Muzimbu wa Bumwene bwa Njambi ukewo muzimbu wa seho manene mu Mbimbiliya. Yehova akapangesa obu Bumwene mu kushulisilila biyongola byakele nabyo mwatangele lifuti-libu. Bumwene bwa Njambi bwapwa buka? Tuzibuka bati ngwetu buli na kuyula? Byuma muka bibunalingi obu bumwene? Co bika bibukalinga kulutwe? Muno mu cilongesa na mu bilongesa bibali binatako, tukumbulula ebi bihula.

1. Bumwene bwa Njambi bwapwa buka? Iya Mwene wabwo?

Bumwene bwa Njambi bwapwa fulumende yanashimbika Yehova Njambi. Yesu Kilistu ikeye Mwene, co ali na kuyula kutundilila mwilu. (Mateo 4:17; Yowano 18:36) Mbimbiliya inendeka hali Yesu ngwayo: “Njambi akamupwisa Mwene . . . myaka yoshe.” (Luka 1:32, 33) Ha kupwa Mwene wa Bumwene bwa Njambi, Yesu akayula banu boshe bakakala hano hasi.

2. Beya bakayula hamo na Yesu?

Yesu kakayulu likalyendi. Banu ‘ba kutunda ku miyati yoshe na ku bindaka byoshe na ku mafuti oshe na ku banu boshe bakayula lifuti-libu.’ (Kujombolola 5:9, 10) Kutunda hezilile Yesu hano hasi, banu babangi banapu baka-Kilistu, co banapu baka-kumukabangeya. Kuma boshe bakayula hamo nendi ndi? Embwe, ba kupwa 144, 000 lika bakebo bakayula hamo na Yesu mwilu. (Tandeni Kujombolola 14:1-4.) Co baka-Kilistu boshe baje bakasala hano hasi bakabayula mu Bumwene bwa Njambi.—Myaso 37:29.

3. Bumwene bwa Njambi bwaliseze bati na bifulumende bya banu?

Baka-kuyula bamo bakalingi byuma byabibwa, oloni kubesi kukala na nzili ya kulinga byuma byoshe bibashaka. Co bisimbu bimo, baje bakabengi kubesi kukala na mbunge ya kushaka kukwasa banu. Oloni Yesu Kilistu, uje wapwa Mwene wa Bumwene bwa Njambi, wahi akamwinga. Njambi “akaka bumwene buje kubukahu.” (Ndanyele 2:44) Yesu akayula hano hasi hoshe, co kakakala na kaangu. Wakala na cizemo na ngozi, co akalingi byuma mu kusungama. Akakwasa banu balizeme umo na mukwabo na kulimwesa ngozi na kulinga byuma mu ngila yaibwa.—Tandeni Isaya 11:9.

4. Bumwene bwa Njambi bukayula hano hasi hoshe

Yesu Kilistu ali na nzili ya kuyula kutubakana baka-kuyula boshe ba hano hasi. Tandeni Mateo 28:18, na kusimutwiya ha cihula cinatako:

• Moko ya Yesu ya kuyula yaliseze bati na moko ya baka-kuyula ba hano hasi?

Bifulumende bya banu bikatenguluka simbu yoshe, co lalo kubyesi kuyula kaye koshe. Batico Bumwene bwa Njambi? Tandeni Ndanyele 7:14, na kusimutwiya ha bihula binatako:

• Mwafwa bika kuzibuka ngwetu ‘naumo wahi akafungulula’ Bumwene bwa Njambi kutuzibisa kubwaha?

• Byuma muka bitukalikuwa omwo Bumwene bwa Njambi bukayula kaye koshe?

5. Bumwene bwa Njambi bunapande kwinga bifulumende bya banu

Mwafwa bika? Kengeni VIDIO na kusimutwiya ha cihula cinatako.

VIDIO: Bumwene bwa Njambi Bwapwa Buka?—Mutamba wa Vidio (1:41)

• Biyulo bya banu binanene bika?

Tandeni Muka-kwambulula 8:9, na kusimutwiya ha bihula binatako:

• Mumona bati, kuma Bumwene bwa Njambi bunapande kwinga bifulumende bya banu ndi? Mwafwa bika?

6. Baje bakayula mu Bumwene bwa Njambi batuzibisisa mwamubwa

Mwene yetu Yesu asa ‘kututetela mu buzeye bwetu’ mwafwa nendi wapwile munu. (Vahevelu 4:15) Co lalo Yehova nangula banalume na banakazi ba kulongwa ba kupwa 144,000 “ba kutunda ku miyati yoshe na ku bindaka byoshe na ku mafuti oshe na ku banu boshe” mangana bakayule na Yesu.—Kujombolola 5:9.

