Mashiko a Njambi Ali na Kutukwasa Bati?

1. Bika bitushakela kututwamenena?

Ishamatanga ali na mana kutubakana yetu. Watwaka mbunge mwafwa wapwa Tate yetu. Njambi kayongwele ngwendi tulimanene yetu babenya embwe. (Njelemiya 10:23) Bana batonda kubatwamenena kuli bisemi byabo. Ngeci, netu tushaka kututwamenena kuli Njambi. (Isaya 48:17, 18) Mashiko a Njambi ali na kututwamenena. Anapu bwana bwa kutunda kuli Njambi.​—Tandeni 2 Timateo 3:16.

Mashiko a Yehova ali na kutulongesa mwakuyoyela bwino ino simbu. Co lalo ali na kutuleka bitunapande kulinga mangana tukalikuwe buyoye bwabubwa kulutwe. Njambi ikeye watutangele, ngeci tulinga mwamubwa kukabangeya mashiko endi.​—Tandeni Myaso 19:7, 11; Kujombolola 4:11.

2. Lijwi lya Njambi lili na kututwamenena bati?

Binangulo bya mu Mbimbiliya bikatuleke mwakulingila mu bukalu bwa kulisezaseza. Oloni mashiko anasa kupanga lika mu bukalu bubanakutila owo mashiko ha simbu oyo. (Kwituluka mu Mashiko 22:8) Nga tushaka ngwetu tuzibisise mubinendeka binangulo bya mu Mbimbiliya mu byuma bimo, tunapande kupangesa cashu cetu ca kusinganyeka. (Visimo 2:10-12) Cakumwenako, Mbimbiliya inatuleka ngwayo kuyoya kunapu bwana bwa kutunda kuli Njambi. Kuzibuka eyi simpi kutukwasa nga tuli ku bipangi, hembo, nambe mu bungenzi. Kuzibuka ngwetu kuyoya kunapu bwana, kutukwasa tulinyungilile ku bushonde.​—Tandeni Vilinga 17:28.

3. Mashiko muka abali aje apwa akama?

Yesu wendekele ha mashiko abali aje apwa akama. Lishiko lya kulibanga linamwesa ngwalyo banu babatangele mangana bazibuke Njambi, bamuzeme na kumupangela na mbunge yabo yoshe. Tunapande kusinganyeka ha lishiko eli omwo twangula byoshe bitulinga mu kuyoya kwetu. (Visimo 3:6) Baje bakabangeya eli lishiko, balikuta busamba na Njambi, babwahelela na kukawana kuyoya kwa myaka yoshe.​—Tandeni Mateo 22:36-38.

Lishiko lya mu cibali lituleka mutunapande kutumbamena na bakwetu. (1 Kolinte 13:4-7) Tunapande kwononoka eli lishiko lya mu cibali mangana tumone bakwetu banu ngwe mwabamona Njambi.​—Tandeni Mateo 7:12; 22:39, 40.

4. Mashiko a Njambi ali na kutukwasa bati?

Mashiko a Njambi ali na kulongesa banu mu binaanga mangana balizeme na kulikwatasana. (Kolose 3:12-14) Lijwi lya Njambi lili na kunyungilila lalo binaanga, mwafwa lili na kulongesa ngwalyo bulo bunapande kwilila.​—Tandeni Kushangumuka 2:24.

Nga tukabangeya biitulongesa Mbimbiliya, tukala na bisinganyeka byabibwa na kunyungilila bufuko bwetu. Cakumwenako, babenya bipangi bashaka kukobelesa banu baje bali na busunga, co lalo baka-kupanga na nzili. (Visimo 10:4, 26; Vahevelu 13:18) Lijwi lya Njambi lili na kutulongesa ngwalyo tushubuluke na byuma bituli nabyo na kuzema manene Njambi kutubakana bufuko.​—Tandeni Mateo 6:24, 25, 33; 1 Timateo 6:8-10.

Nga tukabangeya mashiko a Njambi, co tulikangula ku mubila. (Visimo 14:30; 22:24, 25) Cakumweneko, nga twononoka lishiko lya Njambi lije linabindika kupenda, kutunyungilila ku mishongo na ku bimonde. (Visimo 23:20) Yehova natutabesa ngwendi tunwe bwala mu kwesekela. (Myaso 104:15; 1 Kolinte 6:10) Mashiko a Njambi atukwasa mwafwa ali na kutulongesa kukala na bilinga byabibwa na bisinganyeka byabibwa. (Myaso 119:97-100) Baka-Kilistu ba busunga kubesi na kwononoka mashiko a Njambi mwafwa ya bubwa buli na kutundumo embwe. Bali kuwononoka mwafwa bashaka kusingimika Yehova.​—Tandeni Mateo 5:14-16.