Kukandelela Kuli Yehova Muka-Kutumunga

1. Mwafwa vika Yehova wapwa muka-kumunga wakama?

MU November 2010, njava ivamungile kupangetha vuma vwa ku China, vailandethele ha ndando ya kweta ku 70 million dollars ku England. Muka-kumunga atha kumunga chuma chimo chachivwa ha vuma na kuchilandetha ha ndando yakama. Yehova uje wapwa Muka-kutumunga, watuvakana vaka-kumunga voshe. Mbimbiliya ngwayo Yehova wamungile munu wa kuthungama kupangetha ‘livu lya hathi,’ kulumbununa vuma. (Kushangumuka 2:7) Owo munu, Andama, wapwile “Muna Njambi,” cho wakele na chashu cha kutembwinina vifwa vya Njambi.—Luka 3:38.

2, 3. Twatha kutembwinina vati vaIsalele vaje vatengulukile?

² Andama mwatengulukilile Ishamatanga, katwaleleleho kupwa muna Njambi. Oloni vana va Andama vavangi vanalyangwila kuvayula kuli Yehova. (VaHevelu 12:1) Omwo vanononoka kuli Ishamatanga wavo, vanamwetha ngwavo kuvashaka Satana, oloni vashaka Njambi apwe Ishavo na muka-kuvamunga. (Yowano 8:44) Kulongwa kwavo kuli Njambi, kutwanukitha majwi a vaIsalele vaje vatengulukile. Vendekele ngwavo: “Shukulu Kalunga wapwa u Tate yetu. Yetu tunapu ngwe vuma, cho yove unapu ngwe muka-kushonga. Yove watutangele.”—Isaya 64:8.

³ Na matangwa ano, vaka-kulemetha Yehova va vuthunga vaketheka kulikehetha na kwononoka. Vakalithzivi kuvethzika ha kutumbula Yehova ngwavo Ishavo, cho vashaka avamunge. Tushaka kupwa ngwe vuma vwavuvothsi vuje vwanatha kupangetha Njambi mu kumunga chuma cha theho ndi? Tukamono vandolome na vandokathzi vetu voshe ngwe njava yaivwa ivachili na kumunga kuli Njambi ndi? Tuthimutwiya omwo Yehova akangwilamo vanu va kumunga novyo vyakavamungila nomwo mwakavamungila, mangana tukale na vithinganyeka vyavivwa.

YEHOVA AKANGULA VANU VA KUMUNGA

4. Yehova akangula vati vanu vakulikuta navo vuthamba? Aneni vyakumwenako.

⁴ Yehova kethi kumona vanu ngwe mutukavamwena yetu. Ikeye akakenge mu mbunge ya munu na kumona chifwa chendi. (Tandeni 1 Samwele 16:7b.) Yehova walingile ngocho omwo washimbikile chikungulukilo cha vaka-Kilisitu. Wakokelele vanu vavangi kuli ikeye na kuli Munendi vaje vamonekele ngwe kuvapwile va theho. (Yowano 6:44) Chakumwenako, munu umo wa kufwa ngocho wapwile kaFaliseo wa lithzina lya Saulu. Wendekele “vyuma vyavivi hali ikeye [Yesu] na kumupaketha na kumushaula.” (1 Timateo 1:13) Oloni Yehova wakengele mbunge ya Saulu, cho kamumwene ngwe vuma vwa kujeneka theho. (Vithimo 17:3) Yehova wamwene ngwendi atha kumunga Saulu na kumupwitha “chuma cha kwangula” uje ambulula “kuli vaje kethi vaYunda na kuli vimyene na kuli vanu va Isalele.” (Vilinga 9:15, NWT) Yehova wangwile na vakwavo lalo vaje vapwile vuma vwa “kupangetha vyuma vya theho,” kwambatethelela na vaje vapwile vaka-kupenda na vaka-kulinga vyavivi na vethzi. (Loma 9:21; 1 Kolinte 6:9-11) Omwo valilongethele Vithoneka, vakanyamethele likulahelo lyavo kuli Yehova na kumutavetha avamunge.

5, 6. Kuthzivuka ngwetu Yehova ikeye Muka-kutumunga kutukwatha tumone vati (a) vanu vatukambulwila mu lihya? (b) vandolome na vandokathzi vetu?

