Biñanda bya Kupangesa mu Mukanda wa Biwano bya Buyoye Bwetu Baka-Kilistu na Cipangi Cetu
JANUARY 3-9
BISIMPI BYA SEHO BYA MU LIJWI LYA NJAMBI | MAAKO 15–16
“Kulyenda Bungungu Kwapwa Kwakubi”
w12 4/15 8 ¶4
Kulyenda Bungungu Cinapu Cimweso ca Matangwa a Kukotoka
4 Tucisimutwiyeni hali Ndelila, munakazi yazemene Lyako Samusoni. Samusoni wakele mbunge kukulwisa Bafilistiya mangana amene banu ba Njambi. Bimyene batanu mubanangukile ngwabo Ndelila kazemene Samusoni na mbunge yendi yoshe, bamufwetele bimbongo abaleke lihungu hemanene nzili ya Samusoni mangana bamutsiye. Ndelila watambwile bije bimbongo oloni wonowele lutatu kuwana lihunga lya Samusoni. Ndelila watwaleleleleho kwana Samusoni cikela ha “kumwihozola ha litangwa na litangwa.” Kukapwa muje, Samusoni ‘wajukile manene, co walizibile ngwe ashaka kutsa.’ Co walekele Ndelila ngwendi biñambu byendi kanda babiteuleho, co nga babiteula, nzili yendi ihwa. Mwazibile ngoco, Ndelila walekele munu umo ateule biñambu bya Samusoni omwo wamulangekele ha mendi, kutundaho, wamwanene mu maboko a bitozi bendi bamulinge mubashakelele (Maa 16:4, 5, 15-21) Cuma calingile capwile cacibi. Nuna yalingisile Ndelila ende bungungu munu uje wamuzemene.
w05 1/15 27 ¶5
Bisimpi bya Kulitila bya mu Mukanda wa Maako
Maa 14:16, 17; 16:16. Kwaka munu mu cikela na kumusindiya alinge byuma bimo kwasa kutsiya busamba—Vis 19:13; 21:19.
w12 4/15 11-12 ¶15-16
Kulyenda Bungungu Cinapu Cimweso ca Matangwa a Kukotoka
15 Baje bali mu bulo basa kupwa bati ba kulongwa kuli umo na mukwabo? Mbimbiliya ngwayo: “Bwahelela na munakazi [nambe munalume] iwalyambatele nendi mu bukwenje bwobe.” Co lalo “bwahelela na munakazi [nambe munalume] iwazema ha matangwa oshe a kuyoya kwobe. (Vis 5:18; Kwa 9:9) Ngeci, omwo baya na kukulubalela hamo, baka-kulyambata banapande kulyaka manene mbunge umo na mukwabo. Kulumbununa ngwabo banapande kutolilila kuli umo na mukwabo na kuwana simbu yaingi ya kukala hamo na kusimutwiya. Banapande kunyungilila bulo bwabo na kukanyamesa busamba bwabo na Yehova. Banapande kutandela hamo lika Mbimbiliya na kwambulwila hamo lika na kulombela hamo lika kuli Yehova mangana ababezikise.
TWALELENIHO KUPWA BA KULONGWA KULI YEHOVA
16 Mu cikungulukilo mwakele banu bamo balingile bubi bwakama. Co ‘babendekelele na majwi a kubambuka ngwe moko, ngeci bakale na kukulahela kwa mutunu.’ (Tit 1:13) Bamo banabatundisa mu cikungulukilo mwafwa ya bubi bubalingile, co ‘baje babananyanyamesele ku bakulunu banecela bilinga byabo byabibi na kwiluka mu cikungulukilo. (Hev 12:11) Oloni bati nga tuli na kubushoko ketu nambe kabusamba ketu ibanatundisa mu cikungulukilo? Tunapande kutwalelelaho kupwa ba kulongwa kuli Yehova keti kuli kabusamba nambe kabushoko ketu. Yehova ashaka kumona indi tuli na kukabangeya cinangulo canatwana ca kujeneka kulikwatasana na munu natundu mu cikungulukilo.—1 Ko 5:11-13.
