Banu bamo kukabakaluwila kuzema Njambi. Bakasinganyeka ngwabo Njambi wapwa cuma cije kubasa kuzibisisa mwamubwa, wakala manene ku lyala, co lalo wa kukenyuka. Zibeni bibendekele bamo:

• “Njalombelele kuli Njambi ngwange anjikwase, oloni njakele na kuliziba ngwange wakala kulako manene, co kasa kunjiziba. Kunjamwene Njambi kupwa ngwe munu uje asa kunjaka mbunge.”—Marco, ku Italy.

• “Nameme njashakele manene kupangela Njambi, njakele na kuliziba ngwange wakala kulako manene. Njamumwene ngwange wapwa wa kukenyuka, co washaka lika kwana banu kashitiko. Kunjamumwene ngwange wakala na mema ku mbunge.”—Rosa, ku Guatemala.

• “Ku bwanike njakele na kumona ngwange Njambi akatondesesa lika tupenga twetu na kutwana kashitiko. Mu kwita kwa simbu njamumwene kupwa ngwe munu uje kashakele kukala na bakwabo. Kuli yange, Njambi wapwile ngwe ntwama uje washaka lika kuyula banu bali mwisi yendi oloni kabakele mbunge.”—Raymonde, ku Canada.

Yeni mumona bati? Kuma banu basa kuzema Njambi ndi? Baka-Kilistu banalihula eci cihula ha myaka yaingi. Mu myaka ya ma 500 kutwala 1500 C.E, bwingi bwa baje bakele na kulishasha ngwabo bapwile baka-Kilistu kubakele na kulombela kuli Njambi Muka-nzili Yoshe. Bika byakele na kubalingisa ngoco? Bakele na kumutewa mu ngila ya kuhenga. Muka-kutondesesa mizimbu ya kusañulu umo wa lizina lya Will Durant ngwendi: “Kuma kuli muka-bubi asa kulombela kuli Njambi wa kutewesa manene, uje wakala kulako-lako ndi?”

Bika binalingisa banu bamo bamone ngwabo Njambi atewesa manene, co lalo kesi muyehi na banu? Bika biyendeka Mbimbiliya hali Njambi? Kuma kulilongesa bya Njambi kwasa kumilingisa mumuzeme ndi?

BIBAKULAHELA BANU BABANGI

“Kumoneka ngwe kutwawisilile kumo na kumona indi tunapande kupangesa lizina lya Njambi, co lalo nga kulyakala, co lyapwa lika.”—Profesa David Cunningham, Muka-kulilongesa bya Bulombelo.

BUSUNGA BULI MU MBIMBILIYA

Njambi wendekele ngwendi: “Yange Yehova. Likelyo lizina lyange.” (Isaya 42:8, NWT) Yehova lyapwa lizina lya Cihebelu lije lilumbununa “Akalingisa Byuma Bikaleko.”—Kushangumuka 2:4, NWT, majwi a kwinikila.

Yehova ashaka ngwendi tupangese lizina lyendi. Mbimbiliya ngwayo: ‘Saneni ha lizina lyendi, ambululeni bilinga byendi hakati ka banu. Balekeni bukama bwa bumpau bwendi.’—Isaya 12:4.

Yesu wapangesele lizina lya Njambi. Omwo Yesu walombelele, walekele Yehova ngwendi: ‘Njasholola lizina lyobe kuli bakebo [bandongesi bendi], co anga njikalisholola.’ Bika byamulingisile asholole lizina lya Njambi ku bandongesi bendi? Yesu watwaleleleleho ngwendi: ‘Ngeci cizemo cije wanjizema naco cikale muli bakebo, co nange njilikwatasane nabo.’—Yowano 17:26.

BIKWAPWILA KWA SEHO KUZIBUKA LIZINA LYA NJAMBI

Muka-kulilongesa bya bulombelo umo wa lizina lya Walter Lowrie wasonekele ngwendi: “Nga munu kazibuka lizina lya Njambi, co kamuzibuka mwamubwa. Ngeci, kasa kumuzema nga wamumona kupwa cuma lika ca nzili.”

