KOMA ka kufwa ngwe vwato ka kushongetha lapi kanakwata Jordan kasholoka ngwe kukethi na theho. Oloni kuli ikeye kanapu ka theho manene. Jordan nendeka ngwendi: “Kavushoko kange wa kakulukathzi Russell, ikeye wanjaneneko te njichili nji mwanike.” Munima ya kuthsa kwa Russell, Jordan wanangukile ngwendi Russell wapangele chipangi chakama manene chakuthzembeleka va kuku yendi na vithemi vendi ha thimbu ivakele mu vukalu. Jordan nendeka lalo ngwendi: “Aka ka vwana kakandondo kanapu ka theho manene kuli yange, mwafwa njalilongetha vyavingi hali Russell.”

Vyaliwanene navyo Jordan vimwetha ngwavo, vanu vamo vanatha kumona ngwe vwana vumo vuvanavana kuvwethi na theho. Oloni vakwavo vakavumono kupwa vwa theho manene. Mbimbiliya ili na kulumbununa vya vwana vuje kutwatha kulava, omwo inendeka ngwavo: “Omwo Njambi wathzemene vaka-kaye manene ngechi wanene Munendi umo lika, ngechi woshe akulahela kuli ikeye kethi anyonge, oloni akale na mwonyo wa myaka yoshe.”—Yowano 3:16.

Vwana muka vene ovwo vwatha kunenela vanu mwonyo wa myaka yoshe? Kuma kuli vwana vwa theho ngechi mwovu ndi? Vamo kuvethi kumona theho yovu vwana, oloni vaka-Kilisitu va vuthunga, vakavumono kupwa ‘vwakama manene.’ (Myatho 49:8; 1 Petulu 1:18, 19) Njambi wanenene vika mwonyo wa Munendi kuli vaka-kaye?

Kapositolo Paulu wendekele vyalingilile ngocho ngwendi: “Vuvi vwethzile hano ha kaye hali munu umo lika, cho vuvi vwendi vunanene kuthsa. Cho kuthsa kunete ku miyati yoshe ya vanu.” (Loma 5:12) Munu wa kulivanga, Andama, waviyithile mwafwa kononokele Njambi, ngechi fweto yendi yapwile kuthsa. Vana va Andama va mu kaye mwoshe vali na kuthsa mwafwa ya ikeye.

“Fweto ya vuvi inapu kuthsa, oloni vwana vwa Njambi vunapu mwonyo wa myaka yoshe muli Kilisitu Yesu Mwene yetu.” (Loma 6:23) Njambi watumine Munendi Yesu Kilisitu kwija hano hathi na kwana mwonyo wendi wa kuthungama mangana apatule vanu ku kuthsa. Woshe uje akulahela mu ñombelo ya Yesu akawana mwonyo wa myaka yoshe kwitila mu ndando ya ‘kupatula.’—Loma 3:24.

Paulu wendekele ha vivethzikitho vya Njambi vyakana vaje vamulemetha kwitila muli Yesu Kilisitu ngwendi: “Tukandeleleni kuli Njambi omwo vwana vwendi vuje kutwatha kulumbununa.” (2 Kolinte 9:15) Ovu vwana vunapu vwakama manene vuje kutwatha kulumbununa. Vika Ndando ya kupatula yapwila vwana vwa theho manene kutuvakana vwana vwoshe vwavuvwa vwa Njambi vwanana kuli vanu? Ovu vwana vwalithethze vati na mavwana akwavo a Njambi?a Cho tunapande kuvumona vati? Mu viñanda vivali vinatako, tumilanya ngwetu muwane omwo Mbimbiliya yakumbulwila evi vihula.

IYA WAMYANENEVWO?

Vwana vumo vwapwa vwa theho kuli yetu mwafwa vatwanenevwo kuli munu uje ali na moko nambe uje itwathingimika manene. Vwana vunatha kupwa vwavundondo, oloni vupwa vwa theho kuli yetu mwafwa vutunda kuli muka-nanga yetu nambe kavuthamba itwathzema. Echi chasholokele omwo Russell wanene vwana kuli Jordan, uje ivanatumbula mu ñanda inahu. Echi chakundama vati ku vwana vwa ndando ya kupatula?

Cha kulivanga, Mbimbiliya inendeka ngwavo: Njambi “watumine Munendi umo lika mu kaye ngechi tukale na mwonyo muli ikeye.” (1 Yowano 4:9) Echi chinalingitha ngwavo ovu vwana vupwe vwa theho. Kukwethi munu weka ali na ndthzili ngwe Njambi. Muka-kwimba wa Kahevelu wathonekele ngwendi: “Vathzivuke ngechi yove lika wapwa Shukulu Kalunga muka-kushwana kaye koshe.” (Myatho 83:18) Kutwatha kutambula vwana vwa chifwa echi kuli vanu vaje vali na moko.