Kutondesesa Bisimpi bya Seho
w05 3/15 27 ¶6
Yehova Wakwasele Samusoni Ahyane
Samusoni wakele mbunge ku cipangi cakele naco, ca kulwisa Bafilistiya. Wakakele mu njibo ya cikwizi ku Ngaza mwafwa washakele kulwila banu ba Njambi. Mwetele muje mu nganda butsiki, Samusoni wonowele kwakutulila, ngeci waile ku njibo yauje cikwizi. Samusoni kakele na biyongola bya kukalilala na uje cikwizi. Watundile mu njibo ya uje munakazi hakati ka butsiki. Wambatele bikolo bya nganda na bingunzi byabo, co wabitwalele kulako, bungenzi bwa makilomita 60 kuyehi na lilundu lya Hebelone. Yehova ikeye wamwanene nzili ya kulinga ebi byuma—Maa 16:1-3.
JANUARY 10-16
BISIMPI BYA SEHO BYA MU LIJWI LYA NJAMBI | MAAKO 17-19
“Kujeneka Kwononoka Mashiko A Yehova Kukanene Bukalu”
it-2 390-391
Mika
1. Mika wapwile munalume wa ku lifuti lya malundu lya Efalime. Wapokwele lishiko lya bu 8 ha mashiko 10 (Kut 20:15). Mika webile bimbongo bya siliva bya kupwa 1,100 kuli baina. Hanima ya kulitabela ngwendi ikeye webile bije bimbongo, baina bendekele ngwabo: “Njaka cikumiiyo ca kukundika ebi bimbongo kuli Shukulu Kalunga. Co bikebyo bikakwase kulinga kamponya wa citi wa kufwika na siliva, ngeci bene ololo njikakwilwisila awa mabundungulu a siliva.” Baina banoneleho mabundungulu a siliva a kupwa 200, co bawanene kuli muka-kufula, uje wafulile kamponya wa siliva na kushonga kampoya wa citi, co byoshe ba byakele mu njibo ya Mika. Mika uje wakele na “njibo ya kulemesela binjambi, watungile efonda na kushonga batelafime, co wangwile munendi kupwa kapilistu wendi. Nameme wasinganyekele ngwendi ali na kulemesa Yehova, oloni wasebukile mwafwa Yehova wabindikile kulemesa tumponya. (Kut 20:4-6) Yehova washikile ngwendi bamulemesele lika ku mbalaka na tupilistu bangwile. (Maa 17:1-6; Kwi 12:1-14) Kutundaho, Mika wangwile Yonatana muna Ngeleshone uje wapwile Kalevi na kumupwisa kapilistu wendi. (Maa 18:4;30) Mika wasinganyekele ngwendi walingile cuma cacibwa, co wendekele ngwendi: “Njazibuka ngeci Shukulu Kalunga akasungamesa byoshe, co bikapwa byabibwa kuli yange.” (Maa 17:7-13) Mika wabwezelelele lika kukusebuka kwendi mwafwa Yonatana yangwile, kapwile wa ku cikota ca Alone, co kapandele kupwa kapilistu.—Kul 3:10.
it-2 391 ¶2
Mika
Mukwetile simbu yaindondo, Mika na banalume bamo bakabele banalume ba ku cikota ca Ndani. Mubabawanene, banalume bakucikota ca Ndani behwile Mika ngwabo, mulonga muka utunalingi, co Mika wabakumbulwile ngwendi: “Munambata kapilistu wange na binjambi banjinapangele, co yange bika binjinasala nabyo”? Banalume ba ku cikota ca Ndani balekele Mika ngwabo nga atwalelelaho kubakabangeya na kubapakesa, co bamutsiya. Mika mwamwene ngwendi banalume ba ku cikota ca Ndani bakele na nzili manene kutubakana ikeye na maswalale bendi, welukile kwimbo. (Maa 18:22-26) Banalume ba ku cikota ca Ndani benyekele nganda ya Laishe na kutsiya banu bakelemo, co batungilemo nganda na kuiluka lizina lya Ndani. Yonatana na bana bendi babapwisile tupilistu ba ba Ndani, ‘co binjambi ba Mika basalele kuje simbu yoshe ha simbu iyakele mbakala ya kulemesela Njambi ku Shilo’—Maa 18:27-31.