⁵ Twakulahela ngwetu Yehova atha kwangula vanu vavavwa vakulikuta navo vuthamba. Mukemwo kutwapandele kuhitha vanu vatuwana mu lihya nambe va mu chikungulukilo. Chakumwenako, kengeni mwalingilile Michael omwo Vakaleho va Yehova vamwendelele. Endeka ngwendi: “Njakele na kuvataletha nima na kujeneka kuvakela mana ngwe kunjavamwene. Njakele na vukalu manene. Thimbu imo munjakele kweka, njaliwanene na nanga imo ije injathzemene mwafwa ya vilinga vyavo vyavivwa. Litangwa limo njalikomokelele omwo njathzivukile ngwange vapwa Vakaleho va Yehova. Futithi yavo yanjishongangeyeye njilule vithinganyeka vyange. Njanangukile ngwange kumani na vimo vinjathzivukile vyayi, cho lalo njakele na —kutava vyuma vya kuthziva lika ku vakwetu, kunjathzivukile vuthunga.” Michael washakele kulilongetha vyavingi, cho watavele kulilongetha Mbimbiliya. Munima, vamumbwitikile, cho washangumukile kupanga chipangi cha thimbu yoshe.

⁶ Nga tutava ngwetu Yehova ikeye Muka-kutumunga, cho tukala na vithinganyeka vyavivwa hali vandolome na vandokathzi vetu. Voshe tuvamona ngwe njava yaivwa ivachilili na kumunga. Omwo mukemwo mwakavamwenamo Yehova. Akamono chifwa chavo cha mukati, cho athzivuka ngwendi vuthzeye vwavo tangwa vukahwa. Athzivuka lalo ngwendi munu na munu atha kutenguluka. (Myatho 130:3) Netu twatha kutembwinina Yehova nga tukala na vithinganyeka vyavivwa hali vandolome vetu. Twatha kupangela hamo nendi mu kukwatha vandolome na vandokathzi vetu vakole ku sipilitu. (1 Tesalonika 5:14, 15) Vakulunu va mu chikungulukilo vanapande kwakela vakwavo mwanja wauvwa mu kulinga ngocho.—Efeso 4:8, 11-13.

YEHOVA AKATUMUNGILA VIKA?

7. Mwafwa vika mwashaka kunangula kwa Yehova?

⁷ Vanu vamo vakendeka ngwavo: ‘Kunjamwene theho ya vyuma vivanjinangwile vithemi vange, kuvanga munjakele na vana.’ Omwo tukola, tukashaka kutunangula mwafwa tumona ngwetu kunapu kutumwetha chithzemo. (Tandeni VaHevelu 12:5, 6, 11.) Yehova watuthzema ha kupwa tu vana vendi, mukemwo akatunangula nambe ngwetu kutumunga. Ashaka ngwendi tukale na mana na kuvwahelela na kumuthzema ha kupwa Tate yetu. (Vithimo 23:15) Wathzinda kutumona tuli na kuyanda, cho kashakele ngwendi tuthse na vuvi vwetu.—Efeso 2:2, 3.

8, 9. Yehova akatulongetha vati matangwa ano, cho evi vilongetha vikatwalelelaho vati kulutwe?

⁸ Thimbu kanda tuthzivuke Yehova, mpamo twakele na vifwa vyavivi vyavingi. Oloni Yehova watumungile na kutukwatha tutenguluke, mukemwo tuli na vifwa vyavivwa. (Isaya 11:6-8; Kolose 3:9, 10) Tuli mu palandaisi ya ku sipilitu. Yehova natulingila eyi palandaisi yaivwa mangana atumungilemo. Kukalamo kukatulingitha tupwe va kushuvuluka nameme tuli mu kaye kakavi. Vanu vaje vavayengwile kuli vavushoko vwavo, vali na kulithziva kushuvuluka kuli vandolome na vandokathzi vavo va mu palandaisi ya ku sipilitu. (Yowano 13:35) Twalilongetha kukala na chithzemo kuli vakwetu. Oloni chuma chakama chinapu kuthzivuka Yehova na kulimwena oni chithzemo chendi ha kupwa Tate yetu.—Yakomba 4:8.

⁹ Mu lifuti lyaliha, tukalikuwa vyavingi mu palandaisi ya ku sipilitu. Tukalikuwa vyavingi lalo mu palandaisi ya ku muvila ije ivukayula Vumwene vwa Njambi. Ha thimbu oyo, Yehova akatwalelelaho kutumunga na kutulongetha mu ngila ya kulitila yaikalu kuithzivuka thimbu ino. (Isaya 11:9) Kutundoho lalo, Yehova akalingitha vithinganyeka vyetu na mivila yetu kupwa vya kuthungama. Echi chikatulingitha tuthzivithithe na kukavangeya mashiko endi. Ngechi, tutwaleleleniho kutavetha Yehova atumunge na kumwetha kukandelela ku chithzemo chendi chakama.—Vithimo 3:11, 12.

