Biñanda bya Kupangesa mu Mukanda wa Biwano bya Buyoye Bwetu Baka-Kilistu na Cipangi Cetu
JANUARY 4-10
BISIMPI BYA SEHO BYA MU LIJWI LYA NJAMBI | VALEVI 18-19
“Pweni ba Kujela”
Twasa Kulinyungilila Bati ku Miheto ya Satana?
Yehova wanangwile Baisalele ha byuma byabibi bibakele na kulinga baje balyatele nabo, co wabalekele ngwendi: ‘Keti mukakabangeye bilinga bya banu ba mu lifuti lya Kanana, kuje kunjili na kumitwala. Bilinga byabo binabiisa lifuti, ngeci bene njikabana kashitiko.’ Yehova ha kupwa Njambi wa kujela, wamwene lifuti lya Kanana kupwa lya mazilo nambe ngwetu lya kujwala mwafwa ya bilinga byabibi bya banu bakelemo.—Lev 18:3, 25.
Yehova Ali na Kutwamenena Banu Bendi
13 Aba bimyene ba kulongwa balisezele na baje bantwama ba baka-mafuti eka, mwafwa bakebo bajendamenene ha mana a bunu na bisinganyeka byabo. Mu ciyulo ca Bakanana, banu bakele na kulinga byuma byabibi bya kufwa ngwe kulala na kabushoko na bundei na kulala na tusitu na kukombelela bana babo na kulemesa tumponya. (Lev 18:6, 21-25) Co lalo, bantwama ba Bambambilone na Ingito, kubakele na kukabangeya mashiko aje akundamene ku kujela, aje Njambi wanene kuli Baisalele. (Kul 19:13) Oloni banu ba Njambi ba kusañulu balimwenenene omwo bantwama babo ba kulongwa babakwaselele kupwa ba kujela ku sipilitu na mu bilinga na ku mubila. Mwa busunga bene, Yehova wakele na kubatwamenena.
w14 7/1 7 ¶2
Bika Byakalinga Njambi ku Banu Bababi?
Bika bikalingiwa ku banu baje babyana kutengulula futisi yabo, oloni bali na kutwalelelaho lika kulinga byuma byabibi? Mbimbiliya inakumbulula ngwayo: “Baka-busunga bakebo ba kujeneka mulonga bakakala muno mu lifuti. Oloni Njambi akasheka baka-bubi mu lifuti, bakapwa ngwe cimena cibatukula mu libu.” (Vis 2:21, 22) Banu bababi bakahwa boshe njwa. Oloni banu bababwa bakakala mu kwoloka, co bakabapatula ku bubi bubatambwile kuli Adama na Eva.—Lom 6:17, 18; 8:21.
Bisimpi bya Seho
w06 6/15 22 ¶11
“Njazema Manene Mashiko Obe!”
11 Lishiko lya Njambi lije lyatabesele banu ba Njambi baye na kupupulula mu mahya a bakwabo lyamwesele ngwalyo Njambi wazema banu bendi. Yehova washikile Baisalele ngwendi omwo bateja bapandele kutabesa tuhutu bapupulule bije bibasezele mu mahya. Bandimi kubapandele kuteja byakulya byoshe byakele kushongo ya mahya abo nambe kukungulula bushuka buje bwasala-salele mu mahya. Kubapandele kwilukila bimbuto bibebalelele mu mahya. Ei yapwile ngila yaibwa manene ya kukwaselamo baka-kwija, bisiwa na bifwile. Nameme kupupulula kwapwile cipangi cakama, oloni kwabakwasele bajeneke kuya na kulomba-lomba byakulya ku bakwabo.—Lev 19:9, 10; Kwi 24:19-22; Mya 37:25.
JANUARY 11-17
BISIMPI BYA SEHO BYA MU LIJWI LYA NJAMBI | VALEVI 20-21
“Yehova Atonda Ngwendi Banu Bendi Balyangunune ku Kaye”
w04 10/15 11 ¶12
Mwakulahela Ngweni Mukayoya mu Paladaisi Ndi?