Kutondesesa Bisimpi bya Seho
w15 12/15 10 ¶6
Lijwi lya Njambi Libananungulula Mwamubwa
6 Kuli bukaleho bumwesa ngwabwo mu Mbimbiliya, lizina lya Njambi linatwalelelaho kukala ha mavesi halinapande. Mu Mbimbiliya ya Bisoneka bya Kaye Kakaha ya 2013, lizina lya Njambi linasholoka lalo ha mitamba ya kupwa 6, ngeci lizina lya Yehova linasholokamo bisimbu bya kupwa 7,216 kutubakana mulyasholokelele mu Mbimbiliya ya 1984. Lizina lya Yehova tuliwana lalo ha mukanda wa 1 Samwele 2:25; 6:3; 10:26; 23:14, 16. Eli lizina banalyaka aha ha mavesi mwafwa bukaleho bumwesa ngwabwo mabulu a kuzenga a Cihebelu a kusañulu akele neli lizina aha ha mavesi. Eli lizina banalyaka lalo ha mukanda wa Maako 19:18 hanima ya kutondesa mu mabulu a kusañulu, co bawanene ngwabo halyakele aha ha vesi.
JANUARY 17-23
BISIMPI BYA SEHO BYA MU LIJWI LYA NJAMBI | MAAKO 20–21
“Twaleleleniho Kulomba Yehova Mangana Amitwamenene”
Mwasa Kutembwinina Bati Finehase Nga Muliwana na Bukalu?
Banalume ba ku Ngimbeya ba ku muyati wa Mbenjemani, mubapikile na kutsiya munakazi wa mbanja wa Kalevi, miyati ikwabo ya Baisalele bayongwele kukalwa nabo nzita. (Maa 20:1-11) Balombele kuli Yehova mangana abakwase kukalwa nzita, oloni ei miyati ikwabo ya Baisalele baifungulwile lubali. (Maa 20:14-25) Kuma basinganyekele ngwabo Yehova kakumbulwile malombelo abo ndi? Kuma Yehova washakele ngwendi balwe nzita mwafwa ya buje bukalu bwakeleko ndi?
w05 1/15 27 ¶9
Bisimpi bya Kulitila bya mu Mukanda wa Maako
Maa 20:17-48—Mwafwa bika Yehova watabesele muyati wa Mbenjemani bafungulule miyati ikwabo ya Baisalele lubali okuni Bambenjemani bakebo babapandele kwana kashitiko? Yehova wecelelele ije miyati ya kulongwa ya Baisalele baifungulule mwafwa washakele kumona, indi cili bene bakele na mbunge ya kutundisa bubi mu Isalele.
Mwasa Kutembwinina Bati Finehase Nga Muliwana na Bukalu?
Eyi ñanda itulongesa bika? Bukalu bumo bukatwalelelaho kukala mu cikungulukilo nameme bakulunu banalifwiti kulomba kuli Yehova mangana abakwase. Nga bakulunu banalifwiti kulomba bukwasi kuli Njambi oloni bukalu bucitwalelelaho, banapande kwanuka majwi endekele Yesu ngwendi: “Ngeci bene njimileka ngwange lombeni, co mukatambula, seteleni, co mukawana, toteni, co bakamishokolwela.” (Luk 11:9) Nameme Yehova nasa kwishwala kukumbulula malombelo a bakulunu, oloni banapande kukulahela ngwabo abakumbulula ha simbu inapande.
Kutondesesa Bisimpi bya Seho
w14 5/1 11 ¶4-6
Muzibuka Ndi?
Bipapa Bakele na Kubipangesa Bati mu Binzita bya Kusañulu?
Ndabiti wapangesele cipapa mu kutsiya Ngolyata. Ndabiti walilongesele mwakupangesela eci citwa te acili mwanike ha simbu yapwile kanyungi.—1 Sa 17:40-50.
Bikupulo bya Baka-Ingito na Baka-Asilya bya kusañulu bimwesa mubakele na kupangesela bipapa mu binzita. Eci cipapa bakele na kucikutilila ku tumikole tubali. Muka-kwasha cipapa wakele na kwakamo limanya, co wakele na kuzengulwisa ije mikole ibali na kwecela mukole umo mangana limanya limwashuke na nzili na kundoma cuma cashaka kwasha.
Baka-kushitozola ku Middle East bawanene mamanya amangi abakele na kupangesa mu bipapa mu binzita bya kusañulu. Mamanya abakele na kwasha maswalale babitongwe mu bipapa akele na kuwila kulako. Baka-kulilongesa bakabyana ngwabo aje mamanya kuwakele na kuwila kulako ngwe kuyakele na kuwila mikili ya buta bwa mingamba. Oloni aje mamanya akele na kutsiya banu.—Maa 20:16.
