Biñanda bya Kupangesa mu Mukanda wa Biwano bya Buyoye Bwetu Baka-Kilistu na Cipangi Cetu
NOVEMBER 1-7
BISIMPI BYA SEHO BYA MU LIJWI LYA NJAMBI | YOSHWA 18–19
“Yehova Wapangesele Ngila Yaibwa mu Kutepela Baisalele Libu”
it-1 359 ¶1
Nginga
Cisholoka ngwe kuli byuma bibali bije byakwasele Baisalele balipangele mwamubwa libu. Ca kulibanga, bakele na kuta ñela. Ca mu cibali, bakele na kutala ha bukama bwa muyati. Ñela yabakwasele bazibuke mutambela kuwunapande kukala muyati na muyati. Bazibukile muyati uje wapandele kukela ku kunto, ku mbwela, mwija-tangwa, muya-tangwa, ku cikulo nambe ku malundu. Yehova ikeye wakele na kutwamenena ije ñela. Co oku kwakwasele Baisalele keti balizibile cipululu nambe kulilwisa. (Vis 16:33) Co lalo kwalingisile Yehova atwamenene mwamubwa byuma mangana bupolofweto bwa Yakomba buli ku Kushangumuka 49:1-33 bulishulisilile.
it-1 1200 ¶1
Buswana
Mitambela ibaswanene. Yehova ikeye wanene Baisalele lifuti libapandele kukaswana, co walekele Mosesa binginga byeli lifuti. (Kul 34:1-12; Yos 1:4) Mosesa wapangezelele bana ba Ngande, bana ba Luvena na hafu ya muyati wa Manase mitambela ibapandele kuswana. (Kul 32:33; Yos 14:3) Co Yoshwa na Elyazale bakebo bapangezelele miyati yoshe ya Baisalele mitambe kupangesa ñela. (Yos 14:1, 2) Simyoni na Levi bakele mukati ka binganda bikwabo ngwe mwapolofwetelele Yakomba ku Kushangumuka 49:5, 7. Simyoni bamwanene mutambela wakele mukati ka libu libanene ku muyati wa Yunda (Jos 19:1-9) Co Levi bamwanene binganda bya kupwa 48 mu lifuti lyoshe lya Isalele. Balevi babanene cipangi ca kulitila ku mbalaka, mukemwo Yehova wabalekele ngwendi ikeye buswana bwabo. Bakele na kutambula camulikumi kupwa buswana bwabo nambe ngwetu fweto ya bipangi bibakele na kupanga. (Kul 18:20, 21; 35:6, 7) Naanga na naanga bakele na kuyana libu mu mutambela muje mwakele muyati wabo. Co kulibwezelela kwa bana na batekulu kwalingisile balitepele libu mu mitambela yaindondo yaindondo.
it-1 359 ¶2
Nginga
Nga ñela yamwesele ngwayo muyati wa cingandi unapande kukakala ku mwela wa cingandi, co batalele oni ha bukama bwa muyati mangana bazibuke bukama bwa mwela ubanapande kubana. Mbimbiliya ngwayo: “Mukaswana mu lifuti na kulipangelalyo hakati ka miyati yeni na bikota byeni ha kuta ñela, mukana mutambela wakama kuli baje babangi, na mutambela waundondo kuli baje babandondo.” (Kul 33:54) Ñela yabakwasele lika kuzibuka kubapandele kutunga. Oloni bapandele kuzibuka ngwabo banapande kubana mutambela wa kupwa hali. Cakumwenako, mubanangukile ngwabo mutambela wa Yunda wapwile wakama manene, babatwileko mutambela umo na kuwana muyati wa Simyoni.—Yos 19:9.
Kutondesesa Bisimpi bya Seho
it-1 359 ¶5
Nginga
Ku Yoshwa 15:1-63; 16:1-10; 17:1-13, banamwesa mubatepelele binganda bya mu muyatangwa wa ndonga ya Yondau kupangesa ñela. Ebi binganda babyanene ku muyati wa Yunda, ku muyati wa Efalime muna Yosefa na hafu ya muyati wa Manase, co ebi binganda byoshe banabyendeka ha mazina. Oloni kusholoka ngwe kwakele bukalu ha kushwana ebi mitamba mwafwa ya nganda ya Isalele yanungulukile kutunda ku Ngilingale kuya ku Shilo. (Yos 14:6; 18:1) Nameme kubamwesele simbu yetile, oloni Mbimbiliya imwesa ngwayo Yoshwa walubalelele ije miyati yeshwalele kukaswana mitambela yayo. (Yos 18:2, 3) Baka-kutondesesa bakendeka byuma byakulisezaseza byonowesele miyati 7 ya Baiselele kuswana bwasi mitambela yayo. Bamo bakendeka ngwabo eyi miyati 7 yajaukile na bufuko bubafungulwile mu binganda bibabangele kuswana. Bakwabo ngwabo Baisalele kubamwene ngwabo baje Bakanana basaleleko basele kubakobelesa mu bukalu, ngeci kubamwene seho ya kubashekamo bwasi. Co lalo kusholoka ngwe Baisalele beshwalele kuswana ebi binganda mwafwa bazibile lyoba kulwa na bitozi babo ba nzili baje bakelemo. (Yos 13:1-7) Co lalo kubazibukile mwamubwa eyi myela ibabakulahesele kuswana ngwe mubazibukilile myela ibabangele kuswana.