Cha mu chivali Njambi wapwa “Tatetu.” (Isaya 63:16) Mu ngila muka? Watwanene mwonyo. Kutundoho, akatukwatha ngwe omwo chithemi mwakakwathelamo vana vendi. Omwo Njambi wethekethele vanu vendi va kuthañulu kuli Efalime, wendekele ngwendi: “Isalele yove wapwa munange injathzema manene. . . . Mbunge yange ikushaka manene, cho njikakuthzivila mema ku mbunge.” (Njelemiya 31:20) Na matangwa ano Njambi mukemwo mwakalithzivilamo hali vaka-kumulemetha. Kapwile lika Ishamatanga wetu, oloni wapwa Tatetu na Kavuthamba ketu. Echi chilingitha ngwavo vwana vwoshe vutunda kuli ikeye vupwe vwa theho.

VIKA VYAMYANENENEVWO?

Vwana vwatha kupwa vwa theho nga munu uje natwanavwo nalingi ngocho kutundilila kwithi ya mbunge yendi. Uje ana vwana mu vuthunga kethi kuvandamena ngwendi netu tumulingileko chimo.

Njambi watumine Munendi mwafwa watuthzemene. Mbimbiliya ngwayo: “Cho Njambi nasholola chithzemo chendi kuli yetu omwo watumine Munendi umo lika.” Vika wamutuminine? “Ngechi tukale na mwonyo muli ikeye.” (1 Yowano 4:9) Kuma kuli umo wathindiyiye Njambi kulinga ngocho ndi? Embwe. Ndando ya ‘Yesu Kilisitu ya kupatula’ imwetha “kutetela kwa Njambi” kwakama.—Loma 3:24.

Vika twendekela ngwetu Njambi natwana vwana omwo ya “kutetela” kwendi kwakama? Mbimbiliya inendeka ngwavo: “Njambi nasholola chithzemo chendi chakama kuli yetu, omwo ha thimbu ije twapwile tu vaka- vuvi, Kilisitu watuthsililile.” (Loma 5:8) Chithzemo cha Njambi cha kutundilila kwithi ya mbunge chikecho chanenethele ngwavo amene vanu vaka-kuthzeya na tuhutu na vaka-vuvi. Echi chithzemo te kuchatupandele, cho lalo kutwatha kumufweta. Ovu vwana vunapu vwakama manene.

KULIFWITA MUKA KWANALINGI HA KUTWANA OVU VWANA?

Vwana vumo vukapu vwa theho mwafwa uje natwanavwo nalifwiti ha kuvuwana. Nga munu alyana kutwana chuma chije chanakulahela manene, cho twatha kumwetha kukandelela kuli ikeye mwafwa nalyana.

Njambi “wanene Munendi umo lika.” (Yowano 3:16) Watwanene munendi yathzema manene. Yesu walikwatathanene na Njambi ha myaka yaingi mu kutanga vyuma vya mwilu na hathi, cho wathzivithile Njambi ‘kuvwaha.’ (Vithimo 8:30) Njambi wathzema “Munendi” Yesu, uje wapwa “chifwa cha Njambi.” (Kolose 1:13-15) Ikeye wapwile manene kuyehi nendi kutuvakana vyoshe vya kutanga.

Oloni Njambi “kavyanene kwana Munendi umo lika.” (Loma 8:32) Yehova watwanene munendi yathzema manene. Kukwethi vwana vutuvakana ovu.

MUVUMIKWATHELAMO OVU VWANA

Vwana vumo vwatha kupwa vwa theho, mwafwa vutukwatha. Chakumwenako, mulithziva vati nga munu umo alyana kumifwetela ku chipatela mangana vamithake? Mukandelela manene kuli uje munu, indi vati?

“Omwo vanu voshe vathsa omwo vali hamo na Andama, mu ngila eyi vene voshe vakavathangwila ku mwonyo omwo vali hamo na Kilisitu.” (1 Kolinte 15:22) Ha kupwa tu vana va Andama tuvavoshe tuli na ‘kuthsa,’ cho kutwatha kulitenga ku mishongo na vuthsi nambe kwiluka etu lika kuli Njambi nambe kujeneka kulithziva mulonga. Ha kupwa vanu va kujeneka kulumbunuka kutwatha ‘kuliyoyetha’ yetu vavenya. Mbimbiliya yendeka ngwavo: “Munu katha kulikula ikeye vavenya, ikeye katha kufweta Njambi ndando ya mwonyo wendi . . . Vije vyafweta kuvyatha kupwithamo.” (Myatho 49:7, 8) Kutwatha kufwetela ndando ya kupatula, ngechi kunapande kutukwatha. Nga kuvatukwatha, cho na chimo chahi chitwatha kulinga lika lyetu.

