Kuma Liyabolo Kwakala Ndi?
Biyendeka Mbimbiliya
Eyo, Liyabolo kwakala. Ikeye ‘muka-kuyula kano kaye.’ Wapwile kangelo uje wakupwile wamubi na kutengulukila Njambi. (Yowano 14:30; Efeso 6:11, 12) Mbimbiliya inendeka mwafwila Liyabolo kupangesa mazina na endekesi inatako:
Satana, kulumbununa “Muka-kulwisa.”—Yombi 1:6.
Liyabolo, kulumbununa “Muka-kubiisa lizina.”—Kujombolola 12:9.
Linyoka, kulumbununa “Muka-kukwisa.”—2 Kolinte 11:3.
Muka-kweseka.—Mateo 4:3.
Muka-makuli.—Yowano 8:44.
Kapwile cifwa ca bubi
Bamo bamona Satana Liyabolo kupwa cifwa ca bubi bubakala nabwo banu. Nameme ngoco, mu Mbimbiliya muli biñanda bimo byasimutwiiye Njambi na Satana. Njambi wapwa wa kulumbunuka, co kakele na mutamba waubi uje wasa kusimutwiya nawo. (Kwituluka mu Mashiko 32:4; Yombi 2:1-6) Co lalo, Satana wesekele Yesu uje kakele na bubi. (Mateo 4:8-10; 1 Yowano 3:5) Ngeci, Mbimbiliya yamwesa ngwayo Liyabolo kwakala, kapwile lika bubi embwe.
Kuma tunapande kukasama kuziba banu bamo bendeka ngwabo Liyabolo kakeleko ndi? Embwe. Mbimbiliya ngwayo Satana nongumuna banu babangi mu kushaka kushulisilila biyongola byendi. (2 Tesalonika 2:9, 10) Ngila imo yanalingilamo ngoco inapu kulingisa banu bamone ngwe kakeleko.—2 Kolinte 4:4.
Biyongola bikwabo bya kuhenga bibakala nabyo banu kutalesa kuli Liyabolo
Biyongola bya kuhenga: Lusifa lyapwa lizina likwabo lya Liyabolo.
Busunga: Lijwi lya Cihebelu libananungulula mu Bimbimbiliya bimo ngwabo “Lusifa” lilumbununa “litota” nambe ngwetu wa kubyazima. (Isaya 14:12) Biñanda mubanapangesa eli lijwi bimwesa ngwabyo linatalesa ku bimyene ba Mbambilone basompele Njambi mwafwa ya kulyalesa kwabo. (Isaya 14:4, 13-20) Co endekesi ya “yobe litota” baipangesele mu kushendumuna ciyulo ca Bambambilone munima ya kucifungulula.
Biyongola bya kuhenga: Satana ali na kupangela Njambi kupwa “muka-kumusompela.”
Busunga: Liyabolo wapwa citozi ca Njambi, keti ngamba yendi. Satana Liyabolo akalwisi banu baje bali na kupangela Njambi na kubakutiiya biñanda.—1 Petulu 5:8; Kujombolola 12:10.