NOVEMBER 8-14
BISIMPI BYA SEHO BYA MU LIJWI LYA NJAMBI | YOSHWA 20–22
“Bitulilongesa ku Baisalele Baje Balisebukile”
w18 8/15 5-6 ¶10
Muli na Bukaleho bwa Kushula Ndi?
Tucisimutwiyeni byalingiwile kuli Baisalele baje bakele mu kangombe kayambi ka Ndonga ya Yondau mu matangwa a Yoshwa. (Yosh 22:9-34) Bazibile ngwabo Baisalele baje bakele ku ngangela ya ndonga ya Yondau (muyati wa Lubena na Ngande na litambelo lya muyati wa Manase), banatungu mutula wakama kuyehi na ndonga ya Yondau. Ku mutamba umo, uje muzimbu wapwile wa busunga. Uje muzimbu wa kujeneka bukaleho bwa kushula walingisile Baisalele baje bakele mu kangombe kayambi basinganyeke ngwabo bandolome babo banatengulukila Yehova, ngeci balikungulwile ngwabo bakalwise baje bakele ku ngangela. (Tandeni Yoshwa 22:9-12.) Oloni mu kubezika, simbu kanda bakatuke, batumine banalume ba kulongwa mangana bakatondesese bukaleho bwa kushula. Bakawanene bika? Baisalele ba ku muyati wa Lubena na Ngande na litambelo lya muyati wa Manase cili bene batungile mutula, oloni kuwapwile wa kwenyekela biñombelo, wapwile wa canukiso. Bautungilile ngwabo kulutwe banu bakamone ngwabo nabo bapwile ba kulongwa kuli Yehova. Baje Baisalele bakandelelele manene mwafwa kubazambwilile kukatsiya bandolome babo, oloni bakele na simbu ya kutondesesa bukaleho bwa kushula.
w08 11/15 18 ¶5
‘Lingeni Byuma Binena Kwoloka’
Baisalele bamo balizibile ngwabo bakele na bukaleho bwa kushula bumwesa ngwabo ije miyati ikwabo yakele na mulonga, ngeci kukwabihile kubalwisa. Oloni kubazambwilile kulwisa ije miyati. Batumi bandolome babo mangana bakatondesese bukaleho. Bakabehwile ngwabo: “Omwo bikajo munalingi bubi bwangacije kuli Njambi ya Isalele?” Ije miyati yatungile uje mutula, kuyautungile mukushaka kutengulukila Njambi. Ije miyati ibabangeyeye yapandele kulinga bati? Kuma bapandele kulubala na kubyana kwendeka nabo ndi? Ije miyati ibabangeyeye, yakumbulwile mwamubwa. Balekele baje bezile na kubehula ngwabo batungile uje mutula mwafwa bashakele kupangela Yehova. Kukumbulula mu kasingimiko kwanyungilile busamba bwabo na Yehova hamo lika na myonyo yabo. Nga tukumbula bakwetu mu kasingimiko, co tukala mu kwoloka.—Yos 22:13-34.
Kutondesesa Bisimpi bya Seho
it-1 402 ¶3
Kanana
Nameme Baisalele kubanyongesele Bakanana boshe, oloni “Shukulu Kalunga wanene Baisalele libu lyoshe lije lyalikumiiye na bakukulwila babo ngeci akabanalyo.” Co lalo “wabanene kwoloka mu mitambela yoshe ya lifuti.” ‘Washulisilile bikulaheso byoshe byakulahesele Baisalele.’ (Yos 21:43-45) Bitozi ba Baisalele baje babazengelekele bakele na kubazibila lyoba, co kukwakele bitozi baje basele kufungulula Baisalele. Yehova wakulahesele ngwendi, Baisalele bakatundisa Bakanana mu lifuti lyabo “kabundondo kabundondo” kutewa lifuti lipwa ngundu, co bikashama basemunwinamo manene.” (Kut 23:29, 30; Kwi 7:22) Nameme ba Kanana bamo bakele na bitwa bya kutewesa bya kufwa ngwe matemba akele na mikwale ya bikubo, ebi keti bikebyo byonowesele Baisalele kufungulula mafuti amo a Bakanana. (Yos 17:16-18; Maa 4:13) Oloni bonowele kufungulula mafuti amo, mwafwa kubononokele Yehova.—Kul 14:44, 45; Yos 7:1-12.
