Biñanda bya Kupangesa mu Mukanda wa Biwano bya Buyoye Bwetu Baka-Kilistu na Cipangi Cetu
MAY 3-9
BISIMPI BYA SEHO BYA MU LIJWI LYA NJAMBI | KULAVA 27-29
“Tembwinineni Yehova Uje Kakele na Kaangu”
Kandeleleni Manene ku Bifwa bya Yehova
14 Bana ba Zelofahande batanu baile kuli Mosesa na ku mwihula ngwabo: “Omwo bikajo lizina lya tatetu liziluka ku cikota cendi mu Isalele, omwo ikeye kakele na bana ba banalume ndi?” Co balambelele Mosesa ngwabo: “Twaneniko netu bufuko hakati ka babushoko bwa tate.” Mosesa wabakumbulwile bati? Kuma wabalekele ngwendi kukwesi lishiko litabesa kulinga ngoco ndi? Embwe. “Mosesa watwalele ñanda yabo kuli Shukulu Kalunga.” (Kul 27:2-5) Yehova wamukumbulwile bati? Walekele Mosesa ngwendi: “Cihula ca bana ba Zelofahande cinapu cacibwa, ngeci bane bufuko bwabo hakati ka babushoko bwa ishabo, bufuko bwendi babuswane bakebo.” Kuli bikwabo lalo byendekele Yehova. Yehova watungile lishiko na kuleka Mosesa ngwendi: “Nga munu atsa ikeye kasezele mwana wa munalume, co munendi wa munakazi napande kuswana bufuko bwendi.” (Kul 27:6-8; Yos 17:1-6) Kutunda habatungilile lije lishiko, banakazi boshe ba mu Isalele baje baliwanene nobu bukalu, babanene buswana bwa baishabo.
Kandeleleni Manene ku Bifwa bya Yehova
15 Njambi wamwesele ngwendi wakala na ngozi, co kesi na kaangu. Yehova wasingimikile bana ba Zelofande baje kubakele na umo wa kubamena, ngwe mwalingilile ku Baisalele boshe baje bakele na babushoko bwabo. (Mya 68:5) Ou unapu umo wa mizimbu ya mu Mbimbiliya ije imwesa ngwayo Yehova kakele na kaangu.—1 Sa 16:1-13; Vil 10:30-35, 44-48.
Kandeleleni Manene ku Bifwa bya Yehova
16 Twasa kutembwinina bati Yehova uje kakele na kaangu? Nga tushaka ngwetu keti tukale na kaangu, co tunapande kumona banu boshe ngwetu bapwa ba seho. Hamo tunasa kusinganyeka ngwetu kutwakele na kaangu. Oloni keti kwakwasi kuzibuka mutukamwenamo banu. Bika bitunapande kulinga mangana tuzibuke indi kutwesi na kaangu? Yesu mwashakele kuzibuka bisinganyeka bya banu hali ikeye, wehwile bandongesi bendi ngwendi: “Banu bali na kutumbumbula muna munu ngwabo ikeye iya?” (Mat 16:13, 14) Twasa kutembwinina bati Yesu? Twasa kwihula kabusamba ketu itwakulahela mangana atuleke indi twakala na kaangu. Nga atuleka ngwendi twakala na kaangu, bika bitunapande kulinga? Tunapande kuleka Yehova mu tuli na kulizibila. Tumulombe atukwase kutengulula bisinganyeka byetu, mangana keti tukale na kaangu.—Mat 7:7; Kol 3:10, 11.
Bisimpi bya Seho
it-2 528 ¶5
Milambu
Milambu ya Byakunwa. Baisalele balambwile milambu ya byakunwa ngwe mubalambwilile milambu yoshe, maneneni mubaketele mu Lifuti lya Cikulaheso. (Kul 15:2, 5, 8-10) Eyi milambu ya byakunwa yambateselele na binyu, co bakele na kuitila ha mutula. (Kul 28:7, 14; esekeseni na Kut 30:9; Kul 15:10) Kapositolo Paulu wasonekelele baka-Kilistu ba ku Filipu ngwendi: ‘Nameme nga betila maninga ange [nambe ngwetu nga banjitila] ngwe mulambu wa kukulahela kweni kuli Njambi, njibwahelela.’ Oku ku mukanda, wendekele bya mulambu wa byakunwa mu kumwesa ngwendi walyanene mangana akwase bakwabo baka-Kilistu. (Fil 2:17) Simbu kanda atse, wasonekelele Timateo ngwendi: “Simbu inete ya kunjikombelela, simbu inete kuli yange ya kuseza mwonyo ou njili nawo.”—2 Ti 4:6.
