Chifwa cha Vunjambi Chije Chapwa cha Theho Manene Kutuvakana Ndaimani

Muka-kwambulula umo wa kujeneka kumbwitika wa lithzina lya Haykanush wa ku Armenia, wanonele pasipoti kuyehi na limbo. Omwo mu pasipoti mwakele madebit card na njama ya vimbongo. Walekele munalume wendi wa kujeneka kumbwitika, vyanawana.

Ou ndokathzi na muka-limbo lyendi vakele mu vuhutu ha thimbu eyi. Oloni vatwalele evi vimbongo kuli vavenyavyo kupangetha keyala ije yakele ha pasipoti. Owo vavenya pasipoti na nanga yendi vakakathamene manene. Haykanush na muka-limbo lyendi vamulekele ngwavo vivalilongethele mu Mbimbiliya vikevyo vyavakwathele valinge vyuma mu vuthunga. Cho lalo vamulekele nomwo muvafwila Vakaleho va Yehova na kumwanako mavulu etu hamolika na nanga yendi.

Vaka-nanga yowo wathzimbalethele pasipoti vashakele kufweta Haykanush vimbongo, oloni wavyanene. Litangwa lyateleko, munakathzi wa muka-pasipoti waile kuli Haykanush na munalume wendi, mangana akamwethe kukandelela kwendi, cho wathindiyiye Haykanush atambule kandthzeya ka ndaimani kamutwalelele.

Vanu vavangi vatha kukomoka kulongwa kwamwethele Haykanush na munalume wendi, ngwe muyakomokelele ije nanga. Oloni na Yehova wakomokele ndi? Wamwene vati kulongwa kwavo? Kulongwa kwavo kwatondele kupanga na ndthzili ndi?

VIFWA VYA THEHO KUTUVAKANA VUFUKO

Vikumbululo ku vihula ovyo vyavyathi. Mwafwa vika? Mwafwa vangamba va Njambi vathzivuka ngwavo kutembwinina Yehova kwapwa kwa theho manene kutuvaka ndaimani na ngolinde nambe vufuko vwoshe vwoshe. Vanu vanatha kwombwanetha vyuma vyakamono Yehova kupwa vya theho. (Isaya 55:8, 9) Cho vangamba vendi vathzivuka ngwavo kulifwita kwavo mu kutembwinina vifwa vya Yehova kunapu kwa theho.

Viyendeka Mbimbiliya ha mana na kuthzivithitha vimwetha ngwavo eyi ñanda yapwa ya vuthunga. Ku Vithimo 3:13-15 ngwavo: “Vavethzika vanu vaje vawana mana, vaje vawana kuthzivithitha. Kukala na mana kunatuvakana kukala na vimbongo, kukala nawo kuchilyetheka kukala na ngolinde. Mana ali na theho yakama kutuvakana mamanya a theho, na vimo vyahi viushaka vilyetheka na mana.” Twamono ngwetu evi vikevyo vifwa vya theho kuli Yehova kutuvakana vufuko vwoshe vwoshe.

Cho wamona vati kulinga vyuma mu vuthunga?

Yehova wapwa wa vuthunga. “Kethi kukwitha.” (Tito 1:2) Cho wahwimininine kapositolo Paulu athonekele vaka-Kilisitu va vaHevelu va mu chita cha myaka cha kulivanga ngwendi: “Kakateyeni na kutulombelela lalo. Mwa vuthunga vene tuli na chitakutaku chachivwa, omwo tushaka kulinga chuma cha vuthunga thimbu yoshe.”—VaHevelu 13:18.

Yesu watwakelele mwanja wauvwa wa kulinga vyuma mu vuthunga. Chakumwenako, omwo Kapilisitu Wakama Kayafase wendekele ngwendi, “Mu lithzina lya Njambi wa kuyoya, ololo njikuleka ulithinge ngechi utuleke nga yove u Wakuvwavetha, Muna Njambi,” Yesu wamulekele vuthunga ngwendi ikeye Wakuvwavetha nambe ngwetu Mesiya. Wendekele vuthunga nameme wathzivukile ngwendi kulinga ngocho kulingitha vaka-Munga vamuvangeye ngwavo muka-kushaula na kumuthsiya.—Mateo 26:63-67.

Yetu cho? Umona chuma chimo cha theho chitutonda kuchiwana kuvanga kukwitha nambe kupandakana makuli na vuthunga, twendeka makuli indi vuthunga?

VYUMA VYATHA KWONOWETHA MUNU KUPWA WA KULONGWA

Kulinga vyuma mu vuthunga kwatha kukaluwa muno mu matangwa a kukotoka muje mwalithala vanu “vaka-kulithzema vakevo vavenya, vaka-kuthzema vimbongo.” (2 Timateo 3:2) Nga vimbongo vyakaluwa nambe nga kuwana vipangi kwakaluwa, vanu vavangi kuvethi kumona ngwavo kwiva na kukwitha na kulinga vyuma vikwavo vya kuhenga kwapwa kwakuvi. Evi vithinganyeka vyalithala ano matangwa, mukemwo vanu vavangi vamona ngwavo muka-vuthunga manene katha kufuka. Nambe vaka-Kilisitu vamo vanayi omwo mu ngila yaivi, cho lithzina lyavo lyalivwa mu chikungulukilo linavihya mwafwa ya “chipululu cha vimbongo.”—1 Timateo 3:8; Tito 1:7.