NOVEMBER 15-21
BISIMPI BYA SEHO BYA MU LIJWI LYA NJAMBI | YOSHWA 23–24
“Majwi a Yoshwa a Mamaneselelo ku Baisalele”
it-1 75
Lizibasano
Baisalele baliwanene na bukalu bwakwabo mubakakobelele mu lifuti lya Kanana lyabakulahesele Njambi. Yehova wabanene lifuti lyakulahesele bakukulwila babo. Ngeci kubakakobelele mu lifuti lya banu beka, mukemo Yehova wababindikile kulikwatasana na banu baje bakelemo. (Kut 23:31-33; 34:11-16) Bapandele lika kwononoka mashiko a Njambi keti kutembwinina bilinga bya banu baje babapandele kushekamo. (Lev 18:3, 4; 20:22-24) Njambi wababindikile kulyambatele na banu babakawanene muje mu lifuti. Mwafwa kulyambatela na banu baje kubalemesele Yehova, kwasele kubalingisa balikwatasane na babushoko bwa banakazi babo baje kubakele na kulemesa Yehova. Co lalo ngwe kwabalingisile balikobelese mu bilinga bya bulombelo bwa makuli. Kulinga ngoco kwasele kubalingisa bapwe baka-kutengulukila na kubonowesa kupangela Yehova.—Kwi 7:2-4; Kut 34:16; Yos 23:12, 13.
w07 11/1 26 ¶19-20
Byuma Byanendeka Yehova Bikalishulisilila
19 Ngwe mutunamwena, netu twasa kwendeka ngwetu: ‘Byuma byoshe byabibwa byakulahesele Yehova, binalingiwa. Kukwesi cimo cinonwa cahi.’ (Yos 23:14) Yehova akobola bangamba bendi na kubanyungilila na kubakwasa. Kuma kuli byuma byakulahesele Njambi bije byonowele kulishulisilila ha simbu ibyapandele kulishulisilila ndi? Kukwesi byanakulahela Njambi byasa kwonwa kulishulisilila. Ngeci, twapande kukulahela Mbimbiliya, Lijwi lya Njambi.
20 Batico ha byuma byanakulahesa Njambi kulutwe? Bwingi bwetu, Yehova natukulahesa ngwendi tukakala muno mu kaye mubakakatengulula kupwa paladaisi. Co kuli banu babandondo bali na lilabelelo lya ku kayula hamo na Kilistu mwilu. Tubaboshe twakulahela ngwetu byuma byanatukulahesa Yehova bikalingiwa. Ngeci, tubaboshe tunapande kutwalelelaho kupwa ba kulongwa ngwe mwalingilile Yoshwa. Litangwa limo, byuma byoshe byanatukulahesa Yehova bikalingiwa. Ha simbu oyo, tubaboshe tukendeka ngwetu byuma byoshe byakulahesele Yehova “binalingiwa.”
Kutondesesa Bisimpi bya Seho
w04 12/1 12 ¶1
Bisimpi bya Kulitila bya mu Mukanda wa Yoshwa
Yos 24:2—Kuma Tela ishe ya Abilahama wapwile muka-kulemesa tumponya ndi? Hakulibanga, Tela kapwile muka-kulemesa Yehova Njambi. Cisholoka ngwe wakele na kulemesa Njambi wa munakazi ibakele na kulemesa manene mu Ule walizina lya Sini. Owu Njambi bakele na kumutumbula ngwabo Njambi wa ngonde. Biñanda bimo bya Bayunda bya ku sañulu bimwesa ngwabyo Tela nendi wapwile muka-kushonga tumponya. Oloni omo Yehova walekele Abilahama ngwendi atunde mu Ule kuya ku Halani, Tela waile hamo nendi.—Kus 11:31.
NOVEMBER 22-28
BISIMPI BYA SEHO BYA MU LIJWI LYA NJAMBI | MAAKO 1–3
“Muzimbu Umwesa Kusimpa na Kunyanyama kwa Ehunde”
w04 3/15 31 ¶3
Ehunde Wamenene Banu ba Njambi
Ehunde kahyanene mwafwa ya mana endi nambe mwafwa ya kuzeya kwa bitozi bendi, embwe. Kukwesi byuma byasa kwonowesa biyongola bya Njambi kulishulisilila. Yehova ikeye wakwasele Ehunde ahyane, mangana ashulisilile biyongola byakele nabyo bya kupatula banu bendi. Njambi ikeye wangwile Ehunde apwe lyaako. Co Mbimbiliya imwesa ngwayo, “Hoshe haje Shukulu Kalunga ana Baisalele lyaako, co Shukulu Kalunga wakele hamo na lyaako.”—Maa 2:18; 3:15.
