Biñanda bya Kupangesa mu Mukanda wa Biwano wa Buyoye Bwetu Baka-Kilistu na Cipangi Cetu
MAY 6-12
BISIMPI BYA SEHO BYA MU LIJWI LYA NJAMBI | 2 KOLINTE 4-6
“Kutwasa Kwombwa”
(2 Kolinte 4:16) Omwo cuma eci kutwasa kwombwa nambe mubila wetu uli na kunyonga, oloni munu wetu wa mukati akatulingisa buha ha litangwa na litangwa.
w04 8/15 25 ¶16-17
Kakateyeni Nameme Mwajuka
16 Kukola ku Sipilitu kwapwa kwa seho manene. Twasa kujuka ku mubila, oloni nga busamba bwetu na Yehova bwakanyama, kutukajuka kumulemesa. Yehova ikeye “muka-kukolesa baje banazeye na kujuka.” (Isa 40:28, 29) Kapositolo Paulu uje walimwenenene busunga bwa awa majwi wasonekele ngwendi: “Kutwasa kombwa nambe mubila wetu uli na kunyonga, oloni munu wetu wa mukati akatulingisa buha ha litangwa na litangwa.”—2 Ko 4:16.
17 Nangukeni majwi akwendeka ngwawo, “ha litangwa na litangwa.” Awa majwi alumbununa kupangesa byuma byanatwana Yehova ha litangwa na litangwa. Kamishinali umwo uje wapangele cipangi cendi ha myaka 43, ha bisimbu bimo walizibile kujuka na kuzeya. Oloni watwaleleleho kulemesa Njambi. Wendekele ngwendi: “Simbu kanda njishangumuke bipangi byoshe byoshe, njakele na kumeneka mutondotondo na kulombela na kutanda Lijwi lya Njambi. Kulinga ngoco kwanjikwasele njilikolese kweta na lelo lino.” Twasa kulimwena nzili ya Yehova nga “ha litangwa na litangwa” tulombela na kusinganyekesesa ha bifwa bya Njambi na ha byuma byanatukulahesa.
(2 Kolinte 4:17) Otu tuyando twetu twatundondo lika ngwe twa kasimbu lika na kutunenela bumpau bwa myaka yoshe, buje bwakama manene kutubakana tuyando.
it-1 724-725
Kulikolesa
Co lalo kutwapandele kwibala lilabelelo lituli nalyo ha kupwa baka-Kilistu lya kukayoya myaka yoshe na mibila ya kulumbunuka. Nameme batutsiya kubasa kutunyeka lilabelelo lyetu. (Lom 5:4, 5; 1 Te 1:3; Kuj 2:10) Nga tusinganyekesesa ha lilabelelo lituli nalyo, co tumona ngwetu tuyando tutuli na kuliwana natwo twatundondo manene. (Lom 8:18-25) Tuyando twoshe twoshe tutukaliwana natwo nameme twakama tunapu, “twatundondo lika ngwe twa kasimbu lika.” (2 Ko 4:16-18) Nga munu asinganyeka ngwendi tuyando twalina kuliwana natwo tunapu twa kasimbu kakandondo lika, co kasa kwombwa nambe kujeneka kupwa wa kulongwa kuli Yehova Njambi.
(2 Kolinte 4:18) Omwo twakengelela, keti ngwe ku byuma twamono embwe, oloni ku byuma bije kanda tumone. Byuma bije tumona byasa kukala ka simbu lika, oloni byuma bije kutwasa kumona bya ku myaka yoshe.
Kutondesesa Bisimpi bya Seho
(2 Kolinte 4:7) Oloni yetu tuli na bufuko obu tunapu ngwe bindeho bya buma mukumwesa ngeci nzili yakushemutuka ikeyo yapwa ya Njambi, keti yetu embwe.
w12 2/1 28-29
“Zibiseni Yehova Kubwaha”
Ndolome David Splane wa mu Cibunga ca Kutwamenena wasimutwiiye ha ñanda ije yendeka ngwayo, “Omwo tuli na bufuko obu tunapu ngwe bindeho bya buma.” (2 Ko 4:7) Bufuko bwimanena bika? Ndolome Splane walumbunwine ngwendi: “Bufuko bwendekele kapositolo Paulu bwimanena ‘cipangi’ ca kusholola ‘busunga.’’’ (2 Ko 4:1, 2, 5) Ndolome Splane wanukisile bandolome baje batundile ku sikola ya Ngilyande ngwendi: “Bingonde bitanu bimunakala na kulilongesa ku sikola, binamikwasa mulibwahesele cipangi ca kulitila mu lihya. Ngeci moneni eci cipangi kupwa ca seho manene.”
Ndolome Splane wesekesele mibila yetu ku “bindeho bya buma.” Wendekele kuliseza kuli mukati ka ndeho ya buma neyi ya ngolinde. Bindeho bya ngolinde kubesi kubipangesa simbu yoshe. Oloni byakumunga ha buma bakabipangesa simbu yoshe. Cakumwenako, nga twaka bufuko bwetu mu ndeho ya ngolinde, co twaka mbunge ku ndeho na ku bufuko. Ndolome Splane wendekele ngwendi: “Yeni munamanesa sikola ya Ngilyande, keti mulingise banu bake mana kuli yeni. Oloni munapande kukwasa banu bazibuke Yehova. Yeni munapu mu bindeho bya buma, ngeci likeheseni.”
