Bihula bya Baka-Kutanda

Paulu nendeka beya ku 2 Kolinte 6:14 ngwendi “baka-kujeneka kutaba”?

Ku 2 Kolinte 6:14, Mbimbiliya ngwayo: “Keti mulikutiiye ku joko imo na baka-kujeneka kutaba.” Nga tutala ñanda yakele na kwendeka Paulu, tumona ngwetu wakele na kutalesa ku banu baje kubalikwatasanene na cikungulukilo ca baka-Kilistu. Obu bunapu busunga mwafwa ku mikanda ikwabo ya mu Mbimbiliya Paulu wapangesele ei endekesi kutalesa kuli baje kubakele mu cikungulukilo.

Cakumweneko, Paulu wakandele baka-Kilistu mwafwa ya kulitwala ku nkuta ya “baka-kujeneka kutaba.” (1 Kolinte 6:6, NWT.) Baka-kujeneka kutaba babanendeka oku ku mukanda banapu maako ba nkuta ya mu Kolinte. Mu mukanda wamucibali wasonekelele cikungulukilo ca kolinte, Paulu wendekele ngwendi Satana ‘natsitsibalesa biyongola bya baka-kujeneka kutaba.’ Mesho aba baka-kujeneka kutaba ‘banawafwiki nanga’ mangana keti bamone muzimbu waumbwa. Aba baka-kujeneka kutaba kubamwesele ngwabo bashaka kuzibuka Yehova, mwafwa Paulu wabangele kwendeka ngwendi: “Nga munu atenguluka na kwija kuli Yehova, ei nanga bamutundisayo.”—2 Kolinte 3:16; 4:4, NWT.

Baka-kujeneka kutaba bamo bakapokola mashiko nambe kulemesa tumponya. (2 Kolinte 6:15, 16) Oloni keti baka-kujeneka kutaba boshe bali na kulwisa bangamba ba Yehova. Bamo bashaka kulilongesa busunga. Bamo banalyambata na baka-kilistu, co bashaka kutwalelelaho kukala nabo. (1 Kolinte 7:12-14; 10:27; 14:22-25; 1 Petulu 3:1, 2) Oloni ngwe mutunabanga kwendeka, Paulu napangesa manene lijwi lya “muka-kujeneka kutaba” kutalesa ku munu uje kesi na kulikwatasana na cikungulukilo cije cinapu ca “baka-kutaba muli Mwata.”—Vilinga 2:41; 5:14; 8:12, 13, NWT.

Cinangulo cili ku 2 Kolinte 6:14 cinapu ca seho manene mwafwa citwamenena baka-Kilistu mu byuma boshe mu kuyoya. Oloni kakangi bakacitalesa kuli baka-Kilistu baje bashaka kuwana munu wa kulyambata nendi. (Mateu 19: 4-6) Muka-Kilistu nalikundika kuli Yehova na kumumbwitika alinga mwamubwa kujeneka kutonda munu wa kulyambata nendi mukati ka baka-kujeneka kutaba mwafwa byuma bibamona kupwa bya seho na bilengo byabo na byuma bibakulahela byalisezela kulako nebi bya baka-Kilistu ba busunga.

Batico baje bakalilongesa Mbimbiliya na kulikwatasana na cikungulukilo ca baka-Kilistu? Nambe batico baje banapu baka-kwambulula ba kujeneka kumbwitika? Kuma nabo banapu baka-kujeneka kutaba ndi? Embwe. Baje banatambula muzimbu waumbwa na kutwaleleleho kulilongesa, co bashaka na kubambwitika kukwapandele kubatumbula ngwabo baka-kujeneka kutaba. (Loma 10:10; 2 Kolinte 4:13) Simbu kanda bamumbwitike, Koneliasi bamutumbwile ngwabo ‘munu uje wakolesele mu bulombelo, co wazibilile Njambi lyoba.’—Vilinga 10:2.

Kwesekesa na cinangulu ca Paulu cili ku 2 Kolinte 6:14, kuma muka-Kilistu uje nalikundika kuli Yehova na kumumbwitika napande kulyambata na munu uje napulika muka-kwambulula wa kujeneka kumbwitika ndi? Embwe, kapandele kulinga ngoco. Mwafwa bika? Mwafwa ya cinangulo canene Paulu kuli baka-Kilistu babafwile. Paulu wasonekele ngwendi: “Nazituka kushomboka kuli woshe-woshe yashaka, oloni kubanga muli Mwata lika.” (1 Kolinte 7:39) Kwesekesa neci cinangulo, muka-Kilistu uje nalikundika kuli Yehova na kumumbwika napande kwambatela “muli Mwata lika.”