w04 3/15 30 ¶1-3
Ehunde Wamenene Banu ba Njambi
Cakulibanga, Ehunde wafulile “moko ya mukwale” ya bubela kubali. Kafulile moko yailaha manene mangana ase kuishweka kwisi ya buzalo bwendi. Hamo wasinganyekele ngwendi baka-kunyunga mwene bakamupapateya. Bindalo bya mikwale bakele na kubizalela ku cimoshwe mangana kupwe kwakwasi kushomonamo mukwale na liboko lya cilyo. Oloni Ehunde, wakutiiye moko yendi ya mukwale “kunyonga yendi ya kuliboko lya cilyo kwisi ya buzalo bwendi” mwafwa wapwile muka-cimoshwe. Nameme ngwe bamupapateyeye kucimoshwe ngwe kubaiwanene. Ngeci, ‘Ehunde watwalele milambu kuli Engelone mwene wa bamowabi,’ co nacimo cahi camwonowesele.—Maa 3:16, 17.
Mbimbiliya, kuimwesa byuma byalingiwile omwo Ehunde waketele mu lipela lya mwene Engelone. Oloni Mbimbiliya imwesa lika ngwayo: ‘Ehunde mwamanesele kwana milambu kuli mwene, walekele baje banu bambatele ije milambu beluke kwimbo.’ (Maa 3:18) Munima ya kwana bwana kuli mwene, Ehunde welukile na baje banalume bamusindikiyiye, co bendeleko nunda yailaha kutunda kuli mwene Engelone. Munima ya kulisalesa nabo, Ehunde welukile kuli mwene. Mwafwa bika? Kuma Ehunde washakele lika ngwendi baje banalume bamunyungilile ndi? Indi washakele ngwendi amwese ngwendi wapwile munu wa bulemu nambe mangana bamukwaseko lika kwambata buje bwana bwakele na kutwala kuli mwene ndi? Kuma wasindikiyiye lika baje banalume bamusindikiyiye mangana abanyungilile simbu kanda alinge butumbe bwendi ndi? Nameme kutuzibuka byamulingisile ngoco, oloni tuzibuka ngwetu Ehunde wapwile wa kusimpa, co walingile byuma byayongwele kulinga.
‘Omwo Ehunde wetele ku mamanya a kushonga a ku Ngilingale, welukile kuli Engelone, co wendekele ngwendi: ‘Shukulu, njishaka kusimutwiyako nobe ku bushweke.’’ Mbimbiliya kuimwesa mwakakobelelele Ehunde ku lipela lya mwene. Mwafwa bika baka-kunyunga mwene bamwecelelele kukobela mu lipela? Kuma basinganyekele ngwabo Kaisalele umo kasa kunena bukalu kuli shukulu yabo ndi? Kuma omwo bamwene Ehunde eluka lika lyendi, basinganyekele ngwabo ashaka kwenda Baisalele bungungu ndi? Kutuzibuka byabalingisile ngoco. Tuzibuka lika ngwetu omwo Ehunde walombele kulimona na mwene ku bushweke, bamutabesele.—Maa 3:19.
Kutondesesa Bisimpi bya Seho
w05 1/15 24 ¶7
Bisimpi bya Kulitila bya mu Mukanda wa Maako
Maa 2:10-12. Tunapande kulilongesa Mbimbiliya simbu yoshe ‘mangana keti twibale byuma byanalingi Yehova.’ (Mya 103:2) Bisemi banapande kulongesa Lijwi lya Njambi bana babo mangana likale mu bimbunge byabo.—Kwi 6:6-9.
NOVEMBER 29–DECEMBER 5
BISIMPI BYA SEHO BYA MU LIJWI LYA NJAMBI | MAAKO 4-5
“Yehova Apangesa Banakazi Babali mu Kwobola Banu Bendi”
“Njezile Ngwe Cisemi Kuli Baisalele”
Sisela wayandesele manene Baisalele. Bulombelo bwa Bakanana bwapwile bwabubi mwafwa bakele na kukombelela banike ku mitula na kulingila bukwizi mu tembele. Mukemwo Baisalele bayandele manene mubabayulile kuli mwene wa Bakanana. Mwaso wa Ndembola umwesa ngwawo banu kwabakaluwilile kwenda, co buyoye mu membo bwa kaluwile. (Maa 5:6, 7) Baisalele bakele mu bukalu, co basezele membo abo na kukayoya mushwata na mu malundu. Buyoye bwabakaluwilile mwafwa kubasele kulima, kutunga bibumbe bya kunyungilila membo abo nambe kwenda mu bitapalo bya mbunga mwafwa bakele na kutewa ngwabo basa kubalwisa na kubanyeka bana babo na kulala banakazi babo.