Yehova mu chithzemo chendi walyanene kwovola vanu, omwo wanene Yesu mangana ‘voshe vakavathangwile ku mwonyo.’ Ndando ya kupatula ikashulithilila vati awa majwi? “Maninga a Yesu, Munendi, atujeletha, ku vuvi vwoshe.” Kukulahela mu ñombelo ya Yesu kunalingitha ngwavo vanu vavangi vavathambethe ku vivi vyavo na kukawana mwonyo wa myaka yoshe. (1 Yowano 1:7; 5:13) Ndando ya kupatula ikakwatha vati vanu vatwathzema vaje vanathsi? “Omwo kuthsa kwethzile hali munalume umo, mu ngila eyi vene kuthanguka ku vathsi kunaija hali munu umo [Yesu].”—1 Kolinte 15:21.a

Ñombelo ya Yesu inapu vwana vwakama vwatwanene Njambi mu chithzemo chendi, cho walingile ngocho kutundilila kwithi ya mbunge yendi. Na umo wahi watwanaho laja vwana vwa kufwa ngwe vwanatwana Yehova Njambi. Cho kukwethi vwana vwatha kupwa vwa theho kutuvakana vuje vutupatula ku vuvi na kuthsa. Eyo kukwethi vwana vutuvakana Ndando ya kupatula

VWANA vuvatwana vunapande kutushongangeya tumwethe kukandelela. Yesu wendekele ha kukandelela omwo wakangwithile vanalume likumi ku mushongo uvakele nawo wa mbumba. Umo wa vaje vanalume likumi “welukile, cho washangathzalele Njambi na lijwi lyakama.” Yesu wehwile ngwendi: “Kuma kuvapwile likumi vaje njinakangwithile ndi? Cho oni vakwavo vatanu na vawana vali kuli?” (Luka 17:12-17) Vika tulilongethaho? Tunatha kwivala vwathi vyuma vyavivwa vivanatulingila vakwetu.

Ndando ya kupatula yalithethze na mavwana akwavo. Yapwa vwana vwa theho manene vuvanatwana. Munapande kulinga vika ha vyuma vyanamilingila Njambi?

• Thzivukeni uje Namyana. Munapande kulingako chimo mangana ndando ya kupatula imikwathe kukawana mwonyo wa myaka yoshe. Yesu walombele Ishe ngwendi: “Mwonyo wa myaka yoshe ukewo ou, ngechi vakuthzivuke yove Njambi umo lika wa vuthunga, cho na kuthzivuka Yesu Kilisitu, uje iwatumine.” (Yowano 17:3) Nga vamileka ngwavo, kuli munalume umo wamyovwele te muchili muvavandondo. Kuma echi kuchimishongangeya muthzivuke owo munalume, novyo vyalingilile ngocho ndi? Yehova Njambi uje watwanene vwana vwakutwovola, ashaka ngwendi tumuthzivuke na kushwenya kuyehi nendi. Mbimbiliya itunangula ngwavo: “Shwenyeni kuyehi na Njambi, cho naikeye lalo akashwenya kuyehi neni.”—Yakomba 4:8.

• 

  Kulaheleni ndando ya kupatula. “Woshe akulahela kuli Mwana ali na mwonyo wa myaka yoshe.” (Yowano 3:36) Kumwetha likulahelo kulumbununa vika? Kulumbununa kulingako vyuma vimo vije vimwetha ngwavo twakulahela mu ndando ya kupatula. (Yakomba 2:17) Vyuma vya kufwa vati? Vwana vupwa vweni nga muvutambula na mavoko avali na kuvupangetha. Ngechi, munapande kupanga na ndthzili na kumwetha ngweni mwakulahela mu ndando ya kupatula. Mu ngila muka? Thzivukeni vyashaka Njambi kuli yeni, na kuyoya mwaya chithzango chendi.a Lombeni Njambi athambethe vuvi vweni na kukala na chitakutaku cha kujela. Kulaheleni ngweni ndando ya kupatula yanana Njambi ikalingitha vaje voshe vali na likulahelo vakalikuwe kuyoya myaka yoshe mu kwoloka na kuvwahelela kulutwe.—Vahevelu 11:1.

• 

  Yeni ku Chilika cha Kwanuka kuthsa kwa Yesu. Yesu ikeye washangumukile echi chilika chije chikatwanukitha ndando ya kupatula. Wendekele kutaletha ku chilika ngwendi: “Lingeni echi mukunjanuka yange.” (Luka 22:19) Vakaleho va Yehova vakalinga chilika cha kwanuka kuthsa kwa Yesu lya mu Chivali, April 11, 2017, mangwethzi. Echi chilika chikapwa cha ola imo lika. Kukakala ñanda ije ikalumbununa vya kuthsa kwa Yesu nomwo vuthsi vwendi vutukwathelamo matangwa ano, na kulutwe. Mwakawali vanu vakele oku ku chilika vetele ku 20 milyoni mu kaye mwoshe. Tumilanya ngwetu mwije ku chilika echi kwakumwetha kukandelela ku vwana vwakama vwanatwana Njambi.