Bihula Bya Baka-kutanda

Beya bapwile tupokola ba ku Tembele ya Bayunda? Co bika bibakele na kupanga?

Balebi bamo baje kubapwile tupilistu bakele na kupanga bipangi byeka, bamo bapwile tupokola. Mukulunu wa baka-kunyunga tembele ikeye wabatwamenenene. Philo, muka-kusoneka bya Bayunda wendekele bipangi bya baje tupokola ngwendi: “Bamo bakele na kukala ha bikolo bya ku tembele. Bakwabo bakele na kukala ha lutwe lwa mwela wa kujela mangana keti kukobele munu uje kubatabesele kukobelako, ipwe uje wakele na biyongola bya kukobelako nambe uje washakele kukobelako kwa kujeneka kuzibuka. Beka bakele na kunyunga mutambela wa tembele wa hanja, co bakele na kulilendela butsiki na mutanya.”

Aba tupokola bakele na kukwasa na ku nkuta ya Sunandeline. Bakebo lika Bayunda babatabesele Baloma ngwabo basa kwambata bitwa.

Muka-kulilongesa bya Mbimbiliya Joachim Jeremias wendekele ngwendi: “Yesu wehwile baje bamukutile ngwendi bika kubamukutile ha simbu yakele na kulongesa mu tembele.” (Mat. 26.55) Wendekele lalo ngwendi: “Ngwe kubapwile tupokola ba ku tembele, Yesu ngwe kabehwile cije cihula.” Co lalo Jeremias ngwendi hamo na baje bababangele kutuma ngwabo bakute Yesu bapwile tupokola ba ku tembele. (Yowa 7:32, 45, 46) Mukwita kwa simbu, baka-nkuta ya Sunandeline batumine mukulunu wa baka-kunyunga tembele na tupokola ngwabo bakakwate bandongesi ba Yesu. Co lalo hamo bakebo bapulunyile Paulu na kumutundisa mu tembele.—Vili 4:1-3; 5:17-27; 21:27-30.