• Muliziba bati mumunazibuka ngweni Yesu hamolika na baje bakayula nabo bazibuka mwamubwa mukwafwila kupwa munu? Mwafwa bika?

7. Bumwene bwa Njambi buli na mashiko amabwa

Bifulumende binapande kutunga mashiko aje akwasa banu na kubanyungilila. Bumwene bwa Njambi nabwo buli na mashiko abanapande kukabangeya banu. Tandeni 1 Kolinte 6:9-11, na kusimutwiya ha bihula binatako:

• Kaye kanesi kufwa bati ngwe banu boshe bali na kukabangeya awa mashiko a Njambi?a

• Mumona bati, kuma Yehova napande kuleka baje bashaka kukala mu Bumwene bwendi ngwendi bononoke awa mashiko ndi? Mwafwa bika?

• Tuzibuka bati ngwetu baje kubesi na kukabangeya awa mashiko basa kutenguluka?—Taleni vesi 11.

SIMPI YAKAMA

Bumwene bwa Njambi bunapu fulumende ya mwilu ije ikayula kaye koshe.

Kwitulukamo

• Beya bakayula mu Bumwene bwa Njambi?

• Bumwene bwa Njambi bwalisezela hali na bifulumende bya banu?

• Yehova ashaka ngwendi baje bashaka kukala mu Bumwene bwendi balinge bika?

WANENI BIKWABO

Yesu wendekele ngwendi Bumwene bwa Njambi buli kuli?

“Kuma Bumwene bwa Njambi Buli mu Mbunge Yeni Ndi?” (Ñanda ya ha webusaiti)

Bika bikalingisa Bakaleho ba Yehova bakundwiye Bumwene bwa Njambi kutubakana kukundwiya bifulumende bya banu?

Bakundwiiye Lika Bumwene bwa Njambi (1:43)

Tuzibeni biyendeka Mbimbiliya ha banu 144,000 baje banangula Yehova kukayula na Yesu.

“Beya Bakai Mwilu?” (Ñanda ya ha webusaiti)

Bika byalingisile munakazi umo uje wakele mu kamenga amone ngwendi Njambi lika ikeye asa kulingisa banu boshe babalinge mwamubwa?

“Munjazibukilile Byasa Kulingisa Banu Boshe Babalinge Mwamubwa” (Toneni! ya November 2011)

Yesu walekele baka-kumukabangeya ngwendi kubapandele ‘kupwa baka-kaye.’ (Yowano 15:19) Kujeneka kupwa baka-kaye kunambateselela kujeneka kulikobelesa mu bupolitiki na mu binzita. Oloni kujeneka kupwa baka-kaye keti kwakwasi. Banu basa kutulwisa mwafwa ya kujeneka kulikobelesa mu byuma bya kaye. Twasa kulyangununa bati ku kaye na kutwalelelaho kupwa ba kulongwa kuli Yehova Njambi?

1. Baka-Kilistu ba busunga bamona bati bifulumende bya banu?

Baka-Kilistu bakasingimika bifulumende. Yesu wendekele ngwendi: “Aneni Sezale byuma bya Sezale.” Ngeci, tukalingi ngwe mwendekele. Oku kunambateselela kwononoka mashiko a fulumende a kufwa ngwe kufweta mitelo. (Mako 12:17) Mbimbiliya imwesa ngwayo bifulumende bya banu bili na kuyula mwafwa Yehova ikeye nabitabesa ngwendi biyule. (Loma 13:1) Ngeci, tuzibuka ngwetu bifulumende bya banu bili lika na nzili ya kupwamo. Twakulahela ngwetu Njambi akapangesa Bumwene bwendi mu kumanesa bukalu bwoshe butuli na kuliwana nabwo.

2. Twasa kumwesa bati ngwetu keti tu baka-kaye?

Ngwe mwalingilile Yesu, netu kutwesi kulikobelesa mu bupolitiki. Banu mubamwene cikomokeso cimo calingile Yesu, bashakele kumupwisa mwene. Oloni wabyanene. (Yowano 6:15) Mwafwa bika? Mwafwa ikeye babenya wendekele ngwendi: “Bumwene bwange keti bwa muno mu kaye.” (Yowano 18:36) Ha kupwa bandongesi ba Yesu, kuli bingila byabingi bitwasa kumweselamo ngwetu keti tu baka-kaye. Cakumwenako, kutwesi kulikobelesa mu binzita. (Tandeni Mika 4:3.) Tukasingimika bizibukiso bya lifuti bya kufwa ngwe pandela, oloni kutwesi kubilemesa. (1 Yowano 5:21) Co lalo kutwesi kulwisa nambe kwimanena cibunga coshe-coshe ca bupolitiki. Ebi binapu bingila bimo bitwasa kumweselamo ngwetu tuli na kukundwiya Bumwene bwa Njambi nambe ngwetu fulumende yendi.