(2 Kolinte 6:13) Oloni njili na kwendeka kuli yeni ngwe bene munapu mu bana ba bange, tusholweleni cizemo ngwe cizemo ngwe cije tuli na co muli Yeni. Bimbunge byeni bishokoloke manene.
w09 11/15 21 ¶7
Lizemeni Manene Umo na Mukwabo
7 Twasa kuzema bati bandolome betu nambe ngwetu ‘kushokolola manene bimbunge’ byetu? Kukapu kwakwasi kulizibasana na baje batunda kutwatunda nambe baje batunapu hamo nabo. Co lalo, baje bashaka byuma bya kulifwa bakalitombola. Oloni nga kuli byuma bimo bikatulingisa tulizilile manene na bandolome bamo na kutwangununa kuli boshe, co tunapande ‘kushokolola bimbunge byetu manene.’ Tulinga mwamubwa kulihula ngwetu: ‘Kuma kukanjikaluwila kuya mu lihya nambe kulinga bipangi byeka na baje banajitubakana ku myaka ndi? Munjikakala ku Njubo ya Bumwene, kuma kukanjikaluwila kulikwatasana na bandolome baje banajalukila ololo mu cikungulukilo cetu ndi? Njikameneka banu boshe mu cikungulukilo ndi?’
Kutanda Mbimbiliya
(2 Kolinte 4:1-15) Njambi mu kutetela kwendi natwana bipangi ebi, ngeci bene, kutwasa kujuka. 2 Ngeci bene, ha byuma byoshe bya laja bya kushwekesa tunabyumbila kuti, kutwesi na kupanga na bilinga lalo bya kukwisa, nambe kutanganesa lijwi lya Njambi. Oloni mu mutanya mwelu wa busunga tuli na kuyoyela ku mesho a Njambi na kweseka kulikundika yetu babenya ku munu na munu mu bubwa bwa citakutaku cendi. 3 Oloni nga lijwi eli tuli na kwambulula linapu lya kushweka, banalishweke lika kuli baje banazimbala. 4 Bakebo kubasa kukulahela omwo njambi uje wa bubi wa kano kaye nazibalesa mana a baka-kujeneka kukulahela ngeci keti bamone mutanya uje wa Biñanda Byabibwa bya bumpau bwa Kilistu, uje bene wafwa cifwa ca Njambi. 5 Omwo keti ngwe yetu tulyambulula yetu babenya embwe, oloni tuli na kwambulula Yesu Kilistu ikeye Mwene, co netu tunapu tu bangamba beni ha lizina lya Yesu. 6 Njambi uje wendekele ngwendi, “Mu lisusulungu mukatwa ceke.” Ikeye Njambi uje bene umo lika watwisile ceke mu bimbunge byetu, mukututwisila ceke ca bumpau bwa Njambi buje bunatu mu cihanga ca Kilistu. 7 Oloni yetu tuli na bufuko obu tunapu ngwe bindeho bya buma mu kumwesa ngeci nzili ya kushemutuka ikeyo yapwa ya Njambi, keti yetu embwe. 8 Bisimbu byabingi tukakala mu bukalu, oloni kubesi na kututsena, bisimbu bimo tukakala mu bitanga, oloni kutwesi kwombwa, 9 bitozi babangi kubali, oloni kutwesi kujeneka musamba, na bisimbu bimo tukabulumuka manene bene, oloni kubesi kutunyongesa. 10 Ha simbu yoshe twambata kutsa kwa Yesu mu mibila yetu, ngeci mwonyo wendi usholoke mu mibila yetu lalo. 11 Nambe mu kuyoya kwetu simbu yoshe twakala mu bushonde bwa kutsa omwo Yesu, ngeci mwonyo wendi lalo ukasholoke mu mibila yetu ya kutsa. 12 Co eci cinalumbunuka ngeci kuma kutsa kuli na kupanga muli yetu, oloni mwonyo uli na kupanga muli yeni. 13 Bisoneka byendeka ngwabyo, “Njendekele omwo njakulahelele.” Mu munzinzime wa cifwa cimo lika lalo twendeka omwo tukulahela. 14 Omwo twazibuka ngeci Njambi uje wasangwile Mwene Yesu ku batsi, ikeye akatusangula lalo hamo na Yesu na kutusholola hamo neni, ku mesho endi. 15 Byuma byoshe ebi bilingiwa omwo yeni, co ngwe kutetela kwa Njambi kukatuma manene na kushemutuka ha banu babangi, co bakalomba malombelo amangi a kukandelela bumpau bwa Njambi.
MAY 13-19
BISIMPI BYA SEHO BYA MU LIJWI LYA NJAMBI | 2 KOLINTE 7-10
“Cipangi Cetu ca Kukwasa”
(2 Kolinte 8:1-3) Tushaka ngeci muzibuke bakwetu, bati kutetela kwa Njambi kunalingiwa mu bikungulukilo bya mu Masendoniya. 2 Bakebo bisimbu byabingi banabeseka mu tuyando twatungi, oloni kujolela kwabo kwakama manene ngeci bakebo balambwile manenenene, nambe bapwile baka-kuhutwa. 3 Mwa busunga bene njimileka ngwange, baanene ngwe kwasa kwabo, nambe kuhyana bije. Na cizango cabo coshe,
w98 11/1 25 ¶1
‘Njambi Wazema Uje Ana na Kujolela’
Ha kulibanga Paulu, walekele baka-Kolinte bya bandolome babo ba ku Masendoniya baje balambwile manene mukwasholokele bukalu. Paulu wasonekele ngwendi: “Bakebo bisimbu byabingi banabeseka mu tuyando twatungi, oloni kujolela kwabo kwakama manene ngeci bakebo balambwile manenenene, nambe bapwile baka-kuhutwa.” Baka-Masendoniya balambwile na mbunge imo. Mukemwo Paulu wendekele ngwendi: “Batulombele na kutusindiya ngeci tubane simbu ya kukwasa.” Kwana kwa bandolome ba ku Masendoniya kutukasamesa mwafwa bapwile “baka-kuhutwa.”—2 Ko 8:2-4.
