Vihula Vya Kutunda Kuli Vaka-kutanda

Mwafwa vika vitothzi va Yesu vathingimikile manene kutana ku mavoko?

Ñanda ya kutana yapwile imo ya viñanda vyakele na kunenetha vitothzi va Yesu vamulwithile kumo na vandongethi vendi. Mu Lishiko lya Mosesa vendekelemo manene vya kulitepa na vanu vakele na vukalu vwa kususula kwa ha mivila na mbumba na kujenjuka kukwata vanu na tuthitu va kuthsa. Vendekelemo lalo na mwakujelethela vanu vakele na vukalu vwa chifwa echi. Vathele kulinga viñombelo na kukusha vuthzalo vwavo na kuvetangela mema.—Levi., kape. 11-15; Kula., kape. 19.

Vakulunu va mu vulombelo vwa vaYunda valumbunwine mwamuvwa awa mashiko. Livulu limo ngwalyo nga vatunga lishiko lya kulijeletha, kuvanga kukale “vihula vya mwakulingila ngocho na thimbu ya kulinga ngocho na mwakulekelako vakwavo na vyuma vyakupangetha nevi kuvyapandele ku kulijeletha na vilika vivanapande kukavangeya vanu ha kulijeletha.”

Vaka-kulwitha Yesu vamwihwile ngwavo: “Omwo vikajo vandongithi vove vakaleulula vilongetha vya vakukulwila vetu? Vakevo kuvethi kujwela ku mavoko omwo valya.” (Mako 7:5) Ava vitothzi va Yesu kuvalumbunwine ngwavo kulya na mathzilo kwatha kunena vukalu. Vashakele lika ngwavo vandongithi vakave chithemwa cha kutana ku mavoko thimbu kanda valye. Lije livulu litunatumbula helu lyavwethelelele lalo ngwalyo: “Valingile lalo vimata ha vimbashiya vya kupangetha mu kushangelela mema na ha mema avanapande kupangetha vanu na hali vaka-kushangelela na ha theteko ya livoko inapande kujula.”

Yesu wendekele vuthunga hali awa mashiko a vunu. Walekele vakulunu va mu vulombelo vwa vaYunda va mu chita cha myaka cha kulivanga ngwendi: “Isaya muka-kwimanena wambulwile mwamuvwa vyeni ngwendi, ‘Njambi ngwendi, vanu ava vali na kunjithingimika lika na majwi avo, oloni vimbunge vyavo vili kulyala nange [Yehova.] Chinapu changocho kuli vakevo kunjilemetha omwo vakevo vali na kulongetha mashiko a vanu ngwe akewo anapu mashiko ange.’ Yeni munaka mashiko a Njambi kumukulo, cho muli na kwononoka vilongetha vya vanu.”—Mako 7:6-8.