JANUARY 24-30
BISIMPI BYA SEHO BYA MU LIJWI LYA NJAMBI | LUTE 1–2
“Kaleni na Cizemo Cije Kucesi Kutenguluka”
Tembwinineni Babusamba ba Yehova
5 Naanga ya Lute yakele mu Mowabi. Ngwe welukile kuli babushoko bendi, ngwe bakamunyungile mwamubwa. Wazibukile banu ba mu Mowabi na ndaka ibendekele na bisemwa byabo. Naumi kakulahesele Lute kukamulingila byuma bya cifwa eci mu Mbetelehema. Naumi wakele na kutewa ngwendi hamo kakamuwanena munalume wa kumwambata, nambe njubo yakukala. Naumi walekele Lute ngwendi eluke ku Mowabi. Olepa welukile “kuli babushoko bwendi na kuli binjambi bendi.” (Lut 1:9-15) Oloni Lute kelukile kuli babushoko bwendi na ku binjambi ba makuli embwe.
Tembwinineni Babusamba ba Yehova
6 Casholoka ngwe Naumi na munalume wa Lute bakebo bakwasele Lute azibuke Yehova. Wazibukile ngwendi Yehova kalifwile na tulunga ba ku Mowabi. Wazemene Yehova, co wazibukile ngwendi napandele kumuzema na kumulemesa. Ngeci, Lute wanyanyamene ha kwangula bya kulinga. Walekele Naumi ngwendi: “Banu bobe bakapwa banu bange, co Njambi yobe akapwa Njambi yange.” (Lut 1:16) Tukazibi kubwaha mutukasinganyeka ha cizemo camwesele Lute kuli Naumi. Oloni cizemo camwesele Lute kuli Yehova cikatuzibisa manene kubwaha. Ebi bikebyo byazibisile Mbowasi kubwaha, mukemwo wamushangazalele ‘ha kwija kuli Shukulu Kalunga mu kumunyunga.’ (Tandeni Lute 2:12.) Majwi apangesele Mbowasi aha, atwanukisa omwo kazila akafwikila tubana twendi mu mambaba. (Mya 36:7; 91:1-4) Yehova nendi wanyungile Lute mu ngila eyi bene na kumubezikisa mwafwa ya likulahelo lyendi. Lute kalibeyele ha byuma byangwile.
Kutondesesa Bisimpi bya Seho
w05 3/1 27 ¶1
Bisimpi bya Kulitila bya mu Mukanda wa Lute
Lut 1:13, 21—Kuma Yehova wakaluwisile buyoye bwa Naumi na kumumwesa tuyando ndi? Embwe. Naumi kanene Njambi mulonga ha tuyando twaliwanene natwo. Oloni mu bukalu bwoshe bwaliwanene nabwo Naumi wasinganyekele ngwendi Yehova na mu kengesa nima. Walizibile kubabala ku mbunge na kuzeya. Ha simbu yayoyele Naumi kukala na bana kwamwesele ngwako munu banamubezikisa kuli Njambi, co kujeneka kukala na bana kwamwesele ngwako munu banamusingi kuli Njambi. Kutsisa bana bendi babali na kujeneka kukala na batekulu kwalingisile Naumi alizibe ngwendi Yehova namushaula.
JANUARY 31–FEBRUARY 6
BISIMPI BYA SEHO BYA MU LIJWI LYA NJAMBI | LUTE 3-4
“Lifwiteni Kukala na Lutsimo Lwalubwa”
w12 10/1 22 ¶5
“Munakazi Wamubwa wa Kulongwa”
Majwi amabwa endekele Mbowasi azembelekele manene Lute. Mbowasi wendekele ngwendi: “Shukulu Kalunga akubezikise munange. Eci uli na kulinga cinamwesa bukama na kasingimiko kakama mu naanga kutubakana bije biwalingile kuli banyokomweno. Yobe wapandele kuya na kushakezeke mukwenje wa kufuka nambe wa kahutu, oloni kuwalingilemo.” (Lut 3:10) Majwi akwendeka ngwawo bije biwalingile, amwesa cizemo cije kucesi kutenguluka cakele naco Lute kuli Naumi. Waile nendi ku Isalele, co wakamunyungile mwamubwa. Majwi akwendeka ngwawo eci uli na kulinga atalesele ku byuma byalingile Lute kuli Mbowasi ha simbu ije. Mbowasi wamwene ngwendi Lute ha kupwa mumbanda wapandele kushomboka ku mukwenje wa kufuka nambe wa kahutu, oloni Lute washakele kumwesa bubwa kuli Naumi na kuli munalume wendi uje watsile, co washakele ngwendi lizina lya munalume wa Naumi keti linyonge mu Isalele. Ngeci cizemo cakele naco Lute cikeco calingisile Mbowasi amuzeme.
