Bika Binanene Bubi na Tuyando?

Nga kuli bukalu, kakangi banu bakalihula ngwabo: “Mwafwa bika?” Oloni Mbimbiliya inakumbulula mwamubwa eci cihula.

1. Satana wanenele bati bubi muno mu kaye?

Satana Liyabolo watengulukilile Njambi. Washakele kuyula bakwabo, mukemwo wongumwine banu ba kulibanga, Adama na Eva. Washakele ngwendi balikwatasane nendi mu kutengulukila Njambi. Ngeci, wakwisile Eva. (Kushangumuka 3:1-5) Wamulingisile asinganyeke ngwendi kuli cuma cimo cacibwa canamushwekela Yehova. Wamwesele ngwendi banu basa kupwa ba kubwahelela nameme kubononoka Njambi. Satana wendekele makuli a kulibanga mwalekele Eva ngwendi katsi. Mukemwo Mbimbiliya inatumbula Satana ngwayo “muka-makuli, co ikeye ishe ya makuli.”—Yowano 8:44.

2. Adama na Eva bangwile kulinga bika?

Yehova wanene Adama na Eva byuma byoshe bibatondele. Basele kulya ku muti woshe-woshe kutundisako lika muti umo. (Kushangumuka 2:15-17) Oloni bakebo balile ku muti wababindikile Njambi. Eva “wapotwele ku bushuka bwawo, walile.” Co Adama “nendi lalo walile.” (Kushangumuka 3:6) Kubononokele Njambi. Adama na Eva bapwile ba kulumbunuka. Ngeci, kukwapwile kwakukalu kuli bakebo kulinga byuma byabibwa. Balingilile lika shakelo omwo kubononokele Njambi. Balingile bubi, co bamwesele ngwabo kubashakele ngwabo Njambi abatwamenene. Byuma bibalyangwilile byabanenelele tuyando.—Kushangumuka 3:16-19.

3. Byuma byalyangwilile Adama na Eva binatunenela bika?

Adama na Eva mubalingile bubi, bapwile oni ba kujeneka kulumbunuka. Ngeci, batambwisileko na bana babo kujeneka kulumbunuka. Mbimbiliya inendeka ha bubi bwalingile Adama ngwayo: ‘Bubi bwezile hano hasi kwitila muli munu umolika, co bubi bwendi bunanene kutsa. Co kutsa kunete ku miyati yoshe ya banu.’—Loma 5:12.

Kuli byuma byabingi bikatunenela tuyando. Bisimbu bimo tukaliwana mu bukalu mwafwa ya byuma byabibi bitukangula kulinga. Bisimbu bimoco tukaliwana na bukalu mwafwa ya byuma byabibi bibakalingi bakwetu. Bisimbu bikwabo tukaliwana mu bukalu mwafwa ya kukala mu mwela umo ha simbu ikulingiwa byuma byabibi.—Tandeni Muka-kwambulula 9:11.

TONDESESENI

4. Iya ali na kutunenela tuyando?

Banu babangi bakasinganyeka ngwabo Njambi ikeye ali na kuyula kaye. Kuma mukemwo ndi? Kengeni VIDIO.

VIDIO: Iya Ali na Kuyula Kano Kaye? (1:24)

Tandeni Yakomba 1:13 na 1 Yowano 5:19. Kutundaho, simutwiyeni ha cihula cinatako:

• Kuma Njambi ikeye ali na kunena bubi na tuyando ndi?

5. Ciyulo ca Satana cinanene bika?

VIDIO: Njambi Natabesela Bika Tuyando Tutwaleleleho?—Mutamba wa Vidio (3:07)

Tandeni Kushangumuka 3:1-6, na kusimutwiya ha bihula binatako:

• Makuli muka endekele Satana?—Taleni vesi 4 na 5.

• Byuma muka byendekele Satana bije byamwesele ngwe Yehova nashwekela banu byuma bimo?

• Kuma majwi a Satana amwesa ngwawo banu banapande kwononoka Yehova asina bapwa ba kubwahelela, indi basa kupwa ba kubwahelela nameme kubononoka Yehova?