Majwi a “muli Mwata lika” na “muli Kilistu,” alumbununa bika? Ku Loma 16:8-10; naku Kolose 4:7, Paulu wakele na kwendeka ha banu baje bakele “muli Kilistu” nambe “muli Mwata.” Nga mutanda awa mavesi, mulimwena ngweni aba banu bapwile ‘baka-kupanga ba kulongwa,’ ‘bandolome muli Kilistu,’ ‘bandolome ba cizemo,’ na ‘bindungo bakulongwa.’

Munu napande kulinga bika mangana apwe “ndungo muli Mwata”? Nga alinga byakalingi ndungo kutundilila kwisi ya mbunge na kulibyana ikeye babenya. Yesu wendekele ngwendi: “Nga munu ashaka kunjikabangeya napande kulibyana ikeye babenya na kwambata citi cendi ca kuyandesela, co atwaleleleho kunjikabangeya.” (Mateu 16:24) Munu akashanguka kukabangeya Kilistu nga alikundika kuli Njambi na kuyoya mu kulitombola na cizango ca Njambi. Co bamumbwitika na kupwa ngamba ibanangula kuli Yehova Njambi.a Ngeci, ‘kwambatela muli Mwata’ kulumbununa kulyambata na munu uje namwesa ngwendi napu muka-kutaba wa busunga uje nalikundika na kupwa “ndungo ya Njambi na ndungo ya Mwata Yesu Klistu.”—Yakomba 1:1, NWT.

Munu uje ali na kulilongesa Mbimbiliya na Bakaleho ba Yehova, co ali na kukola ku sipilitu ali na kulinga mwamubwa. Nameme ngoco, kanda alikundike laja kuli Yehova na kulyana kumupangela mu kuyoya kwendi kwoshe. Acili na kutengululako bimo mu kuyoya. Napande kutengululako bimo na kupwisamo bitondeka mangana apwe muka-Klistu wa kumbwitika simbu kanda alingeko bikwabo mu kuyoya bya kufwa ngwe kwambata.

Kuma muka-Klistu napande kukulahesa kulyambata na munu uje ali na kulinga mwamubwa ha cilongesa ca Mbimbiliya na kumubandamena ngwendi balyambata munima ya kumumbwitika ndi? Embwe. Kulinga ngoco kunasa kulingisa munu ashake lika kumumbwitika mwafwa yakushaka bulo.

Kakangi munu napu muka-kwambulula wa kujeneka kumbwitika kapandele kwambata simbu yailaha manene oku kanda bamumbwitike. Ngeci cinangulo cili helu ca kwambatela lika muli Mwata casiwa kucikabangeya. Batico kulizibasana kulyambata na munu uje nete ha seteko ya kwambata, co lalo nakolela mu naanga ya baka-Klistu na kutwalelelaho kulinga mwamubwa ha kupwa muka-kwambulula wa kujeneka kumbwitika mu cikungulukilo? Lihuleni ngweni, bika binamwonowesa kulikundika kuli Yehova? Bika bikamulingisa akwate-kwate ku masinde? Akauwasana ndi? Nameme kapwile muka-kujeneka kutaba, oloni kucitaba lalo kumutumbula ngwetu ali ‘muli Mwata.’

Cinangulo ca Paulu cikwasa yetu babenya. (Isaya 48:17) Nga banu bashaka kulyambata banalikundika laja kuli Yehova, co cikumiiyo cabo ca bulo cikala mwamubwa mwafwa cimana ha binangulo bya mu Mbimbiliya. Bamona byuma bya kulifwa kupwa bya seho, co lalo bakala na bilengo bya kulifwa. Kulinga ngoco kubakwasa bapwe bakubwahelela mu bulo bwabo. Kutundaho, nga munu ‘ambatela muli Mwata,’ amwesa ngwendi wa kulongwa kuli Yehova, co alikuwa bibezikiso byabingi mwafwa ‘[Yehova] wapwa wa kulongwa kuli baje ba kulongwa kuli ikeye.’—Myaso 18:25.

[Majwi a kwinikila]

[Cikupulo]

‘[Yehova] wapwa wa kulongwa kuli baje ba kulongwa kuli ikeye’