3. (a) Kulongwa kwapwa kuka? (b) Byakumwenako muka bitukwasa tuzibisise lijwi lya kulongwa?

³ Kuli yetu banu ba Njambi, kulongwa kunapu kuzema Njambi na mbunge yetu yoshe na kumupangela na mbunge yetu yoshe na kutwameka cizango cendi omwo twangula bya kulinga. Tumoneni mubanapangesela lijwi lya kulongwa mu Mbimbiliya. Lijwi lya Cihebelu libananungulula ngwabo “kulongwa,” lilumbununa cuma camutunu, ca kujeneka kapenga nambe calambwe. Cakumwenako, Baisalele bakele na kwana ñombelo ya tusitu kuli Yehova, co Lishiko lyamwesele ngwalyo baje tusitu kubapandele kukala na kapenga.b (Levi 22:21, 22) Banu ba Njambi kubabatabesele kwana kasitu wa kupokoka lindi, wa kujeneka litwi, wa kutibika lisho nambe uje ali na kubinja. Yehova washakele kasitu wamutunu, wa kujeneka kapenga, walambwe. (Mala 1:6-9) Yehova washaka cuma ca kujeneka kapenga nambe camutunu. Cakumwenako, mutukalanda bushuka, libulu nambe cikwata ca kupangesa, kutwesi kulanda bya kutubazeka nambe bya kutabuka. Oloni tukalanda byamutunu, byabibwa na bya kujeneka kapenga. Mu ngila imo lika, Yehova ashaka ngwendi cizemo na kulongwa kwetu kuli ikeye bipwe byamutunu, byalambwe, nambe bya kujeneka kapenga.