Biñanda bya Kupangesa mu Mukanda wa Biwano bya Buyoye Bwetu Baka-Kilistu na Cipangi Cetu
MARCH 7-13
BISIMPI BYA SEHO BYA MU LIJWI LYA NJAMBI | 1 SAMWELE 12–13
“Kulyalesa Kutulingisa Tulinge Byuma Kutwapandele Kulinga”
w00 8/1 13 ¶17
Kulyalesa Kutulingisa Tulinge Byuma Kutwapandele Kulinga
17 Nga tutanda muzimbu wa Saulu lwa kulibanga, twasa kusinganyeka ngwetu hamo te kabiisile. Mwafwa ha simbu eyi, banu ba Njambi “bakele mu bukalu bwakama,” ‘bakele na kubalwisa,’ ngeci, bakele na kuziba lyoba. (1 Sa 13:6, 7) Co lalo simbu imo tukalingi byuma mungila yeka, nga kukwabihile kulinga ngoco. Oloni twanukeni ngwetu Yehova akamono bili mu bimbunge byetu na kuzibuka bitulingisa tulinge byuma bimo. (1 Sa 16:7) Ngeci, hamo Yehova wamwene bifwa bimo byabibi muli Saulu bije kubendekele mu Mbimbiliya. Cakumwenako, hamo Yehova wanangukile ngwendi kulyalesa kukekwo kwalingisile Saulu onwe kubandamena Samwele. Hamo Saulu hakupwa mwene wa Isalele, walizibile ngwendi kasele kubandamena kapolofweto wa kakulukazi uje washaka kulinga byuma mu kukotokela. Kutuzibuka mwamubwa, oloni hamo Saulu walizibile ngwendi wapandele kulinga cipangi cije kapandele kulinga mwafwa Samwele wakotokelele kwija. Bika byatundilemo? Samwele kashangalele Saulu ha byuma byalilngile. Oloni wamutenukilile na kumuleka ngwendi: ‘Bumwene byobe kubukeshwala . . . mwafwa kuwononokele lishiko lyanakwanene Yehova.’ (1 Sa 13:13, 14) Kulyalesa kwalingisile Saulu alinge byuma kapandele kulinga.
w07 6/15 27 ¶8
Yehova Wazema Kwononoka Kweni
8 Biinendeka Mbimbiliya ha byuma byalingile Mwene Saulu bimwesa seho ya kwononoka. Ha kulibanga, Saulu wapwile wa kulikehesa, co lalo wayulile mwamubwa ‘omwo waliyongwele ngwendi kesi na seho.’ Oloni mu kwita kwa simbu, washangumukile kulyalesa na kupangesa mwamubi nzili yendi omwo wangwile byakulinga. (1 Sa 10:21, 22; 15:17) Simbu imo, Saulu wapandele kulwisa Bafilisitiya. Samwele wamulekele ngwendi amubandamene mangana akwane milambu kuli Yehova na kumuleka bikwabo byapandele kulinga. Oloni Samwele wakotokelele kwija, ngeci banu bashangumukile kulishandoka. Saulu mwamwene ngoco ‘walambwile mulambu wa kwenyeka.’ Byalingile Saulu byalubalesele Yehova. Omwo Samwele wetele, mwene Saulu wendekele ngwendi kabiisile mwafwa Samwele wakotokelele kwija mukwemwo ‘walambwile mulambu wa kwenyeka’ mangana Yehova amuzibile ngozi. Mwene Saulu wamwene ngwendi kwana mulambu kukekwo kwapwile kwa seho manene kutubakana kwononoka byamulekele Samwele ngwendi amubandamene mangana akulambule mulambu ikeye. Ngeci, Samwele wamulekele ngwendi: “Eci cinapu cuma ca bulema ciunalingi. Kuwononokele lishiko lije lyakwanene Shukulu Kalunga Njambi yobe.” Saulu katwaleleleho kupwa mwene mwafwa ya kujeneka kwononoka kwendi.—1 Sa 10:8; 13:5-13.
Kutondesesa Bisimpi bya Seho
Kuma Mukabangeya Kutwamenena Kwa Yehova Kwakubwa Ndi?