MAY 10-16
BISIMPI BYA SEHO BYA MU LIJWI LYA NJAMBI | KULAVA 30–31
“Lingeni Bimunakulahesa”
it-2 1162
Cikumiiyo
Nga Twalikumiya Kulinga Cuma Cimo, Co Tunapande Kulinga Bitunakulahesa. Kusañulu, munu kubakele na kumusindiya kulikumiiya kulinga byuma bimo. Oloni mashiko amwesele ngwawo nga munu na likumiiya kulinga byuma bimo, co wapandele kushulisilila byanalikumiiya. Munu uje walikumiiye kulinga cuma cimo wapandele kumwesa mu kuyoya kwendi kwoshe ngwendi wakele na kulinga byuma byakulahesele. (Kul 30:2 ; Lom 1:31, 32) Munu napande kusinganyekesesa simbu kanda alikumiiye kulinga byuma bimo, mwafwa Bisoneka bimwesa ngwabyo nga unalikumiiya, co unapande kushulisilila byuma biunakulahesa. Mbimbiliya ngwayo: “Omwo mukalisinga cisingo kuli Shukulu Kalunga Njambi yeni . . . Ashaka yeni mushulisilile cisingo ceni. Kujeneka kushulisilila cisingo kunapu bubi. Oloni kukwesi mulonga nga kumulisingi cisingo kuli Shukulu Kalunga.”—Kwi 23:21, 22.
it-2 1162
Cikumiiyo
Kulikumiiya kuli Njambi kulumbununa kumukulahesa ngwetu tumupangela, tumulambwila byuma bimo, nambe kumukulahesa ngwetu kutulingi byuma bimo nameme mashiko kuabindika kubilinga. Banu bakele na kulinga bikumiiyo kutundilila kwisi ya bimbunge byabo. Kulikumiiya ngwetu tulinga cuma cimo kunalifu na kulisinga ngwetu oco cuma tucilinga, co mu Mbimbiliya awa majwi bakaapangesa kulumbununa cuma cimo. (Kul 30:2; Mat 5:33) Kulikumiiya kunapu kukulahesa kulinga byuma bimo na kwendeka ku mbunga ngwetu byuma bitunakulahesa tubilinga. Nga twalikumiiya kulinga cuma cimo, co tunapande kushulisilila bitunakulahesa.—Kus 26:28; 31:44, 53.
w04 8/1 27 ¶3
Bisimpi bya Kulitila bya mu Mukanda wa Kulava
Kul 30:6-8—Kuma Ndolome Asa Kubindika Mwebwendi Kushulisilila Byanalikumiiya Ndi? Ano matangwa, munu na munu akalikumiiya ikeye babenya kuli Yehova. Cakumwenako, munu na munu akalikundika ikeye babenya kuli Yehova. (Nga 6:5) Munalume kasa kubindika munakazi wendi kushulisilila eci cikumiiyo. Nameme ngoco, munakazi kapandele kulikumiiya kulinga byuma bije kubilitombola na Lijwi lya Njambi nambe bije bimulingisa keti asingimike munalume wendi.
Bisimpi bya Seho
it-2 28 ¶1
Njefeta
Kusañulu, bisemi bakele na lisesa lya kwana munabo kuli Yehova mangana akapangele ku mbalaka. Hana wakulahesele ngwendi omwo Samwele akasemuka akapangela Njambi ku mbalaka mu kuyoya kwendi kwoshe. Elekana ikeye watabesele Hana alinge eci cikumiiyo. Hana mwashumwine Samwele, wamutwalele ku mbalaka mangana akapangeleko. Mwatwalele Samwele ku mbalaka, wambatele na muna ngombe wa kukalambula. (1 Sa 1:11, 22-28; 2:11) Samisoni nendi bamukundikile kuli Njambi oku acili mwanike, mangana akapange cipangi ca Bunazalite. (Maa 13:2-5, 11-14) Ku mukanda wa Kulava 30:3-5, 16, banamwesa nzili yakele nayo cisemi wa munalume hali munendi wa munakazi.
MAY 17-23
BISIMPI BYA SEHO BYA MU LIJWI LYA NJAMBI | KULAVA 32–33
“Mukasheke Banu Boshe Batungamo”
Muzibuka Ndi?
Myela ya kulunduka ibanendeka manene mu Bisoneka bya Cihebelu, yapwile myela muka?
Yehova walekele Baisalele ngwendi mubakakobela mu Lifuti lya Cikulaheso bakanyongese myela yoshe ibakele na kupangesa Bakanana mu kulemesa tumponya. Wabashikile ngwendi: ‘Munapande . . . kukanyongesa tumponya twabo twa mamanya na bikubo na kusiula mitula ije ibakalemesela.’ (Kul 33:52) Ije myela ibakele na kulemesela Bakanana hamo yakele helu lya malundu nambe hamo baitungilile mu myela yeka ya kufwa ngwe mwisi ya miti nambe mu binganda. (1 Vi 14:23; 2 Vi 17:29; Eze 6:3) Oku ku myela kwakele mitula, bisini, bikupulo, bimesa bya kwenyekela insense na byuma bikwabo bibakele na kupangesa mu kulemesa tumponya.
w08 2/15 27 ¶5-6
Bika Bitulilongesa ku Kusebuka kwa Baisalele?