w12 10/1 23 ¶1
“Munakazi Wamubwa wa Kulongwa”
Lute wakanyamene Mbowasi mwamulekele ngwendi banu boshe bazibuka ngwabo yobe u munakazi wamubwa wa kulongwa. Awa majwi a kumushangala amushongangeyeye azeme manene Yehova na kumupangela. Co lalo, wazemene bainamweno Naumi na babushoko bwendi, co walilongesele bisemwa byabo bije byapwile bya cingenzi kuli ikeye. Nga tutembwinina likulahelo lya Lute, co netu tusingimika bakwetu na kusingimika bisemwa byabo.
w12 10/1 24 ¶3
“Munakazi Wamubwa wa Kulongwa”
Mbowasi wambatele Lute. Co mukwita kwa simbu ‘Yehova wabezikisile Lute, co wemitile, wakitile mwana wa munalume.’ Banakazi ba mu Mbetelehema bashangalele Naumi ngwabo Lute wamuzemene manene kutubakana bana babanalume ba kupwa 7. Kutundaho, Mbimbiliya imwesa ngwayo muna Lute wapwile kukulwila ya Mwene Ndaviti. (Lut 4:11-22) Co Ndaviti wakupwile kukulwila ya Yesu Kilistu.—Mat 1:1.
Kutondesesa Bisimpi bya Seho
w05 3/1 29 ¶3
Bisimpi bya Kulitila bya mu Mukanda wa Lute
Lut 4:6—Muka-kukula wasele bati kubiisa buswana bwendi nga akula buswana bwa mukwabo? Nga munu napu kahutu, co alandesa mutamba umo wa libu lya swanene, co uje akula napande kulanda lije libu ha ndando inapande kwesekesa na myaka inasalako simbu kanda bete mu mwaka wa kulitila. (Lev 25:25-27) Kulinga ngoco kwatepulwile ku buswana bwa uje alanda. Co lalo nga Lute akita mwana wa munalume uje mwana ikeye akaswana lihya libanakulu, keti kabushoko ka munu uje na kulu lije lihya.
FEBRUARY 7-13
BISIMPI BYA SEHO BYA MU LIJWI LYA NJAMBI | 1 SAMWELE 1-2
“Lombeni Kuli Yehova Kutundilila Kwisi ya Mbunge”
ia 55 ¶12
Walombelele Kuli Njambi Kutundilila Kwisi ya Mbunge
12 Hana nakela mwanja waubwa bangamba ba Njambi boshe wa kulombela. Yehova natulanya ngwendi tumuleke byoshe bili ku bimbunge byetu ngwe mwakalingi mwana uje alomba bukwasi ku bisemi bendi ba cizemo. (Mya 62:8; 1 Te 5:17) Njambi wahwimininine Petulu asoneke awa majwi a kutushongangeya kulombela kuli Yehova ngwendi: “Akeni bukalu bweni bwoshe kuli ikeye omwo ikeye ali na kumilela.”—1 Pet 5:7.
w07 3/15 16 ¶4
Bika Byakwasele Hana Akale mu Kwoloka?
Bika bitulilongesa ku ñanda ya Hana? Omwo tulombela kuli Yehova, tunapande kumulomba kutundilila kwisi ya mbunge na kumuleka mutuli na kulizibila. Nga bukalu butuli nabwo butwalelelaho kulibwezelela, co tunapande kubuseza lika mu maboko a Yehova. Kukulahela manene Yehova kukekwo lika kutukwasa.—Vis 3:5, 6.
