Tembwinineni Vavuthamba va Yehova

1-3. (a) Mwafwa vika twakulahela ngwetu twatha kupwa vavuthamba va Njambi? (b) Vanu muka vatuthimutwiya omu mu chilongetha?

AVILAHAMA vamutumbula lutatu mu Mbimbiliya ngwavo kavuthamba ka Njambi. (2 Mithzimbu 20:7; Isaya 41:8; Yakomba 2:23) Ikeye lika munu ivanatumbula mu Mbimbiliya ngwavo kavuthamba ka Njambi. Cho Avilahama, ikeye lika munu wapandele kupwa kavuthamba ka Yehova ndi? Embwe. Mbimbiliya imwetha ngwayo tuvavoshe twatha kupwa vavuthamba vendi.

² Mu Mbimbiliya muli vanalume na vanakathzi va kulongwa vaje vathingimikile Yehova na kumukulahela, cho vapwile vavuthamba vendi. (Tandeni Myatho 25:14.) Navo vakala ha “mbunga ya vakaleho vavangi” vaje vendekele Paulu. Ava vanu voshe vapwile vavuthamba va Njmabi.—VaHevelu 12:1.

³ Tuthimutwiyeni hali vavuthamba va Yehova vatatu vavanendeka mu Mbimbiliya: (1) Lute, fwile wa kulongwa wa ku Mowavi na (2) Hezekiya, mwene wa kulongwa wa ku Yundeya na (3) Maliya, ina ya Yesu wa kulikehetha. Vika vitulilongetha kuli ava vanu muvalikutililemo vuthamba na Njambi?

WAMWETHELE CHITHZEMO CHA KWONWA KUTENGULUKA

4, 5. Chuma muka chachikalu wangwile kulinga Lute, cho mwafwa vika chapwile chachikalu? (Kengeni chikupulo ha liputa 14.)

⁴ Naumi na vainamweno vaLute na Olepa, vendele vungendthzi vwavulaha kutunda ku Mowavi kuya ku Isalele. Omwo vetele hakati, Olepa wangwile kwiluka kwimbo lyavo ku Mowavi. Oloni Naumi washakele kwiluka kwimbo lyendi ku Isalele. Lute wangwile kulinga vika? Chapwile cha chikalu kwangula vya kulinga. Wangwile kwiluka ku Mowavi kukakala na nanga yendi, indi kuya na Naumi inamweno ku Mbetelehema?—Lute 1:1-8, 14.

⁵ Nanga ya Lute yakele mu Mowavi. Ngwe welukile kuli vavushoko vendi, ngwe vakamunyungile mwamuvwa. Wathzivukile vanu va mu Mowavi na ndaka ivendekele na vithemwa vyavo. Naumi kakulahethele Lute kukamulingila vyuma vya chifwa echi mu Mbetelehema. Naumi wakele na kutewa ngwendi hamo kakamuwanena munalume wa kumwambata, nambe njuvo yakukala. Naumi walekele Lute ngwendi eluke ku Mowavi. Olepa welukile “kuli vavushoko vwendi na kuli vinjambi vendi.” (Lute 1:9-15) Oloni Lute kelukile kuli vavushoko vwendi na ku vinjambi va makuli embwe.

6. (a) Lute wanyanyamene vati ha kwangula vya kulinga? (b) Mwafwa vika Mbowasi wendekele ngwendi Lute wapwithile Yehova vutewelo vwendi?