Cipangi ca Kukwasa
MU MWAKA wa 46 C.E., nganda ya Yundeya yakele mu njala ya lyangengela. Baka-Kilistu ba Bayunda kubakele na bimbongo bya kulanda byakulya mwafwa bindando byalondele manene. Bihanga byabo byasholokele bene ngwabo bakele mu njala ya lyangengela. Oloni kwalingiwile byuma bimo bya kukasamesa bije byamwesele ngwabo liboko lya Yehova lyabakwasele. Byuma muka obyo bene?
(2 Kolinte 8:4) batulombele na kutusindiya ngeci tubane simbu ya kukwasa banu ba Njambi baje bali mu Yundeya.
Cipangi ca Kukwasa
4 Mu mukanda wendi wa mu cibali wasonekelele baka-Kolinte, Paulu wendekele ngwendi baka-Kilistu bakala na bipangi bibali byakama. Nameme ou mukanda wausonekelele baka-Kilistu ba kubwabesa, oloni wasa kukwasa na “bimanga beka.” (Yow 10:16) Cipangi ca kulibanga cinapu ca kwilwisa banu kuli Njambi, kulumbununa kwambulula na kulongesa. (2 Ko 5:18-20; 1 Ti 2:3-6) Cipangi ca mu cibali cinambateselela byuma bitukalingila bandolome betu. Paulu wabitumbwile ngwendi cipangi ca kukwasa. (2 Ko 8:4) Awa majwi abananungulula ngwabo, cipangi ca kwilwisa banu kuli Njambi neci ca kukwasa, atunda ha lijwi lya Cingiliki lya di·a·ko·niʹa. Mwafwa bika wapangesele lijwi limo?
5 Paulu mwapangesele lijwi limo lya Cingiliki wamwesele kulitombola kuli mukati ka cipangi ca kukwasa na bipangi byeka bibakele na kupanga mu cikungulukilo. Ha kulibanga wendekele ngwendi: “Kubili bingila byabingi bya kupanga, oloni Mwene umo lika ibali na kupangela. Kuli nzili ya kulisezaseza ya kupanga bipangi, . . . Oloni ikeye umo lika munzinzime uje ali na kulinga byuma byoshe ebi.” (1 Ko 12:4-6, 11) Paulu wamwesele kulitombola kuli mukati ka bipangi bya mu cikungulukilo ku “cipangi ca kujela.” (Lom 12:1, 6-8) Cikeco camulingisile alyane simbu yendi mu kukwasa banu ba Njambi.—Lom 15:25, 26.
6 Paulu wakwasele baka-Kolinte bazibuke ngwabo cipangi cabo ca kukwasa capwile ca seho mu bulombelo bwa Yehova. Wendekele ngwendi baka-Kilistu bakalyana mwafwa ya ‘kulongwa kwabo ku muzimbu waubwa wa Kilistu.’ (2 Ko 9:13) Ngeci bakakwasa bakwabo mwafwa bashaka kupangesa bilongesa bya Kilistu. Paulu wendekele ngwendi bipangi bibapangele baka-Kilistu mu kukwasa bandolome babo byamwesele ‘kutetela kuje kwabasholwele Njambi.’ (2 Ko 9:14; 1 Pe 4:10) Kaposhi ka Kukengela ka Ingilish ka December 1, 1975 kendekele ngwako: “Yehova Njambi na Munendi Yesu Kilistu bamona eci cipangi ca kukwasa bandolome betu kupwa ca seho.” Cili bene cipangi ca kukwasa naco capwa ca kujela.—Lom 12:1, 7; 2 Ko 8:7; Hev 13:16.
(2 Kolinte 9:7) Ngeci bene, umo na umo napande kwana ngwe mwanashakela, keti kubyana na busiwa nambe ngwe ha kusindiya, omwo Njambi azema uje ana na kujolela.
Bimbongo Bibakapangesa mu Bipangi bya Bumwene Bakabiwana Bati?
10 Ca kulibanga tukana milambu mwafwa twazema Yehova co tushaka kulinga byuma bimuzibisa kubwaha. (1 Yo 3:22) Yehova wazema baje bana kutundilila kwisi ya bimbunge byabo. Tucisimutwiyeni ha majwi endekele Paulu ha kwana. (2 Ko 9:7) Muka-Kilistu wa busunga kesi kulisindiya kwana. Oloni akana mwafwa “mukemwo mwanayongwela” mu mbunge yendi. “Njambi wazema uje ana na kujolela,” ngeci nga twana kutundilila kwisi ya bimbunge, co Yehova atuzema. Mbimbiliya ikwabo inendeka awa majwi ngwayo: “Njambi wazema banu baje bazema kwana.”