Ano matangwa, tuli na kuliwana na byeseko byabingi bya kulifwa nebi bibaliwanene nabyo Baisalele. Babu babangi ano matangwa banapwisa byuma bimo kupwa ngwe njambi yabo. Ebi byuma binambateselela kusingimika manene banu banatsimana mu bweho, kulikobelesa mu byuma bya bupolitiki, kuzema manene baka-naanga kutubakana Njambi, na kusingimika manene bantwama ba mu bulombelo. Kutwameka ebi byuma kwasa kutukobelesa mu bukalu mu kuyoya kwetu. Banu babangi bamona ebi byuma kupwa bya seho manene mu kuyoya kwabo. Co kulikwatasana na banu ba cifwa eci kwasa kutsiya busamba bwetu na Yehova.
Bukwizi bwalisalele manene ku banu baje bakele na kulemesa Mbale, co Baisalele babangi bongumukile mwafwa ya kulikwatasana nabo. Na matangwa ano, banu ba Njambi bamo bacili na kutsa mu mweto wa kulifwa. Cakumwenako, nga munu ali ha kompyuta kwa likalyendi, mbunge yendi inasa kumukwisa na kushangumuka kuyongola bikupulo bya mushelengwa ha intaneti bije bijwalesa citakutaku cendi. Muka-Kilistu alibindamesa ikeye babenya nga ayongola bikupulo bya mushelengwa.
it-1 404 ¶2
Kanana
Yehova washikile Mosesa ngwendi aleke Baisalele bakanyongese Bakanana boshe. Co ‘Yoshwa walekele Baisalele byuma boshe bije byashikile Shukulu Kalunga kuli Mosesa.’ (Yos 11:15) Oloni Baisalele kubanyongesele Bakanana boshe baje bajwalesele lifuti ngwe mwabashikilile Yoshwa. Baisalele bakobelele mu mukalu bwakama mwafwa ya kulikwatasana na Bakanana. Babangi balikobelesele mu bukenya, bukwizi na mu kulemesa tumponya. Co babangi batsile mwafwa ya kujeneka kwononoka Yehova. Oloni ngwe bononokele Yehova na kunyongesa Bakanana boshe, ngwe batwaleleleleho kukala mu lifuti lyabanene Yehova. (Kul 33:55, 56; Maa 2:1-3, 11-23; Mya 106:34-43) Yehova walekele Baisalele ngwendi kakababezikisa nga bakalyambatela na Bakanana na kulikwatasana nabo mukulemesa tumponya. Wabalekele ngwendi akababyana na ‘kubanyongesa’ ngwe mubapandele kunyongesela Bakanana.—Kut 23:32, 33; 34:12-17; Lev 18:26-30; Kwi 7:2-5, 25, 26.
Bisimpi bya Seho
it-1 359 ¶2
Binginga
Nga ñela yamwesele ngwayo muyati wa cingandi unapande kukakala ku mwela wa cingandi, co batalele oni ha bukama bwa muyati mangana bamone ngwabo banapande kubana mwela wa kupwa hali. Mbimbiliya ngwayo: “Co mukaswana mu lifuti na kulipangelalyo hakati ka miyati yeni na bikota byeni ha kuta ñela, mukana mutambela wakama kuli baje babangi, na mutambela waundondo kuli baje babandondo.” (Kul 33:54) Ñela yabakwasele lika kuzibuka kubapandele kutunga. Oloni bapandele kuzibuka ngwabo banapande kubana mutambela wa kupwa hali. Cakumwenako, mubanangukile ngwabo mutambela wa Yunda wapwile wakama manene, babatwileko mutambela umo na kuwana muyati wa Simyoni.—Yos 19:9.
MAY 24-30
BISIMPI BYA SEHO BYA MU LIJWI LYA NJAMBI | KULAVA 34–36
“Teweleni Kuli Yehova”
Muli na Kutewela Kuli Yehova Ndi?
4 Baisalele bakele na kulinga bati banu baje bakele na kutsiya bakwabo mu kujeneka kuzibuka? Nameme munu watsiyile mukwabo mu kujeneka kuzibuka, oloni hanga wakele na mulonga wa kwitila maninga. (Kusha. 9:5) Uje munu bamutabesele kutewela ku imo ya binganda 6 bya kutewela, mangana babushoko bwa mutsi keti bamutsiye. Kuje ku binganda kwapwile kwa kubanda. Munu uje watsiyile mukwabo mu kujeneka kuzibuka, watumbamene kuje ku nganda kweta noho hatsililile kapilisitu wakama.—Kula. 35:15, 28.
Muli na Kutewela Kuli Yehova Ndi?
6 Nga munu natsiyi mukwabo mu kujeneka kuzibuka, co napande “kulangulula kuli bantwama bije binalingiwa” omwo eta ku cikolo ca nganda kuje kwanatewela. Bakele na kumutambula mwamubwa. (Yosh. 20:4) Munima ya matangwa, uje munu bakele na kumwilwisa kuli bakulunu ba muje mu nganda mwanatsiyila munu mangana bakatale tahi ñanda yendi. (Tandeni Kulava 35:24, 25.) Nga bakulunu banawana ngwabo cili bene uje munu natsiyi mukwabo mu kujeneka kuzibuka, co bamwilwisa ku nganda ya kutewela.
Muli na Kutewela Kuli Yehova Ndi?