Munalume umo wa lizina lya Victor wakele na kuya ku ceci calumingo na calumingo, oloni wakele na kuliziba ngwendi kazibukile Njambi. Wendekele ngwendi: “Munjazibukile ngwange Njambi ikeye Yehova, calingile ngwe lukelwo lwa kulibanga kuziba bya Njambi. Njalizibile ngwe njinaliwanoni na munu injakele na kuziba manene byendi ha simbu yailaha. Njashangumukile kumumona ngwe munu hendi, co njashakele kulikuta busamba nendi.”

Yehova akashwenye muyehi na baje bakapangesa lizina lyendi. Co nakulahesa baje basinganyekesesa ha lizina lyendi ngwendi: “Njikabazibila mema ku mbunge ngwe cisemi azibila mema ku mbunge munendi uje amupangela.” (Malakiya 3:16, 17) Njambi akabezikisa baje basana ha lizina lyendi. Mbimbiliya ngwayo: ‘Woshe asana ha lizina lya Yehova akoboka.’—Loma 10:13.

BIBAKULAHELA BANU BABANGI

Baka-bulombelo bwa Katolika, baka-bulombelo bwa Orthodoxy na baka-bulombelo bwa Protestanti buje bwapwa mitamba yakama itatu ya bulombelo bwa baka-Kilistu boshe bakulahela Cilongesa ca Binjambi Batatu. Bakulahela ngwabo kwakala Njambi Tate, Njambi Mwana na Njambi Sipilitu ya Kujela. Bakendeka ngwabo oku kukulumbununa ngwabo kwakala binjambi batatu. Ngwabo aba banu batatu bapwa Njambi umolika.”—Libulu lya New Encyclopædia Britannica.

BUSUNGA BULI MU MBIMBILIYA

Yesu Muna Njambi kendekele ngwendi napu hamo na Ishe nambe kumwesa ngwendi ikeye na Ishe bapwa munu umolika. Wendekele ngwendi: “Njili na kuya kuli Tate, omwo Tate wapwa wakama kutubakana yange.” (Yowano 14:28) Walekele lalo ndongesi yendi umo ngwendi: ‘Njili na kwiluka kuli Tate ikeye Ishweni, kuli Njambi yange ikeye Njambi yeni.’—Yowano 20:17.

Sipilitu ya kujela kuyapwile munu. Baka-Kilistu ba kulibanga ‘bashulile na sipilitu ya kujela.’ Co lalo Yehova wendekele ngwendi: ‘Njiketila sipilitu yange hali munu na munu.’ (Vilinga 2:1-4, 17) Ngeci, sipilitu ya kujela kuyapwile mutamba wa Binjambi Batatu. Yapwa nzili ya Njambi.

BIKWAPWILA KWA SEHO

Karl Rahner na Herbert Vorgrimler baje bapwa baka-kulilongesa ba Katolika bendekele ngwabo: “Banu kubasa kuzibisisa Cilongesa ca Binjambi Batatu kwa kujeneka bukwasi bwa Njambi. Oloni nameme Njambi atukwase, anga kutwasa kucizibisisa mwamubwa.” Kuma mwasa kuzema munu uje kumwasa kuzibuka nambe kuzibisisa mwamubwa byendi ndi? Cilongesa ca Binjambi Batatu cinonowesa banu babangi kuzibuka Njambi na kumuzema.

Marco itunabanga kusimutwiya byendi nendi mukemwo mwamwenenene. Ngwendi: “Njasinganyekele ngwange Njambi kashaka ngwendi njimuzibuke. Co kulinga ngoco kwanjilingisile njilizibe ngwange wakala manene kulyala, kunjasa kumuzibuka mwamubwa, co nomu munjasa kushwenyena kuli ikeye mwahi.” Oloni “Njambi kapwile Njambi wa kushaka kutanganesa byuma.” (1 Kolinte 14:33, Mbimbiliya ya American Standard Version) Njambi kalishwekele embwe. Ashaka ngwendi tumuzibuke. Yesu wendekele ngwendi: “Tuzibuka uje itulemesa.”—Yowano 4:22.