MWAKATUMUNGILAMO YEHOVA

10. Yesu watembunwinine vati kuthimpa na vutongwe vwa Muka-kumunga Wakama?

¹⁰ Yehova, Muka-kutumunga atuthzivuka mwamuvwa, ngwe muje muka-kumunga wa vutongwe akathzivukila vuma vwamunga. Athzivuka vuthzeye vwetu na chashu chetu na kujovoloka kwetu, cho akamungu munu na munu kwetheketha nomwo mwafwila. (Tandeni Myatho 103:10-14.) Twatha kuthzivuka mwakatumwenamo Yehova nga twanuka vyalingile Yesu omwo tupositolo vendi vakele na kuthevuka. Thimbu imo, tupositolo valikananganene ngwavo iya wapwile wakama mukati kavo. Ngwe neni kumwakele, ngwe mwamwene vati chuma chivalingile tupositolo? Mpamo ngwe mwathinganyekele ngweni kuvapwile vuma vwa kuvothsiya. Oloni Yesu wathzivukile ngwendi vatha kutenguluka nga vatambula kunangula kwendi kwakuvwa na kutembwinina kulikehetha kwendi. (Mako 9:33-37; 10:37, 41-45; Luka 22:24-27) Yesu mwathangukile, tupositolo vatambwile sipilitu ya kujela, cho kuvakele vimbunge vyavo ku kuthzivuka wakama mukati kavo. Oloni vakele vimbunge vyavo ku chipangi chavanene Yesu.—Vilinga 5:42.

11. Ndaviti wamwethele vati kupwa vuma vwa kuvothsiya, cho twatha kumutembwinina vati?

¹¹ Ano matangwa, Yehova akatumungu kupangetha Mbimbiliya na sipilitu yendi ya kujela na chikungulukilo. Mbimbiliya yatha kutumunga vati? Tunapande kuitanda na kuthinganyekethetha vitutanda na kulomba Yehova mangana atukwathe tupangethe vituli na kulilongetha. Mwene Ndaviti wathonekele ngwendi: “Omwo njilala ha vulili vwange, njikakuyongola, vuthsiki vwoshe njikanuka lika yove.” (Myatho 63:6) Wathonekele lalo ngwendi: “Njikushangathzala yove Shukulu Kalunga, omwo unanjana mana. Nameme thimbu ya vuthsiki mbunge yange injinangula.” (Myatho 16:7) Ndaviti wathinganyekele ha kunangula kwa Yehova na kumutavetha amunge vithinganyeka vya mu mbunge yendi, nameme thimbu imo kwapwile kwakukalu kutambula kunangula. (2 Samwele 12:1-13) Ndaviti watwakelele mwanja wa kulikehetha na kwononoka. Ngechi lihuleni ngweni: ‘Omwo munjikatanda Mbimbiliya, njikathinganyeka vinjitanda na kutavetha kunangula kwa Njambi kutwamenene vithinganyeka vyange ndi? Njatha kuvwethzelela ku chashu change chakulinga ngocho ndi?’—Myatho 1:2, 3.

12, 13. Yehova akatumungu vati kupangetha sipilitu ya kujela na chikungulukilo cha vaka-Kilisitu?

¹² Sipilitu ya kujela yatha kutumunga mu vingila vya kulithethzathethza. Chakumwenako, yatha kutukwatha tutembwinine vunu vwa Yesu, na kwima vushuka vwavwingi vwa ku sipilitu. (Ngalatiya 5:22, 23) Chifwa chimo chapwa chithzemo. Twathzema Njambi, cho tushaka atumunge na kumwononoka mwafwa tuthzivuka ngwetu mashiko endi atha kutukwatha. Kutundoho lalo, sipilitu ya kujela yatha kutukanyametha mangana kethi tungumuke na kano kaye kakavi. (Efeso 2:2) Kapositolo Paulu mwapwile mwanike, wongumukile na vantwama va kulyaletha va mu vulombelo. Oloni sipillitu ya Njambi yamukwathele atenguluke. Mu kwita kwa thimbu wathonekele ngwendi: “Njatha kulinga vyuma vyoshe ha ndthzili ije yananjana Kilisitu.” (Filipu 4:13) Netu tunapande kulomba sipilitu ya kujela omwo tuthzivuka ngwetu Yehova akumbulula malombelo etu a kutundilila kwithi ya mbunge.—Myatho 10:17.