Kutondesesa Bisimpi bya Seho
(2 Kolinte 9:15) Tukandeleleni kuli Njambi omwo bwana bwendi buje kutwasa kulumbununa.
‘Bwana bwa Njambi Buje Kutwasa Kulumbununa’ Bumishongangeye
2 Paulu wazibukile ngwendi ñombelo ya Yesu ikeyo ikalingisa bikulaheso bya Njambi byoshe bikalishulisilile. (2 Ko 1:20) Oku kulumbununa ngwe, kuli byuma byabingi byalibungila mu “bwana bwa Njambi buje kutwasa kulumbununa,” kesi ngwe ñombelo ya Yesu lika embwe. Muli na byuma byabibwa byoshe na cizemo ca Njambi cije kucesi kutenguluka cakatumwesa Yehova kulutwe. Bwana bwa cifwa eci, bwa bukalu kubulumbununa na kubuzibisisa. Tunapande kuliziba bati ha bwana obu bwa kulitila?
(2 Kolinte 10:17) Oloni ngwe muje mubyendeka bisoneka ngwabyo, “Woshe uje ashaka kulyalesa, napande kulyalesa kuli bije byanalingi Mwene.”
g99 7/8 20-21
Kuma Kulishasha Kwakubi Ndi?
Mu Bisoneka bya Cingiliki bya baka-Kilistu, lijwi lya kau·khaʹo·mai banalilumbununa ngwabo “kulishasha” nambe “kulyalesa.” Co eli lijwi bakalipangesa mu ngila yaibwa neyi yaibi. Cakumwenako, Paulu wendekele ngwendi twasa ‘kulishasha ha lilabelelo lituli nalyo lya kutambula bumpau bwa Njambi.’ Co lalo washongangeyeye ngwendi: “Woshe uje ashaka kulyalesa napande kulyalesela kuli bije byanalingi” Yehova. (Lom 5:2; 2 Ko 10:17) Awa majwi alumbununa kubwahelela kutukalizibi mwafwa ya kuzibuka ngwetu Yehova ikeye Njambi yetu. Oku kubwahelela kukeko kukatulingisa tulishashele lizina lya Njambi.
Kutanda Mbimbiliya
(2 Kolinte 7:1-12) Bikulaheso byoshe ebi babilingilile yetu, basamba bange. Ngeci bene, tulijeleseni ku byuma byoshe bije bijwalesa mubila nambe mwonyo, co tupweni ba kujela njwa ha kuyoya kwetu mu kusingimika Njambi. 2 Tushokolweleni bimbunge byeni. Kutwalingile mwamubi munu naumo wahi itunabihisila, nambe kweseka kwambata cuma cimo mu ngila ya makuli. 3 Kunjasa kwendeka ngwe kumihisa embwe, oloni ngwe omwo njendekele ha kulibanga ngwange yeni munapu basamba amwo netu ngeci mwa busunga bene tuli hamo neni simbu yoshe, nambe tuyoya nambe tutsa. 4 Mwa busunga njinasimpi manene hali yeni, co lalo njili na kujolela hali yeni. Mu tuyando twetu twoshe njinashulu nebi bya kunjizembeleka, njinashulu na kujolela. 5 Nambe omwo twetele mu Masendoniya kutwasele kuhwima. Kwoshe-ikwoshe kwakele bipakeso na bimata na byeka lalo na lyoba mu bimbunge byetu. 6 Oloni Njambi, uje muka-kutakamesa baka-kuzeya, watutakamesele ha kwija kwa Tito. 7 Keti ha kwija kwendi lika embwe, oloni na kuzembeleka kuje mwamuzembelekele nakwo. Natuleka lalo ngwendi mushaka kunjimona, muli na mangunge na kulila omwo yange, ngeci bene, njabwahelela manene. 8 Nambe njamizibisile busiwa mu mukanda wange, yange kunjilibeye nga kunjamisonekelelewo, omwo njamono ngeci uje mukanda wamizibisile busiwa, oloni kasimbu kakandondo lika. 9 Oloni ololo njili na kubwahelela kesi ngwe omwo njamizibisile busiwa embwe, oloni omwo busiwa bweni bunatengulwisa bingila byeni. Omwo busiwa obu Njambi wabupangesele, co yetu kutwamibulumwine. 10 Omwo busiwa bwa cizango ca Njambi na bupangesa mu kumitwala ku kutenguluka kwa bimbunge byeni na kumitwamenena ku kwoboka, co eci naumo wahi asa kucibyana. Oloni busiwa bwa ku cisemwa ca bunu butwala ku kutsa. 11 Kengeni Njambi bati nalingi na busiwa bweni obu, bati bunamilingisa ngeci munyanyame manene. Nakusholola sholobya ya kulishungamesa na bukaleho bwabubwa na cizemo na mu kulikundika na kuzambula kunyanyamesa bilinga byabibi. Co munalisholola yeni babenya ngeci munajeneka mulonga mu byuma byoshe. 12 Ngeci bene, nambe njasonekele uje mukanda, njalingilemo bene keti ngwe omwo uje walingile mwamubi nambe uje ubabiisilile embwe. Oloni njasonekele ngeci cimilumbunuke mwamubwa ku mesho a Njambi, ngeci kulikundika kweni kuli yetu kunapu kwakama manene.