Kutondesesa Bisimpi bya Seho
w05 3/15 21 ¶5
Bisimpi bya Kulitila bya mu Mukanda wa Samwele wa Kulibanga
1 Sa 2:10—Mwafwa bika Hana ina ya Samwele walombelele ngwendi Yehova “akaana nzili kuli mwene yendi,” okuni Muisalele kumwakele mwene? Mu lishiko lya Mosesa bapolofwetele ngwabo Baisalele bakakala na mwene. (Kwi 17:14-18) Yakomba mwakele kuyehi na kutsa wapolofwetele ngwendi: “Mulamu wa bumwene [cimweso ca nzili ya kuyula] kuukatundu kuli Yunda.” (Kus 49:10) Yehova wendekele hali Sala kukulwila ya Baisalele ngwendi: “Hakati ka batekulwila bendi hakakala bimyene.” (Kus 17:16) Ngeci, Hana wakele na kulombela bya mwene wa kulutwe akayula Baisalele.
FEBRUARY 14-20
BISIMPI BYA SEHO BYA MU LIJWI LYA NJAMBI | 1 SAMWELE 3-5
“Yehova Waka Mbunge Banu Bendi”
Wapwa Muka-nzili Yoshe, Oloni Akaka Banu Mbunge
3 Samwele wakele na “kupangela Shukulu Kalunga” ku Mbalaka kushwa ku bwanike bwendi. (1 Sa 3:1) Butsiki bumo Samwele mwalalele, kwalingiwile cuma cimo. (Tandeni 1 Samwele 3:2-10.) Wazibile lijwi lyamusanene ha lizina lyendi. Wasinganyekele ngwendi hamo Kapilisitu Wakama Eli ikeye wamusanene, washatukilile kuli ikeye, co wendekele ngwendi: “Yange uno omwo unanjisana.” Eli wamukumbulwile ngwendi keti ikeye wamusanene. Lije lijwi mulyamusanene lwa mu citatu, Eli wanangukile ngwendi Njambi ikeye wakele na kusana Samwele. Ngeci, walekele mwanike Samwele mwakukumbulwila, co Samwele walingile ngoco. Yehova mwapangesele kangelo, mwafwa bika kalisholwele kuli Samwele lwa kulibanga? Mbimbiliya kuyendekeleho, oloni byuma byalingiwile bimwesa ngwabyo Njambi wakele mbunge Samwele. Mu ngila muka?
Wapwa Muka-nzili Yoshe, Oloni Akaka Banu Mbunge
4 Tandeni 1 Samwele 3:11-18. Lishiko lya Yehova, lyashikile banike basingimike tukulukazi, maneneni bantwama. (Kut 22:28; Lev 19:32) Kwapwile kwakukalu kuli mwanike Samwele kuya kuli Eli ku mutondo kukamuleka muzimbu wa kutewesa mu kusimpa. Mukemwo Mbimbiliya yendeka ngwayo Samwele “wakele na lyoba ha kwambulula cimona kuli Eli.” Oloni Njambi walingisile Eli ananguke ngwendi munu wasanene Samwele wapwile Njambi. Mukemwo Eli washikile Samwele ngwendi: “Keti unjishwekele cuma cimo.” Samwele wononokele, co “wamulekele byuma byoshe.”
Kutondesesa Bisimpi bya Seho
w05 3/15 21 ¶6
Bisimpi bya Kulitila bya mu Mukanda wa Samwele wa Kulibanga
1 Sa 3:3—Kuma Samwele walalele bene mu mwela wa Kujela Manene wa Mbalaka ndi? Embwe keti mukemwo mwalalele. Samwele wapwile Kalevi wa ku cikota ca Bakohate baje kubapwile tupilistu. (1 Mi 6:33-38) Ngeci, kubamutabesele ‘kumona byuma bya kujela.’ (Kul 4:17-20) Samwele bamutabesele lika kukobela mu lilapa lya mbalaka. Ngeci hamo muje mu lilapa lya Mbalaka mukemwo mwalalele. Co lalo hamo ha simbu oyo na Eli walalele muje mu lilapa lya mbalaka. Ngeci majwi a kwendeka ngwawo “muje mwakele cikasha ca cikumiiyo” atalesa ku lilapa lya mbalaka.
