Bika Biyendeka Mbimbiliya ha Kulipenta na Kulicakeya?
Biyendeka Mbimbiliya
Nameme Mbimbiliya kuyendekele byabingi hali ei ñanda, kuyabindikile kulipenta, kuzala busanga nambe byuma byeka bije binakundama ku kulicakeya. Mbimbiliya itushongangeya ngwayo keti twake manene mbunge ku sholwesi yetu ya hanja, oloni twake mbunge ku kulibwahesa “kuje kukwasa kubola, kwa kwoloka na kuwa mbunge”.—1 Pita 3:3, 4.
Mbimbiliya kuyabindikile kubwahesa sholwesi yetu
Banakazi bakulongwa ba banatumbula mu Mbimbiliya babwahesele sholwesi yabo. Rabeka uje washombokele kuli Isaki muna Abrahamu, wazalele riñi ya ku lijulu na maseka na byuma bya seho bibamwanene baishemweno. (Genese 24:22, 30, 53) Co lalo na Esta nendi watabele ‘babwahese sholwesi yendi’ mwakele na kulibwahesela kupwa lishano wa mwene wa Bumwene bwa Pelesha. (Esta 2:7, 9, 12) Cisholoka ha kumubwahesa balikwasesele byuma bya kuliseza-seza mangana asholoke bwino.
Mu byakumwenako bya mu Mbimbiliya, banesekesa byuma bya kulicakeya ku byuma byabibwa. Cakumwenako, munu uje akana cinangulo cacibwa kuli “munu uje washaka kutolilila” banamwesekesa ku “lisikiyo lya goldi.” (Provebia 25:12) Co lalo na Njambi wesekesele mwakele na kulingila Baisalele ku munalume uje acakeya shombolwa wendi kulikwasesa maseka, lilyenge lya mu singo na masikiyo. Co oku kwalingisile muyati wa Isalele upwe ‘waubwa manene’.—Ezekiele 16:11-13.
Biyongola bya kuhenga ha kulipenta na kulicakeya
Biyongola bya kuhenga: Ku mukanda wa 1 Pita 3:3, Mbimbiliya inabindika “kubinda binkambu na kuzala byuma bya goldi nambe bizalo byabibwa.”
Busunga: Biñanda bili oku ku mukanda bimwesa seho ya bubwa bwa munu wa mukati kutabakana sholwesi ya hanja. (1 Pita 3:3-6) Mikanda ikwabo ya mu Mbimbiliya nayo inamwesa seho ya bubwa bwa munu wa mukati.—1 Samwele 16:7; Provebia 11:22; 31:30; 1 Timothi 2:9, 10
Biyongola bya kuhenga: Lishano wamubi Jezebele wakele na kulipenta ha mesho, ngeci oku kumwesa ngwabo kulipenta kunapu kulinga bubi.—2 Bimyene 9:30, futunoti.
Busunga: Jezebele uje wapwile cilozi na muka-kutsiya bakwabo, bamusompele mwafwa ya bilinga byendi byabibi keti mwafwa ya sholwesi yendi.—2 Bimyene 9:7, 22, 36, 37.