MAY 20-26
BISIMPI BYA SEHO BYA MU LIJWI LYA NJAMBI | 2 KOLINTE 11-13
Paulu Wakele na “Mushongo wa Lulanga mu Mubila” Nambe Ngwetu Mungonga
(2 Kolinte 12:7) Oloni mu kunjinyunga kutewa njilyalesa omwo byuma bije bya kukomokesa binjamwene, co banjanene mushongo wa lulanga mu mubila, uje wakele na kupanga ngwe muluwa wa Satana mu kunjisindakana na kunjinyunga kutewa njilyalesa.
w08 6/15 3-4
Likoleseni Omwo Muliwana mu Byeseko
Ngamba wa kulongwa mukwabo walombele Yehova ngwendi amutundise “mushongo wa lulanga mu mubila” nambe ngwetu mungonga. Kapositolo Paulu walambelelele Njambi lutatu ngwendi amutundise uje mungonga. Uje mungonga washakele kumwonowesa kupangela Yehova mwamubwa. Paulu wakele na kuliziba ngwe bali na kumupupa bimbanda. Mukemwo Yehova wamukumbulwile ngwendi: “Kutetela kwange kunapumo ku byoshe, omwo nzili yange yapwa ya kukomokesa omwo unazeye.” Yehova katundisile uje mungonga. Oloni Paulu walikolesele, mukemwo wendekele ngwendi: “Omwo njinazeye asinoni njikale na nzili.” (2 Ko 12:7-10) Mwendekele awa majwi walumbunwine bika?
(2 Kolinte 12:8, 9) Bisimbu bitatu njalombelele kuli Mwene ha cuma eci, co njamwihwile ngeci acitundise. 9 Co ikeye wanjikumbulwile ngwendi, “Kutetela kwange kunapumo ku byoshe, omwo nzili yange yapwa ya kukomokesa omwo unazeye.” Ngeci bene, njili na kubwahelela manene ha byuma bya kuzeya byoshe ibyoshe na kujolela ha kunyunga kwa Kilistu na nzili eyi ili hali yange.
w06 12/15 24 ¶17-18
Yehova ‘Akana Sipilitu ya Kujela Kuli Baje Bamulomba’
17 Yehova mwakumbulwile malombelo a Paulu, wendekele ngwendi: “Kutetela kwange kunapumo ku byoshe, omwo nzili yange yapwa ya kukomokesa omwo unazeye.” Paulu wendekele ngwendi: ‘Njinabwahelela manene ha byuma bya kuzeya byoshe byoshe na kujolela ha kunyunga kwa Kilistu na nzili eyi ili hali yange.’ (2 Ko 12:9; Mya 147:5) Ngeci Njambi wapangesele Kilistu mu kwana Paulu nzili. Ano matangwa Yehova akakumbulula malombelo etu mu ngila ya kulifwa. Akatwana nzili ije ikatunyungilila ngwe muikanyungilila njubo.
18 Nameme njubo kuyesi kwonowesa nyozi kunyoka nambe kwimika lihunzi kuhuhwa, oloni ikanyungilila. Mu ngila imo lika ‘nzili ya Kilistu’ kuyesi kubindika byeseko nambe bukalu bwoshe kutwizila. Oloni ikanyungilila ku byuma byabibi bya kano kaye na ku matumbe a Satana mwene wako. (Kuj 7:9, 15, 16) Ngeci, nameme muliziba ngweni byeseko bimulinawana nabyo binapu byakama manene, oloni zibukeni ngweni Yehova azibuka bukalu bweni, co omwo mulilila kuli ikeye, amikumbulula. (Isa 30:19; 2 Ko 1:3, 4) Paulu wasonekele ngwendi: “Njambi akanyungu cikulaheso cendi, co kataba ngeci bamyeseke na byeseko bya kutubakana nzili yeni ngeci mwimane mbe, ha simbu ije bamyeseka, ikeye akamyana nzili ya kukolesa, co amisholwela ngila ngeci mwase kutundamo.”—1 Ko 10:13; Fil 4:6, 7.
(2 Kolinte 12:10) Yange njinahwimi mu mbunge ha kuzeya, mu kunjishaula na mu kukalekeya na mu mapakeso na mu kukaluwa omwo lizina lya Kilistu. Omwo njinazeye, asinoni njikale na nzili.
‘Njambi Akakolesa Baje Banazeye’
8 Nameme tuli na nzili ya kupwa hali, oloni kutwasa kulinga byuma byoshe mu nzili yetu. (Isa 40:30) Awa majwi anapu a busunga. Nameme kapositolo Paulu wapwile wa kukanyama, oloni nendi wakele na buzeye, ngeci kasele kulinga byuma byoshe byashakele. Omwo walombelele kuli Njambi, bamukumbulwile ngwabo: “Nzili yange yapwa ya kukomokesa omwo unazeye.” Paulu wazibisisile, mukemwo wendekele ngwendi: “Omwo njinazeye asinoni njikale na nzili.” (2 Ko 12:7-10) Walumbunwine bika omwo wendekele awa majwi?
9 Paulu wazibukile ngwendi kasa kupanga bipangi byoshe kwa kujeneka kumukwasa kuli Njambi. Mukemwo Njambi wanene Paulu sipilitu ya kujela mangana akale na nzili. Sipilitu ya Njambi yakwasele lalo Paulu alinge byuma bije kasele kulinga mu nzili yendi babenya. Netu mukemwo muikatukwaselamo sipilitu ya Njambi. Nzili ya Yehova ikeyo ikatutakamesa.
