Biñanda bya Kupangesa mu Mukanda wa Biwano bya Buyoye Bwetu Baka-Kristu na Cipangi Cetu
© 2024 Watch Tower Bible and Tract Society of Pennsylvania
NOVEMBER 4-10
BISIMPI BYA SEHO BYA MU LIJWI LYA NJAMBI BISAMU 105
“Anuka Cikumiiyo Cendi Myaka Yoshe”
Twasa Kukanyamesa Bati Likulahelo Lyetu mu Byuma Byanatukulahesa Yehova?
11 Tucisimutwiyeni ha byuma byakulahesele kulingila Yehova bangamba bendi, bije byamonekele ngwe kubyasa kulingiwa. Wakulahesele Abrahamu na Sala ngwendi bakakita mwana nameme banakulubala. (Gen 17:15-17) Wakulahesele lalo Abrahamu ngwendi akana batekulwila bendi lifuti lya Kanana. Ha myaka yaingi ibakele batekulwila ba Abrahamu mu bundungo mu Ijipiti, kwamonekele ngwe eci cikulaheso kucilishulisilila. Oloni cije cikulaheso calishulisilile. Mu kwita kwa simbu, Yehova wendekele ngwendi Elizabethi akakala na mwana. Walekele lalo Maliya mumbanda uje te kanda alilaleho laja na munalume ngwendi akakita Yesu. Co eci mucalingiwile cashulisilile bupolofweto bwapolofwetele Yehova myaka yaingi kunima mu lihya lya Edeni.—Gen 3:15.
12 Kusinganyekesesa ha bikulaheso byakulahesele Yehova kunima nomu mwabishulisililile, kutukwasa tukulahele ngwetu akashulisilila cikulaheso cendi ca kunena kaye kakaha. (Tandeni Joshua 23:14; Isaya 55:10, 11.) Oku kutulingisa tulibwahesele kulumbwinina bakwetu ngwetu byuma byoshe byanatukulahesa Yehova bya kufwa ngwe kaye kakaha, bikalishulisilila. Yehova ikeye babenya wendekele bya melu amaha na kaye kakaha ngwendi: “Awa majwi anapu a kulongwa, co lalo a busunga.”—Kujo 21:1, 5.
it-2 1201 ¶2
Lijwi lya Njambi
Byuma byanatanga Njambi bya kuyoya na bije kubyesi na kuyoya, byoshe bikalingi byakendeka, co asa kulikwasesabyo mu kushulisilila cizango cendi. (Sm 103:20; 148:8) Twasa kukulahela lijwi lyendi mwafwa byoshe byakakulahesa akabilingi. (Det 9:5; Sm 105:42-45) Ngwe mwanendeka babenya ngwendi, lijwi lyendi ‘likakalako ku myaka yoshe’ kulikeluka kuli ikeye kwa kujeneka kushulisilila cizango cendi.—Isa 40:8; 55:10, 11; 1Pi 1:25.
Kutondesesa Bisimpi bya Seho
w86 11/1 19 ¶15
Babaha, Bimunapande Kulinga Mangana Mupwe Bakubwahelela mu Naanga na Kulikwatasana
15 “Mendi endi [Jozefu] bawakutile na malyenge. Singo yendi bayakele mu bikubo. Majwi a Yehova amujelesele kweta noho hawalishulisilile majwi endi.” (Sm 105:17-19) Jozefu wapwile ndungo ha myaka 13, co lalo wapwile lipanditi kweta noho ha calishulisilile cikulaheso ca Yehova. Ebi byuma byaliwanene nabyo byamujelesele. Nameme ngwabo Yehova keti ikeye wanenele buje bukalu oloni kuli bimo byabutabeselele. Kuma Jozefu watabesele “majwi a Yehova” amukanyamese nameme wakele na kuliwana na bukalu bwakama ndi? Kuma wasele kukala na bifwa byabibwa byakufwa ngwe mbunge ya kubandamena, kulikehesa, kukola ku sipilitu na kutwalelelaho kupanga cipangi cacikalu ndi? Cili bene, Jozefu wapwile wa kujela ngwe goldi ije ibanajelesa mu tuhya, co wazibisile manene kubwaha Njambi uje washangumukile kumupangesa.—Gen 41:14, 38-41, 46; 42:6, 9.
NOVEMBER 11-17
BISIMPI BYA SEHO BYA MU LIJWI LYA NJAMBI BISAMU 106
“Bebalele Njambi, Mwobole Wabo”
‘Iya Nakundama ku Mutambela wa Yehova’?