12 Kuli Simpi imo kutwapandele kwibala. Njambi walekele Baisalele ngwendi: ‘Mukononoke mashiko awa njili na kumyana ku litangwa lya lelo, ngeci mukase kujabuka ndonga ya Yondau na kuswana lifuti lije mushaka kuswana.’ (Kwi 11:8) Ku Valevi 20:22, 24 banendekako lalo byeli lifuti. Mukanda ngwawo: “Ngeci bene, mukanyunge mashiko ange oshe, na kushika kwange kwoshe na kuwalinga, ngeci kesi bakamibyane mu lifuti muje munjili na kumitwala. Oloni yange njamikulahesele lifuti eli lyalibwa lya bwilo nebi byakujenekamo byahi kupwa buswana bweni, co yange njikamyanalyo.” Ngeci, Baisalele bapandele kukanyamesa busamba bwabo na Yehova Njambi mangana batwaleleleho kukala mu Lifuti lya Cikulaheso. Oloni kubononokele Njambi mukemwo watabesele Bambambilone babafungulule na kubatundisa mu lifuti lyabanene Njambi.
it-1 1199
Buswana
Buswana bwapa cuma coshe-coshe caswana munu nga babenya natoko. Co lalo bunapu cuma cibana munu. Lijwi lya buswana lyatunda ha lijwi lya Cihebelu lya na·chalʹ neli lya chalahʹ. Eli lijwi linambateselela kutambula nambe kwana byuma bimo mangana munu abiswane. (Kul 26:55; Eze 46:18) Lijwi lya Cihebelu lya ya·rashʹ simbu imo bakalipangesa mu kuswana munu, oloni kakangi bakalipangesa mu kuswana byuma. (Kus 15:3; Lev 20:24) Likalumbununa lalo kunyeka munu cuma nambe kumusindiya atunde ha mutambela wendi ngwe mubakalingi maswalale. (Kwi 2:12; 31:3) Majwi a Cingiliki aje alumbununa buswana alifwa na lijwi lya kleʹros. Eli lijwi ha kulibanga lyalumbunwine kuta ñela, co mu kwita kwa simbu lyalumbunwine kulipangezela, hano lilumbununa buswana.—Mat 27:35; Vil 1:17; 26:18.
it-1 317 ¶2
Tuzila
Libazi lyakama mulyahwile, Nowa wanene tuzila ba kujela na tusitu bamo kupwa ñombelo. (Kus 8:18-20) Kutunda haje bene, Njambi watabesele banu balye tuzila, cakama kubabatundisile lika maninga. (Kus 9:1-4; esekeseni Lev 7:26; 17:13.) Ngeci, tuzila bamo babatumbwile ngwabo bapwile ba kujela mwafwa bakebo babapangesele mu kulemesa Njambi. Bisoneka kubimwesa ngwabyo tuzila bamo kubapandele kubalya mwafwa bapwile ba kujwala, kubanga hakwezilile Mashiko a Mosesa. (Lev 11:13-19, 46, 47; 20:25; Kwi 14:11-20) Mbimbiliya kuyendekele mpundu byuma byalingisile tuzila bamo babatumbule ngwabo bapwile ba kujwala. Bwingi bwa tuzila baje bakali situ babatumbwile ngwabo ba kujwala, oloni keti boshe. Oloni eli lishiko lya kujeneka kulya tusitu bamo lyahwile omwo kwakele cikumiiyo caciha. Cimona camwene Petulu cimwesa bukaleho bwei ñanda.—Vil 10:9-15.
Bisimpi bya Seho
it-1 563
Kulilengozola
Lishiko lya Njambi lyabindikile Baisalele ngwabo keti balilengozole nga kuli byakutsa. (Lev 19:28; 21:5; Kwi 14:1) Kubapandele kulinga ngoco mwafwa bapwile ba kujela kuli Yehova, co lalo bapwile buswana bwendi. (Kwi 14:2) Ngeci, kubapandele kulinga byuma byoshe-byoshe bije byakundamene ku kulemesa tumponya. Co lalo kubapandele kulila mu kutubakanesa na kulilengozola mwafwa bazibukile mwamubwa cifwa cibalimo batsi, co lalo bakele na lilabelelo lya kusanguka kwa batsi. (Nda 12:13; Hev 11:19) Kutundaho, lije lishiko lyakwasele Baisalele bakale na biyongola byabibwa ha mibila yabanene Njambi.
JANUARY 18-24
BISIMPI BYA SEHO BYA MU LIJWI LYA NJAMBI | VALEVI 22-23
“Bika Bitulilongesa ku Biwano bya ha Mwaka?”
it-1 826-827
Biwano bya Makende a Kujeneka Musima
Banu boshe bapandele kulikungulula ha litangwa lya kulibanga lya Ciwano ca Makende a Kujeneka Musima, co lalo lyapwile lya Sabata. Ha litangwa lya mu cibali lya ciwano, ha Nisani 16, bakele na kutwala mukuta wa bimbuto bya mbale kuli kapilistu. Mbale ikeyo yakele na kulibanga kuhya mu Palestine. Simbu kanda eci ciwano cete, kubapandele kulya makende nambe bimbuto bya kwoca byabiha. Kapilistu wanene bije bimbuto bya kulibanga kuli Yehova mu cifwisa omwo wakele na kuhungisa uje mukuta noku-noku. Co bakele na kukombelela lijamba lya muna manga wa mwaka umo wa kujeneka kapenga kupwa ñombelo ya kwenyeka hamolika na mulambu wa bimbuto bya kutsingasana na mazi na mulambu wa binyu. (Lev 23:6-14) Kukwakele lishiko lyamwesele ngwalyo bimbuto nambe bunga bwa kuseneta bapandele kubyenyekela ha mutula ngwe mubakulingile tupilistu. Kutundaho, ha simbu yeci cilika, naanga na naanga nambe munu endi lika uje wakele na libu mu Isalele, boshe bakele na kulambula mulambu wa kumwesa kukandelela.—Kut 23:19; Kwi 26:1, 2.