“Njezile Ngwe Cisemi kuli Baisalele”
Baisalele bakele mu bukalu ha myaka 20 kweta noho Yehova wamwene ngwendi bashaka kutenguluka. Mwaso wa Ndembola na Mbalake umwesa ngwawo Baisalele bakele mu bukalu, ‘kweta noho Ndembola wezile ngwe cisemi kuli Baisalele.’ Kutuzibuka indi Ndembola munakazi wa Lapindote wakele na bana bendi ba kulisemena indi embwe, oloni awa majwi anapangesa anapu lika a cifwisa. Yehova wapangesele Ndembola kukunyungilila banu bendi, ngeci wapwile ngwe cisemi cabo. Yehova walekele Ndembola ngwendi asane Lyako Mbalake, munalume wa likulahelo na kumuleka mwakulwila na Sisela.—Maa 4:3, 6, 7; 5:7.
“Njezile Ngwe Cisemi Kuli Baisalele”
Njaele wapandele kwangula bwasi bya kulinga. Wanene Sisela mwela mwa kuhwimina. Sisela walekele Njaele ngwendi nga kwija munalume ali na kumushakazeka co keti amuleke ngwendi kwali. Sisela mwalombele Njaele mema a kunwa, wa mwanene mabele a kukonda. Sisela mwalalele, Njaele wa mufwikile mwamubwa nanga. Co Sisela waile mu tulo twakama. Njaele wambatele mumba na sando ya citi, bikwata bibakele na kupangesa manene banakazi baje bakele mu bitenti. Njaele washwenene kabundende kabundende ku mutwe wa Sisela, co watsiile Sisela mu kwimanenako Yehova. Ngwe Njaele wakwatakwatele ku masinde, ngwe wanenele bukalu. Bika byalingisile Njaele atsiye Sisela? Kuma wasinganyekele mwayandeselele Baisalele ha myaka yaingi ndi? Indi walizibile kubezika mwafwa ya kwimanena Yehova? Mbimbiliya kuimwesa byalingisile Njaele atsiye Sisela. Oloni tuzibuka ngwetu Njaele kakwatakwatele ku masinde—Maa 4:18-21; 5:24-27.
Kutondesesa Bisimpi bya Seho
w05 1/15 25 ¶5
Bisimpi bya Kulitila bya mu Mukanda wa Maako
Maako 5:20—Bingongonosi mwilu byalwililile bati Mbalake? Mbimbiliya kuimwesa ngwayo tungelo bakebo balingile ngoco, co lalo kuimwesa ngwayo bije bingongonosi byapwile lika mamanya awile mwilu ngwe mubendekelele baka-mana ba Sisela. Co lalo kubilitombola nebi bibendekela baka-kutaha kupangesa bingongonosi, baje batahelele Sisela. Oloni tuzibuka ngwetu kuli bimo byalingile Yehova mangana amene banu bendi.
DECEMBER 6-12
BISIMPI BYA SEHO BYA MU LIJWI LYA NJAMBI | MAAKO 6-7
“Ya na Nzili Yoshe Eyi Uli Nayo”
w02 2/15 6-7
Binangulo bya Njambi Bimikwasa
Ngimbiyone uje wapwile lyako wa Bahevelu ba kusañulu walilwile na kumona ebi wasele kulinga nebi kasele kulinga. Kasinganyekele bya kupwa ntwama ya Baisalele. Njambi mwamwangwile ngwendi atwamenene Baisalele, wakumbulwile ngwendi eci cipangi kucamupandele. Wendekele ngwendi: “Cikota cange cikeco ca kuzeya manene mu naanga ya Manase, co yange njiwamundondo mu naanga yange.”—Maa 6:12-16.
w05 7/15 16 ¶3
“Mukwale wa Yehova Nou wa Ngilyone”
Bamindiyane bakele mu lyoba lyakama mubabajujwisile. Batewele manene mubamwene Baisalele bakupwa 300 baje bemanene lika, oku batika binjaba byabo na kwohyesa malupembo abo na kukuwa manene. Bakasamene manene mubazibile Baisalele batambeka ngwabo ‘mukwale wa Yehova nou wa Ngilyone.’ Bamindiyane bashangumukile kulitetela, co miyoyo yalibwezelelele. Mwafwa ya kulishoshomwena manene, kubasele kuzibuka bitozi babo nambe kulizibuka bakebo babenya. Yehova walingisile Bamindiyane bashangumuke kulitapa mikwale mukati kabo, oloni Baisalele ba kupwa 300 bakebo bemanene lika mu mitambela yabo. Bamindiyane boshe babanyongesele, co naumo wahi watewele. Baisalele bamanesele cipangi cabo ca ku nyongesa Bamindiyane.—Maa 7:19-25; 8:10-12, 28.