¹³ Yehova akatumungu lalo kupangetha vakulunu na chikungulukilo. Chakumwenako, nga vakulunu vananguka ngwavo tuli na vuthzeye vumo, vaketheka kutukwatha. Oloni kuvethi kutuleka vithinganyeka vyavo. (Ngalatiya 6:1) Vakalombo Yehova avane kuthzivithitha na mana. Cho vakatondethetha mu Mbimbiliya na mavulu etu vaka-Kilisitu mangana vawane vilongetha vije vitukwatha. Nga vakulunu vaija kuli yeni kwa kuminangula mu ngila ya chithzemo, mpamo ha thzalethi yeni, anukeni ngweni echi chimwetha ngwavo Njambi wamithzema. Nga mutambula kuje kunangula, cho mupwa ngwe vuma vwavuvothsi vuje vwanatha kumunga Yehova, cho lalo muwana vukwathi.

14. Yehova akamwetha vati ngwendi wathingimika ndthzili yetu ya kulyangwila vitushaka, nameme ali na ndthzili ya kutumunga mwashakela?

¹⁴ Nga tuthzivuka mwakatumungilamo Yehova, cho twatha kulikuta vuthamba na vandolome na vandokathzi vetu. Cho lalo, tukala na vithinganyeka vyavivwa ha vanu vatukawana mu lihya, kwambatethelela na vanu vatukalongetha Mbimbiliya. Mu thimbu ivakele na kuthoneka Mbimbiliya, muka-kumunga wavangele tahi kujeletha vuma na kutundithamo mamanya na vyuma vikwavo, athina ashangumuke kumunga. Yehova Muka-kumunga Wakama, akakwatha vanu vaje vashaka kuvamunga. Kethi kuvathindiya vatenguluke, oloni akavamwetha vilinga vyendi vyavivwa. Cho vavenya valyangwila kutenguluka nga vashaka.

15, 16. Vanu vatukalilongetha navo Mbimbiliya vakamwetha vati ngwavo vashaka kuvamunga kuli Yehova? Aneni chakumwenako.

¹⁵ Thinganyekeni vyalingiwile kuli ndokathzi Tessie, wa ku Australia. Kwapwile kwakwathi kuli ikeye kulilongetha viyendeka Mbimbiliya. Oloni kakolele vwathi ku sipilitu, cho kakele na kuya ku viwano. Ndokathzi wakele na kumulongetha Mbimbiliya walombelele kuli Yehova, cho washakele kulikela kulilongetha nendi. Cho kwalingiwile chuma cha kukomoketha. Omwo vakele na kulilongetha, Tessie walekele mulongethi wendi vyuma vyakele na kumwonowetha kukola ku sipilitu. Wendekele ngwendi wakele na kulithziva ngwe muka-kutengulukila mwafwa washakele manene vweho vwa kulihyana. Kutundoho, walikelele ovwo vweho vwa kulihyana.

¹⁶ Tessie washangumukile kuya ku viwano na kusholola vifwa vya vaka-Kilisitu, nameme vavuthamba vendi va laja vakele na kumulenya. Kukapwa muje, Tessie vamumbwitikile, cho washangumukile kulinga vupainiya vwa thimbu yoshe nameme wakele na vana vavandondo. Nga vanu vatukalilongetha navo Mbimbiliya vashangumuka kulinga vyuma vyashaka Njambi, alikuta vuthamba navo na kuvamunga vapwe chikwata cha vuma cha theho.

17. (a) Vyuma muka vimithzivitha kuvwaha ha kumimunga kuli Yehova? (b) Vyuma muka vikwavo vyakundama ku kumunga vitukathimutwiya mu chilongetha chinakavangeyaho?

¹⁷ Na vaka-kumunga va matangwa ano hanga vakamungu vikwata vyavivwa ha vuma. Mu ngila imo lika, Yehova akatumungu mwamuvwa kwitila mu kutunangula, cho akatukenge mangana amone mutulingila vyuma. (Tandeni Myatho 32:8.) Mukamono ngweni Yehova wamyaka mbunge ndi? Mukamono mwali na kumimungilamo Yehova ndi? Nga ngocho, cho vifwa muka vije vyatha kumikwatha mupwe ngwe vuma vwavuvothsi vuje vwanatha kumunga Yehova? Vyuma muka vimunapande kujenjuka mangana kethi mupwe ngwe vuma vwa kukola vuje kuvwathiwa kuvumunga? Cho vithemi vatha kupangela vati hamo na Yehova mangana vamunge vana vavo? Chilongetha chinakavangeyaho chitukumbulwila evi vihula.