Makende a kujeneka musima emanenene bika? Baisalele mubakele na kulya makende a kujeneka musima aha ha cilika, balingile bije byendekele Yehova kuli Mosesa bije bili ku mukanda wa Kutuuka 12:14-20. Oku kwambateselele na lishiko lije lili ha vesi 19, lije lyendeka ngwalyo: “Kesi mukakale musima mu binjubo byeni ha matangwa [7].” Ku Kwituluka mu Mashiko 16:3, awa makende banawatumbula ngwabo “makende a tuyando,” co akele na kwanukisa Bayunda mwaka na mwaka ngwabo batundile mu lifuti lya Ingito mu kushatozoka. Kubakele na simbu ya kwaka musima ha makende abo. (Kut 12:34) Ngeci, Baisalele bakele na kwanuka tuyando tubayandele mu bundungo muje mu babapatwile. Yehova wabalekele ngwendi: “Simbu yoshe ya kuyoya kweni mukanuka litangwa lije mwatundile mu lifuti lya Ingito, lifuti lije lya tuyando.” Baisalele bazibukile ngwabo Yehova ikeye wabapatwile mu bundungo, ngeci bakele na kulinga ciwano ca Makende a Kujeneka Musima. Eci ciwano capwile cimo ca biwano bitatu byakama bibalingile ha mwaka na mwaka.—Kwi 16:16.
it-2 598 ¶2
Pentekosita
Byuma byakele na kulingiwa mubakele na kwana bimbuto bya kulibanga bya mbale ya maumwa, byalisezele na byuma byakele na kulingiwa mubakele na kwana bimbuto bya kulibanga bya tiliku. Bambatele makilo abali a bunga bwa kuseneta bwa tiliku na kubukumbasana na musima na kumungaho makende abali. Bakele na kuwamungila ku binjibo byabo, co apwile lika ngwe makende aje abakele na kumunga ha litangwa na litangwa keti ngwe aje abapangesele mu byuma bya kujela. (Lev 23:17) Co lalo bakele na kwana mulambu wa kwenyeka na mulambu wa ha bubi. Kutundaho bakele na kwana majamba a bimanga babali kupwa mulambu wa kulitombola. Kapilistu wakele liboko lyendi kwisi ya makende na bipuka na kubihungisila noku-noku. Kulinga ngoco kwamwesele ngwabo babyanene kuli Yehova. Mubamanesele kubyana kuli Yehova, byapwile oni bya kapilistu, co wabilile kupwa mulambu wa kulitombola.—Lev 23:18-20.
w14 5/15 29 ¶11
Kuma Muli na Kwendelela Hamo na Munga ya Yehova Ndi?
11 Munga ya Yehova ishaka ngwayo tuyoye mwamubwa mukemwo ikatushongangeya ngwayo twononoke majwi asonekele kapositolo Paulu ngwendi: “Ngeci bene, tuliyongoleni umo na mukwabo na kulikwasa umo na mukwabo na kumwesa cizemo na kulinga mwamubwa. Kesi tulikele kulikungulula hamolika, ngwe futisi ya bamo. Oloni tulikoleseni umo na mukwabo na kuhyana, omwo litangwa lya Mwene lili muyehi.” (Hev 10:24, 25) Biwano bibakele na kulinga Baisalele ha mwaka na mwaka na biwano bikwabo byakanyamesele busamba bwabo na Yehova. Co lalo biwano bya kufwa ngwe Ciwano ca Mapapela ca mu simbu ya Nehemiya byabalingisile babwahelele. (Kut 23:15, 16; Neh 8:9-18) Mu ngila imolika, netu tukawana bukwasi ku biwano bya cikungulukilo, bya citingitingi nebi bya mutambela. Ngeci, tuwaniwe-waniwe oku ku biwano mangana tukanyamese busamba bwetu na Yehova na kupwa ba kubwahelela.—Tit 2:2.
