Mutanya umo lya Chalumingo, Kenneth na Filomena vaje vakala ku Curaçao vendelele munu na munakathzi wendi vaje vavakele na kulilongetha navo Mbimbiliya.

Kenneth wendekele ngwendi: “Mutwaketele ku njuvo yavo twakawanene vanapatela mukati, cho munyau kuwakeleho. Oloni kuli vimo vyanjilingithile njitumine munakathzi foni.”

Munakathzi wakumbulwile foni, cho wendekele ngwendi munalume wendi wakele ku vipangi. Omwo wanangukile ngwendi Kenneth na Filomena vakele hanja, wethzile ku chikolo, cho wavalekele ngwendi vakovele mukati.

Kenneth na Filomena vanangukile ngwavo ou munakathzi wakele na kulila. Omwo Kenneth washangumukile chilongetha na lilombelo, ou munakathzi waputukile lalo kulila. Kenneth na Filomena vehwile ou munakathzi vukalu vwakele navwo.

Ou munakathzi wavalekele ngwendi washakele kulithsiya owo vene mutanya uvethzile, washangumukile na kuthoneka mukanda wa kuthethzela munalume wendi oloni foni yatumine Kenneth ya mulingithile alikele. Wavalekele lalo ngwendi wombwele, ngechi vamutandeleleko vithoneka vimo vya mu Mbimbiliya vije vya muthzembelekele. Oku kumuthzembeleka kwamwovwele.

Kenneth wendekele ngwendi: “Twakandelelele kuli Yehova ha kulikwathetha kangelo nameme sipilitu yendi ya kujela kutulingitha tutume foni mangana tukwathe uje munakathzi wakele mu vukalu.”a

Kenneth na Filomena vatava ngwavo Njambi walikwathethele kangelo, nameme sipilitu yendi ya kujela nambe ngwetu ndthzili ya Njambi kuvatwamenena. Kuma chili Njambi wavatwamenenene, indi vyaliwaneneneho lika?

Kututhzivuka mwamuvwa. Oloni tuthzivuka ngwetu Njambi akalikwathetha tungelo kukwatha vanu ku sipilitu. Chakumwenako, Mbimbiliya ngwayo Njambi walikwathethele kangelo kutwamenena Filipu muka-kwambulula kukwatha Kaithopya uje washakethzekele vukwathi vwa ku sipilitu.—Vilinga 8:26-31.

Vulombelo vwavungi vukashongangeya vanu vakulahele vanu va ku sipilitu vaje vakala na ndthzili yakama manene. Ava vanu va ku sipilitu vakavamwetha kupwa vanu va ngothzi vaje vakalingi chipangi cha Njambi na kunyunga munu na munu. Vanu vavangi kuvakulahelele lika ngwavo tungelo kuvakala oloni vakulahela lalo ngwavo vakavakwatha mu vingila vya kulitila. Oloni kuli vanu vamo vaje kuvakulahelele ngwavo tungelo kuvakala.

Tungelo kuvakala ndi? Nga kuvakala, cho vatunda kuli? Tungelo vafwa vati? Vatha kutukwatha ndi? Tutondethetheni vukaleho.

• Ngwe omwo Njambi wapwa Sipilitu na tungelo navo vapwa sipilitu, cho ‘kuvakele na muvila na vithsiya,’ ngechi kutwatha kuvamona. Tungelo va kulongwa vakala na lithetha lya kukala na Njambi mwilu.—Luka 24:39; Mateo 18:10; Yowano 4:24.

• Thimbu imo tungelo vakele na kusholoka mu chifwa cha vunu omwo Njambi wakele na kuvatuma hano hathi, cho valitengulwile lalo mu chifwa chavo nga vanamanetha kulinga vipangi vyavo.—Maako 6:11-23; 13:15-20.

• Nameme Mbimbiliya iketheketha tungelo ku vanalume, oloni kukwakele kangelo wa munalume nameme wa munakathzi. Kuvethi kwambata na kukita, embwe. Tungelo kuvavatangele ngwe muvatangelele vanu hano hathi, kupwa tukeke na kupwa vanike na kukola kupwa vakulunu. Yehova ikeye watangele tungelo mukemwo Mbimbiliya ikavatumbula ngwayo “vana va Njambi.”—Yombi 1:6; Myatho 148:2, 5.

