BIBAKEHULA BABAHA
Mbimbiliya Yasa Kunjikwasa Bati?—Mutamba 2: Likuweni Kutanda Mbimbiliya
Mukwenje wa lizina lya Will ngwendi: “Nga munu kazibuka mwamubwa mwakutandela Mbimbiliya, nasa kuliziba ngwe ifutula.”
Kuma mushaka kuzibuka byuma byasa kumilingisa mulikuwe kutanda Mbimbiliya ndi? Nga mukemwo, co ei ñanda imikwasa.
Lingeni ngwe muli na kumona bimutanda
Lingeni ngwe neni kumwakele ha simbu ibyalingiwile byuma bimuli na kutanda. Mwasa kulinga byuma binatako:
Anguleni muzimbu wa mu Mbimbiliya umushaka kutanda. Mwasa kwangula muzimbu walingiwile kunima nambe ñanda ya mu mikanda ya Biñanda Byabibwa, nambe muzimbu umo ha mizimbu ya mu Mbimbiliya ibanatanda ngwe drama ije ili ha jw.org.
Tandeni muzimbu umunangula. Mwasa kuutanda likalyeni, nambe kuutandela hamo na babusamba beni nambe baka-naanga yeni. Munu umo nasa kutanda majwi a kuzimbula, bakwaboco batanda majwi a banu beka bali omwo mu ñanda.
Esekeni kulingako cuma cimo nambe bibali ku byuma binatako:
Soneni bikupulo bije bimwesa byuma bili na kulingiwa mu muzimbu umuli na kutanda, nambe kusona bikupulo bije bimwesa mubyalikabelele byuma byalingiwile. Sonekeni majwi amo kumukulo wa bikupulo mangana mulumbunune byuma bili na kulingiwa.
Soneni cati ije imwesa byuma byalingiwile mu buyoye bwa munu imuli na kutanda byendi. Cakumwenako, omwo mutanda bya munu umo wa kulongwa, mweseni omwo bifwa byendi byabibwa na bilinga byendi byamunenele bibezikiso.
Sonekeni muzimbu umunatanda ngwe muzimbu wa baka-mizimbu. Mwasa kuusoneka mu bingila bya kuliseza-seza. Cakumwenako, mwasa kulinga ngwe muli na kusimutwiya na munu ibanendeka manene omwo mu ñanda na banu beka bakeleko ha simbu ibyalingiwile byuma bimuli na kutanda.
Nga munu umo ibanendeka mu ñanda imuli na kutanda kangwile mwamubwa byakulinga, co singanyekeni mubinesi kufwila byuma ngwe wangwile mwamubwa byakulinga. Cakumwenako, singanyekeseseni ha ñanda ya Petulu mwabyanene Yesu. (Mako 14:66-72) Byuma muka byabibwa byasele kulinga Petulu?
Nga mwasa, mwasa kusoneka bweho bunemana ha muzimbu wa mu Mbimbiliya umunatanda. Sonekeni nebi bibasa kulilongesako banu.—Loma 15:4.
Mwasa kulinga ngwe muli na kumona byuma bimuli na kutanda mu Mbimbiliya!
Tondeseseni!
Nga mutondesesa, co muwana bisimpi bya seho bimwasa kulilongesa mu muzimbu umutanda. Bisimbu bimo, mwasa kulilongesako bimo ku lijwi limo nambe abali ali mu muzimbu wa mu Mbimbiliya umutanda.
Cakumwenako, esekeseni Mateo 28:7 na Mako 16:7.
Mwafwa bika Mako wendekele ngwendi Yesu te ololo asholoka kuli bandongesi bendi ‘na kuli Petulu’?
Byuma bimikwasa kuwana cikumbululo: Mako kakeleko ha simbu ibyalingiwile ebi byuma; cisholoka ngwe Petulu ikeye wamulekelebyo.
Bimwasa kulilongesako: Mwafwa bika Petulu watakamene mwazibile ngwendi Yesu washakele kumumona lalo? (Mako 14:66-72) Yesu wamwesele bati ngwendi wapwile kabusamba wamubwa wa Petulu? Mwasa kupwa bati kabusamba wamubwa ngwe mwalingile Yesu?
Nga mulinga ngwe muli na kumona bimuli na kutanda na kutondesesa, co mulikuwa kutanda Mbimbiliya!