Ezekiele
27 Yehova wanjilekele lalo ngwendi: 2 “Oloni yobe muna munu, imba mwaso wa busiwa kutalesa kuli Tile. 3 Co endeka kuli Tile ngwobe,
‘Obe wakala ku bikolo bya kalunga-ndonga,
Obe muka-kulinga mingoso na banu ba ha mañanda amangi,
Mwata Wahakamwa ya Byoshe Yehova nendeka ngwendi:
“Obe Tile, yobe babenya unendeka ngwobe, ‘Njapwa nji wamubwa manene.’
4 Wakala na bitingitingi hakati ka kalunga-ndonga,
Co baje bakutungile banakulingisa upwe u wamubwa manene.
5 Ha kupwa bwato bwakama, mabaya obe oshe bawashongele ha miti ya junipa ya ku Seni,
Co bambatele muti wa sida wa ku Lebanoni na kukushongelaho citi ca hakati ka bwato.
6 Bilapo byobe babishongele ha miti ya oke ya ku Bashani,
Co litusi lyobe balishongele ha miti ya sipresi na kulibwahesa na mambinga a binjamba ba ha mañanda a ku Kitimu.
7 Binanga byobe bya lineni bya mibala-mibala bya ku Ijipiti bikebyo byakele na kwendesa bwato bwobe,
Co binanga bya mubala wa blu na binanga bya mubala wa pepo bya ku mañanda a Elishaha bikebyo biwapwisile ciluli ca bwato bwobe.
8 Baje bakala mu Sidoni na baje bakala mu Avadi bakebo bakujabwile.
Banalume bobe ba bitongwe, obe Tile, bakebo bakujabwile.
9 Banalume ba bitongwe ba ku Gebo baje bali na lyezi bakebo bazikile myanzi yobe.
Co mato oshe a mu kalunga-ndonga na baka-kuwajabula bezile kuli yobe na kulinga mingoso.
10 Banalume ba ku Pelesha na ku Ludimu na ku Puti bapwile maswalale bobe, bapwile banalume bobe baka-kulwa.
Bashukikile bintelo byabo na bitepa byabo muli yobe, co bakunenelele bumpau.
11 Banalume ba ku Avadi baje banapu maswalale bobe, babakwalalekele kuzenguluka helu lya bibumbe byobe byoshe,
Co banalume ba kusimpa banyungile tuposhi twobe,
Bashukikile bintelo byabo bya muzenguluke kuzengeleka bibumbe byobe byoshe,
Co bakulingisile usholoke mwamubwa manene.
12 “‘“Banu ba ku Tashishi balingile nobe mingoso mwafwa wakele na bufuko bwabwingi. Bakunenelele siuva, cikubo, tini na loto mangana ubane bitenga byobe. 13 Banu ba ku Javani na ku Tubau na ku Mesheki balingile nobe mingoso. Bakunenelele bindungo na byuma bya kopa mangana ubane byuma byobe bya mingoso. 14 Bakunjibo ya Togama bakunenelele tubalu na bidonki mangana ubane byuma byobe. 15 Banu ba ku Dedani balingile nobe mingoso. Wakobelesele bipangi baka-mingoso ba ha mañanda amangi. Bakwanene mambinga a binjamba na biti bya seho bya kuzibala kupwa mulambu. 16 Banu ba ku Edomu balingile nobe mingoso mwafwa ya byuma byobe byabingi. Bakwanene mamanya a takoizi, bwanda bwa pepo, binanga bya kutaleka, binanga byabibwa, makolale, na mamanya a rubi mangana ubane byuma byobe.
17 “‘“Banu ba ku Juda na banu ba mu lifuti lya Isalele balingile nobe mingoso. Bakwanene tiliku ya ku Minithi na byakulya byabibwa na buki na mazi na bosamu, mangana ubane byuma byobe.