Bisimpi bya Seho
Pweni ba Kulongwa
3 Kuli yetu banu ba Njambi, kulongwa kunapu kuzema Njambi na mbunge yetu yoshe na kumupangela na mbunge yetu yoshe na kutwameka cizango cendi omwo twangula bya kulinga. Tumoneni mubanapangesela lijwi lya kulongwa mu Mbimbiliya. Lijwi lya Cihebelu libananungulula ngwabo “kulongwa,” lilumbununa cuma camutunu, ca kujeneka kapenga nambe calambwe. Cakumwenako, Baisalele bakele na kwana ñombelo ya tusitu kuli Yehova, co Lishiko lyamwesele ngwalyo baje tusitu kubapandele kukala na kapenga. (Lev 22:21, 22) Banu ba Njambi kubabatabesele kwana kasitu wa kupokoka lindi, wa kujeneka litwi, wa kutibika lisho nambe uje ali na kubinja. Yehova washakele kasitu wamutunu, wa kujeneka kapenga, walambwe. (Mal 1:6-9) Yehova washaka cuma ca kujeneka kapenga nambe camutunu. Cakumwenako, mutukalanda bushuka, libulu nambe cikwata ca kupangesa, kutwesi kulanda bya kutubazeka nambe bya kutabuka. Oloni tukalanda byamutunu, byabibwa nambe bya kujeneka kapenga. Mu ngila imo lika, Yehova ashaka ngwendi cizemo na kulongwa kwetu kuli ikeye bipwe byamutunu, byalambwe, nambe bya kujeneka kapenga.
JANUARY 25-31
BISIMPI BYA SEHO BYA MU LIJWI LYA NJAMBI | VALEVI 24-25
“Cilika ca Mwaka wa Kulitila Cimwesa Mutukapatukila Kulutwe”
it-1 871
Kupatuka
Njambi Muka-kupatula. Yehova wapwa Njambi muka-kupatula. Wapatwile Baisalele mu Ingito. Wabalekele ngwendi nga bononoka mashiko endi, bakapatuka, co na cimo cibakajena cahi. (Kwi 15:4, 5) Lishiko lyamwesele ngwalyo nga munu nahutwa, co wasele kulilandesa mu bundungo mananga awane byakulikwasesa na naanga yendi. Oloni nga ndungo wa Kahebelu napangela shukulu yendi ha myaka 6, wapandele kupatuka mu mwaka wa bu 7. (Kut 21:2) Mwaka wa Kulitila uje wakele na kukalako munima ya myaka 50, wapwile mwaka wa kupatula banu boshe. Ndungo wa Kahebelu woshe wapatukile, co welukile kwimbo lyendi ha libu libamwanene.—Lev 25:10-19.
it-1 1200 ¶2
Buswana
Libu kubalitabesele kulilandeselela myaka yoshe, mwafwa naanga yoshe yatalele haje bene ha libu. Ndando ya libu yemanene ha myaka yasaleleko mangana bete ha Mwaka wa Kulitila. Co nga uje Mwaka wa Kulitila wetele, lije libu lyelukile kuli babenyalyo, kubanga nga uje walilandele alilanda lalo. (Lev 25:13, 15, 23, 24) Eli lishiko lyambateselele na binjibo bije kubazengelekele na cibumbe ca nganda, bije byapwile ngwe mahya. Oloni binjibo bije bibazengelekele na cibumbe ca nganda babitabesele lika kubilwisa kuli babenyabyo nga kukwetile mwaka mukati. Oloni nga mwaka watubakanene, babenya njibo kasele lalo kwilwisa ije njibo, yapwiloni ya uje wailandele. Binjibo bije byakele mu binganda bya Balebi basele kubilwisa simbu yoshe-yoshe mwafwa Balebi kubakele na libu lije lyapwile buswana bwabo.—Lev 25:29-34.
it-2 122-123
Mwaka wa Kulitila
Baisalele mubakele na kwononoka lishiko lya Mwaka wa Kulitila bayoyele mwamubwa. Kukwakele bituli na kumona ano matangwa mu mafuti amo muje mulinga bamo baka-kufuma manene bakwaboco baka-kuhutwa manene. Omwo munu na munu wayoyele mwamubwa, co lifuti nalyo lyakele mwamubwa mwafwa boshe bakele na kupanga byuma bije byakwasele lifuti. Baisalele mubakele na kwononoka Yehova, bakele na kuyoya mwamubwa, mu ciyulo cacibwa mwafwa Yehova wakele na kubezikisa libu habakele na kulima na kubalongesa byuma byabibwa.—Isa 33:22.
