CILONGESA 17
Bifwa Muka Byakala Nabyo Yesu?
Nga tuzibuka byuma byendekele Yesu nebi byalingile mwakele hano hasi, co tuzibuka mwamubwa bifwa byendi. Omwo tuzibuka mwamubwa bifwa byendi, co tulikuta nendi busamba bwa kukanyama hamolika na Ishe, Yehova. Bifwa muka byabibwa byakele nabyo Yesu? Twasa kumutembwinina bati?
1. Yesu nalifu bati na Ishe?
Yesu wakele mwilu ha myaka yaingi, co wamwene mwakele na kulingila byuma Ishe. Ngeci, akasinganyeka na kulinga byuma ngwe Ishe. (Tandeni Yowano 5:19.) Yesu wamwesele mwamubwa bifwa byakala nabyo Ishe. Mukemwo wandekele ngwendi “woshe uje nanjimono namono Tate.” (Yowano 14:9) Oshe muzibuka bifwa byakala nabyo Yesu, co muzibuka mwamubwa Yehova. Cakumwenako, Yesu wakele banu mbunge, co oku kwamwesele ngwabo Yehova nendi watwaka mbunge.
2. Yesu wamwesele bati ngwendi wazema Yehova?
Yesu wendekele ngwendi: ‘Njili na kulinga ngwe mwanjishikile, mangana baka-kaye bazibuke ngwabo yange njazema Tate.’ (Yowano 14:31) Yesu mwakele hano hasi wamwesele ngwendi wazema Ishe mwafwa walingile byoshe byamulekele. Walingile ngoco nameme simbu imo kukwapwile kwakwasi. Co lalo wendekele manene bya Ishe na kukwasa banu balikute busamba na Njambi.—Yowano 14:23.
3. Yesu wamwesele bati ngwendi wazema banu?
Mbimbiliya imwesa ngwayo Yesu ‘wabwahelelele na banu.’ (Visimo 8:31) Wamwesele ngwendi wazema banu omwo wabatakamesele na kubakwasa. Bikomokeso byalingile byamwesele nzili yakala nayo, co lalo byamwesele ngwabyo wakala na mema ku mbunge. (Mako 1:40-42) Wakele na ngozi ku banu, co lalo kakele na kaangu. Majwi endi azembelekele banu ba bimbunge byabibwa baje bamutolililile. Yesu wayandele na kutsila banu mwafwa wabazema. Oloni wazema manene baje bakabangeya bilongesa byendi.—Tandeni Yowano 15:13, 14.
TONDESESENI
Bifwa muka bikwabo byakele nabyo Yesu? Twasa kumutembwinina bati mu kumwesa cizemo na kukala na mbunge ya kwana?
4. Yesu wazema Ishe
Mwanja wa Yesu utulongesa mutwasa kumwesela ngwetu twazema Njambi. Tandeni Luka 6:12 na Yowano 15:10; 17:26. Mumumanesa kutanda cisoneka na cisoneka, simutwiyeni ha cihula eci:
Twasa kumwesa bati ngwetu twazema Yehova ngwe Yesu?
Yesu wamwesele ngwendi wazema Ishe wa mwilu, co wakele na kulombela kuli ikeye simbu yoshe
5. Yesu waka banu mbunge
Yesu katwamekele byendi kulutwe. Wakele bakwabo mbunge. Nameme ha bisimbu bimo Yesu wajukile, oloni wapangesele simbu yendi na nzili yendi mu kukwasa banu. Tandeni Mako 6:30-44, na kusimutwiya ha bihula binatako:
Kwesekesa nou mukanda, Yesu wamwesele bati ngwendi wakele banu mbunge?—Taleni vesi 31, 34, 41 na 42.
Bika byalingisile Yesu akwase banu?—Taleni vesi 34.
Yesu watembwininine mwamubwa bifwa bya Yehova. Co mwanja wendi utukwasa tumone ngwetu Yehova wafwa bati?
Mu bingila muka lalo mutwasa kumwesela ngwetu twaka bakwetu mbunge ngwe Yesu?
6. Yesu wakele na mbunge ya kwana
Nameme Yesu kakele na byuma byabingi bya ku mubila, oloni waneneko bakwabo byuma byakele nabyo. Co ashaka ngwendi netu tukale na mbunge ya kwana. Tandeni Vilinga 20:35, na kusimutwiya ha cihula cinatako:
Yesu wendekele ngwendi twasa kupwa bati ba kubwahelela?
Kengeni VIDIO na kusimutwiya ha cihula cinatako.
Bika bitwasa kwanako bakwetu nameme kutwesi na byuma byabingi bya ku mubila?
Muzibuka Ndi?
Mbimbiliya ngwayo tunapande kulombela kuli Yehova mu lizina lya Yesu. (Tandeni Yowano 16:23, 24.) Nga tulinga ngoco, tumwesa ngwetu byuma byanatulingila Yesu bije bitukwasa tupwe babusamba ba Yehova binapu bya seho manene.
BAMO BAKENDEKA NGWABO: “Njambi katwakele mbunge.”
Twamono ngwetu Yesu wakala na bifwa byabibwa bije byakala nabyo Ishe. Co byuma byalingile bimwesa bati ngwabyo Yehova watwaka mbunge?
SIMPI YAKAMA
Yesu wazema Yehova na banu. Wakala na bifwa byabibwa ngwe Ishe. Ngeci, nga tuzibuka mwamubwa Yesu, co tuzibuka mwamubwa Yehova.
Kwitulukamo
Twasa kumwesa bati ngwetu twazema Yehova ngwe Yesu?
Twasa kumwesa bati ngwetu twazema banu ngwe Yesu?
Cifwa muka cakala naco Yesu cimwashaka manene?
WANENI BIKWABO
Moneni bifwa bimo byakala nabyo Yesu bije bitwasa kutembwinina.
“Mutembwinina Yesu Nga. . .” (Yesu Ikeye Ngila na Busunga na Kuyoya, liputa 317)
Tandeni biñanda bije bimwesa seho ya kulombela mu lizina lya Yesu.
“Mwafwa Bika Tunapande Kulombela mu Lizina lya Yesu?” (Kaposhi ka Kukengela ka February 1, 2008)
Kuma Mbimbiliya inendeka mwakele na kumonekela Yesu ndi?
Yesu wasingimikile banakazi. Yetu bika bitulilongesako?
“Njambi Ashaka Ngwendi Tusingimike Banakazi” (Kaposhi ka Kukengela ka September 1, 2012)