18 “‘“Banu ba ku Damasika balingile nobe mingoso mwafwa ya byuma byobe byabingi na bufuko bwobe bwabwingi. Bakulandesele binyu bya ku Heuboni na bwanda bwa ku Zaha.* 19 Banu ba ku binganda bya Vedani na Javani bije byakala ku Uzau, bakunenelele byuma bya kufula ha cikubo na miti ya kashia* na mahongo a keni* mangana ubane byuma byobe. 20 Banu ba ku Dedani bakunenelele binanga bya kwaka ha myongo ya tubalu. 21 Wakobelesele bipangi baka-Arabia na bamyata boshe ba ku Keda. Aba banu bapwile baka-kulandesa bana ba bimanga na bimanga ba nkomba na bimembe. 22 Baka-mingoso ba ku Sheba na ku Laama balingile nobe mingoso. Bakwanene mazi oshe a lwengo lwalubwa na mamanya a seho na goudi mangana ubane byuma byobe. 23 Banu ba ku Halani na ba ku Kane na ba ku Edeni na baka-mingoso ba ku Sheba na ku Ashu na ku Kiumadi, balingile nobe mingoso. 24 Mu mutambela wobe wa kulandesela balandeselelemo bizalo byabibwa na tumapai tubanatungu ha binanga bya blu na ha binanga bya kutaleka bya mibala yaibwa. Balandeselelemo lalo binanga bya kujala hasi bya mibala ya kuliseza-seza, co byoshe babizengele na kubikuta na mikole.
25 Mato a ku Tashishi akewo akele na kwambata byuma byobe bya mingoso,
Ngeci washulile manene na bufuko na kulemenena* hakati ka kalunga-ndonga.
26 Baka-kukujabula banakutwala kuje kuli lihunzi lyakama,
Lihunzi lya ku butuhukilo bwa litangwa linakutabozwela hakati ka kalunga-ndonga.
27 Bufuko bwobe na byuma byobe na mingoso yobe na baka-kukujabula na baka-kwenda nobe,
Na baka-kuzika myanzi yobe na baka-kukulingila mingoso na banalume boshe baka-kulwa,
Mbunga yoshe iuli nayo,
Boshe bakabombela hakati ka kalunga-ndonga ha litangwa liukawa.
28 Baka-kukujabula mubakatambeka, myela ya ku ngenge ya kalunga-ndonga ikajaja.
29 Baka-kujabula mato na baka-kupanga mu mato na baka-kwenda mu tulunga-ndonga boshe
Bakatunda mu mato abo na kwimana ha nunda.
30 Bakatambeka na kukulila manene
Oku balishawila libu ku mitwe na kulyandazeka mu lito.
31 Bakakongobola mitwe yabo na kuzala bikeleya.
Bakakulila manene na kumbolozoka.
32 Ha simbu ibakalila, bakemba mwaso wa busiwa kutalesa kuli yobe ngwabo:
‘Iya nalifu na Tile uje nolokoni kulu hakati ka kalunga-ndonga?
33 Byuma byobe mubyezile kutunda hakati ka kalunga-ndonga, walingisile baka-mafuti babwahelele.
Bufuko bwobe bwabwingi na byuma byobe bya mingoso byafukisile bimyene ba ha lifuti-libu.
34 Hanwoni unatabozokela ha nzinga ya kalunga-ndonga,
Co byuma byobe bya mingoso na banu bobe banabombela hamo nobe.
35 Banu boshe bakala ha mañanda bakakutala oku banalikomokela,
Co bimyene babo bakajaja mwafwa ya lyoba, co na bihanga byabo bikamwesa ngwabyo bali na kuziba lyoba.
36 Baka-mingoso baje bakala mukati ka baka-mafuti bakakumba milozi mwafwa ya byuma binalingiwa kuli yobe.
Mamaneselelo obe akaija mu kukasumuna, co akapwa a kutewesa.
Co ukaziluka myaka yoshe.’”’”