15 Kuma Baisalele basinganyekele ngwabo kukala na mwene ibalimwena na mesho kubalingisa bamukulahele manene kutubakana Yehova ndi? Nga mukemwo, co balikwisile bakebo babenya! Co lalo bakulahelele byuma bya makuli. Bimyene ba banu banesi kubalingisa bashangumuke kulemesa tumponya. Baka-kulemesa tumpoya bakasinganyeka mu kuhenga ngwabo kulemesa cuma cibasa kulimwena na mesho abo cije cibanashongo ha citi nambe cibanamungu ha limanya, kwakubwa manene kutubakana kulemesa Yehova Njambi uje kubasa kumona uje watangele byuma byoshe. Kapositolo Paulu wendekele ngwendi ‘tumponya bapwa bangoco.’ (1 Ko 8:4) Tumponya kubasa kumona, kuziba, kwendeka nambe kulinga bimo. Tumponya mwasa kubamona na kubakwata, oloni nga mubalemesa, co mulemesa byuma bya ngoco na kulikobelesa mu bukalu.—Mya 115:4-8.
MARCH 14-20
BISIMPI BYA SEHO BYA MU LIJWI LYA NJAMBI | 1 SAMWELE 14–15
‘Kwononoka Kwapwa Kwa Kubwa Kutubakana Mulambu’
w07 6/15 26 ¶4
Yehova Wazema Kwononoka Kweni
4 Hakupwa Ishamatanga, Yehova ikeye natwana byuma byoshe bya ku mubila bituli nabyo. Yehova ikeye natwana byuma byoshe, kuma kuli bitwasa kumwanako ndi? Eyo. Kuli byuma bya seho bitwasa kumwana. Bika bene obyo? Tuwana cikumbululo ku cinangulo cinatako: “Munange, kala na mana, co njikabwahelela njikasa kukumbulula munu woshe uje anjipaya.” (Visimo 27:11) Nga twononoka Njambi, co cinapu ngwe tuli na kumwana mulambu. Nameme tukaliwana na byuma bya kuliseza-seza, co lalo twatunda ku bisemwa bya kuliseza-seza, oloni nga twononoka, co tupayesa satana uje wendekele ngwendi banu kubasa kutwalelelaho kwononoka nga baliwana na byeseko. Oku kunapu kubezika kwakama!
it-2 521 ¶2
Kwononoka
Na cimo cahi citwasa kwingisa mu kwononoka. Nga kutwononoka Njambi kasa kutubezikisa. Samwele wehwile Mwene Saulu ngwendi ‘cuma muka cashaka Shukulu Kalunga? Milambu ya kwenyeka indi kumwononoka? Mwamubwa kumwononoka kutubakana kumulambwila bimanga bababwa. Cinapu Cuma cacibwa kumwononoka kutubakana kumulambwila mazi a majamba.’ (1 Sa 15:22) Kujeneka kwononoka kunapu kubyana lijwi lya Njambi. Kunapu kumwesa ngwabo munu katabele, co lalo kakulahelele Mbimbiliya na babenyayo. Ngeci, munu wakujeneka kwononoka nalifu na muka-kutaha na muka-kulemesa tumpoya. (1 Sa 15:23; Lom 6:16.) Kutwapandele kulitabela lika ngwetu tulinga byuma bimo na kujeneka kubilinga. Mwafwa nga kutulingi byuma bitunalitabela, co tumwesa ngwetu kutwasingimikile munu natuleke ngwendi tubilinge. (Mat 21:28-32) Baje baziba lika lijwi lya Njambi oloni kubapangesa bibanazibi, balikwisa bakebo babenya, co Yehova kababezikisa. (Yak 1:22-25) Muna Njambi nendi wendekele ngwendi nameme baje balinga byuma byakulifwako nebi bibanendeka mu Mbimbiliya, oloni babilinga mu ngila ya kuhenga nambe mwafwa ya biyongola byabibi bibali nabyo kubakakobela mu Bumwene bwa Njambi, oloni bakababyana.—Mat 7:15-23.
Kutondesesa Bisimpi bya Seho
it-1 493
Mema ku mbunge
Kumwesa mema ku mbunge mwafwa ya kuzibila banu lyoba nga Njambi katulekele tulinge ngoco, kutukobelesa mu bukalu. Twendeka ngoco mwafwa ya byuma byalingiwile kuli Mwene Saulu. Yehova washikile Saulu ngwendi anyongese Baamaleke mwafwa bakebo bapwile bakulibanga kushangumuka Baisalele na kubalwisa omwo bakele na kutunda mu Ingito. Yehova washikile Saulu ngwendi akanyongese byuma byoshe keti akabazibile mema ku mbunge. Oloni kononokele bya mulekele Yehova mwafwa wazibilile banu lyoba. Mukemo Yehova wamubyanene kupwa mwene wa Isalele. (1 Sa 15:2-24) Nga munu atwalelelaho kupwa wa kulongwa kuli Yehova na kukulahela ngwendi Yehova akalingi byuma byoshe mu ngila yaibwa, co kasebuka ngwe mwalingilile Saulu. Co lalo Yehova kamubyana.
MARCH 21-27
BISIMPI BYA SEHO BYA MU LIJWI LYA NJAMBI | 1 SAMWELE 16–17
‘Yehova Ikeye Atulwila’
wp16.5 11 ¶2-3
‘Yehova Ikeye Atulwila’
Ndabiti walekele Saulu mwamukwaselele Yehova omwo watsiile ndumba na Mbeya. Kuma wakele na kushasha ndi? Embwe. Ndabiti wazibukile byamukwasele atisye ndumba na mbeya. Wendekele ngwendi: ‘Yehova uje wanjamenene ku byala bya ndumba na kubyala nya mbeya ikeye akanjamena na kuli ou Kafilisitiya.’ Kumamaneselelo Saulu wamukumbulwile ngwendi: “Mukemwo, ya, Shukulu Kalunga akale hamo nobe.”—Sa 17:37.
Mushaka kukala na likulahelo lyakele nalyo Ndabiti ndi? Anukeni ngweni likulahelo lya Ndabiti kulyemanene ha byuma bya kulisinganyekela. Wakulahelele Yehova mwafwa wamuzibukile mwamubwa, co walimwenenene mwamukwaselelemo mu buyoya bwendi. Wazibukile ngwendi Yehova akanyungu banu bendi, co akashulisilila byanakulahesa. Nga tushaka kukala na likulahelo lya kulifwa neli lya Ndabiti, co tunapande kutwalelelaho kulilongesa bya Yehova babenya Mbimbiliya. Likulahelo lyetu likanyama omwo tumona byuma byabibwa bitunda mu kupangesa byuma bitulilongesa.—Hev 11:1.
wp16.5 11-12
‘Yehova Ikeye Atulwila’
Majwi endekele Ndabiti amwesele likulahelo lya kukanyama lyakele nalyo. Lingeni ngwe mumona Ndabiti aleka Ngolyata ngwendi: “Uli na kwija kuli yange na mukwale na likunga na cimbuya, oloni yange njili na kwija kuli yobe mu lizina lya Shukulu Kalunga Muka-nzili yoshe, Njambi ya maswalale ba Isalele uje unashaula.” Ndabiti wazibukile ngwendi kasa kuhyana Ngolyata mu nzili yendi lika na bitwa byakele nabyo. Ngolyata washawile Yehova Njambi. Ngeci, Yehova walingileko bimo. Mukemo Ndabiti wendekele ngwendi, ‘Yehova ikeye atulwila.’—1 Sa 17:45-47
Ndabiti wamwene kutunuka kwa Ngolyata na bitwa byakele nabyo, oloni kazibile lyoba. Katembwininine byuma byalingile Saulu na maswalale bendi. Ndabiti kalyesekesele kuli Ngolyata, oloni wesekesele Ngolyata kuli Yehova. Ngolyata wapwile wamulaha kutubakana banu boshe. Mu bulaha wapwile wa mamita 2.9. Oloni kakele na nzili kutubakana Yehova Mwene wa Mwilu na Hasi. Yehova wamwene Ngolyata ngwe kalongolo kaje kaanasa kutsena simbu yoshe-yoshe!
wp16.5 12 ¶4
‘Yehova Ikeye Atulwila’
Ano matangwa, banu ba Njambi kubekulwa binzita ngwe mubakele na kulingila kusañulu. (Mat 26:52) Nameme ngoco tunapande kutembwinina likulahelo lyakele nalyo Ndabiti. Netu tunapande kumona Yehova kupwa Njambi wa busunga itunapande kupangela na kuzibila lyoba. Simbu imo twasa kuliziba ngwetu bukalu bwetu bunatwamena, oloni tunapande kwanuka ngwetu kukwesi bukalu bwakama butubakana nzili yakala nayo Yehova. Nga twangula Yehova kupwa Njambi yetu na kumukulahela ngwe mwamukulahelele Ndabiti, co nameme tuliwana na byeseko nambe bukalu bwoshe-bwoshe kutuzibi lyoba. Nabimo byahi kasa kulinga Yehova!
Kutondesesa Bisimpi bya Seho
it-2 871-872
Saulu
Saulu kononokele lishiko lyamwanene Yehova lya kunyongesa Baamaleke na byuma byabo byoshe. Mukemo Yehova wabwabesele Ndabiti mangana apwe mwene wa Isalele, co sipilitu ya Yehova yatundile kuli Saulu. Kutunda bene lije litangwa ‘sipilitu ya Yehova yaibi yamuyandesele.’ Yehova mwatundisile sipilitu yendi kuli Saulu watabesele sipilitu yaibi ikobele muli ikeye. Ei sipilitu yaibi yalingisile Saulu alizibe mwamubi na kukala na bisinganyeka byabibi. Co lalo yamulingisile keti akale mu kwoloka. Omwo Saulu kononokele Yehova wamwesele bisinganyeka byabibi byakele mu mbunge yendi bije byalingisile sipilitu ya Yehova itunde kuli ikeye. Bangamba ba Saulu bendekele ngwabo ei ‘sipilitu yaibi’ yatundile kuli Yehova mwafwa Yehova ikeye watabesele ei ‘sipilitu yaibi’ ikobele kuli Saulu na kumuyandesa. Umo wa bangamba bendi wamulekele ngwendi Ndabiti wapwa citongwe mu kwimba kalyalya. Ngeci, Saulu walombele Ndabiti aije mu lipela kwa kumwimbila-imbila kalyalya nga ‘sipilitu yaibi’ ishangumuka kumuyandesa.—1 Sa 16:14-23; 17:15.
MARCH 28–APRIL 3
BISIMPI BYA SEHO BYA MU LIJWI LYA NJAMBI | 1 SAMWELE 18–19
“Pweni ba Kulikehesa Nameme nga Byuma Bimyendela Mwamubwa”
w04 4/1 15 ¶4
Kulaheleni Sipilitu ya Yehova Omwo Muliwana na Byeseko mu Kuyoya
4 Ndabiti uje wapwile kayungi ka bimanga ha kulibanga, wakupwile wa kutsimana mu Isalele mwoshe. Mwene wamusanene ku lipela mangana akumwimbile myaso ya kumuzembeleka. Co lalo Ndabiti watsiile liswalale Ngolyata wa kutunuka, wa nzili, wa kutewesa uje ibatewele maswalale banzili ba mu Isalele. Maswalale ba Baisalele mubaile hamo na Ndabiti ku nzita, bakahyanene Bafilisitiya. Ngeci, banu bamuzemene. Bamwimbilile myaso ya kumushangazala. Ha kulibanga, muka-kunangula Mwene Saulu wamulekele ngwendi Ndabiti kapwile lika “muka-kwimba mwamubwa” kalyalya, oloni wapwa lalo ‘munalume wa kusimpa, liswalale wamubwa, muka-kulwa binzita na muka-kwendeka wa citongwe.’—1 Sa 16:18; 17:23, 24, 45-51; 18:5-7.
Kengeni Kuliseza Kuli Mukati ka Banu
6 Banu bamo bakalyalesa mwafwa ya kubwaha kwabo na kutsimana na kukala na lijwi lyalibwa mu kwimba nambe kukala na butongwe nambe kukala na citwamo cakama ha bipangi. Ndabiti wakele na bifwa byabibwa, co watsimanene, oloni wapwile wa kulikehesa mu kuyoya kwendi kwoshe. Munima ya kutsiya Ngolyata, Mwene Saulu washakele ngwendi Ndabiti ambate munendi, oloni Ndabiti wakumbulwile ngwendi: “Yange iyajo, co lalo naanga ya tate yapwa ikajo mu Isalele, ngeci njipwe ishemweno ya mwene?” (1 Samwe. 18:18) Bika byakwasele Ndabiti atwaleleleho kupwa wa kulikehesa? Njambi walikehesele na kukwasa Ndabiti akale na bifwa byabibwa na kumubezikisa. (Myatho 113:5-8) Ndabiti wazibukile ngwendi byuma byoshe byabibwa byakele nabyo byatundile kuli Yehova.—Esekeseni 1 Kolinte 4:7.
7 Banu ba Njambi ano matangwa bakalifwiti kupwa ba kulikehesa ngwe mwalingile Ndabiti. Tukakasama ha kumona Njambi wa hakamwa ya byoshe alikehesa kuli yetu. (Myatho 18:35) Tunapande kukabangeya cinangulo ca kuhwiminina cije cendeka ngwaco: “Munapande kuzala lyobwa-obwa, na ngozi, na kulilumbilisa, na bubwa na lukakateya.” (Kolo. 3:12) Tuzibuka lalo ngwetu cizemo “kucesi na lifuwa nambe kulyalesa.” (1 Koli. 13:4) Nga tulikehesa, co tukwasa banu bashwenye kuli Yehova. Ngeci lika kwononoka kwa banakazi mukunasa kukokela banalume babo kuli Njambi, na bakwetu banasa kushwenya kuli Njambi mwafwa ya kulikehesa kwetu.—1 Petu. 3:1.
Kutondesesa Bisimpi bya Seho
it-2 695-696
Kapolofweto
Nameme tupilisitu bakele na kubangula na sipilitu ya Yehova, oloni kukulumbununa ngwabo bibakele na kwendeka simbu yoshe byapwile bya kubahwiminina. Sipilitu ya Yehova ‘yakele na kwija hali bakebo’ ha bisimbu bimolika nga kuli muzimbu ubapandele kwambulula. (Eze 11:4, 5; Mik 3:8) Ei sipilitu ikeyo inakala na kubashongangeya bendeke muzimbu ubanatambula na ntwima. (1 Sa 10:10; Nje 20:9; Amo 3:8) Kubakele na kulinga lika byuma bya kukomokesa, oloni tukulahela ngwetu na majwi abakele na kwendeka nomu mubakele na kulingila byuma nabyo hamo byakele na kukomokesa. Oku kutukwasa kuzibisisa biilumbununa Mbimbiliya muyendeka ngwayo bashangumukile ‘kulinga ngwe tupolofweto.’ (1 Sa 10:6-11; 19:20-24, NWT; Nje 29:24-32; Vil 2:4, 12-17; 6:15; 7:55.) Sipilitu ya Yehova muyakele na kwija ha tupolofweto, yakele na kubalingisa bambulule muzimbu na ntwima. Mubakele na kulinga ngoco, bamo bakele na kubamona ngwe kubaswile. Twendeka ngoco mwafwa ya byuma byalingiwile omwo kapolofweto waile ku bamyata ba maswalale kwakele Yehu na kukamubwabesa kupwa mwene. Omwo bamyata ba maswalale banangukile ngwabo wapwile kapolofweto, batambwile muzimbu wabalekele na maboko abali. (2 Vi 9:1-13; Vil 26:24, 25) Omwo Saulu wakele na kusheka Ndabiti, nendi ‘walingile ngwe kapolofweto.’ Mwalingile ngwe kapolofweto washulwile buzalo bwendi, “co wakele ngacije bene mushelengwa litangwa lyoshe lije, na butsiki bwoshe buje.” Co cisholoka ngwe ei ikeyo simbu yalyunukile Ndabiti na kukalishweka. (1 Sa 19:18–20:1) Oku kukulumbununa ngwabo tupolofweto simbu yoshe bakele na kushulula buzalo bwabo, mwafwa Mbimbiliya kuimwesa ngoco. Mu mizimbu ikwabo ibali ya mu Mbimbiliya ije imwesa tupolofweto bakele mushelengwa, Mbimbiliya inamwesa ngwayo balingile ngoco mu kwimanenako byuma bimo. (Isa 20:2-4; Mik 1:8-11) Mbimbiliya kuyendekele byalingisile Saulu akale mushelengwa. Kutuzibuka indi walingile ngoco mangana amwese ngwendi wapwile munu lika, indi walingile ngoco mangana amwese ngwendi natundu ha bumwene nambe kumwesa ngwendi Yehova namunyeke nzili ya bumwene, kutuzibuka.
APRIL 4-10
BISIMPI BYA SEHO BYA MU LIJWI LYA NJAMBI | 1 SAMWELE 20–22
“Mwasa Kupwa Bati Kabusamba Wamubwa?”
Kanyameseni Busamba Bweni Simbu Kanda Mamaneselelo Aije
18 Ano matangwa, bandolome na bandokazi betu bali na kuliwana na bukalu bwa kulisezaseza. Cakumwenako, bamo bali na kuyanda mwafwa ya mandunduma na binzita. Mu simbu ya cifwa eci, bandolome bamo bali na kukala nabo ku binjubo byabo. Bakwabo bali na kubana bimbongo. Oloni bwingi bwetu twasa kulomba Yehova mangana abakwase. Nga tuziba ngwabo ndolome nambe ndokazi nazeye, hamo kutwasa kuzibuka byakwendeka nambe byakulinga. Oloni tubaboshe twasa kukwasa. Cakumwenako, twasa kusikama nowo kabusamba ketu, nambe kumutolilila mwamubwa nga ali na kwendeka. Co lalo twasa kumuleka Cisoneka citwashaka manene cije cimuzembeleka. (Isaya 50:4) Cuma cakama cinapu kukwasa babusamba betu nga batonda bukwasi.—Tandeni Visimo 17:17.
w08 2/15 8 ¶7
Twaleleleniho Kulinga Byashaka Yehova
7 Njambi ashaka ngwendi tupwe kabusamba wamubwa simbu yoshe. (Vis 17:17) Yonatana muna Mwene Saulu wapwile kabusamba wamubwa wa Ndabiti. Omwo wazibile ngwendi Ndabiti natsii Ngolyata, “Yonatana wazemene manene Ndaviti ngwe mwalizema ikeye babenya.” (1 Sa 18:1, 3) Yonatana wakele na kuleka Ndabiti kwapandele kutewela omwo Saulu wakele na kumushakezeka mangana amutsiye. Ndabiti mwatewele, Yonatana waile na kumushakezeka, co mwakamuwanene wakalikumiiye kupwa kabusamba kendi simbu yoshe. Yonatana mwalekele Saulu ngwendi keti atsiye Ndabiti, Saulu washakele kumutsiya. Nameme ngoco, Yonatana mwakaliwanene lalo na Ndabiti bakakanyamesele busamba bwabo. (1 Sa 20:24-41) Yonatana mwakaliwanene na Ndabiti lwa maneneselelo, wamusimpisile mbunge na kumuleka ngwendi ‘Njambi amunyunga.’—1 Sa 23:16-18.
w09 10/15 19 ¶11
Pweni Babusamba Bababwa Muno Mu Kaye Kakujeneka Cizemo
11 Pweni bakulongwa. Solomoni wasonekele ngwendi: “Basamba bamwesa cizemo cabo simbu yoshe, babushoko banasemukila ngeci bamwene hamo tuyando.” (Vis 17:17) Solomoni mwasonekele awa majwi, hamo wanukile busamba bwakele mukati ka ishe Ndabiti na Yonatana. (1 Sa 18:1) Mwene Saulu washakele ngwendi munendi Yonatana amwinge ha litanda na kupwa mwene wa Isalele. Oloni Yonatana wazibisisile ngwendi Yehova nangula Ndabiti mangana enge Saulu ha bumwene. Yonatana kazibilile Ndabiti cipululu ngwe mwalingilile Saulu. Kazibilile Ndabiti cipululu mubakele na kumushangala. Co lalo kakulahelele biñanda bya makuli byanakala nakwendeka Saulu hali Ndabiti. (1 Sa 20:24-34) Kuma twalifu na Yonatana ndi? Kuma tukabwahelela nga bakwetu babana bipangi mu munga ndi? Nga bali mu bukalu, kuma tukabakwasa na kubazembeleka ndi? Mutukazibi banu bendeka biñanda byabibi hali kabusamba ketu, kuma tukazambwila kubikulahela ndi? Indi tukemanena kabusamba ketu ngwe mwa Yonatana?
Kutondesesa Bisimpi bya Seho
w05 3/15 24 ¶4
Bisimpi bya Kulitila bya mu Mukanda wa 1 Samwele
21:12, 13. Yehova ashaka ngwendi tupangese nzili yetu ya kusinganyeka omwo tuliwana na byuma byabikalu mu kuyoya. Co lalo natwana Mbimbiliya ije ikatukwasa tukale na mana na kwangula mwamubwa byakulinga na kusinganyeka mwamubwa. (Vis 1:4) Na bakulunu mu cikungulukilo batukwasa.
APRIL 18-24
BISIMPI BYA SEHO BYA MU LIJWI LYA NJAMBI | 1 SAMWELE 23–24
“Bandameneni Yehova Abwahese Byuma ha Simbu Inapande”
w04 4/1 16 ¶8
Kulaheleni Sipilitu ya Njambi Nga Byuma Bitenguluka mu Kuyoya
8 Ndabiti kashakele kulinga mwamubi Saulu. Likulahelo na mbunge ya kubandamena byamukwasele aseze byuma byoshe mu baboko a Yehova. Mwene Saulu mwatundile mu linzenzengoma, Ndabiti wamutambekele ngwendi: “Shukulu Kalunga asompe hakati ketu tubabali iya umo nabiisa! Ngeci bene, ikeye akunyanyamese ha bilinga byobe byakunjilwisa, omwo yange kunjikakubulumuna embwe.” (1 Sa 24:12) Nameme Ndabiti wazibukile ngwendi Saulu ikeye wabiisile, oloni kamulingile shambandinga nambe kumwendeka mwamubi. Ha bisimbu byabingi, Ndabiti kalingile lika byuma mwashakelele. Oloni wakulahelele ngwendi Yehova abwahesa byuma ha simbu inapande.—1 Sa 25:32-34; 26:10, 11.
Kuma Byeseko Bikamyonowesa Kuzibuka Byakulinga Ndi?
Ca mu citatu, tulilongesa ngwetu kutwapandele kupokola mashiko a Yehova mu kushaka lika kumanesa bukalu bwetu, oloni tunapande kubwaka mu maboko a Yehova. Yakomba wasonekele ngwendi: “Lukakateya lweni lumyetese na kushongo kujeneka kwonwa, ngeci mupwe bakujela, bamutunu na kujeneka cuma cimo.” (Yakomba 1:4) Tunapande kutwalelelaho kukolesa kweta na kushongo ha simbu ituliwana na ceseko. Keti tupokole mashiko a Yehova. Mwafwa nga likulahelo lyetu balyeseka, co likanyama. Yosefa na Ndabiti nabo baliwanene na byeseko, oloni bakolesele. Kubatondele bingila bya kumaneselamo bukalu bwabo bije kubyalitombwele na mashiko a Yehova. Oloni balingile byuma bije byabakwasele bakolese mu byeseko bibaliwanene nabyo. Bakele bukalu bwabo mu maboko a Yehova, co wababezikisile. Yehova wabapangesele mu kwobola na kutwamenena banu bendi.—Kus 41:39-41; 45:5; 2 Sa 5:4, 5.
Netu twasa kuliwana na byeseko bije byasa kutulingisa tupokole mashiko a Yehova. Cakumwenako, kuma munazeye mwafwa kanda muwane munu napande wakulyambata nendi ndi? Nga mukemwo, co keti mupokole lishiko lya Yehova lije limwesa ngwalyo munapande kulyambata ‘lika na muka-Kilistu.’ (1 Ko 7:39) Kuli bukalu bumuli na kuliwana nabwo mu bulo bweni ndi? Nga mukemwo, co keti mutembwinine biyongola bya baka-kaye bya kulitepa nambe kutsiya bulo, oloni pangeleni hamo mangana mumanese bukalu bumuli nabwo. (Mal 2:16; Efe 5:21-33) Kuma kuli na kumikaluwila kulela naanga yeni mwafwa kumwesi na bimbongo byakupwamo ndi? Akeni bukalu bweni mu maboko a Yehova, co keti mupangese bingila kubyapandele mu kushaka kuwana bimbongo. (Mya 37:25; Hev 13:18) Tubaboshe tunapande kupanga na nzili na kulinga byuma byabibwa nga tuliwana na byeseko mangana Yehova atubezikise. Co lalo tunapande kwaka bukalu bwetu mu maboko a Yehova na kukulahela ngwetu atukwasa.—Mik 7:7.
Kutondesesa Bisimpi bya Seho
Kesi Mwecelele Cuma Coshe Coshe Cimyonowese Kukatambula Cikandelela
11 Nga tukala na cizemo na ngozi mu mbunge ya kubandamena, co kutuzibila bakwetu cipululu. Lijwi lya Njambi ngwalyo: “Cizemo cili na lukakateya na kutetela, cizemo kucesi na lifuwa.” (1 Koli. 13:4) Nga kutushaka kukala na cipululu, co tunapande kumona byuma mwakabimwena Njambi na kulikwatasana na bandolome na bandokazi ha kupwa naanga imolika. Kulinga ngoco kutukwasa kumwesa ngozi ku bakwetu mu ngila ije ilitombola nawa majwi: “Nga cilyo cimo bacishangala, co byoshe bilyo bibwahelela hamo naco.” (1 Koli. 12:16-18, 26) Ngeci, nga bakwetu batambula bibezikiso kutubazibila cipululu, oloni tubwahelela nabo. Acisinganyekeni hali Yonatana muna Mwene Saulu. Kazibilile Ndabiti cipululu omwo bamwangwile kupwa mwene. Oloni watakamesele Ndabiti. (1 Samwe. 23:16-18) Kuma netu twasa kumwesa cizemo na ngozi ngwe Yonatana ndi?
APRIL 25–MAY 1
BISIMPI BYA SEHO BYA MU LIJWI LYA NJAMBI | 1 SAMWELE 25–26
“Kuma Mukazambwila Kulinga Byuma Ndi?”
ia 78 ¶10-12
Walingile Byuma Mu Kunyanyama
10 Maswalale ba Ndabiti balingile bati maswalale ba Nabale? Ngwe bashakele ngwe balingile naha-naha banakwatako umo ku bimanga ba Nabale na kulya, oloni kubalingile ngoco. Banyungile mwamubwa bimanga ba Nabale na bangamba bendi butsiki na mutanya. (1 Sa 25:15, 16) Bimanga na tunyungi bakele na kuliwana na bukalu bwabwingi. Kwakele bikashama babangi, co lalo ku mbwela ya Isalele kwakele bikenya na bezi babangi baje bakele na kunyeka tunyungi bimanga babo.
11 Hamo kukwapwile kwakwasi kuwanena byakulya banalume baje bakele hamo na Ndabiti muje mu mambo. Ngeci, tangwa limo Ndabiti watumine bakwenje 10 kuli Nabale na kulomba byakulya. Ndabiti wabatumine ha simbu yaibwa. Yapwile simbu ya kutehula bimanga, co kakangi ha simbu ei banu bakele na kutambula mwamubwa bangenzi. Co lalo Ndabiti wangwile mwamubwa majwi a kasingimiko. Walyendekele ngwendi yange “munobe Ndabiti.” Hamo wendekele ngoco mwafwa wazibukile ngwendi Nabale wapwile mukulunu. Nabale wakumbulwile bati?—1 Sa 25:5-8.
12 Umo wa bakwenje ba Nabale walekele Abingaile ngwendi Nabale walubalele manene na kutenukila bakwenje batumine Ndabiti. Nabale wa litsita wayayabalele ha likende na mema na situ ya bimanga bendi. Nabale washawile Ndabiti na kumumona ngwe cilema cangoco. Wamwesekesele kuli ngamba uje natewe kuli shukulu yendi. Bisinganyeka bya Nabale byalifwile na bisinganyeka bya Saulu uje wazindile Ndabiti. Naumo wahi hali aba banalume babali wamwene Ndabiti ngwe mwakele na kumumwena Yehova. Njambi wazemene Ndabiti kamumwene ngwe ngamba uje nabomboloka kuli shukulu yendi. Wazibukile ngwendi ikeye bene apwa mwene wa Isalele.—1 Sa 25:10, 11, 14.
ia 80 ¶18
Walingile Byuma Mu Kunyanyama
18 Abingaile walitabelele mulonga, co walombele Ndabiti ngeci amukonekele. Abingaile wendekele lalo ngwendi munalume wendi Nabale wapwa cilema cangoco, co walekele lalo Ndabiti ngwendi wapwa munu wa bulemu kapandele kubiisa simbu yendi kuya na kwana Nabale kashitiko. Abingaile wendekele ngwendi, Ndabiti ‘wakele na kulwa binzita bya Yehova.’ Awa majwi endekele Abingaile amwesele ngwawo wakulahelele ngwendi Ndabiti wakele na kwimanenako Yehova. Co lalo wazibukile ngwendi Yehova wakulahesele Ndabiti ngwendi apwa mwene wa Isalele. Wendekele ngwendi: “Shukulu Kalunga akakupwisa mwene.” Abingaile walekele lalo Ndabiti ngwendi keti akale na mulonga wa maninga, mwafwa kulinga ngoco kupwa “citanukiso” kuli ikeye, kulumbununa ngwabo citakutaku cendi cimupaya. (1 Sa 25:24-31) Awa apwile majwi amabwa manene!
Kutondesesa Bisimpi bya Seho
ia 80 ¶16
Walingile Byuma mu Kunyanyama
16 Kuma Abingaile kasingimikile munalume wendi ha kupwa mutwe wa naanga ndi? Embwe. Anukeni ngweni Nabale walingile mwamubi mwene yabwabesele Yehova. Ngwe Abingaile kalingileko bimo, ngwe naanga ya Nabale yoshe yakobelele mu bukalu. Co lalo ngwe nendi wakele na mulonga wakele nawo munalume wendi. Ha simbu ei wapandele kwononoka Njambi kutubakana kwononoka munalume wendi.