Kutondesesa Bisimpi bya Seho
w05 1/15 26 ¶6
Bisimpi bya Kulitila bya mu Mukanda wa Maako
Maa 6:25-27. Ngilyone walingile byuma mu kunyanyama mangana keti alubalese bitozi bendi. Netu omwo tuya na kwambulula, kutwapandele kwendeka mu ngila ije ilubalesa banu batuli na kwambulwila.
DECEMBER 13-19
BISIMPI BYA SEHO BYA MU LIJWI LYA NJAMBI | MAAKO 8-9
“Kulikehesa Kwapwa Kwakubwa Kutubakana Kulyalesa”
w00 8/15 25 ¶3
Mwasa Kulinga Bati Nga Mwalisebuka na Bakweni?
Ngilyone mwashakele kulwisa Bamindiyane, walombele Baefalime mangana bamukwase. Oloni mubamanesele kulwa, Baefalime bayayabalele manene kuli Ngilyone mwafwa ya kujeneka kubasana ku mashangumukilo a nzita. Mbimbiliya imwesa ngwayo ‘balicokotele manene ha cuma eci.’ Oloni Ngilyone wabakumbulwile ngwendi: “Ebi njinalingi binapu byabindondo, kubilyeseka nebi munalingi yeni. Nameme ngoco, bundondo bwa cije mwalingile yeni Baefalime, cinatubakana bije balingile baka-cikota cange coshe. . . . mu nzili ya Njambi mwatsiile Bimyene babali, Oleba na Zebe.” (Maa 8:1-3) Cikumbululo cacibwa ca Ngilyone cikeco cakwasele mangana keti kukale nzita mukati ka Baefalime na Bangilyone. Baefalime balimwene ngwabo bapwile ba seho manene kutubakana ba Ngilyone co balyalesele. Nameme ngoco, Ngilyone washakazekele bingila bya kunena kwoloka mukati kabo. Twasa kutembwinina bati mwanja waubwa wa Ngilyone?
Kulikehesa Kwapwa kwa Seho
15 Ngilyone, wamwesele mwanja waubwa wa kulikehesa mu bilinga. Omwo kangelo ka Yehova washolokele kuli ikeye lwa kulibanga, Ngilyone wakumbulwile mu kulikehesa. (Maa 6:15) Munima ya kutambula cipangi camwanene Yehova, Ngilyone washakele kuzivuka byuma byalibungilile mu cipangi cibamwanene, na kukulahela Yehova ngwendi amutwamenene. (Maa 6:36-40) Ngilyone wapwile wa kusimpa. Oloni walingile byuma mu kunyanyama. (Maa 6:11, 27) Kalingile cipangi cibamwanene mu kushaka kutsimana. Omwo wamanesele kucipanga, welukile kwimbo lyendi mu kubwahelela.—Maa 8:22, 23, 29.
w08 2/15 9 ¶9
Endeni mu Bingila bya Yehova
9 Nga tushaka ngwetu tupwe ba busamba ba Njambi, co tunapande kupwa ba “kulikehesa.” (1 Pe 3:8; Mya 138:6) Mukanda wa Maako capita 9, umwesa bubwa bwa kupwa ba kulikehesa. Yotame muna Ngilyone wendekele ngwendi: “Mu simbu ya kusañulu miti ikeyo babenya yaile na kulyangwila mwene ngwe banu.” Eyi miti ibashakele ngwabo ipwe bimyene yapwile muti wa Olibe na muti wa mukuyu na muti wa mukolobozi wa bushuka bwa binyu. Eyi miti yemanenene banu ba seho baje kubayongwele kupwa bimyene mu Isalele. Oloni muti wa mambimbo ubakele na kupangesa lika ku bikuni wemanene mwene Abimeleki wa kulyalesa, uje wapwile muka-kutsiya na muka-kulyatelela banu. Nameme ‘wapwile mwene wa Baisalele ha myaka itatu,’ oloni watsile butsi bwabubi (Maa 9:8-15, 22, 50-54) Cili bene, “kulikehesa” kwapwa kwakubwa.
Kutondesesa Bisimpi bya Seho
it-1 753 ¶1
Efonda, I
Ngilyone wabwahelelele manene omwo Yehova wakwasele Baisalele kuhyana mu nzita, ngeci watongele efonda. Oloni ije efonda ‘yapwile mweto kuli Ngilyone na naanga yendi,’ mwafwa Baisalele bashangumukile kuilemesa. (Maa 8:27) Oloni Mbimbiliya kuimwesa ngwayo Ngilyone nendi walemesele ije efonda. Mukemwo kapositolo Paulu wamwakele ha mukana wa ‘mbunga yakama’ ya Bakaleho ba Yehova ba kusañulu.—Hev 11:32; 12:1.