13 Nga munu natewela mu nganda bakele na kumunyungilila. Yehova wendekele ha binganda bije ngwendi: “Nga munu umo atsiya mukwabo na cintulu ase kutewelamo.” (Yosh. 20:2, 3) Yehova kahisile muka-bubi uje watewelele mu nganda, co lalo katabesele ngwendi babushoko bwa mutsi bakobele muje mu nganda na kukatsiya uje munu natewelamo. Ngeci, munu uje walingile mulonga kalishoshomwenene lalo kumulinga shambandinga mwafwa Yehova wamunyungililile. Oloni bije binganda kubyapwile tumenga. Ha simbu yakele muje mu nganda, uje munu wakele na kupanga na kukwasa bakwabo na kupangela Yehova mu kwoloka. Wakele na kuyoya mu kubwahelela.
Bisimpi bya Seho
w91 2/15 13 ¶13
Ndando ya Kupatula Banu Boshe
13 Ba Adama na Eva kubakawana bukwasi ku ndando ya kupatula. Mu Lishiko lya Mosesa mwakele cinangulo cendekele ngwaco: ‘Keti mukatambule ndando ya kupatula mwonyo wa muka-kutsiya embwe, napande kutsa.’ (Kul 35:31) Adama walingilile bubi shakelo mwafwa keti ikeye ibwakwisile. (1 Ti 2:14) Adama wapwile muka-kutsiya mwafwa watambwisileko bana bendi bubi, co boshe bali na kutsa. Adama wapwile wa kulumbunuka, ngeci walingilile shakelo bubi, mukemwo wapandele kutsa. Yehova wapwa muka-kwakula mu busunga, ngeci kasa kutabesa Adama awane bukwasi ku ndando ya kupatula ya Yesu. Nameme ngoco, mulambu wa Yesu unafwetela bana ba Adama na kubapatula ku bubi na kutsa. (Lom 5:16) Adama watambwisile bubi ku bana bendi, oloni mulambu wa Yesu unapatula banu boshe ku bubi bubatambwile kuli Adama.—Hev 2:9; 2 Ko 5:21; 1 Pe 2:24.
MAY 31–JUNE 6
BISIMPI BYA SEHO BYA MU LIJWI LYA NJAMBI | KWITULUKA MU MASHIKO 1–2
“Kusompa Kwakundama Kuli Njambi”
w96 3/15 23 ¶1
Yehova wazema kwakula mu busunga
Bakulunu mu cikungulukilo bakatala biñanda bya munu uje nalingi bubi bwakama. (1 Ko 5:12, 13) Omwo batala ñanda, bakanuka ngwabo Yehova ali na kubapangesa mangana bwakwase owo munu ecele bubi bwendi. Oloni nga munu ibali na kukwasa kalitabela bubi bwendi, co kubasa kumuzibila ngozi. Bakulunu kubesi kutundisa munu mu cikungulukilo mwafwa ya kumuzinda embwe. Kutundisa munu mu cikungulukilo kukamulingisa alilule na kwiluka bwasi mu cikungulukilo. (Eze 18:23) Yesu ikeye ali na kutwamenena bakulunu, ngeci bakakula mu busunga, co bakapu ngwe “mwela wa kubanda lihunzi.” (Isa 32:1, 2) Ngeci kubapandele kukala na kaangu omwo basompa biñanda, oloni banapande kubisompa mu kusungama.—Kwi 1:16, 17.
w02 8/1 9 ¶4
Tulyakeni Kwisi ya Ciyulo ca Njambi
4 Kuli byuma byabingi byalibungilile mu kupwa lyako. Lyako kapandele kuzibuka lika mashiko. Maako kubapwile ba kulumbunuka. Ngeci, bapandele kulifwita mangana keti bakale na bifwa byabibi bya kufwa ngwe kulishaka bakebo babenya, kaangu na nuna. Mwafwa ebi bifwa byasa kubalingisa keti bakule mu kusungama. Mosesa walekele maako ngwendi: “Ha kusompa kweni, keti mukakale na kaangu, oloni munapande kusompa munu na munu mu cifwa cimolika, ipwe iya nambe iya. Co keti mukale na lyoba hali munu umo embwe, omwo kusompa kwakundama kuli Njambi.” Maako ba mu Isalele bakele na kwimanenako Njambi mu biñanda bibakele na kutala. Eci capwile cipangi cakama.—Kwi 1:16, 17.
Bisimpi bya Seho
Mashiko a Yehova Apwa Amabwa
9 Baisalele mubashangumukile bungenzi bwabo bwa myaka 40 “mu mambo yakama ya kutewesa,” Yehova kabalekele cuma na cuma cakalinga mangana abanyungilile na kubatwamenena. Oloni welukilile ilukilile kulinga byuma bije byapandele kubalingisa bamukulahele na kukulahela mashiko endi. Yehova wapangesele lishelwa mutanya na tuhya butsiki mu kutwamenena Baisalele. Oku kwabalingisile bakulahele ngwabo Yehova wakele hamo nabo mubakele na kwita muje mu mambo ya kutewesa. (Kwi 1:19; Kut 40:36-38) Njambi wabanene byuma byoshe bibashakele. “Buzalo bwabo kubwakulubalele na mendi abo kuazimbile.”—Neh 9:19-21.