Oloni vaka-Kilisitu vavangi vakatembwinina Yesu. Vanamono ngwavo kukala na vifwa vya Njambi kwapwa kwa theho kutuvakana vufuko vwoshe vwoshe. Mukemwo vaka-Kilisitu vaje vakovela sikola kuvapandele kukwitha mu kushaka vapase. (Vithimo 20:23) Kethi ngwavo thimbu yoshe nga tulinga vyuma mu vuthunga cho tutambula vimo ngwe ndokathzi Haykanush. Oloni Njambi ngwendi kupwa va vuthunga kwakuvwa, cho kutulingitha tukale na chitakutaku chachivwa. Chapwa cha theho manene.

Mwanja wa Gagik umwetha vuthunga vweyi ñanda. Nendeka ngwendi: “Thimbu kanda njipwe muka-Kilisitu, njapangele mu kampani imo. Vavenya kampani wakele na kukwitha ngwendi kampani kuyethi kuwana vwino vimbongo mangana kethi afwete lithimu. Ha kupwa nji mukulunu ha kampani, yange njinapandele kuthzika muka-kufwetetha lithimu ku kanwa mangana kethi alangulule vilinga vya kampani yetu vya linyanyamena. Kukapwa muje, vanu vanjithzivukile kupwa muka-linyanyamena. Omwo njalilongethele vuthunga, njechelele ocho chipangi nameme njakele na kutambula vimbongo vyavingi. Njashokolwele kampani yange. Njavangele kuithoneketha kuli vaka-mashiko, cho njatwaleleleho kufweta lithimu.”—2 Kolinte 8:21.

Gagik ngwendi: “Njakele na kuwana vimbongo vyavindondo, chakaluwile kuwanena nanga yange vya kulikwatha navyo. Oloni njavwahelela, mwafwa njili na chitaku-taku cha kujela ku mesho a Yehova. Njinakela vana vange va vakwenje vavali mwanja wauvwa, cho vali na kunjipangetha mu chikungulukilo. Vaka-kufwetetha lithimu na vakwetu vanjikapanga navo vanjimona oni kupwa munu muka-vuthunga.”

YEHOVA AKATUKWATHA

Yehova wathzema vaje vajeletha lithzina lyendi mu kutembwinina vifwa vyendi vyavivwa vya kufwa ngwe kulinga vyuma mu vuthunga. (Tito 2:10) Cho nakulahetha ngwendi nga tulinga evi vyuma, atukwatha. Wahwiminine Mwene Ndaviti endeke ngwendi: “Njapwile njimukwenje, ololo njinakuluvala, kanda njimone Shukulu Kalunga kwivala muka-vuthunga, nambe vana vendi kulomba vyakulya.”—Myatho 37:25.

Vyaliwanene navyo Lute wa kulongwa vimwetha vuthunga vwa awa majwi. Kathethzele inamweno Naumi mwafwa ya kukuluvala, oloni wangwile kukala hamo lika nendi. Lute waile ku Isalele kuje kwakalemethele Njambi wa vuthunga. (Lute 1:16, 17) Wapwile wa kulongwa cho wapangele na ndthzili chipangi cha kupupulula, kwetheketha na Lishiko lya kukundama kuli tuhutu. Yehova watwaleleleho kunyunga Lute na Naumi ngwe mwalingile kuli Ndaviti. (Lute 2:2-18) Kakwathele lika Lute ku muvila. Nendi vamwangwile akundame ku nanga ya Mwene Ndaviti na Mesiya ivakulahethele.—Lute 4:13-17; Mateo 1:5, 16.

Vangamba va Yehova vamo vali mu vuhutu. Oloni kuvethi na kushakethzeka vimbongo mu vingila vyavyathi vya kuhenga, vali na kupanga na ndthzili. Omwo valinga ngocho, vamwetha ngwavo vifwa vya Njambi vya kufwa ngwe kulongwa, vyapwa vya theho manene kutuvakana vufuko.—Vithimo 12:24; Efeso 4:28.

Vaka-Kilisitu vavangi mu kaye vanakulahela ngwavo Yehova atha kuvakwatha ngwe mwalingilile kuli Lute. Vakulahela Uje wendekele ngwendi: “Kunjikamithethze na lumo lwahi nambe kumivyana.” (VaHevelu 13:5) Yehova namwetha lwalwingi ngwendi atha kukwatha vanu va kulongwa, cho atwalelelaho kulinga ngocho. Thimbu yoshe akashulithilila chikulahetho chendi cha kukwatha vangamba vendi ku muvila.—Mateo 6:33.

Eyo vanu vanatha kumona ndaimani na vyuma vyeka kupwa vya theho. Oloni tuthzivuka ngwetu kulongwa na vifwa vyavivwa vikwavo vikevyo vyapwa vya theho manene kuli Tate yetu wa mwilu kutuvakana vufuko.