13 BaIsalele bazibile lyoba mubamwene lishelwa lya kuzibala na mihyato na bimweso byeka bya kutewesa bije byatundile kuli Njambi. Mubakele ku Munkinda wa Sinai, Mosesa wabalekele ngwendi akapwa muka-kubendekelako kuli Yehova. (Ekz 20:18-21) Mosesa wakele helu lya munkinda simbu yailaha manene. Kuma baIsalele bakele mu citanga mu mambo mwafwa ya kujeneka kumona ntwama yabo ibakulahelele ndi? Hamo likulahelo lya baIsalele lyemanene ha kumona Mosesa. Balishoshomwenene manene, co balekele Aloni ngwabo: ‘Kutuzibuka cuma mukajo cinalingiwa kuli ou munalume Mosesa, ou watutwamenenene kututundisa mu Ijipiti, oloni yobe unapande kutupangela njambi ngeci atutwamenene.’—Ekz 32:1, 2.
Kutondesesa Bisimpi bya Seho
w06 7/15 13 ¶9
Bitulilongesa ku Mukanda wa Bisamu wamucitatu na wamuciwana
106:36, 37. Awa ma vesi anesekesa kulemesa tumponya ku kwana milambu ku badimona. Oku kumwesa ngwabo munu uje akalemesa tumponya asa kushangumuka kulikwatasana na badimona. Mbimbiliya ili na kutushongangeya ngwayo: “Linyungeni ku tumponya.”—1Iw 5:21.
NOVEMBER 18-24
BISIMPI BYA SEHO BYA MU LIJWI LYA NJAMBI BISAMU 107-108
“Kandeleleni Yehova Mwafwa Wapwa Wamubwa”
w07 4/15 20 ¶2
Cikungulukilo Cishangazale Yehova
2 Cikungulukilo kucapwile lika ca banu ba muyati umo. Kucapwile cibunga ca banu baje ba cisemwa cimo, baje bashaka bweho bwakulifwa nambe baje bashaka byuma byakulifwa byakulishubulwisa nabyo. Oloni cikungulukilo capwa ca banu bakulisezaseza baje bakashangazala hamo Yehova Njambi. Omu mukemwo mubakele na kulinga na kusañulu ngwe muumwesela mukanda wa Samu 35:18 uje wendeka ngwawo: “Njikakukandelela mu cikungulukilo cakama. Njikakushangazala mukati ka mbunga ya banu.” Co lalo na mukanda wa Samu 107:31, 32 uli na kutushongangeya ngwawo: “Banu bakandelele kuli Yehova mwafwa ya cizemo cendi cije kucesi kutenguluka, mwafwa ya bipangi byendi bya kukomokesa byanalingila bana ba banu. Bamwamese mu cikungulukilo ca banu.”
w15 1/15 9 ¶4
Kandeleleni kuli Yehova, co Amibezikisa
4 Nga tushaka kukala na mbunge ya kukandelela, tunapande kunanguka mwali na kutukwaselamo Yehova, na kusinganyekesesa mwali na kutubezikisilamo, nomu mwali na kutumwesela cizemo cije kucesi kutenguluka. Muka-kwimba mwalingile ngoco, walikomokelele mwafwa ya byuma byabibwa byabingi byanalingi Yehova.—Tandeni Samu 40:5; 107:43.
Kutondesesa Bisimpi bya Seho
it-2 420 ¶4
Moabu
Mukwita kwa simbu, Devidi mwapwile mwene, kwakele nzita mukati ka Isalele na Moabu. BaMoabu babahyanene, co bashangumukile kwana Devidi mulambu. Cisholoka ngwe mubamanesele kulwa ei nzita, maswalale babangi ba Moabu babatsiile. Hamo Devidi wabakosesele hasi na kupima mikana itatu, co wangwileko mikana ibali ya maswalale batsiya na kusezako umo. (2Sa 8:2, 11, 12; 1Ko 18: 2, 11) Co lalo cisholoka ngwe omu bene mu nzita, Benaya muna Jehoyada watsiile bana babali ba banalume ba Aliele wa kaMoabu. (2Sa 23:20; 1Ko 11:22) Devidi mwahyanene baMoabu, washulisilile bupolofweto bwa Balamu buje bwapolofwetele myaka 400 kunima bwa kwendeka ngwabwo: ‘ngongonosi, ikatunda kuli Jakobu, mulamu wa bumwene ukatunda mu Isalele. