ndi?
Kuma wamuwanene hakati ka bezi,
Mangana umupikisile mutwe wobe na kumwendeka mwamubi ndi?
28 Eni mwakala mu Mowabi, tundeni mu binganda mukakale ha limanya,
Co pweni ngwe liyembe uje akatungila lishwa lyendi kumukulo wa cimbongo.’”
29 “Tunazibi bya kulyalesa kwa Mowabi. Wapwa muka-kulijundula manene.
Tunazibi bya kulishasha kwendi na bya kulyalesa kwendi na bya kulijundula kwendi na bya mbunge yendi ya kulyamesa.”
30 Yehova nendeka ngwendi, ‘Njizibuka butenu bwendi,
Oloni akambamba lika ngoco,
Nebi byalinga bene byahi.
31 Mukemwo njikalila Mowabi,
Njilila baMowabi boshe.
Co njikalinyenga ha banu ba ku Kile-helesi.
32 Obe muti wa binyu wa Sibma njikakulila,
Njikakulila kutubakana munjikalilila Jaze.
Minango yobe inaketa na mu sambwa lya kalunga-ndonga.
Inaketa ku kalunga-ndonga ku Jaze.
Muka-kunyongesa naija na kubiisa bushuka bwobe bwa ha ntondwe
Na bushuka bwobe bwa binyu buunateje.
33 Naumo wahi akalisamba nambe kubwahelela mu lihya lya miti
Na mu lifuti lya Mowabi.
Njinalingisa binyu bilikele kwita, kutunda mu bitikilo bya binyu.
Naumo wahi akatika binyu oku ali na kutambeka mu kubwahelela.
Kutambeka cibakatambeka cikapwa ceka.’”
34 Miteto ya ku Heshiboni inaketa na ku Eleyale.
Bali na kutambeka, co majwi abo anaketa na ku Jahazi,
Kutunda ku Zowa anaketa ku Holonaimu na ku Egilathi-shelishiya.
Nameme bene mema a ku Nimrimu akoma.
35 Yehova nendeka ngwendi:
‘Baje bakanene bwana ha myela ya kulunduka
Na baje bali na kwana milambu ku binjambi babo, boshe njikabanyongesa mu Mowabi.
36 Mbunge yange ikalinyengela Mowabi ngwe kamutolilo,*
Co mbunge yange ikalinyengela banu ba mu Kile-helesi ngwe kamutolilo.*
Mwafwa bufuko bwanakungulula bunyonga.
37 Mwafwa mitwe yoshe banaikongobola,
Co minjezi yoshe banaitehula.
Banalilengozola ha maboko hoshe,
Co banazala bikeleya.
38 “‘Ha biluli byoshe bya Mowabi
Na mu myela yendi yoshe ya mbunga
Muli lika kumbolozoka
Mwafwa njinabwabwanya Mowabi
Ngwe njaba ibanombila kuti,’ mukemwo mwanendeka Yehova.
39 Lileni eni mwakala mu Mowabi,
Mowabi neluka na shwamwa!
Mowabi bali na kumushendumuna,
Boshe baje banamuzengeleka bali na kumutewa.’”
40 “Mwafwa Yehova nendeka ngwendi:
‘Ngeci mwa ngonga uje ali na kusikumuka hasi,
Citozi nendi akajangumwina mambaba endi hali Mowabi.
41 Bimbongi byendi bakabifungulula,
Co bimpaka byendi nabyo bakabifungulula.
Ha litangwa olyo, bimbunge bya baka-kulwa ba Mowabi
Bikapwa ngwe bimbunge bya banakazi baje bali na kupapa.’”
42 Mowabi bakamunyongesa, co kakapu muyati,
Mwafwa nalijundwila ku mesho a Yehova.
43 Eni mwakala mu Mowabi mukaziba lyoba
Na kuwila mu bwina na kutsa mu muheto,’ mukemwo mwanendeka Yehova.
44 ‘Woshe akaziba lyoba na kutewa akawila mu bwina,
Co woshe akatuhuka mu bwina akatsa mu muheto.’
Mwafwa njili na kunenela Mowabi mwaka wa kashitiko,’ mukemwo mwanendeka Yehova.
45 Baje banatewela mu munzinze wa Heshiboni banalijujukila
Mwafwa tuhya tuli na kutunda mu Heshiboni,
Co mulangi uli na kutunda ku Sihoni.
Byenyeka luholo lwa Mowabi
Na bikola bya bana ba lwozi.
46 Lubinda lwobe obe Mowabi.
Banu ba Kemoshi bananyongo,
Mwafwa bana bobe ba banalume banabapwisa bafunge,
Co bana bobe ba banakazi banai mu bufunge.
47 Oloni njikakungulwila hamo banu ba Mowabi baje banai mu bufunge mu matangwa a mamaneselelo,’ mukemwo mwanendeka Yehova.
Hano hakeho haunahwila muzimbu wa kusompa Mowabi.