⁶ Chasholoka ngwe Naumi na munalume wa Lute vakevo vakwathele Lute athzivuke Yehova. Wathzivukile ngwendi Yehova kalifwile na tulunga va ku Mowavi. Wathzemene Yehova, cho wathzivukile ngwendi napandele kumuthzema na kumulemetha. Ngechi, Lute wanyanyamene ha kwangula vya kulinga. Walekele Naumi ngwendi: “Vanu vove vakapwa vanu vange, cho Njambi yove akapwa Njambi yange.” (Lute 1:16) Tukathzivi kuvwaha mutukathinganyeka ha chithzemo chamwethele Lute kuli Naumi. Oloni chithzemo chamwethele Lute kuli Yehova chikatuthzivitha manene kuvwaha. Evi vikevyo vyathzivithile Mbowasi kuvwaha mukemwo wamushangathzalele ‘ha kwija kuli Shukulu Kalunga mu kumunyunga.’ (Tandeni Lute 2:12.) Majwi apangethele Mbowasi aha, atwanukitha omwo kathzila akafwikila tuvana twendi mu mambava. (Myatho 36:7; 91:1-4) Yehova nendi wanyungile Lute mu ngila eyi vene na kumuvethzikitha mwafwa ya likulahelo lyendi. Lute kaliveyele ha vyuma vyangwile.

7. Vika vyatha kukwatha vaje vali na kulithindiya kulikundika kuli Yehova?

⁷ Vanu vavangi vakalilongetha vya Yehova, oloni kuvamupwithile vutewelo vwavo. Kuvethi kulikundika vwathi kuli Njambi na kuvambwitika. Nga neni mukemwo mu muli na kulinga, cho pangeleni ha vyuma vili na kumishwaletha. Munu na munu alyangwile Njambi yapangela. (Yoshuwa 24:15) Oloni munu wa kunyanyama angula kupangela Njambi wa vuthunga. Nga mulikundika kuli Yehova, mumwetha ngweni mushaka kumupwitha vutewelo vweni. Cho amyana ndthzili ya kumupangela nameme muliwana na vukalu. Lute nendi vamukwathele kuli Njambi.

“WAKAKATEYEYE KULI YEHOVA”

8. Nanga ya Hezekiya yafwile vati?

⁸ Vuyoye vwa Hezekiya vwa lithethzele manene na vwa Lute. Hezekiya wakele mu nanga ije yalikundikile kuli Njambi. Oloni kethi vaIsalele voshe vatwaleleleho kupwa va kulongwa. Ahaze, ishe ya Hezekiya wapwile Mwene wamuvi. Kathingimikile tembele ya Njambi, wongumwine mbunga yoshe valemethe vinjambi veka. Ahaze wakombelelele vandolome va Hezekiya vamo ku vinjambi va makuli. Hezekiya wakolelele mu nanga yaivi.—2 Vimyene 16:2-4, 10-17; 2 Mithzimbu 28:1-3.

9, 10. (a) Vika vyapandele kuluvaletha Hezekiya? (b) Mwafwa vika kutwapandele kuluvalela Njambi? (c) Mwafwa vika kutwapandele kuthinganyeka ngwetu munu woshe akatambula futithi ya vavushoko na vithemi vendi?

⁹ Mwanja wauvi wa Ahaze ngwe walingithile munendi Hezekiya aluvalele Yehova. Matangwa ano, vanu vaje vali mu vukalu vwa kufwa ngwe vwa Hezekiya, vakalithzivi ngwavo chinapandemo ‘kuluvalela Yehova,’ nambe kuluvalele munga yendi. (Vithimo 19:3) Vamo vakalithzivi ngwavo vilinga vyavivi vya vithemi vavo vivalingitha vayoye mwavuvi, nambe kwita mu vukalu vuvaneti vithemi vavo. (Ezekiyele 18:2, 3) Evi vithinganyeka vya vuthunga ndi?

¹⁰ Kuyoya kwa Hezekiya kwamwethele ngwavo ovyo vithinganyeka kethi vya vuthunga. Kutwapandele kuluvalela Yehova. Kethi ikeye akanene vyuma vyavivi ku vanu. (Yombi 34:10) Vithemi vanatha kulongetha vana vavo vilinga vyavivi nambe vyavivwa. (Vithimo 22:6; Kolose 3:21) Oloni echi kuchilumbununa ngwavo vitukalingi tukavitambula kuli vithemi, nambe vavushoko vwetu. Mwafwa vika? Mwafwa Yehova nana munu na munu ndthzili ya yakwangula vyavivwa nambe vyavivi. (Kwituluka mu Mashiko 30:19) Hezekiya wapangethele vati eyi ndthzili?