• Mbimbiliya yamwetha ngwayo kwakaka “vindaka vya vanu nambe vya tungelo,” kulumbununa ngwe vanu va ku sipilitu vakala na ndaka ivakendeka. Nameme Njambi walikwathethele tungelo mu kwendeka na vanu, kethi kututavetha kulemetha tungelo nambe kulombela kuli vakevo.—1 Kolinte 13:1; Kujombolola 22:8, 9.

• Mwilu mwakala makulukathzi likumi a makulukathzi likumi a tungelo, vaje vatha kweta mu mambilyoni.—Ndanyele 7:10, NWT; Kujombolola 5:11, NWT.

• Tungelo vapwa “vandthzili” na mana kutuvakana vanu. Vanatha kupulula manene na kutuvakana kuwalenga melu.—Myatho 103:20; Ndanyele 9:20-23.

• Nameme tungelo vakala na mana amangi na ndthzili yakama manene, oloni kuli vyuma kuvatha kulinga, cho lalo kuli vyuma kuvathzivuka.—Mateo 24:36; 1 Petulu 1:12.

• Tungelo vavatangele na vunu vwavo na vifwa vya vunjambi na ndthzili ya kulyangwila vya kulinga. Vanatha kwangula kulinga vyuma vyavivwa nameme vyavivi ngwe vanu. Chaluvinda tungelo vamo valyangwilile kutengulukila Njambi.—Yunda 6.

Mbimbiliya kuyethi kulongetha ngwayo munu na munu wakala na kangelo muka-kumunyungilila. Yesu wendekele vene ngwendi: “Kengeni ngechi kethi muyengule umo wa ava vavandondo [vandongethi va Kilisitu]. Omwo njimileka ngwange, thimbu yoshe tungelo twavo vali mwilu ku mesho a Tate wa mwilu.” (Mateo 18:10) Oloni hano Yesu walumbunwine ngwendi tungelo vaka mbunge umo na umo wa vandongethi vendi. Ngechi vaka-kulemetha va vuthunga kuvethi kulingila vyuma shakelo na kuvandamena ngwavo tungelo va Njambi vavanyungilile.

Oku kulumbununa ngwavo tungelo kuvethi kukwatha vanu ndi? Embwe. (Myatho 91:11) Vamo vakalithzivi ngwavo Njambi napangetha kangelo mu kuvanyungilila na kuvatwamenena. Kenneth ivanatumbula kumaputukilo nendi walithzivile ngocho. Kutwatha kuvyana, hamo wendekele vuthunga. Vakaleho va Yehova kakangi vakamono muvakavakwathela ku tungelo omwo vakambulula muthzimbu wauvwa. Oloni kututhzivuka omwo Njambi mwakapangethelelamo tungelo mu kukwatha vanu mwafwa kutwethi kuvamona. Nameme ngocho, kutuviyitha nga tukandelela Muka-ndthzili Yoshe mu vingila vyoshe vyoshe vyakatukwathelamo.—Kolose 3:15; Yakomba 1:17, 18.

Eyo, tungelo vavavi kuvakala. Vatundililile kuli? Anukeni ngweni Njambi watangele tungelo na ndthzili ya kulyangwila vya kulinga. Munima ya kutanga Andama na Eva, kangelo umo wa kulumbunuka wapangethele mwamuvi ndthzili yendi ya kulyangwila vya kulinga wakwithile Andama na Eva, ngechi vatengulukilile Njambi. (Kushangumuka 3:1-7; Kujombolola 12:9) Mbimbiliya kuyatumbwile lithzina, nameme chipangi chakele nacho ou kangelo mwilu thimbu kanda atengulukile Njambi. Oloni hanima ya kutengulukila Njambi, Mbimbiliya inamutumbula kupwa Satana, lithzina linamufwila lije lilumbununa “Muka-kulwitha,” na Liyavolo lije lilumbununa “Muka-kuvangeya.”—Mateo 4:8-11.