DECEMBER 20-26
BISIMPI BYA SEHO BYA MU LIJWI LYA NJAMBI | MAAKO 10-12
“Njefeta Wakele na Busamba bwa Kukanyama na Yehova”
Kupwa ba Kulongwa Kuli Njambi Kukamuzibisa Kubwaha
9 Mwanja wa Yosefa hamo ukewo wakwasele Njefeta. Hamo walilongesele kuli Yosefa uje wazibililile bandolome bendi ngozi baje bamuzindile. (Kus 37:4; 45:4, 5) Kusinganyeka ha mwanja ou kwakwasele Njefeta kulinga byuma bije byazibisile Yehova kubwaha. Byuma bibamulingile babushoko bwendi byamuzibisile kubabala ku mbunge. Oloni Njefeta watwamekele kujelesa lizina lya Yehova na kulwila banu bendi, kutubakana byuma bije byakele na kumulingikila. (Maa 11:9) Washakele kutwalelelaho kulongwa kuli Yehova. Mu kulongwa kwendi, Yehova wamubezikisile na kubezikisa Baisalele.—Hev 11:32, 33.
it-2 27 ¶2
Njefeta
Njefeta watwamenenene Baisalele mu kusimpa. Watumine tunganda kuli Baamoni mwafwa wazibukile ngwendi Baamoni banakobela mu lifuti lya Baisalele na kubalwisa. Oloni mwene wabakumbulwile ngwendi, Baisalele bakebo batambwile lifuti lya Baamoni. (Maa 11:12, 13) Njefeta kamwesele lika ngwendi wapwile munalume wa kusimpa, oloni wamwesele ngwendi wazibukile mwamubwa mizimbu ya kusañulu ya banu ba Njambi. Wabyanenene Baamoni baje balingile bimata, wabalekele ngwendi (1) Baisalele kubatambwile Baamoni na Bamowabe nambe Baendome lifuti lyabo (Maa 11:14-18; Kwi 2:9, 19, 37; 2 Mi 20:10, 11); (2) Ha simbu ibahyanene Baisalele, Baamoni kubakele omu mu lifuti. Yehova wanene Baisalele eli lifuti munima ya kuhyana mwene Sihone. (3) Baisalele bakele oku ku mutambela ha myaka 300, oloni Baamoni neci cibalingile cahi, co bikoni kubalitambwile ha myaka yoshe eyi?—Maa 11:19-27.
it-2 27 ¶3
Njefeta
Njefeta wabindikile Baamoni kunyeka Baisalele lifuti lyabo, mwafwa washakele kunyungilila kulemesa kwa busunga. Wendekele ngwendi Yehova Njambi ikeye wanene Baisalele lije lifuti, ngeci kubapandele kwanako nambe mutamba waundondo ku baka-kulemesa binjambi ba makuli. Njefeta wendekele ngwendi Kemoshe wapwile njambi wa Baamoni, oloni bamo bakendeka ngwabo awa apwile makuli mwafwa Moleke ikeye wapwile njambi wa Baamoni, co Kemoshe wapwile njambi wa ba Moabi. Nameme ngoco, banu bo mu mu mafuti balemesele binjambi babangi. Mbimbiliya imwesa ngwayo Solomoni wambatele banakazi ba ku mafuti eka baje balingisile Baisalele bashangumuke kulemesa Kemoshe. (Maa 11:24; 1 Vi 11:1, 7, 8, 33; 2 Vi 23:13) Baka-kutondesesa bamo bakendeka ngwabo lizina lya Kemoshe lilumbununa muka-kuhyana. Ngeci Njefeta kashakele ngwendi Baamoni basinganyeke ngwabo njambi yabo Kemoshe ikeye wabakwasele bahyane Baisalele na kubanyeka lifuti.
Kutondesesa Bisimpi bya Seho
it-2 26
Njefeta
Njefeta Kapwile Mwana wa mu Bukwizi. Ina ya Njefeta wapwile ‘cikwizi.’ Oloni oku kukulumbununa ngwabo Njefeta wapwile mwana wa mu bukwizi. Ina ya Njefeta wapwile cikwizi simbu kanda ashomboke mu lwale kuli Ngilyande, ngwe mwafwile Lahabe simbu kanda acishomboke kuli Salimone. (Maa 11:1; Yos 2:1; Mat 1:5) Bandolome ba Njefeta baje basemukile kuli munakazi wa Ngilyande wa kulibanga bamushekele hembo mangana keti awane mutamba kubuswana bwa ishe. Obu bunapu bukaleho bwa kulibanga bumwesa ngwabwo Njefeta kapwile mwana wa mu bukwizi. (Maa 11:2) Co lalo Njefeta ikeye ibakwangwile kupwa ntwama ya banalume ba mu Ngilyande (nameme bapandele kwangula ntwama hakati ka bandolome bendi). (Maa 11:11) Kutundaho, Mbimbiliya imwesa ngwayo Njefeta wanene mulambu kuli Njambi ku Mbalaka. (Maa 11:30, 31) Ngwe Njefeta wapwile mwana wa mu bukwizi ngwe kasele kulinga byuma byoshe ebi. Mwafwa Lishiko lya Mosesa lyamwesele ngwalyo: “Kukwesi mwana wa mu bukwizi nambe mutekulwila wendi nameme wa mu cisemwa ca mu likumi ibakapandakana ku banu ba Shukulu Kalunga.”—Kwi 23:2.