11. Vika vyalingithile Hezekiya apwe mwene wamuvwa mu Yundeya?

¹¹ Nameme ishe wapwile mwene wamuvi mu Yundeya, oloni Hezekiya wayulile mwamuvwa. (Tandeni 2 Vimyene 18:5, 6.) Kakavangeyeye vilinga vyavivi vya ishe. Oloni watolililile ku tupolofweto va Yehova va kufwa ngwe Isaya na Mika na Hoseya. Watolililile ku kunangula kwavo. Kulinga ngocho kwamukwathele amanethe vukalu vwanenele ishe. Wajelethele tembele na kulomba Njambi athambethe vivi vya vanu na kunyongetha kulemetha kwa makuli mu mitambela yoshe. (2 Mithzimbu 29:1-11, 18-24; 31:1) Omwo mwene wa vaAsilya Senakelivi wethzile mu kulwitha Yelusalema, Hezekiya wamwethele kuthimpa na likulahelo lyendi. Wakulahelele ngwendi Yehova anyunga vanu vendi na kuvatakametha. (2 Mithzimbu 32:7, 8) Thimbu imo, Hezekiya walyalethele, oloni omwo Yehova wamunangwile, wononokele. (2 Mithzimbu 32:24-26) Hezekiya watwana mwanja wauvwa utunapande kukavangeya. Katembwininine vilinga vyavivi vya ishe. Oloni walikutile vuthamba na Yehova.

12. Vanu vavangi matangwa ano vanamwetha vati ngwavo vapwa vavuthamba va Yehova ngwe Hezekiya?

¹² Mu kaye matangwa ano muli vukenya, cho kumwethi chithzemo, ngechi vana vavangi shavo kunyunga vithemi vavo mwamuvwa. (2 Timateo 3:1-5) Vaka-Kilisitu vavangi vanalikwata vuthamba na Yehova, nameme vatunda mu vinanga vyavikalu vya kulithethzathethza. Ngechi mwa Hezekiya, kuvethi na kutembwinina vithemi nambe vavushoko vwavo. Njambi natwana ndthzili ya kulyangwila vya kulinga, cho twatha kumwononoka na kumupangela ngwe mwalingile Hezekiya.

‘YANGE NGAMBA YA SHUKULU KALUNGA’

13, 14. Vika vyalingithile chipangi chivanene Maliya chisholoke ngwe chitele, oloni wakumbulwile vati Ngambiliyele?

¹³ Omwo mwetile myaka yaingi kutunda hali Hezekiya, kwakele lalo mumbanda wa kulikehetha wa lithzina lya Maliya. Yehova wamwanene chipangi cha kulitila mwafwa wapwile kavuthamba kendi. Wemitile na kuthema Muna Njambi, cho wamulelele mwamuvwa. Yehova wathzemene Maliya na kumukulahela, mukemwo wamuvethzikithile. Oloni walingile vati ha kulivanga omwo vamulekele ou muthzimbu?

¹⁴ Kakangi, tukathimutwiya ha kuvethzika kwa Maliya. Oloni vyuma muka vyalishoshomwenene? Kangelo Ngambiliyele wamulekele ngwendi emita kwa kujeneka kulimona na munalume. Ngambiliyele kalekele vavushoko vwa Maliya nambe vandambo vendi owo akamwa limo. Ngechi walishoshomwene ngwendi vamumona vati? Alumbunwina vati Yosefa mangana atave ngwendi kalingile vupangala? Cho lalo wakele na chipangi chakama cha kulela Muna Njambi. Kututhzivuka vyoshe vyathinganyekele Maliya, oloni tuthzivuka vyakumbulwile omwo Ngambiliyele wamunenelele muthzimbu. Wendekele ngwendi: “Yange njinapu nji ngamba ya Shukulu Kalunga, chilingiwe kuli yange ngwe muunendekela.”—Luka 1:26-38.

15. Mwafwa vika likulahelo lya Maliya lyapwile lyakama?

¹⁵ Likulahelo lya Maliya lyapwile lyakama. Walivwahethelele kulinga vyoshe vivamulekele, ngwe mwalingile ndungo. Wakulahelele ngwendi Yehova amunyunga. Vika vyalingithile Maliya akale na likulahelo lyakama ngocho? Likulahelo kutwethi kuthemuka nalyo. Oloni tunapande kulingako vimo na kulomba Yehova akwithule kufwitangana kwetu athinoni tukale nalyo. (Ngalatiya 5:22; Efeso 2:8) Maliya wapangele na ndthzili mu kukanyametha likulahelo lyendi. Tuthzivuka vati ngocho? Tuthimutwiyeni mwatolililile, novyo vyendekele.

16. Vika vimwetha ngwavo Maliya wapwile muka-kutolilila wamuvwa?

¹⁶ Mwatolililile Maliya. Mbimbiliya ngwayo tunapande ‘kuthzambula kuthziva, oloni twishwale kukumbulula.’ (Yakomba 1:19) Maliya wapwile muka-kutolilila wamuvwa. Mbimbiliya yamwetha ngwavo Maliya watolililile ku vyuma vyathzivile, maneneni vyuma vivamulongethele vya kukundama kuli Yehova. Wathinganyekele ha vyuma evi vya theho. Chakumwenako, ha kuthemukwa kwa Yesu, Maliya watolilile omwo kanyungi wamulekele muthzimbu wa kutunda kuli kangelo. Kundaho, Yesu mwakele na myaka 12, wendekele chuma chimo chije chakomokethele Maliya. Maliya watolililile na kuthinganyeka ha vyuma vyoshe evi vyathzivile.—Tandeni Luka 2:16-19, 51.

17. Vika vitulilongetha ku endekethi ya Maliya?

¹⁷ Vyendekele Maliya. Mbimbiliya kuyethi kwendeka manene vyuma vyendekele Maliya. Vwingi vwa vyuma vyendekele tuviwana ku Luka 1:46-55. Awa majwi amwetha ngwavo Maliya wathzivukile mwamuvwa Vithoneka. Mu ngila muka? Majwi endekele Maliya analifu na majwi aje a mulilombelo lya Hana, ina ya Samwele. (1 Samwele 2:1-10) Chasholoka ngwe Maliya wendekele majwi a mu Vithoneka mu vithimbu 20. Maliya washakele kwendeka vuthunga vyalilongethele kuli kavuthamba kendi wakama Yehova.

18. Twatha kutembwinina vati Maliya?

¹⁸ Ngechi mwa Maliya, netu Yehova atha kutwana chipangi chije chitumona ngwetu chachikalu manene. Tutembwinineni mwanja wa Maliya wa kutambula chipangi chivatwana na kukulahela ngwetu Yehova atukwatha. Twatha kumutembwinina lalo nga tutolilila kuli Yehova na kuthinganyeka ha vyuma vitunalilongetha na viyongola vyendi. Cho tulekeniko vakwetu vitunaliongetha.—Myatho 77:11, 12; Luka 8:18; Loma 10:5.

19. Vika vitukakala navyo nga tutembwinina likulaheho lya vangamba va Njambi vavanendeka mu Mbimbiliya?

¹⁹ Tunamono ngwetu Lute na Hezekiya na Maliya vapwile vavuthamba va Yehova ngwe Avilahama. Cho lalo kuli “mbunga ya vakaleho vavangi” vaje vapwile vavuthamba va Njambi. Tutembwinineni likulahelo lya kukanyama lyava vanu. (VaHevelu 6:11, 12) Nga tuvatembwinina, cho tukapwa vavuthamba va Yehova ku myaka yoshe.