Bisimpi bya Seho
w09 9/1 22 ¶4
Nga Banakulingi Mwamubi
Nga Kaisalele wabulumwine mukwabo na kumucakula lisho, Lishiko lyamwesele ngwalyo basele kumwana kashitiko. Oloni uje ibabulumwine nambe umo wa mu naanga yendi keti bakebo bapandele kukamwana kashitiko. Lishiko lyamwesele ngwalyo bapandele kutwala ije ñanda ku maako mangana bakaisompe mwamubwa. Kuzibuka ngwabo munu uje nabulumuna mukwabo shakelo bamwana kashitiko kanapande, kwakwasele uje ibanabulumuna ajeneke kulinga shambandinga. Oloni byabingi byalibungililemo.
FEBRUARY 1-7
BISIMPI BYA SEHO BYA MU LIJWI LYA NJAMBI | VALEVI 26-27
“Tunapande Kulinga Bika Mangana Yehova Atubezikise?”
w08 4/15 4 ¶8
Byaneni bya Kujeneka Seho
8 “Bufuko” bwasa kupwa bati ngwe njambi? Cakumwenako, lingeni ngwe mumona limanya lili mu lihya lya Kaisalele. Lije limanya basele kulipangesa mu kutunga njibo nambe cibumbe. Oloni limanya lya kulifwa lyasele kupwa citanukiso ku banu ba Yehova nga balilemesele kupwa kamponya. (Lev 26:1) Mu ngila imolika, bimbongo nabyo kubyabihile. Bitukwasa mu byuma bya ku mubila na mu cipangi ca Yehova. (Kwa 7:12; Luk 16:9) Oloni nga tutwameka bimbongo kutubakana cipangi ca Yehova, co bimbongo bipwa ngwe njambi yetu. (1 Ti 6:9, 10) Muno mu kaye, banu babangi bamona ngwabo bimbongo bikebyo byapwa bya seho manene, ngeci tunapande kukala na biyongola byabibwa ha bimbongo.—1 Ti 6:17-19.
it-1 223 ¶3
Kasingimiko Kakama
Banu ba Njambi basingimikile Mosesa mwafwa ya kumona omwo Yehova wamupangeselele mu ngila ya kulitila. (Kwi 34:10, 12; Kut 19:9) Baje bakele na likulahelo basingimikile Mosesa mu ngila inapande. Bazibukile ngwabo Njambi wakele na kwendeka kuli bakebo kwitila muli Mosesa. Kutundaho, basingimikile mbalaka ya Yehova. (Lev 19:30; 26:2) Oku kwambateselele kumona mbalaka kupwa ya kujela na kulemesa Yehova mu ngila inapande na kwononoka mashiko endi oshe.
w91 3/1 17 ¶10
“Kwoloka kwa Njambi” Kunyunge Bimbunge Byeni
10 Yehova walekele Baisalele ngwendi: “Nga mukabangeya mashiko ange na kwononoka kushika kwange, co njikanyokesa nyonzi ha simbu yayo yaibwa, co libu likamenesa bimbuto, na miti lalo ikaima bushuka bwabungi. Mukakala mu kwoloka kuluu mu lifuti lyeni, co kumukazibi lyoba. Njikatundisa bushonde bwa tusitu bababi mu lifuti lyeni, kumukakala lalo nzita muje. Yange njikakala neni, njikapwa Njambi yeni, co neni lalo mukapwa banu bange.” (Lev 26:3, 4, 6, 12) Baisalele bakele mu kwoloka mwafwa bitozi babo kubabalwisile, co lalo bakele na bufuko bwabungi na busamba bwa kukanyama na Yehova. Oloni kukala mu kwoloka kwemanene ha kwononoka mashiko a Yehova.—Mya 119:165.
Bisimpi bya Seho
it-2 617
Mishongo
Mishongo Ije Yezile Mwafwa ya Kujeneka Kukabangeya Mashiko a Njambi. Njambi walekele Baisalele ngwendi nga bapokola cikumiiyo calikumiiye nabo, co akabatumina mishongo. (Lev 26:14-16, 23-25; Kwi 28:15, 21, 22) Bisoneka bimwesa ngwabyo, kusañulu, nga munu walikangwile, ipwe ku mubila nambe ku sipilitu, co kwamwesele ngwakwo wakele na bibezikiso bya Yehova. (Kwi 7:12, 15; Mya 103:1-3; Vis 3:1, 2, 7, 8; 4:21, 22; Kuj 21:1-4) Oloni mishongo yamwesele bubi na kujeneka kulumbunuka. (Kut 15:26; Kwi 28:58-61; Isa 53:4, 5; Mat 9:2-6, 12; Yow 5:14) Ha bisimbu bimo, Yehova ikeye wakele na kunenela banu bamo mishongo ngwe mwalingile kuli Milyamu, Uziya na Ngehazi. (Kul 12:10; 2 Mi 26:16-21; 2 Vi 5:25-27) Oloni kakangi cisholoka ngwe mishongo imo yakele na kulizila mwafwa ya bubi bwalingile munu umo nambe banu babangi. Batejele bibakubile, co babinjile mwafwa ya bilinga byabo byabibi. (Nga 6:7, 8) Kapositolo Paulu wendekele bya baje balingile bukwizi ngwendi Njambi “nabecelela ngeci balinge byuma bya mazilo ngwe ku mashungu a bimbunge byabo, co balinga byuma bya shwamwa kuli umo na mukwabo. . . Co ha cuma eci banatambula fweto inabapande omwo bilinga byabo byabibi bije bibanalingi.”—Lom 1:24-27.
FEBRUARY 8-14
BISIMPI BYA SEHO BYA MU LIJWI LYA NJAMBI | KULAVA 1-2
“Yehova Akongweya Banu Bendi”
w94 12/1 9 ¶4
Kulemesa Yehova Kukekwo Kunapande Kupwa kwa Seho Manene mu Kuyoya Kwetu
4 Ngwe mwasele kupulula ngwe kazila na kumona cilombo ca Baisalele oku muli mu bukambwila, ngwe bika munesi kumona? Ngwe munesi kumona bitenti byabingi bibanashimbika mu mikana. Munesi kumona lalo banu 3 milyoni nambe kutubakana baje bali mu bibunga bya miyati itatu-itatu. Cibunga cimo cakele mu kunto, cikwabo mu mbwela, cikwabo mwija-tangwa, cikwaboco muya-tangwa. Omwo mutalesesa mwamubwa, munesi kumona cibunga cikwabo cili muyehi na hakati ka cilombo. Eci cibunga cakelele na bibunga biwana bya bitenti muje mwakele Balebi. Co hakati ka cilombo, kwakele lilapa lya nanga muje mwakele “mbalaka mwakuliwanena” ije ibatungile “baka-butongwe” kwesekesa na mashiko a Yehova.—Kul 1:52, 53; 2:3, 10, 17, 18, 25; Kut 35:10.
it-1 397 ¶4
Cilombo
Cilombo ca Baisalele capwile cakama manene. Kwesekesa na banu babasonekesele, banalume baje basele kulwa bapwile 603,550, kutundisako banakazi na banike na tukulukazi na biyanga. Balebi bapwile 22,000, co kwakele lalo “mbunga ya banu beka.” Ngeci, boshe betele ku 3 milyoni nambe kutubakana. (Kut 12:38, 44; Kul 3:21-34, 39) Kutuzibuka mwamubwa ngwetu banu boshe basele kukala ha mwela wa kupwa hali. Oloni cilombo mucalitalele na nganda ya Yeliko mu Cana ca Mowabi, Mbimbiliya inamwesa ngwayo catundile ku ‘Mbete Njeshimote kweta na ku Cana ca Miti ya Mingongo.’—Kul 33:49.
Bisimpi bya Seho
it-2 764
Kulisonekesa
Banu bakele na kulisonekesa mazina abo kwesekesa na muyati wabo nambe nanga yabo. Kulisonekesa kwambateselele byuma byabingi keti kutanda lika banu. Kulisonekesa kubanendeka mu Mbimbiliya kwakwasele banu bafwete mitelo, bazibuke banu bakobela buswalale, co lalo kwakwasele Kalebi na Kalebi azibuke simbu ya bipangi bibanamwana ku Mbalaka.
FEBRUARY 15-21
BISIMPI BYA SEHO BYA MU LIJWI LYA NJAMBI | KULAVA 3-4
“Bipangi bya Balebi”
it-2 683 ¶3
Kapilistu
Mwisi ya Cikumiiyo ca Lishiko. Baisalele mubatundile mu bundungo mu Ingito, Yehova wajelesele bantwatwa ba Baisalele ba banalume omwo watsiile bantwatwa ba Baingito ba banalume mu cihiso ca bu 10. (Kut 12:29; Kul 3:13) Ngeci, bantwatwa boshe bapwile ba Yehova, co bapandele kumupangela mu cipangi ca kulitila. Njambi wapandele kwangula lika bantwatwa ba banalume mangana bapwe tupilistu na baka-kutala bya ku mbalaka. Oloni kalingile ngoco, wangwile muyati wa Balebi mangana bapange cije cipangi ca kulitila. Ngeci, watabesele Balebi benge bantwatwa ba banalume ba Baisalele mangana balinge cipangi cibapandele kulinga bantwatwa ba banalume ba Baisalele ba ku miyati 12. Bana ba Yosefa babali, Efalime na Manase babatandele kupwa miyati ibali. Oloni omwo batandele bantwatwa boshe ba banalume ba Baisalele baje kubapwile Balebi baje bakele na ngonde imo nambe kutubakana, bawanene ngwabo banalume ba kupwa 273 batubakanene nambala ya banalume ba Balebi. Ngeci, Njambi washikile ngwendi munu na munu kuli baje bakupwa 273, afwete mabundungulu atanu a siliba (K198). Co bimbongo byoshe babyanene Alone na bana bendi. (Kul 3:11-16, 40-51) Simbu kanda ebi byuma bilingiwe, Yehova te nangula laja banalume mu naanga ya Alone ije yapwile ya ku muyati wa Lebi ngwendi kukekwo kutunda tupilistu boshe ba Baisalele.—Kul 1:1; 3:6-10.