JUNE 7-13
BISIMPI BYA SEHO BYA MU LIJWI LYA NJAMBI | KWITULUKA MU MASHIKO 3–4
“Mashiko a Yehova Ana Munu Mana”
it-2 1140 ¶5
Kuzibisisa
Nga munu alilongesa Lijwi lya Njambi na kupangesa byanalilongesa, co akala na mana kutubakana balongesi bendi na kupwa wa kuzibisisa kutubakana baje banayoyo myaka yaingi. (Mya 119:99, 100, 130; Luk 2:46, 47.) Mashiko a Njambi akewo alingisa munu akale na mana na kuzibisisa. Ngeci, Baisalele bapandele kwononoka awa mashiko mangana banu baje babazengelekele babendeke ngwabo bakele “na mana na kuzibisisa kwakubwa.” (Kwi 4:5-8; Mya 111:7, 8, 10; 1 Vi 2:3) Munu muka-kuzibisisa, azibuka bukalu bukatundu mukujeneka kwononoka mashiko a Njambi, ngeci akalifwiti kuwononoka na kulomba Njambi amukwase kulinga ngoco. (Mya 119:169) Akatabesa Lijwi lya Njambi limwete ku mbunge. (Mat 13:19-23) Akasoneka mashiko a Njambi mu mbunge yendi. (Vis 3:3-6; 7:1-4) Kutabesa Lijwi lya Njambi limwete ku mbunge na kusoneka mashiko a Njambi mu mbunge yendi kukamulingisa azinde ‘byuma byoshe byabibi.’ (Mya 119:104) Yesu mwakele hano hasi wamwesele ngwendi wapwa wa kuzibisisa. Simbu yoshe washakele kulinga cizango ca Njambi, mukemwo katewele kutsila ha citi ca kuyandesela mwafwa bisoneka byamwesele ngwabyo wapandele kutsila ha citi ca kuyandesela.—Mat 26:51-54.
w99 11/1 20 ¶6-7
Bikatundu mu Kukala na Mbunge ya Kwana
Mwene wa ku Shemba walikomokelele byuma byamwene na kuziba kuli Solomoni. Mukemwo wendekele ngwendi: ‘Banabezika bangamba bobe mwafwa simbu yoshe bali ku mesho obe na kuziba ku byendeka byobe bya mana.’ (1 Vi 10:4-8) Cuma muka cakama calingisile mwene wa ku Shemba ashangale bangamba ba Solomoni? Kabashangalele mwafwa ya kukala na mwene wa kufuka. Oloni wabashangalele mwafwa simbu yoshe bakele na kutolilila ku mana a Solomoni aje amwanene Njambi. Mwene wa ku Shemba nakela bangamba ba Njambi mwanja waubwa, nabo banapande kuliziba kubezika mwafwa bali na kulilongesa byabingi kuli Ishamatanga yabo na kuli munendi Yesu Kilistu.
Ou mwene wa ku Shemba walekele lalo Solomoni ngwendi: “Bashangazale Shukulu Kalunga Njambi yobe.” (1 Vi 10:9) Walimwenenene ngwendi Yehova ikeye nana Solomoni mana na bufuko. Byamwene ou mwene wa ku Shemba byalitombwele na majwi endekele Yehova kuli Baisalele. Yehova walekele Baisalele ngwendi: “Ononokeni mashiko [ange], co eci cikamwesa banu baka-miyati yeka mana eni. Omwo bakaziba mashiko oshe awa, co bakendeka ngwabo, ‘mwa busunga bene muyati ou [Baisalele] bali na mana na kuzibisisa kwakubwa.’”—Kwi 4:5-7.
w07 8/1 29 ¶13
‘Mwafukila Kuli Njambi’ Ndi?
13 Yehova mwakabezikisa banu bendi, akabana byuma byabibwa. (Yak 1:17) Cakumwenako, Yehova wanene Baisalele lifuti lije lyakele na ‘mabele na buki.’ Nameme mu lifuti lya Ingito namwo mwakele byuma byabibwa, oloni kwakele cuma calingisile lifuti lya Kanana lipwe lya kulitila. Mosesa walekele Baisalele ngwendi ‘Yehova ikeye ali na kunyunga lije lifuti.’ Mu ngila ikwabo, Mosesa walumbunwine ngwendi, Baisalele bakabezika mwafwa Yehova ikeye akabanyunga. Baisalele mubapwile ba kulongwa, Yehova wababezikisile, co bayoyele mwamubwa kutubakana mafuti aje abazengelekele. Cili bene, ‘kubezikisa kwa Yehova kukekwo kufukisa.’—Kul 16:13; Kwi 4:5-8; 11:8-15.
Bisimpi bya Seho
w04 9/15 25 ¶3
Bisimpi bya Kulitila bya mu Mukanda wa Kwituluka mu Mashiko
Kwi 4:15-20, 23, 24—Kuma lishiko lije libindika kushonga tumponya lilumbununa ngwalyo munu kapandele kushonga cikupulo ca cuma coshe-coshe cashaka ndi? Embwe. Yehova wabindikile lika Baisalele kushonga tumponya bakupangesa mu kulemesa. Wababindikile ‘kutsikamena tumponya na kubalemesa.’ Bisoneka kubibindika munu kushonga byuma bya kufwa ngwe kasitu, kazila nambe byuma byeka na kubipangesa mu ngila yaibwa.—1 Vi 7:18, 25.