FEBRUARY 21-27
BISIMPI BYA SEHO BYA MU LIJWI LYA NJAMBI | 1 SAMWELE 6-8
“Iya Mwene Yeni?”
it-2 163 ¶1
“Bumwene bwa Njambi”
Baisalele Balomba Kubangwila Mwene. Mukwetile myaka yaingi, Baisalele mubatundile mu Ingito bashakele kubangwila Mwene abayula ngwe mwa mafuti abalyatele nawo. Cuma cibalingile camwesele ngwaco babyanene kubayula kuli Yehova. (1 Sa 8:4-8) Kuli byuma byabingi bitulingisa tukulahele ngwetu Baisalele babandamenene ngwabo bakakala na mwene. Ca kulibanga hamo bazibukile ngoco mwafwa ya cikumiiyo calikumiiye Yehova na Abilahama na Yakomba. Ca mu cibali, bakulahelele ngoco mwafwa ya bupolofweto bwendekele Yakomba kuli Yunda. (Kus 49:8-10) Ca mu citatu, bakulahelele ngoco mwafwa ya byuma byendekele Yehova kuli Baisalele mubatundile mu Ingito. (Kut 19:3-6) Ca mu ciwana bakulahelele ngoco mwafwa ya Cikumiiyo ca Lishiko (Kwi 17:14, 15) Ca mu citanu, bakulahelele ngoco mwafwa ya majwi endekele kapolofweto Mbalame (Kul 24:2-7, 17) Ca bu 6 bakulahelele ngoco mwafwa ya majwi endekele Hana, ina ya Samwele mu lilombelo lyendi. (1 Sa 2:7-10) Oloni ha simbu oyo, Yehova te kanda acisholole ‘cuma ca kushweka ca kujela’ na simbu ibukashangumuka kuyula obu bumwene na cifwa cobu bumwene, noku kubukayulila, mwilu nambe hasi. Ngeci, Baisalele balyalesele ha simbu ibashakele ngwabo bakale na mwene abayula.
Wakolesele Nameme Waliwanene na Byeseko
Samwele mwalekele Yehova mu lilombelo ije ñanda ya Baisalele ya kushaka kukala na mwene, Yehova wakumbulwile ngwendi: “Tolilila ku byuma byoshe bije bibendeka banu kuli yobe, keti yobe ibanabyana embwe, oloni banabyana yange kupwa mwene yabo.” Awa majwi azembelekele manene Samwele, oloni walizibile manene kubabala ku mbunge, mwafwa cuma cibalingile Baisalele camwesele ngwaco banashaula Yehova Njambi, muka-nzili yoshe. Yehova walekele kapolofweto Samwele aleke Baisalele bya bukalu bubakaliwana nabwo mwafwa ya kushaka kukala na mwene wa kubayula. Samwele mwabalekele awa majwi Baisalele bamukumbulwile ngwabo: “Embwe yetu tushaka mwene.” Samwele walingile byamulekele Yehova, co waile na kubwabesa mwene yangwile Yehova.—1 Sa 8:7-19.
Yehova Ikeye Lika Napande Kuyula Banu
9 Byuma byalingiwile kuli Baisalele byamwesele ngwabyo Yehova wendekele busunga. Kubayula kuli mwene ibalimwena na mesho kwabakobelesele mu bukalu, maneneni nga uje mwene kapwile wa kulongwa. Byuma bibaliwanene nabyo Baisalele bimwesa ngwabyo kushwa kusañulu bimyene banayulu banu banonowa kusungamesa mwamubwa byuma mwafwa kubononokele mashiko a Yehova. Bantwama bamo ba bupolitiki bakalombo Njambi ngwabo abane kwoloka na lizibasano, oloni Njambi asa kubezikisa bati banu baje kubalyaka kwisi ya ciyulo cendi?—Mya 2:10-12.
Kutondesesa Bisimpi bya Seho
w02 4/1 12 ¶13
Mwafwa Bika Banapande Kumimbwitika?
13 Simbu kanda bamimbwitike na kupwa Mukaleho wa Yehova, munapande kutenguluka. Munu uje nalyangwila kukabangeya Yesu Kilistu na mbunge yendi yoshe napande kulyana ikeye babenya mangana atenguluke. Nga munu natenguluka, akecela bilinga byendi byabibi na kushangumuka kulinga byuma byabibwa bije bizibisa Njambi kubwaha. Mu bisoneka bya Cihebelu na Cingiliki, eli lijwi libanapangesa lya kutenguluka, limwesa ngwalyo munu necela bilinga byendi byabibi. Munu napande kwecela bilinga byabibi na kushangumuka kupangela Yehova (1 Vi 8:33, 34) Nga munu necela kulinga byuma byabibi, co napande ‘kulinga byuma bije bimwesa ngwabyo natenguluka.’ (Vil 26:20) nga munu natenguluka napande kutunda mu bulombelo bwa makuli na kushangumuka kupangela Yehova na mbunge yendi yoshe. (Kwi 30:2, 8-10; 1 Sa 7:3) Nga tunatenguluka, co tumwesa ngoco mu bisinganyeka na mu bilinga na mu byuma bitwangula kulinga. (Eze 18:31) Nga munu‚ ‘natenguluka’ napande kwecela bilinga bya bunu bwalaja na kukala na bilinga bya bunu bwabuha.—Vil 3:19; Efe 4:20-24; Kol 3:5-14.
FEBRUARY 28–MARCH 6
BISIMPI BYA SEHO BYA MU LIJWI LYA NJAMBI | 1 SAMWELE 9-11
“Hakulibanga Saulu Wapwile wa Kulikehesa”
Likeheseni na Kuzibuka Hayalenga Nzili Yeni
11 Tusimutwiyeni ha byuma byalingiwile kuli Mwene Saulu. Ku bukwenje bwendi wapwile wa kulikehesa. Wazibukile hayalenga nzili yendi, co washakele kubyana kumupwisa mwene. (1 Sa 9:21; 10:20-22) Oloni mu kwita kwa simbu, Saulu washangumukile kulyalesa. Wamwesele eci cifwa mwapwile mwene. Litangwa limo, wonowele kukwata mbunge mwakele na kubandamena kapolofweto Samwele. Saulu kakulahelele ngwendi Yehova amena banu bendi, co wanene ñombelo nameme kakele na lisesa lya kulinga ngoco. Ngeci, Saulu walubalesele Yehova, co Yehova wamubyanene. (1 Sa 13:8-14) Tunapande kulilongesako bimo ku byuma byalingiwile kuli Saulu na kujenjuka kulinga bipangi bije kubatutabesele.
w14 3/15 9 ¶8
Twaleleleniho Kukala na Sipilitu ya Kulyana
8 Mwene Saulu wa Baisalele napu mwanja kuli yetu mwafwa wecelelele sipilitu ya kulyalesa itsiye sipilitu yakele nayo ha kulibanga ya kulyana. Saulu mwashangumukile kuyula wapwile munalume wa kulikehesa (1 Sa 9:21) Kanene kashitiko Baisalele baje bamwendekele mwamubi nameme wakele na nzili ya kulinga ngoco mwafwa ya kumwangula kuli Njambi kupwa mwene. (1 Sa 10:27) Mwene Saulu watabesele sipilitu ya Njambi imutwamenene amene Baisalele na kufungulula Baamoni. Kutundaho, washangazalele Yehova mwafwa ikeye wamukwasele ahyane, co oku kumwesa ngwako wapwile wa kulikehesa.—1 Sa 11:6, 11-13.
w95 12/15 10 ¶1
Baamoni Kubakandelelele ku Cizemo ca Bamwesele Njambi
Baamoni kubamwesele kukandelela ku cizemo cakele naco Yehova kuli bakebo. Yehova kecelelele bilinga byabo byabibi bitwaleleleho. Ngeci, “omwo Saulu wazibile majwi endekele Nahashe, co sipilitu ya Njambi yezile na nzili hali ikeye, co walubalele manene.” Sipilitu ya Njambi yatwamenenene Saulu akungulule maswalale ba kupwa 330,000. Balwisile Baamoni, co,“munu na munu watewelele kwendi”—1 Sa 11:6, 11.
Kutondesesa Bisimpi bya Seho
w05 3/15 22 ¶8
Bisimpi bya Kulitila bya mu Mukanda wa Samwele wa Kulibanga
1 Sa 9:9—Tulilongesa bika ku majwi akwendeka ngwawo,‘kapolofweto wa matangwa ano ikeye ibatumbwile laja ngwabo muka-kumona’? Tulilongesa ngwetu mu simbu yayoyele Samwele tupolofweto mubashangumukile kutuma, na bimyene mubashangumukile kuyula mu Isalele eli lijwi lya,“muka-kumona” balingisile na lijwi lya kapolofweto, co Samwele bashangumukile kumutumbula ngwabo kapolofweto.—Vil 3:24.