Marco ngwendi: “Munjazibukile ngwange Njambi kapwile binjambi batatu, njamwene ngwange njasoni kulikuta busamba nendi.” Nga tumona Yehova kupwa ngwe Munu hendi keti ngwe cuma cije kubasa kuzibuka mwamubwa banu, co kutupwila kwakwasi kumuzema. Mbimbiliya ngwayo: “Woshe uje kesi na cizemo kazibuka Njambi, omwo Njambi wapwa cizemo.”—1 Yowano 4:8.

BIBAKULAHELA BANU BABANGI

“Munu acitsa lika, mwonyo wendi uya mu litende lya tuhya nga wakele na kulinga bubi. Co ayandela mu ‘tuhya twa myaka yoshe’ mwafwa kakeko kashitiko kendi.” (Libulu lya Katekisema lya Bulombelo bwa Katolika) Bantwama bamo ba bulombelo bakendeka ngwabo banu bali mu litende lya tuhya banabangununa kuli Njambi myaka yoshe.

BUSUNGA BULI MU MBIMBILIYA

Mbimbiliya ngwayo ‘mwonyo uje ulinga bubi ukewo utsa.’ (Ezekiyele 18:4) Co lalo ngwayo “batsi neci bene bazibuka cahi.” (Muka-kwambulula 9:5) Nga mwonyo ukatsi, co wasa kuyanda bati lalo mu “tuhya twa myaka yoshe” nambe kwangunuka kuli Njambi myaka yoshe?

Mu Mbimbiliya, lijwi lya Cihebelu nambe lya Cigriki libananungulula ngwabo “litende lya tuhya” lilumbununa bihilo mubakai banu boshe. Cakumwenako, Yombi mwabinjile mushongo umo wakama wendekele ngwendi: “Ngwe unjishweka mu cihilo cange [“mu litende lya tuhya,” Mbimbiliya ya Douay-Rheims Version].” (Yombi 14:13, Mbimbiliya ya Holy Bible—Easy-to-Read Version) Yombi washakele kuhwima mu cihilo, keti kukala mu mwela umo mwanasa kuyandela munu nambe kwangunuka kuli Njambi.

BIKWAPWILA KWA SEHO KUZIBUKA NGWETU NJAMBI KAPWILE

CIKENYA Kumona Njambi ngwetu cikenya kukwasa kutulingisa tushake kushwenya kuli ikeye. Munakazi umo wa lizina lya Rocío uje wakala ku Mexico ngwendi: “Banjilongesele bya litende lya tuhya kushwa ku bwanike. Njakele manene na lyoba, co kwanjikaluwilile kumona ngwange Njambi wakala na bifwa byabibwa. Yange njamumwene ngwange wapwa wa kulubala lika simbu yoshe, co lalo kashaka ngwendi banu bapwe ba kuzituka.”

Oloni kuzibuka biyendeka Mbimbiliya ha kusompa kwa Njambi na cifwa cibalimo batsi kwatengulwile mwamwenenenemo Njambi. Co wendekele ngwendi: “Njalizibile kupatuka, mwafwa njalizibile ngwe bananjitulu citele ca bishoti cinjinambatele. Njanangukile ngwange Njambi ashaka ngwendi tukale mwamubwa, watuzema, co nange njasa kumuzema. Napu ngwe cisemi uje washaka kukwatelela bana bendi ku maboko na kubakwasa mangana bakale mwamubwa.”—Isaya 41:13.