it-2 241
Balebi
Bipangi Byabo. Lebi wakele na bana batatu ba banalume, Ngeleshone, Kohate na Melali. Co oku kukekwo kwatunda Balebi. (Kus 46:11; 1 Mi 6:1, 16) Omwo bakele mu mambo, imo na imo yebi binanga bayanene mutambela kuyehi na mbalaka mangana bakaleko. Cikota ca Kohate, kuje kwatunda Alone, bashimbikile cilombo cabo kulutwe lwa mbalaka mu mbwela. Cikota ca Ngeleshone bashimbikile cilombo cabo muya-tangwa, co cikota ca Melali bashimbikile cilombo cabo mu kunto. (Kul 3:23, 29, 35, 38) Balebi bakebo bakele na kushimbika mbalaka na kuishimbula na kuijalwisa. Ha simbu ya kujaluka, Alone na bana bendi bakebo bakele na kutundisa binanga bije byangunwine Mutambela wa Kujela na Mutambela wa Kujela Manene, co babifwikile ha cikasha ca cikumiiyo na ha mitula na ha bikwata byoshe bya kujela bibapangesele ku mbalaka. Co ba ku cikota ca Kohate bakebo babyambatele. Ba ku cikota ca Ngeleshone bakebo bajalwisile mbalaka, bifwiko, bilambu, mabamba na mikole ya ku mbalaka. Co ba ku cikota ca Melali bambabatele bibuliko, mabalo, bimanda, bipambalingo na mikole ya ku cipango ca mbalaka.—Kul 1:50, 51; 3:25, 26, 30, 31, 36, 37; 4:4-33; 7:5-9.
it-2 241
Balebi
Ha simbu yakele na kutwamenena Mosesa, Balebi baje betele ha myaka 30 bakebo basele kupanga bipangi byoshe bya Balebi bya kufwa ngwe kujalwisa mbalaka na byuma byayo. (Kul 4:46-49) Baje bakele na myaka 25 bakele na kupangako bipangi bimo, oloni kubakele na kupanga bipangi bya kulema ngwe bya kujalwisa mbalaka. (Kul 8:24) Ha simbu yayulile Mwene Ndabiti, batabesele nameme baje bakele na myaka 20 mwafwa mbalaka kubakele na kuijalwisa-jalwisa. Mu kwita kwa simbu, mbalaka baingisile na tembele. Nga Kalebi wakele na myaka 50, kapangeloni ngwe mubakele na kupangela bakwenje. (Kul 8:25, 26; 1 Mi 23:24-26) Balebi bapandele kuzibuka mwamubwa mashiko a Njambi mangana bawatandele mbunga mwamubwa na kulongesako bakwabo.—1 Mi 15:27; 2 Mi 5:12; 17:7-9; Neh 8:7-9.
Bisimpi bya Seho
w06 8/1 23 ¶13
Kaleni na Mana, co Zibileni Njambi Lyoba
13 Ndabiti mwalimwenenene mwamukwaselelemo Yehova ha simbu yaliwanene na bukalu, wazibilile Njambi lyoba, co wamukulahelele manene. (Mya 31:22-24) Oloni ha bisimbu bitatu, Ndabiti kazibilile Njambi lyoba, co oku kwanenele bukalu bwakama. Lwa kulibanga, Ndabiti wabwahesele ngwendi cikasha ca cikumiiyo bacitwale ku Yelusalema mu litemba. Oloni Lishiko lya Njambi lyamwesele ngwalyo Balebi bakebo bapandele kwambata cije cikasha ha bitsili. Uza uje wakele na kwendesa litemba mwolwele liboko ngwendi akwate Cikasha ca Cikumiiyo manganga kesi ciwe, watsile haje bene. Uza walingile bubi bwakama, oloni Ndabiti ikeye wonowele kukabangeya Lishiko lya Njambi mukemwo bukalu bwoshe buje bwezile. Kuzibila Njambi lyoba kulumbununa kulinga byuma mwanabibwahesela Njambi.—2 Sa 6:2-9; Kul 4:15; 7:9.