JUNE 14-20
BISIMPI BYA SEHO BYA MU LIJWI LYA NJAMBI | KWITULUKA MU MASHIKO 5–6
“Longeseni Bana Beni Bazeme Yehova”
w05 6/15 20 ¶11
Bisemi Kwaseni Naanga Yeni
11 Mutukendeka ha cipangi cibali naco bisemi, tukapangesa manene cisoneka ca Kwituluka mu Mashiko 6:5-7. Tumilomba mutande awa mavesi mu Mbimbiliya yeni. Eci cisoneka cimwesa ngwaco bisemi banapande tahi kukanyamesa busamba bwabo na Yehova na kumuzema na kunyunga majwi endi mu bimbunge byabo. Bisemi banapande kwaka mbunge kukulilongesa Lijwi lya Njambi. Banapande kulitanda simbu yoshe na kusinganyekesesa ha byuma bibatanda. Kulinga ngoco kubakwasa babizibisise na kuzema Yehova na binangulo byendi na mashiko endi. Kuzibisisa byuma bibanatanda kubakwasa bazeme busunga bwa mu Mbimbiliya buje bubalingisa bapwe bakubwahelela na kusingimika Yehova na kumuzema. Nga bisemi balinga ebi byuma, co balongesa mwamubwa bana babo.—Luk 6:45.
w07 5/15 15-16
Njasa Kulongesa Bati Bana Bange Bazeme Yehova?
Byuma bimwendeka na byuma bimulinga, bimwesa byuma bimwamona kupwa bya seho mu kuyoya kweni. (Lom 2:21, 22) Kushwa lika ku bwanike, bana bakalilongesa ku byuma bibakamono ku bisemi babo. Kakangi byuma bibakamono bisemi kupwa bya seho, bikebyo lalo bibakamo bana kupwa bya seho omwo bakola. Nga bisemi bazema Yehova, co na bana babo babatembwinina. Cakumwenako, nga bamona ngwabo mwazema kutanda Mbimbiliya, co bananguka ngwabo mwatwameka bya Bumwene kulutwe mu kuyoya kweni. (Mat 6:33) Nga mukai ku biwano simbu yoshe na kupanga cipangi ca kwambulula, co bana beni bananguka ngwabo mwamona kupangela Yehova kupwa kwa seho manene mu kuyoya kweni.—Mat 28:19, 20; Hev 10:24, 25.
w05 6/15 21 ¶14
Bisemi Kwaseni Naanga Yeni
14 Ngwe mubanamwesa ku mukanda wa Kwituluka mu Mashiko 6:7, bisemi bali na bisimbu bya kulisezaseza bibanasa kusimutwiya na bana babo bya Yehova. Mwasa kusimutwiya na bana beni bya Yehova omwo mwenda nabo, omwo mupanga nabo nambe omwo musikama nabo. Oloni munapande kutengulula tengulula ku bingila bimukapangesa mu kubalongesa busunga. Simutwiyeni nabo mu ngila ije ibalingisa balikuwe bimuli na kusimutwiya. Cakumwenako, mu magazini ya Toneni! mukakala biñanda byabingi bimwasa kusimutwiya. Munasa kuwanamo biñanda byendeka ha tusitu twanatanga Yehova, mitambela yaibwa ya mu kaye, bisemwa bya kulisezaseza bya banu na yosesi yabo. Kusimutwiya na bana beni ha biñanda bya cifwa eci, kubashongangeya batande mabulu amanga anasoneka ndungo wa kulongwa na kunyanyama.—Mat 24:45-47.
Bisimpi bya Seho
Yehova Wamwesele Bati Cizemo na Kwakula Mwamubwa mu Isalele?
11 Bitulilongesao: Yehova kesi kumona lika cifwa ca munu ca hanja. Oloni akamono mbunge ya munu. (1 Samwe 16:7) Njambi akamono biyongola na bilinga bya munu byoshe. Ashaka tulinge byuma byabibwa simbu yoshe. Ngeci, tunapande kunanguka bisinganyeka byabibi na kubibyana mangana keti bikole mu bimbunge byetu.—2 Mizi 16:9; Mateo 5:27-30.
JUNE 21-27
BISIMPI BYA SEHO BYA MU LIJWI LYA NJAMBI | KWITULUKA MU MASHIKO 7–8
“Keti Mulyambatele Nabo”
w12 7/1 29 ¶2
Mwafwa Bika Njambi Washikile Ngwendi Banu Bendi Balyambatele Lika na Bakwabo Baka-kukulahela?