Nameme banu babangi bali na lyoba lya kutewa litende lya tuhya, Njambi kashaka ngwendi mumupangela mwafwa ya kumumona ngweni atewesa. Yesu wendekele ngwendi: ‘Munapande kuzema Yehova Njambi yeni.’ (Mako 12:29, 30) Nga tunanguka ngwetu Njambi akalingi byuma mu kusungama, co tukulahela na byuma byanatukulahesa kulutwe. Ngwe mwa Elihu kabusamba ka Yombi, netu co twendeka ngwetu: “Njambi kesi kulinga bubi nambe kamandondo, co Muka-nzili yoshe kesi kulinga bubi embwe.”—Yombi 34:10.

Litangwa limo mu Yelusalema, Yesu wakele na kwendeka bya Ishe Yehova na kujombolola bilongesa bya makuli bibakele na kulongesa bantwama ba bulombelo. (Yowano 8:12-30) Co byendekele bitukwasa kwilula byuma bibakulahela banu babangi ano matangwa. Yesu wendekele ngwendi: “Nga mwononoka bilongesa byange, mwa busunga munapu mu bandongesi bange, co mukazibuka busunga, co busunga bukamipatula.”—Yowano 8:31, 32.

Omwo Yesu wendekele ngwendi bandongesi bendi banapande ‘kwononoka bilongesa byendi,’ wamwesele cuma citukwasa kuzibuka indi bilongesa bya mu bulombelo bumo bya “busunga.” Nga muziba banu bendeka bya Njambi, munapande kulihula ngweni, ‘Kuma ebi biñanda byalitombola nebi byendekele Yesu hamolika na biñanda bikwabo bili mu Mbimbiliya ndi?’ Tembwinineni baje bazibile byakele na kwendeka kapositolo Paulu. ‘Ha litangwa na litangwa belwile mwamubwa Bisoneka mangana bamone indi bije byendekele Paulu byapwile bya busunga.’—Vilinga 17:11.

Marco, Rosa, na Raymonde batunabanga kuziba bibaliwanene nabyo belwile mwamubwa bibakulahelele omwo balilongesele Mbimbiliya na Bakaleho ba Yehova. Bika bibalilongesele?

Marco ngwendi: “Batwakele na kulilongesa nabo Mbimbiliya bakumbulwile bihula byoshe bitwakele nabyo nange na mwebwange kupangesa Mbimbiliya. Twashangumukile kuzema Yehova. Co bulo bwetu nabwo bwakanyamene.”

Rosa ngwendi: “Ha kulibanga njasinganyekele ngwange Mbimbiliya yapwa lika libulu libanalisonekela banu mu kushaka kwendeka bya Njambi. Oloni mu kwita kwa simbu yakumbulwile bihula binjakele nabyo. Co njalimwena ngwange Yehova kwali, co lalo njasa kumukulahela.”

Raymonde ngwendi: “Njalombelele kuli Njambi ngwange anjikwase kulilongesa byendi. Mu simbu yaindondo lika kutundoho, nange na muka-limbo lyange twashangumukile kulilongesa Mbimbiliya. Co twalilongesele busunga hali Yehova! Twabwahelelele manene mutwazibukile mwafwila.”

Mbimbiliya kuyajombolwele lika makuli abali na kushandola banu hali Njambi, inendeka lalo na ha bifwa byendi byabibwa. Ikeye waihwimininine, co itukwasa “tuzibuke byoshe bije byanatwana.” (1 Kolinte 2:12) Kuma neni mushaka kulizibila muinakumbulwila Mbimbiliya bihula bya seho bibakalihula banu kutalesa kuli Njambi, biyongola byendi hamolika na byuma bikalingiwa kulutwe ndi? Waneni bikumbululo ku bihula bimo ha webusaiti ya www.pr418.com ha mutamba wa “Bilongesa bya mu Mbimbiliya > Bikumbululo ku Bihula bya Kukundama ku Mbimbiliya.” Co lalo mwasa kulilombela cilongesa ca Mbimbiliya aha ha webusaiti nambe kuleka umo wa Bakaleho ba Yehova. Nga mulinga ngoco, co mulimwena ngweni kuzema Njambi keti kwakukalu ngwe mubakasinganyekela banu bamo.