Tandeni Muka-kwambulula 8:9, na kusimutwiya ha cihula cinatako:

• Bukalu muka butuli na kuliwana nabwo mwafwa ya kujeneka kutuyula kuli Yehova?

1. Adama na Eva bapwile ba kulumbunuka, co bayoyele mu Paradaisi. Oloni bakabangeyeye byabalekele Satana na kutengulukila Yehova

2. Munima ya kutengulukila Njambi, kaye kanashulu na bubi na tuyando na kutsa

3. Yehova akamanesa bubi, tuyando na kutsa. Co banu bakapwa ba kulumbunuka mu Paradaisi

6. Yehova watwaka mbunge

Kuma Njambi ali na kumona tuyando tutuli na kuliwana natwo ndi? Tumoneni byendekele Mwene Ndabiti na kapositolo Petulu. Tandeni Myaso 31:7 na 1 Petulu 5:7. Kutundaho, simutwiyeni ha cihula cinatako:

• Muliziba bati mumunazibuka ngweni Yehova watwaka mbunge, co lalo ali na kumona tuyando tutuli na kuliwana natwo?

SIMPI YAKAMA

Satana Liyabolo na Adama na Eva bakebo bananene bubi mu kaye. Yehova watwaka mbunge, co ololo amanesa tuyando twoshe tutuli na kuliwana natwo.

Kwitulukamo

• Satana Liyabolo wakwisile bati Eva?

• Bika binatundu mu kujeneka kwononoka kwa Adama na Eva?

• Tuzibuka bati ngwetu Yehova ali na kumona tuyando tutuli na kuliwana natwo?

WANENI BIKWABO

Kwesekesa na Mbimbiliya, bubi bwapwa buka?

“Bubi Bwapwa Buka?” (Ñanda ya ha webusaiti)

Tandeni mu kushula ñanda yakatwile Satana Liyabolo mu citungu ca Edeni.

“Njambi Necelela Bika Tuyando?” (Kaposhi ka Kukengela ka January 1, 2014)

Moneni muinakumbulwila Mbimbiliya bihula bimo byabikalu.

“Bika Byakatwile Nzita Ije Yatsiile Banu Babangi? Mwafwa Bika Njambi Kaimikile?” (Ñanda ya ha webusaiti)

Munalume umo wazibukile byuma bili na kunena tuyando.

Hano Kunjesi Likalyange (5:09)

Banu bali na kulinga bubi, bali na kuyanda na kutsa mwafwa bisemi betu ba kulibanga, Adama na Eva kubononokele Njambi.a Nameme ngoco, tuli na lilabelelo. Yehova watumine Munendi, Yesu Kilistu mangana akutupatule ku bubi na ku kutsa. Mbimbiliya imwesa ngwayo kutsa kwa Yesu kukekwo kunapu ndando ya kupatula. Ndando ya kupatula inapu fweto ibafweta mangana bapatule munu. Yesu wanene mwonyo wendi wa kulumbunuka mangana upwe fweto. (Tandeni Mateo 20:28.) Watushokwelelele ngila mangana twase kuwana byuma byoshe byazimbalesele Adama na Eva. Co wamwesele ngwendi ikeye na Yehova batuzema manene. Cino cilongesa cimikwasa mumone seho ya kutsa kwa Yesu.

1. Kutsa kwa Yesu kutukwasa bati ano matangwa?

Ha kupwa baka-bubi, tukalingi byuma byabibi bije kubyesi kuzibisa Yehova kubwaha ku mbunge. Oloni nga tuliziba kubihya ha byuma bitunalingi na kulomba ngwetu Yehova atukonekele kwitila muli Yesu Kilistu na kulinga mwoshe mutwasela kujeneka kwilukila obwo bubi, co twasa kupwa kabusamba ka Njambi. (1 Yowano 2:1) Mbimbiliya ngwayo: “Kilistu watsililile bubi lumo ku simbu yoshe, muka-busunga kutsila baka-bubi, ngeci, amitwamenene kuli Njambi.”—1 Petulu 3:18.