Kutondesesa Bisimpi bya Seho
(2 Kolinte 12:2-4) Njazibuka munalume umo wa muka-Yesu uje ibatwalele [mu lilu lya mu citatu, NWT] te kuneti laja myaka 14 (kunjasa kuzibuka nga eci mwa busunga calingiwile, nambe wamwene cimona, kubanga Njambi lika azibuka.) 3 Njilukilamo lalo ngwange, njazibuka ngeci uje munalume bamutwalele mu Lipela (lalo kunjizibuka nga eci mwa busunga calingiwile, nambe capwile cimona, lika kubanga Njambi lika azibuka), 4 co kuje wakazibile byuma bije naumo wahi asa kubilumbununa mu majwi, byuma bije, munu kasa kubyendeka na kanwa.
Bihula bya Baka-kutanda
“Lilu lya mu citatu” lije libanendeka ku mukanda wa 2 Kolinte 12:2, NWT lilumbununa Bumwene bwa Mesiya buje bwakayula Yesu na bakubwabesa ba kupwa 144,000 mu “lilu lyaliha.”—2 Pe 3:13.
Obu Bumwene banabutumbula ngwabo “lilu lya mu citatu” mwafwa bwapwa bumwene bwakama na kulitila.
Paladaisi ije ibatwalelemo Paulu mu cimona ilumbununa (1) Paladaisi ije ikakala hano hasi, (2) Paladaisi ya ku sipilitu ije ikakalako ha simbu ya kulutwe, ije lalo ikapwa yakama manene kutubakana Paladaisi ya ku sipilitu iliko ha simbu ino, co (3) “Paladaisi ya Njambi” ya mwilu, ije ikakala na hano ha kaye koshe.
(2 Kolinte 13:12) Lindwiseni umo na mukwabo na kulitsemba kwa kwoloka. Banu ba Njambi boshe banatumu biindu byabo kuli yeni.
it-2 177
Kulitsemba
“Kulitsemba kwa Kwoloka” Nambe Ngwetu Kulitsemba ca Kujela. Baka-Kilistu ba kusañulu bakele na futisi ya kulimeneka ibatumbwile ngwabo kulitsemba ca kujela nambe “kulitsemba ca cizemo.” (Lom 16:16; 1 Ko 16:20; 2 Ko 13:12; 1 Te 5:26; 1 Pe 5:14) Eci kulitsemba cakele mukati ka banu ba bushwamwa bumo. Eci kulimeneka calitombwele na kulimeneka ca Bahebelu ba kusañulu. Nameme bisoneka kubyendekele manene ha kulitsemba ca kujela nambe “kulitsemba ca cizemo,” oloni eci kulitsemba camwesele cizemo cije cakele mu cikungulukilo ca baka-Kilistu na likwatasano.—Yow 13:34, 35.
Kutanda Mbimbiliya
(2 Kolinte 11:1-15) Nga mwasa kunjitolilila, nambe omwo njilinga ngwe nji cilema kamandondo. Mukemwo bene njitolilileni. 2 Njili na lifuwa hali yeni ngwe lije lyakala nalyo Njambi, omwo munapu ngwe mumbanda uje kanda alimone na munalume uje njinakulahesa kumushombwesa kuli munalume umo lika, ikeye Kilistu. 3 Oloni njili na lyoba ngwange ngwe omwo linyoka wakwisile Eva na kunyanyama kwendi, hamo biyongola byeni bikazimbalesa kulikundika kweni kwa mutunu kwa kujela kuli Kilistu. 4 Omwo yeni muli na kutambula na kujolela munu woshe uje aija kuli yeni na kwambulula Yesu wa muyati weka, oloni keti uje itwambulwile yetu kuli yeni, co yeni munatambula munzinzime na muzimbu weka keti uje watundile ku Munzinzime na muzimbu waubwa uje umwatambwile kuli yetu. 5 Kunjayongwele ngwange yange njapwa wamundondo kuli baje bakama bamutumbula ngweni “miluwa.” 6 Nambe njinapu wamundondo ha kwendeka, oloni mwa busunga bene keti mu mana embwe, omwo mu bingila byoshe na ha bisimbu byoshe tunamisholwela byuma ebi. 7 Kunjasele kumifwetesa cuma cimo omwo njambulwile Biñanda Byabibwa bya Njambi kuli yeni, njalikehesele mu kulingisa yeni kupwa bakama. Kuma njabiisile ndi? 8 Simbu ije omwo njakele na kupanga hakati keni, bikungulukilo byeka byakele na kunjifweta. Co njebile kuli bakebo, ngeci njimipangele. 9 Ha simbu ije njakele neni kunjamiyandesele mu kujeneka kwange bimbongo, omwo bandolome baje batundile ku Masendoniya banjitikile byoshe ngwe ku kujeneka kwange. Ngwe matangwa a kunima, ngeci bene, na kulutwe, kunjikamitwiki citele. 10 Ha busunga bwa Kilistu buje buli muli yange, njimikulahesa ngwange kulishasha kwange oku kubakasa kucolwesa mu lifuti lya Akaya. 11 Kuma njendeka ngeci omwo njamizinda ndi? Njambi azibuka ngeci njamizema. 12 Njitwalelelaho kulinga bije njili na kulinga ololo, ngeci njibindike “miluwa” beka baje bali na kulishashela ha byuma byoshe na kwendeka ngwabo bakebo bipangi byabo binapu bya cifwa cimo ngwe bije tuli na kupanga yetu. 13 Banu aba kubapwile miluwa ba busunga embwe, bendeka makuli ha bipangi byabo, co bemuka mweka ngeci basholoke ngwe miluwa ba Kilistu bababwa. 14 Mukemwo bene, kutwasa kukomoka, nambe bene Liyabolo akalipwisa ikeye babenya ngwe kangelo wa mutanya. 15 Ngeci bene, eci keti cikeco cuma ca kukomokesa nga bangamba ba Liyabolo balisholola bakebo babenya ngwe bangamba ba busunga. Oloni ha kukotoka bakatambula fweto yabo ngwe ku bilinga byabo.