Chaluvinda, kutengulukila Njambi kwatwaleleleho. Mu matangwa a Nowa, tungelo vaje kututhzivuka vungi vwavo, “vathethzele mwela wavo” mu nanga ya Njambi ya mwilu. Ava tungelo valikelele kulinga vipangi vyavanene Njambi, cho valitengulwile kupwa vanu na kwija hano hathi kwa kuyoya vuyoye vwavuvi.—Yunda 6; Kushangumuka 6:1-4; 1 Petulu 3:19, 20.

Vika vyalingiwile kuli ava tungelo? Omwo Njambi wanenele livathzi mangana ajelethe kaye, ava tungelo vathethzele mivila yavo ya vunu na kulitengulula kwapwa vanu va ku sipilitu na kwiluka lalo mwilu. Oloni Njambi katavethele vaje tungelo vavavi veluke ku “myela yavo” ya kulivanga. Ngechi wavakutile na kuvaka mu “lithuthulungu lya kwithi [lya ku sipilitu],” lije vatumbula ngwavo Tatalase. (Yunda 6; 2 Petelu 2:4) Ava vandemone vanatavetha Satana Liyavolo “mwene ya mindthzindthzime ya kujwala,” uje “akalipwitha ikeye vavenya ngwe kangelo ka mutanya” avatwamenene.—Mateo 12:24; 2 Kolinte 11:14.

Mbimbiliya ikalongetha ngwayo Vumwene vwa Njambi vuje Mwene yavwo napu Mesiya vavushimbikile mu 1914.a Hanima ya kushimbika ovu vumwene, Satana na vandemone vendi vavandandumwine mwilu na kwija hano hathi. Vandemone vanaluvala vamanene mwafwa vavasheka mwilu, cho vali na kukundwiya vuvi na vilinga vya vukwithzi vije vinalithala manene muno mu kaye—Kujombolola12:9-12.

Kutuma kwa vuvi kumwetha ngwavo chino chiyulo cha vukenya ololo vachitundithako. Ololo ava vandemona vavavi vavanyeka ndthzili ya kuyula vanu. Hanima ya myaka 1,000 ya Chiyulo cha Vumwene vwa Njambi, ava vandemona vakavatavetha kwetheka vanu lwa mamanethelo. Cho hanima yevi vyoshe, Satana na vandemona vendi vakavanyongetha.—Mateo 25:41; Kujombolola 20:1-3, 7-10.

Mbimbiliya ikamwetha ngwayo ha vithimbu vimo tungelo vakanyungilila vangamba va Njambi va vuthunga mangana chithzango cha Njambi chilingiwe. (Myatho 34:7) Vyakumwenako:

• Thimbu kanda Yehova anyongethe vinganda vyavivi vya Sondoma na Ngomola, tungelo vakwathele Lote na nanga yendi vatunde muje mu nganda ivaile na kunyongetha.—Kushangumuka 19:1, 15-26.

• Mu Mbambilone ya kuthañulu vakwenje vatatu va Vahevelu vavombilile mu lilungu lya tuhya mangana vathsilemo, oloni Njambi ‘watumine kangelo kendi kwamena ava vanalume vaka-kumupangela na kumukulahela.’—Ndanyele 3:19-28.

• Hanima ya kukala mu mbulu ya vindumba vuthsiki vwoshe, Ndanyele wendekele ngwendi: “Njambi yange ikeye natumine kangelo kendi kushoka tunwa twa vindumba” mukemwo njinovoka.—Ndanyele 6:16, 22.

TUNGELO VAKWATHELE CHIKUNGULUKILO CHA VAKA-KILISITU CHA KULIVANGA

Thimbu imo tutumwa va Njambi vakwathele chikungulukilo cha vaka-Kilisitu cha kulivanga mangana viyongola vya Yehova vilishulithilile. Vyakumwenako:

• Kangelo washokolwele vikolo vya kamenga, cho watuhwile hanja tupositolo vaje vavakutile na kuvashika vatwaleleleho kwambulula mu tembele.—Vilinga 5:17-21.