DECEMBER 27–JANUARY 2
BISIMPI BYA SEHO BYA MU LIJWI LYA NJAMBI | MAAKO 13-14
“Bibalilongesa Bisemi Kuli Manowa na Munakazi Wendi”
Bisemi Longeseni Bana Beni Kutunda ku Bwanike
Tucisimutwiyeni byalingiwile kuli Manowa wa ku muyati wa Ndani uje wakele ku limbo lya Zola mu Isalele. Kangelo ka Yehova walekele munakazi wa Manowa uje wapwile mumba ngwendi akakita mwana wa munalume. (Maa 13:2, 3) Tukulahela ngwetu Manowa na munakazi wendi babwahelelele manene mubatambwile ou muzimbu. Nameme babwahelele, oloni balishoshomwenene lalo. Ngeci, Manowa walombelele ngwendi: ‘Yehova tuma lalo uje munu wa Njambi iwatumine eluke lalo kuli yetu akutuleke bije bitunapande kulinga kuli ou mwanike omwo akasemuka.’ (Maa 13:8) Manowa na munakazi wendi bashakele kuzibuka mwakulelela uje mwana omwo akasemuka. Balongesele munabo Samusoni mashiko a Njambi, co cipangi cabo kucaile mwangoco. Mbimbiliya ngwayo: ‘Mu kwita kwa simbu sipilitu ya Yehova yakele hali [Samusoni].’ Eyi sipilitu ya Njambi yakwasele Samusoni apange bipangi byakama bya nzili mwapwile lyako mu Isalele.—Maa 13:25; 14:5, 6; 15:14, 15.
w05 3/15 25-26
Sipilitu ya Yehova Ikeyo Yakwasele Samusoni
Samusoni mwakolele, ‘Yehova ikeye watwaleleleho kumubezikisa.’ (Maa 13:24) Litangwa limo Samusoni walekele baishe na baina ngwendi: ‘Ku Timena kuli mumbanda wa Kafilistiya injinashaka manene, ngeci bene njendekeleniye mangana apwe munakazi wange.’ (Maa 14:2) Acisinganyekeni mubalizibilile bisemi bendi. Bisemi ba Samusoni bakasamene mwafwa basinganyekele ngwabo Samusoni apatula ba Isalele ku bitozi babo, oloni ikeye wabalekele ngwendi ashaka kulyambatela nabo. Lishiko lya Njambi lyabindikile Baisalele kulyambatela na banu baje bakele na kulemesa binjambi ba makuli. (Kut 34:11-16) Mukemwo bisemi bendi bamwihwile ngwabo: “Omwo bikajo ushaka kuya ku Bafilistiya aba baka-kujeneka kukulahela na kwambatelako munakazi? Kuma kuwasa kuwana mumbanda wa ku cikota cetu wa ku bushoko bwetu ndi?” Oloni Samusoni wabakumbulwile ngwendi: “Ikeye lika injishaka ngwange munjambateleye. Njamushaka nanjiyi ku mbunge”—Maa 14:3.
Kutondesesa Bisimpi bya Seho
w05 3/15 26 ¶1
Sipilitu ya Yehova Ikeyo Yakwasele Samusoni
Bika byalingisile Samusoni endeke ngwendi uje munakazi wa Kafilistiya ‘ikeye lika’ wamuile ku mbunge. Libulu lya McClintock neli lya Strong’s Cyclopedia ngwalyo, Samusoni “kalingile ngoco mwafwa ya bubwa bwa uje munakazi embwe, oloni wakeleko lika na biyongola bimo.” Biyongola muka byakelenabyo? Mukanda wa Maako 14:4 ngwawo, Samusoni “washakazekele ngila ya kulwa na Bafilistiya.’ Ebi bikebyo byalingisile Samusoni azeme manene uje munakazi. Samusoni mwakele na kukola, ‘sipilitu ya Yehova yakele hali ikeye,’ co ikeyo yakele na kumutwamenena. (Maa 13:25) Sipilitu ya Yehova ikeyo yalingisile Samusoni aleke bisemi bendi bya kwambata uje munakazi wa Kafilistiya, co lalo ikeyo yamukwasele omwo wapwile lyako mu Isalele.