MAY 27–JUNE 2
BISIMPI BYA SEHO BYA MU LIJWI LYA NJAMBI | NGALATIYA 1-3
“Njamupopolwele ku Mesho a Mbunga”
(Ngalatiya 2:11-13) Oloni omwo Petulu wezile ku Antyoke, njamupopolwele ku mesho a mbunga, omwo wabiisile. 12 Omwo simbu kanda bete banu baje baatumine Yakomba, Petulu wakele na kulya na baka-kukulahela baje keti Bayunda. Oloni omwo betele baje banu, co washondolokele, co kalile na baje keti Bayunda, omwo wakele na lyoba lya baje batuukile. 13 Co Bayunda bamo baka-kukulahela balingile cibembulu ngwe Petulu, nameme Mbanambase nendi watangukile na cibembulu cabo.
Mukalingi Byuma mu Busunga Ngwe Yehova Ndi?
16 Petulu watsile mu mweto wa kutewa banu. (Nga 2:11-14; Vis 29:25) Nameme Petulu wazibukile bisinganyeka bya Yehova ha ñanda ya kutuhuka, oloni wazibile lyoba ha bisinganyeka bya Bayunda ba kutuhuka baje bakele mu cikungulukilo ku Yelusalema. Kapositolo Paulu uje wakele kuje ku ciwano ca ku Yelusalema mu 49 C.E., watenukilile Petulu mu Antyoke na kujombolola cibembulu camwesele. (Vil 15:12; Nga 2:13.) Banu baje kubapwile Bayunda balingile bati ha mulonga walingile Petulu? Bazeyele na kutanuka ndi? Petulu bamwecelesele bipangi byendi mwafwa ya uje mulonga ndi?
(Ngalatiya 2:14) Oloni omwo njamwene ngeci kubakele na kwenda mu ngila yaibwa ya busunga bwa muzimbu, co njendekele kuli Petulu ku mesho abo boshe ngwange, “Yobe unapu u Kayunda, oloni unakala na kuyoya ngwe uje keti Kayunda, keti ngwe Kayunda. Ngeci bene, bati wasa kusindiya baje keti Bayunda ngeci bayoye ngwe Bayunda?”
Baje Bazema Yehova “Kukwesi Cuma Cimo Casa Kubatanwisa”
12 Ha bisimbu bimo Petulu watanukile mwafwa ya kuzibila banu lyoba, oloni watwaleleleho kupwa wa kulongwa kuli Yehova na Yesu. Cakumwenako wabyanene Mwene yendi lutatu. (Luk 22:54-62) Co lalo, wayengwile baka-Kilistu ba kujeneka kutuhuka. Oloni kapositolo Paulu wazibukile ngwendi mu cikungulukilo kukwapandele kukala kulitepa mwafwa ya kutuhuka nambe kujeneka kutuhuka. Ngeci Petulu wakele na biyongola bya kuhenga. Oloni simbu kanda biyongola bya Petulu binene mpindangano mu cikungulukilo, Paulu wanangwile Petulu ku mesho a mbunga (Nga 2:11-14) Kuma Petulu walizibile manene kubabala ku mbunge na kwecela kwenda mu ngila iya ku mwonyo ndi? Embwe. Wasinganyekesesele ha cinangulo ca Paulu na kucipangesa na kutwalelelaho kwenda mu ngila iya ku mwonyo.
Kutondesesa Bisimpi bya Seho
(Ngalatiya 2:20) Bananjishukika hamo na Kilistu, ngeci bene, keti yange lalo njiyoya embwe, oloni Kilistu ikeye ayoya muli yange. Co mwonyo ou njili na kuyoya nawo ololo, njili na kuyoya ha kukulahela kuli Muna Njambi, uje wanjizemene, co walyanene ikeye babenya omwo yange
w14 9/15 16 ¶20-21
Pangeleni Njambi mu Kulongwa Nameme Mwita mu “Tuyando Twatungi”
20 Twasa kuhyana bati bisinganyeka bije byasa kutuzeyesa? Twasa kuhyana ebi bisinganyeka nga tusinganyekesesa ha ndando ya kupatula. Mukemwo mwalingilile na kapositolo Paulu. Ha bisimbu bimo walizibile kupwa munu wa kubindama. Oloni wazibukile ngwendi Kilistu watsililile baka-bubi. Co walizibile ngwendi nendi wapwile muka-bubi. Mukemwo wasonekele ngwendi: “Njili na kuyoya ha kukulahelela kuli Muna Njambi, uje wanjizemene, walyanene ikeye babenya omwo yange.” (Nga 2:20) Paulu wakulahelele ndando ya kupatula. Walizibile ngwendi Yesu watsililile ikeye.