• Kangelo walekele Filipu muka-kwambulula ngwendi aye ku ngila ya mambo ije itunda ku Yelusalema iya ku Ngaza kukambulwila Kaithopya uje waile ku Yelusalema na kulemetha Njambi.—Vilinga 8:26-33.

• Omwo thimbu yetele ije Njambi washakele ngwendi vaje kuvapwile Vayunda vapwe vaka-Kilisitu, kangelo washolokele kuli Konelyasi lishwalale wa ku Loma mu chimona, cho wamulekele ngwendi alanye Petulu ku njuvo yendi.—Vilinga 10:3-5.

• Omwo Petulu wakele mu kamenga, kangelo washolokele kuli ikeye na kumutuhwitha mu kamenga.—Vilinga 12:1-11.

MUVAKAMIKWATHELA TUNGELO

Kukwethi vukaleho vumwetha ngwavwo ano matangwa Njambi ali na kupangetha tungelo kukwatha vanu mu vingila vya kukomowetha ngwe vije vivanendeka mu Mbimbiliya. Oloni Yesu wendekele ha vithimbu vyetu ngwendi: “Evi viñanda vyavivwa vya vumwene vakavyambulula mu kaye mwoshe ngwe kupwa vukaleho ku miyati yoshe, cho athinoni kukotoka kwa kaye kukaija.” (Mateo 24:14) Muthzivika ngweni tungelo vakatwamenena vandongethi va Kilisitu mu chipangi cha kwambulula ndi?

Ku Kujombolola vamwetha ngwavo tungelo vakakwatha vanu mu kaye koshe valilongethe vya Yehova, nevi vyanayongola kulingila vanu. Kapositolo Yowano wathonekele ngwendi: “Athinoni njamwene kangelo mukwavo ali na kupulula mwilu ha mukambwila, na lijwi lya viñanda vyavivwa vya kwambulula kuli vanu va hano hathi na ku mafuti oshe na ku miyati yoshe na ku vindaka vyoshe na ku vanu voshe. Cho wendekele na lijwi lyakama ngwendi, ‘Komokeni Njambi, cho shangathzaleni vukama vwendi! Omwo thimbu inete ngechi athompe vanu voshe. Lemetheni uje watangele lilu na hathi na mema a kalunga na mathima a mema a tuvwelu-vwelu!’” (Kujombolola 14:6, 7) Vyuma vinalingiwa vimwetha ngwavyo na matangwa ano tungelo vali na kukundwiya chipangi cha kwambulula Vumwene mu kaye koshe. Mu vuthunga vene nga muka-vuvi umo atenguluka na kwiluka kuli Yehova, “tungelo twa Njambi vakavwahelela.”—Luka 15:10.

Vika vikalingiwa muchikahwa chipangi cha kwambulula? Tungelo va mu “vimbunga vya ndthzita ya mwilu” vakakwatha Yesu Kilisitu, Mwene wa vimwene mu kulwa “ndthzita ha litangwa lyakama lya Njambi Muka-ndthzili Yoshe” ha Alamangindone. (Kujombolola 16:14-16; 19:14-16) Omwo Mwene Yesu akaija “na kunyanyametha vaje . . . kuvethi kwononoka viñanda vyavivwa vya Mwene yetu Yesu,” na tungelo navo vakakwatha Yesu mu kulinga ngocho.—2 Tesalonika 1:7, 8.

Ngechi kulaheleni ngweni tungelo vatwaka mbunge munu na munu. Vashaka ngwavo vanu vaje vashaka kupangela Njambi vakale mwamuvwa, cho vithimbu vyavingi Yehova napangetha tungelo mu kukanyametha na mu kunyungilila vangamba vendi va kulongwa va hano hathi.—Vahevelu 1:14.

Munu na munu napande kulyangwila vya kulinga mwafwa kunapu kwa theho manene. Tutolilila na kwononoka muthzimbu wauvwa uvali na kwambulula mu kaye koshe ndi? Vakaleho va Yehova va mu chitingitingi cheni vamikwatha muthzivuke vimunapande kulinga mangana tungelo va Njambi vandthzili vamikwathe.