FEBRUARY 22-28
BISIMPI BYA SEHO BYA MU LIJWI LYA NJAMBI | KULAVA 5-6
“Mwasa Kutembwinina Bati Banazalite?”
it-2 477
Kanazalite
Kwakele mashiko atatu akama abapandele kukabangeya baje balikumiiye kupwa Banazalite: (1) Kubapandele kunwa bwala nambe kulya bushuka bwa binyu bwa bubishu, bwa kuhya nambe bwa kuma nambe kunwa musozi wabwo wa kutonola, wa kuseta nambe wa kungangamena. (2) Kubapandele kuteula biñambu bya ku mitwe yabo. (3) Kubapandele kukwata cibimbi, nameme obo batsile bapwile baishe, baina, bandolome yabo nambe bandokazi yabo.—Kul 6:1-7.
Bikumiiyo bya Kulitila. Munu uje walikumiiye kupwa ‘Kanazalite, walikundikile kuli Shukulu Kalunga,’ co kalingile ngoco mu kushaka lika kulimwesa ku banu. Oloni ‘wapwile wa kujela kuli Yehova.’—Kul 6:2, 8, 8; esekeseni Kus 49:26.
Mashiko abapandele kukabangeya Banazalite abakwasele bapangele mwamubwa Yehova. Ngwe mwa kapilistu wakama uje kapandele kukwata cibimbi, nambe ca kabushoko kendi, Kanazalite nendi kapandele kukwata cibimbi. Kapilistu wakama na tupilistu bakwabo, kubapandele kunwa binyu nambe bwala omwo bakele na kupanga cipangi ca Yehova ca kujela.—Lev 10:8-11; 21:10, 11.
“Kanazalite (mu Cihebelu ngwabo na·zirʹ) kapandele kuteula biñambu byendi” bya ku mutwe. Kujeneka kuteula biñambu kwalingisile banu bamuzibuke bwasi ngwabo wapwile Kanazalite. (Kul 6:5) Lijwi lya na·zirʹ balipangesele lalo mu mwaka wa Sabata na mu Myaka ya Kulitila kutalesa ku miti ya binyu ya kujeneka kutetela. (Lev 25:5, 11) Co lalo, halutwe lwa nanga yakele na kuzala kapilistu wakama ku mutwe, hakele mande ya ngolinde. Haje ha mande basonekeleho ngwabo Kujela Kwapwa kwa Yehova. Ije mande baitumbwile ngwabo cizibukiso ca kujela ca kulikundika [mu Cihebelu ngwabo neʹzer]. Co lijwi lya neʹzer neli lya na·zirʹ lyatunda ha lijwi limo. (Kut 39:30, 31) Cilongo cibakele na kuzala bimyene ba Baisalele naco bacitumbwile ngwabo neʹzer. (2 Sa 1:10; 2 Vi 11:12.) Kapositolo Paulu mwasonekelele cikungulukilo ca Baka-Kilistu, wendekele ngwendi banakazi banabana biñambu kupwa ngwe cakuzala ku mutwe. Eci cinapu canukiso cimwesa ngwaco banakazi baliseza na banalume, co banapande kulyaka kwisi kwesekesa nomu mwanabwahesela Njambi. Mu ngila imolika, Banazalite kubakele na kuteula biñambu na kunwa binyu, co lalo bapandele kupwa ba kujela mangana bamwese ngwabo banalikundika kuli Yehova na kulyaka kwisi yendi.—1 Ko 11:2-16.
Bisimpi bya Seho
w05 1/15 30 ¶2
Bihula bya Baka-kutanda
Samusoni wapwile Kanazalite, oloni Bunazalite bwendi bwalisezele nobu bwa bakwabo. Simbu kanda asemuke, kangelo walekele baina ngwendi: “Co munima ya kusemuka kwa munobe wa munalume, kesi ukamuteule biñambu byendi, omwo kutunda ha litangwa lya kusemuka kwendi, akapwa wa kukundika kuli Njambi kupwa Kanazalite. Akashangumuka bipangi bya kwobola Isalele kuli Bafilisitiya.” (Maa 13:5) Ngeci, Samusoni kalingile cikumiiyo ca kupwa Kanazalite. Njambi ikeye wamwangwile kupwa Kanazalite, co wapwile Kanazalite kweta na ha kutsa kwendi. Ikeye kubamubindikile kukwata cibimbi. Lishiko lya kujeneka kukwata cibimbi kulyasele kupanga kuli ikeye, mwafwa ngwe wacikwatele nambe mu kujeneka kuzibuka ngwe wesi kwilukilile bati ku bumbututu na kushangumuka lalo Bunazalite? Ngeci, cisholoka ngwe Bunazalite bwendi bwalisezeleko mu bingila bimo nobu bwa bakwabo baje balikumiiye bakebo babenya kupwa Banazalite.