21 Mu ngila imo lika, nga muzibuka ngweni Yehova namyana ndando ya kupatula, co kumikwasa mulikolese. Oloni oku kukulumbununa ngwabo buzeye bwetu buhwa oho bene. Mwafwa bamo betu batwalelelaho kulifwita nobu bukalu kweta na mu kaye kakaha. Oloni zibukeni ngweni baje batwalelelaho kulikolesa bakebo bakatambula cikandelela. Ololo Bumwene bwa Njambi bunena kwoloka mu kaye koshe, co banu ba kulongwa bakapwa ba kulumbuka. Nameme mwita mu tuyando twatungi, kakateyeni mangana mukakobele mu Bumwene bwa Njambi.
(Ngalatiya 3:1) Eni bilema baka-Ngalatiya. Iya namikasumuna? Mwalimwenenene mwamubwa na mesho eni mu kwalumbunukilile kutsa kwa Yesu Kilistu ha [citi ca kuyandesela]
it-1 880
Mukanda Kuli Baka-Ngalatiya
Kukwesi bukaleho buje bumwesa ngwabo Paulu mwendekele ngwendi “eni bilema baka-Ngalatiya,” walumbunwine cikota ca banu ba ku kunto ya Ngalatiya lika. (Nga 3:1) Oloni watenukilile banu ba mu cikungulukilo baje bakele na kuungumuka na bisemwa bya Ciyunda. Co lalo, bashakele kulipwisa baka-busunga ha kukabangeya mashiko a Mosesa kutubakana kupwa “baka-busunga ha kukulahela” kuje kubatambwile mwafwa ya cikumiyo caciha. (Nga 2:15–3:14; 4:9, 10) Paulu wasonekelele mukanda bikungulukilo bya mu Ngalatiya. Muje mu bikungulukilo mwakele Bayunda na baje kubapwile ba Bayunda. Hakati ka baje kubapwile Bayunda hapwile baka-kutuhuka na baje kubatuhukile, co lalo kwakele baje batundile ku Europe. (Nga 1:2; Vil 13:14, 43; 16:1; Nga 5:2) Oloni boshe babatumbwile ngwabo baka-Kilistu ba ku Ngalatiya, mwafwa mukemwo mubakele. Ou Mukanda wausonekelele baje bakele ku mbwela ya Loma baje baazibukile mwamubwa, keti baje bakele ku kunto baje kazibukile nambe kwendela.
Kutanda Mbimbiliya
(Ngalatiya 2:11-21) Oloni omwo Petulu wezile ku Antyoke, njamupopolwele ku mesho a mbunga, omwo wabiisile. 12 Omwo simbu kanda bete banu baje baatumine Yakomba, Petulu wakele na kulya na baka-kukulahela baje keti Bayunda. Oloni omwo betele baje banu, co washondolokele, co kalile na baje keti Bayunda, omwo wakele na lyoba lya baje batuhukile. 13 Co Bayunda bamo baka-kukulahela balingile cibembulu ngwe Petulu, nameme Mbanambase nendi watangukile na cibembulu cabo. 14 Oloni omwo njamwene ngeci kubakele na kwenda mu ngila yaibwa ya busunga bwa muzimbu, co njendekele kuli Petulu ku mesho abo boshe ngwange, “Yobe unapu u Kayunda, oloni unakala na kuyoya ngwe uje keti Kayunda, keti ngwe Kayunda. Ngeci bene, bati wasa kusindiya baje keti Bayunda ngeci bayoye ngwe Bayunda?” 15 Mwa busunga, yetu tunapu tu Bayunda ku cisemwa keti yetu “baje kesi Bayunda baka-bubi,” ngwe mu bali na kubatumbula. 16 Oloni twazibuka ngeci munu apwa muka-busunga ku mesho a Njambi ha kukulaela lika kuli Yesu Kilistu, keti ngwe mu kulinga bije bishakiwa ku Majwi a Lishiko embwe. Netu lalo tuna kulahela kuli Kilistu batupwisa baka-busunga ku mesho a Njambi ha kukulahela kuli Kilistu, keti ngwe mu kulinga bije bishakiwa ku Majwi a Lishiko embwe. Omwo ku bilinga bya mashiko munu naumo wahi akoboka. 17 Oloni omwo tushaka ngeci batupwise baka-busunga ku mesho a Njambi muli Kilistu, co banatuwana tunapu baka-bubi, ngwe baje keti Bayunda, kuma eci cinanunguluka ngeci Kilistu ali na kupangela nsina ya bubi ndi? Embwe. 18 Oloni nga njishangumuka kutungulula Majwi a Lishiko aje anjasiwile, co njili mwesa ngwe njili na kupokola Mashiko. 19 Omwo njatsile ku Majwi a Lishiko ngeci njiyoye muli Njambi. 20 Bananjishukika hamo na Kilistu, ngeci bene, keti yange lalo njiyoya embwe, oloni Kilistu ikeye ayoya muli yange. Co mwonyo ou njili na kuyoya nawo ololo, njili na kuyoya ha kukulahela kuli Muna Njambi, uje wanjizemene, co walyanene ikeye babenya omwo yange. 21 Kunjombwanesa kutetela kwa Njambi. Oloni nga munu bamupwisa muka-busunga ku mesho a Njambi ha kunyunga Majwi a Lishiko, co cinalumbunuka ngeci Kilistu nebi byatsililile byahi.