Kuli cuma cakama calingisile Yehova alinge ngoco. Wazibukile ngwendi Satana ashaka kubongomuna na kubalingisa balemese binjambi ba makuli. Wabalekele ngwendi nga balyambatela na baka-kujeneka kukulahela ‘bakabatangula kukaba Yehova na kulemesa binjambi beka.’ Oloni kwakele bukalu bukwabo lalo bwasele kutunda mu kulyambatela na baka-kujeneka kukulahela. Ngwe Baisalele bashangumukile kulemesa binjambi beka, Yehova ngwe wecelele kubabezikisa na kubanyungilila. Co ngwe kwapwile kwakwasi kubalwisa ku bitozi babo. Ngwe babanyongesele ku bitozi babo, ngwe batanganesele cikota kwapandele kusemukila Mesiya. Cili bene, tunamono ngwetu kunakala byuma byabingi byalingisile Satana ashake kungumuna Baisalele mangana balyambatele na baka-mafuti eka.
Kuma Cinangulo ca Kulyambatela Lika na Bakwetu ‘Baka-Kilistu’ Cicipanga Ano Matangwa Ndi?
Yehova namwesa mu Lijwi lyendi ngwendi bangamba bendi banapande kulyambatela lika na bakwabo baka-Kilistu. Mwafwa bika? Mwafwa Njambi azibuka byuma bikwasa bangamba bendi. Njambi kashaka lika kunyungilila bangamba bendi ku bukalu bukatundu mu kulyambata na muka-kujeneka kukulahela, oloni ashaka lalo bangamba bendi bapwe bakubwahelela. Bayunda babangi mubalyambatelele na baje kubakele na kupangela Yehova, Nehemiya wabanukisile bukalu bwatundile mu byuma byalingile Solomoni. Nameme ‘Njambi wazemene Solomoni, . . . oloni [Solomoni] walingile bubi,’ mwafwa wambatele banakazi baje kubalemesele Yehova. (Neh 13:23-26) Njambi ashaka kunyungilila bangamba bendi, mukemwo nabashiki ngwendi banapande kulyambatela lika na baka-kumulemesa. (Mya 19:7-10; Isa 48:17, 18) Baka-Kilistu ba busunga bakononoka mashiko a Njambi. Kwononoka awa mashiko kumwesa ngwabo banasingimika Njambi uje wapwa Mwene wa mwilu na hasi.—Vis 1:5.
Anguleni Mwamubwa Babusamba Muno mu Matangwa a Kukotoka
12 Baka-Kilistu ba bazike banapande kwangula mwamubwa munu ibashaka kulyambata nendi. Mbimbiliya ngwayo: “Keti mulikutiiye mukambo umo na baka-kujeneka kukulahela, omwo kucitaba kulinga ngacije. Omwo busunga na bubi byasa kulikumbasana bati? Nambe ceke na lisusulungu biyoye hamo ndi?” (2 Ko 6:14) Mbimbiliya yanangula bangamba ba Njambi baje bashaka munu wa kulyambata nendi ngwayo, banapande kulyambatela na bakwabo ‘baka-Kilistu.’ Ou munu ibalyambata nendi napande kupwa wa kulikundika kuli Njambi na kumumbwitika, co ali na kuyoya mu kulitombola na bisoneka. (1 Ko 7:39) Nga muka-Kilistu alyambata na mukwabo muka-Kilistu uje nalikundika kuli Yehova, co amukwasa atwaleleleho kupangela Yehova.
Bisimpi bya Seho
w04 2/1 13 ¶4
Yehova Ikeye Muka-kutwana Bitutonda ha Litangwa na Litangwa
4 Omwo tulomba Njambi ngwetu atwane byakulya bya ku mubila ha litangwa na litangwa, tunapande kwanuka ngwetu na byakulya bya ku sipilitu nabyo tubitonda ha litangwa na litangwa. Nameme Yesu watsile manene njala munima ya kulibindika byakulya ha simbu yailaha, oloni wabyanenene Satana mwamulekele ngwendi atengulule mamanya kupwa byakulya. Yesu wakumbulwile Satana ngwendi: “Bisoneka byendeka ngwabyo, ‘munu kasa kuyoya na makende lika embwe, oloni kubanga na majwi oshe a Njambi.’” (Mat 4:4) Yesu wendekele majwi endekele Mosesa. Mosesa walekele Baisalele ngwendi: “[Yehova] wamyononwesele na kumikesa na njala, asinoni wamilisile byakulya bya maana, byakulya bije yeni kumwazibukile nambe bakukulwila beni kubabizibukile mu kumilongesa ngeci munu kasa kuyoya na likende lika, oloni kubanga kukulahela na kwononoka majwi oshe aje endeka Shukulu Kalunga.” (Kwi 8:3) Yehova washakele ngwendi Baisalele balilongeseko bimo ku ngila yakele na kupangesa mu kubana maana. Wabalekele ngwendi omwo banona maana, bapandele kunona ‘ibasa kulya ha litangwa limo lika.’ Mubanonele maana yaingi yakweta na ku litangwa likwabo, yabolele na kukala na mabuno. (Kut 16:4, 20) Oloni ha litangwa lya bu 6 mubabalekele ngwabo banone maana ya matangwa abali ibapandele kupangesa na ha litangwa lya Sabata, kuyabihile nambe kubola. (Kut 16:5, 23, 24) Yehova washakele Baisalele balilongese ngwabo bapandele kupwa bakwononoka, co kuyoya kwabo kukwemanene lika ha maana, oloni na ha ‘majwi endi.’