2. Kutsa kwa Yesu kukatukwasa bati kulutwe?

Yehova watumine Yesu kwakututsila mangana “woshe akulahela kuli ikeye kesi anyonge, oloni akale na mwonyo wa myaka yoshe.” (Yowano 3:16) Ololo Yehova amanesa byuma byoshe byabibi binaija mwafwa ya kujeneka kuziba kwa Adama. Byoshe ebi bikasiwa mwafwa ya ndando ya kupatula ya Yesu. Ngeci, nga tukulahela ndando ya kupatula ya Yesu, co tukalikuwa kuyoya myaka yoshe mu paradaisi hano hasi.—Isaya 65:21-23.

TONDESESENI

3. Kutsa kwa Yesu kutupatula ku bubi na ku kutsa

VIDIO: Bika Byatsililile Yesu?—Mutamba 1 (2:01)

• Bika byazimbalesele Adama omwo kononokele Njambi?

Tandeni Loma 5:12, na kusimutwiya ha cihula cinatako:

• Bukalu muka bumuli na kuliwana nabwo mwafwa ya bubi bwalingile Adama?

Tandeni Yowano 3:16, na kusimutwiya ha cihula cinatako:

• Yehova watuminine bika Munendi hano hasi?

1. Adama wapwile munu wa kulumbunuka, oloni kononokele Njambi, co walingile bubi. Ngeci, banu banatambula bubi na kutsa kuli ikeye

2. Yesu wapwile munu wa kulumbunuka, co wononokele Njambi. Ngeci, banu basa kukapwa ba kulumbunuka na kukayoya myaka yoshe

4. Kutsa kwa Yesu kukwasa banu boshe

VIDIO: Bika Byatsililile Yesu?—Mutamba 2 (2:00)

• Kutsa kwa munu umo kukwasa bati banu boshe?

Tandeni 1 Timateo 2:5, 6, na kusimutwiya ha cihula cinatako:

• Adama wapwile munu wa kulumbunuka, oloni mwalingile bubi, watambwisile banu boshe bubi na kutsa. Yesu nendi wapwile wa kulumbunuka ngwe Adama. Co kutsa kwendi kupatula bati banu boshe?

5. Ndando ya kupatula inapu bwana bwanamyana Yehova

Babusamba ba Yehova bamona ndando ya kupatula kupwa bwana bwanabana Yehova. Cakumwenako, tandeni Ngalatiya 2:20, na kusimutwiya ha cihula cinatako:

• Kapositolo Paulu wamwesele bati ngwendi wamwene ndando ya kupatula kupwa bwana bwamwanene Njambi?

Adama mwalingile bubi, ikeye na bana bendi boshe bapandele kutsa. Oloni Yehova watumine Munendi akututsile mangana tukayoye myaka yoshe.

Omwo mutanda mavesi anatako, singanyekeni mwalizibilile Yehova mwamwene Munendi ayanda. Tandeni Yowano 19:1-7, 16-18, na kusimutwiya ha cihula cinatako:

• Muliziba bati mumunazibuka byuma byanamilingila Yehova na Yesu?

SIMPI YAKAMA

Yehova asa kukonekela bubi bwetu, co twasa kukayoya myaka yoshe mwafwa Yesu watutsililile.

Kwitulukamo

• Bika byatsililile Yesu?

• Ndando ya kupatula ya Yesu yasa bati kumanesa bubi bwalingile Adama?

• Kutsa kwa Yesu kumikwasa bati?

WANENI BIKWABO

Bika bibanatumbwila mwonyo wa Yesu wa kulumbunuka ngwabo ndando ya kupatula?

“Kutsa kwa Yesu Kunapu Bati ‘Ndando ya Kupatula Banu Babangi’?” (Ñanda ya ha webusaiti)

Bika bitunapande kulinga mangana tukoboke?

“Yesu Atwobola Bati?” (Ñanda ya ha webusaiti)

Kuma Yehova asa kukonekela munu uje nalingi bubi bwakama ndi?

“Bikumbululo ku Bihula bya Kukundama ku Mbimbiliya” (Kaposhi ka Kukengela ka May 1, 2013)

Ndando ya kupatula ya Kristu yakwasele bati munalume umo atengulule futisi yendi.

“Hanisali Mutu wa Mifilifili” (Ñanda ya ha Webusaiti)