“VAMUNUNGULWILE MANGANA KETHI AMONE KUTHSA”

Kuyoya cha Inoke chahwile vati? Kuyoya cha Inoke chachathi manene kuchithzivithitha kutuvakana kuthsa chendi. Ku mukanda wa Kushangumuka vanendeka lika ngwavo: “Inoke wendele na kulitombola na Njambi wa vuthunga thimbu yendi yoshe, cho kuvamumwene lalo, omwo Njambi wamwambatele.” (Kushangumuka 5:24, NWT) Njambi wamwambatele vati? Kapositolo Paulu walumbunwine ngwendi: “Ha kukulahela, Inoke vamunungulwile mangana kethi amone kuthsa, cho naumo wahi wamuwanene mwafwa Njambi wamunungulwile. Thimbu kanda vamunungulule, watambwile vukaleho vuje vwamwethele ngwavo wathzivithile Njambi kuvwaha.” (Vahevelu 11:5, NWT) Paulu walumbunwine vika ha kwendeka ngwendi, “vamunungulwile mangana kethi amone kuthsa”? Vimbimbiliya vimo vinendeka ngwavo Njambi watwalele Inoke mwilu. Oloni ovwo kethi vuthunga. Mbimbiliya imwetha ngwayo Yesu Kilisitu ikeye wa kulivanga kuthanguka na kuya mwilu.—Yowano 3:13.

Cho Inoke “vamunungulwile” vati mangana kethi “amone kuthsa”? Mpamo Yehova wanungulwile Inoke kamandondo kamandondo kutunda ku kuyoya kuya ku kuthsa, mangana kethi athzive kayando ka vuthsi. Oloni ha kulivanga Inoke “watambwile vukaleho vuje vwamwethele ngwavo wathzivithile Njambi kuvwaha.” Mu ngila muka? Thimbu kanda athse, Inoke mpamo wamwene vimona vije vyatundile kuli Njambi vije vyamwethele ngwe kaye kanapu palandaisi. Omwo wamwene ovyo vimona vyavivwa, Inoke walalele tulo twa vuthsi. Paulu mwathonekele kutaletha kuli Inoke na kuli vanalume na vanakathzi vakwavo va kulongwa, wendekele ngwendi: “Vanu voshe ava vathsile mu kukulahela.” (Vahevelu 11:13) Kutundoho, mpamo vitothzi vendi vashakethzekele chivimbi, oloni ‘naumo wahi wachiwanene.’ Mpamo Yehova wachishwekele mangana kethi vachiviyithe nambe kuchipangetha mu vulombelo vwa makuli.b

Kwetheketha nomu muvanalumbunwinamo Vithoneka helu, tumoneni muvyatha kutukwathelamo mangana tuthzivithithe vuthsi vwa Inoke. Lingeni ngwe muli na kumona vije vyalingiwile, cho lalo anukeni ngweni ikeyo lika ngila yanethi kwovokelamo. Omwo Inoke washatukile nunda yakama wajukile. Vitothzi vendi vakele na kumuyomba, mwafwa ya kuvaleka uje muthzimbu wa kuthompa. Cho Inoke wawanene mutamba mwa kuvanda na kuhwimako kamandondo, oloni wathzivukile ngwendi vatha kumuwana. Ha thimbu ije vuthsi vwakele muyehi nendi. Omwo wakele na kuhwima, walombelele kuli Njambi. Kutundoho lyova lyamuhwile. Cho wamwene chimona chije chamwethele ngwe Inoke vamutwala ku mutambela wa kulyala.

Thinganyekeni ngweni vamumwethele lifuti lije lyalithethzele kulako na lije lyathzivukile. Wamwene ngwe lyalifwile na lihya lya Endeni, oloni kumwakele vakelumbi va kuvindika vanu kukovelamo. Cho mwakele vanalume na vanakathzi vavangi va kulikangula vaje vakele na mivila ya vukwenje. Voshe vakele mu kwoloka. Vyuma vyathzivukile Inoke vya kufwa ngwe chithzindo na mapaketho kuvyakelemo. Evi vimona vyalingithile Inoke alithzive ngwendi Yehova ali hamo nendi, cho lalo wamuthzema. Walithzivile ngwendi nendi nakundama ku mutambela uje, cho mukemwo mwimbo lyendi. Omwo lyova lyamuhwile, Inoke walithzimine ku mesho na kulala tulo twa kujeneka kulota.

Okwo vene kukekwo kwali na lelo lino nalala tulo twa vuthsi, cho Yehova Njambi kakamwivala. Yesu wakulahethele ngwendi, vanu voshe vaje vali mu vithinganyeka vya Njambi vakathziva lijwi lya Kilisitu, cho vakatuhuka mu vimbumbo na kumona kaye kakaha kakavwa.—Yowano 5:28, 29.