TONDESESENI

3. Baka-Kilistu ba busunga kubesi kulikobelesa mu byuma bya kaye

Yesu na baka-Kilistu ba kulibanga banatumwesa mwanja waubwa. Tandeni Loma 13:1, 5-7 na 1 Petulu 2:13, 14. Kutundaho, kengeni VIDIO na kusimutwiya ha bihula binatako.

VIDIO: Baka-Kilistu ba Busunga Kubesi Kulikobelesa mu Byuma bya Kaye—Mutamba 1 (4:28)

• Bika bitunapande kusingimikila fulumende?

• Twasa kumwesa bati ngwetu tunalyaka kwisi ya fulumende?

Nga kuli nzita mukati ka bibunga bibali, mafuti amo akalikwisi ngwawo kuwakundwiya cibunga cimo. Oloni anga akakundwiya oyo nzita. Tandeni Yowano 17:16. Kutundaho, kengeni VIDIO na kusimutwiya ha cihula cinatako.

VIDIO: Baka-Kilistu ba Busunga Kubesi Kulikobelesa mu Byuma bya Kaye—Mutamba 2 (3:11)

• Kujeneka kulikobelesa mu byuma bya kaye kulumbununa bika?

Bika bitunapande kulinga nga fulumende ituleka ngwayo tulinge byuma bije kubilitombola na mashiko a Njambi? Tandeni Vilinga 5:28, 29. Kutundaho, kengeni VIDIO na kusimutwiya ha bihula binatako.

VIDIO: Baka-Kilistu ba Busunga Kubesi Kulikobelesa mu Byuma bya Kaye—Mutamba 3 (1:18)

• Mashiko eya atunapande kwononoka nga mashiko a fulumende alilwisa na mashiko a Njambi?

• Endekeniko byuma bimo bije byasa kulingisa muka-Kilistu onowe kwononoka fulumende.

4. Keti mulikobelese mu byuma bya kaye, ipwe mu bisinganyeka nambe mu bilinga

Tandeni 1 Yowano 5:21. Kutundaho, kengeni VIDIO na kusimutwiya ha bihula binatako.

VIDIO: Baka-Kilistu Banapande Kupwa ba Kusimpa Mangana Keti Balikobelese mu Byuma bya Kaye (2:49)

• Bika byalingisile Ayenge ajeneke kulikwatasana na cibunga cimo ca bupolitiki nambe kulemesa pandela?

• Kuma nalingile mwamubwa ndi?

Byuma muka bikwabo bitulingisa kutupwile kwakukalu kujeneka kulikobelesa mu byuma bya kaye? Kengeni VIDIO na kusimutwiya ha bihula binatako.

VIDIO: Bitunalilongesa mu Kaposhi ka Kukengela—Keti Mulikobelese mu Byuma bya Kaye (5:16)

• Bika bitunapande kulinga mangana keti tulikobelese mu byuma bya kaye nga kuli bweho bumo bwa kulihyana mukati ka mafuti?

• Bika bitwasa kulinga mangana keti tulikobelese mu byuma bya kaye nameme nga byuma bibalinga baka-bupolitiki binatukundama?

• Bika byasa kulingiwa kuli yetu nga simbu yoshe tutolilila ku mizimbu ya bupolitiki nambe kulikwatasana na banu baje bashaka kwendeka lika bya bupolitiki?

SIMPI YAKAMA

Baka-Kilistu bakalingi mwoshe mubasela mangana keti balikobelese mu byuma bya kaye, ipwe mu byuma bibasinganyeka, mu byuma bibendeka, nambe mu byuma bibalinga.

Kwitulukamo

• Bika bitunapande kulyakela kwisi ya fulumende?

• Mwafwa bika kutwesi kulikobelesa mu byuma bya bupolitiki?

• Bika byasa kutulingisa kutupwile kwakukalu kujeneka kulikobelesa mu byuma bya kaye?

WANENI BIKWABO

Byuma muka bimo bitwasa kulinga mangana keti tulikobelese mu byuma bya kaye?

Yehova Kanda Atusezeho Likalyetu (3:14)

Banu mu naanga basa kulibwahesela bati mangana keti balikobelese mu byuma bya kaye?

Keti Mulikobelese mu Byuma bya Kaye Nga Kuli Bilika Nambe Biwano (4:25)

Mwafwa bika kwimanena lifuti lyetu keti cikeco cuma ca seho manene?

“Kuli Njambi Byuma Byoshe Byasiwa” (5:19)

Nga muli na kutonda bipangi, bika bimwasa kulinga mangana keti mupwe baka-kaye?

“Munu na Munu Alyambatele Citele Cendi” (Kaposhi ka Kukengela ka March 15, 2006)