JUNE 28–JULY 4
BISIMPI BYA SEHO BYA MU LIJWI LYA NJAMBI | KWITULUKA MU MASHIKO 9–10
“Bika Byashaka Yehova Kuli Yeni?”
w09 10/1 10 ¶3-4
Bika Byashaka Yehova Kuli Yetu?
Bika binapande kutulingisa twononoke Njambi na mbunge yetu yoshe? Mosesa wendekele cuma ca kulibanga ngwendi: ‘Zibileni Yehova Njambi yeni lyoba.’ (Kwi 10:12 NWT) Eli keti lyoba lya kutewa lika bukalu butunda mu byuma bitulinga, oloni linapu lyoba lije likatulingisa tusingimike Njambi na mashiko endi. Nga tuzibila Njambi lyoba, co kutulingi byuma bimulubalesa.
Oloni cuma muka cakama cinapande kutulingisa twononoke Njambi? Mosesa wendekele ngwendi: “Muzemeni [Yehova] na kumupangela na bimbunge byeni byoshe na mwonyo weni woshe.” (Kwi 10:12) Kuli byuma byabingi byalibungila mu kuzema Njambi. Libulu limo lyendekele ngwalyo: “Majwi a Cihebelu abakapangesa ku kulumbununa mwalizibila munu akendelela na bilinga byendi.” Cakumwenako, eli libulu lyakulifwa lyendekele ngwalyo, kuzema Yehova kulumbununa “kulinga byuma bije bimwesa ngwabyo twamuzema.” Mu ngila ikwabo twasa kwendeka ngwetu, nga twazema Njambi na mbunge yetu yoshe, co tulinga byuma bimuzibisa kubwaha.—Vis 27:11.
w09 10/1 10 ¶6
Bika Byashaka Yehova Kuli Yetu?
Yehova atubezikisa nga tumwononoka na mbunge yetu yoshe. Mosesa wendekele ngwendi: ‘Ononokeni mashiko . . . aje njinamishiki ku litangwa lya lelo ngeci mukale mwamubwa.’ (Kwi 10:13) Mashiko oshe anatwana Yehova na byuma byoshe byashaka ngwendi tulinge bitukwasa mu kuyoya kwetu. Mwafwa bika twendekela ngoco? Mwafwa Mbimbiliya ngwayo: “Njambi wapwa cizemo.” (1 Yo 4:8) Ngeci, mashiko anatwana atukwasa tupwe bakubwahelela mu kuyoya kwetu. (Isa 48:17) Kwononoka mashiko a Njambi kutunyungilila ku bukalu bwabungi ha simbu ino na kutukwasa tukalikuwe bibezikiso byabingi mu Bumwene bwendi.
cl 16 ¶2
Mwasa ‘Kushwenya Kuyehi na Njambi Ndi’?
2 Abilahama washwenyene kuyehi na Njambi. Yehova watumbwile Abilahama ngwendi ‘kabusamba kange.’ (Isa 41:8) Yehova wamwene Abilahama kupwa kabusamba kendi wa ha mbunge. ‘Abilahama wakulahelele Yehova’ mukemwo wapwile kabusamba kendi. (Yak 2:23) Na matangwa ano, Yehova acili na kushwenya kuyehi na banu baje bamuzema. (Kwi 10:15) Mbimbiliya ngwayo: “Shwenyeni kuyehi na Njambi, co naikeye lalo akashwenya kuyehi neni.” (Yak 4:8) Oku ku mukanda Yehova ali na kutulanya, co nakulahesa ngwendi ashwenya kuyehi netu.
Bisimpi bya Seho
it-1 103
Baanakime
Ou wapwile muyati wa banu ba kutunuka baje bakele ku mitambela ya malundu na kubingenge bya ndonga bya ku mbwela ya lifuti lya Kanana. Simbu imo, banalume batatu bakutsimana ba ku muyati wa Anakime, ba Ahime, Sheshai na Talemai batungile mu Hevelone. (Kul 13:22) Ku mutambela wa Hevelone kukekwo kuje baka-kunenga 12, ba Bahebelu bakamwene ba Anakime lwa kulibanga. Baka-kunenga 10 bakwetesele muzimbu wa kujujwisa mubakamwene baje banalume. Bendekele ngwabo twakamwene batekulwila ba Manefilimu, co mutwalyesekesele nabo twasholokele ngwe “tubimbimba” mukati kabo. (Kul 13:28-33; Kwi 1:28) Banu ba ku muyati wa Anakime bapwile ba kutunuka manene, nameme miyati ya ba Emime na Balefaime muje mwakele banu ba kutunuka, bakele na kuyesekesa ku Baanakime mwafwa ya kutunuka manene kwabo. Baanakime bapwile banalume ba nzili manene, mukemwo bakele na kubendeka ngwabo: “Naumo wahi asa kulwa nabo na kubafungulula.”—Kwi 2:10, 11, 20, 21; 9:1-3.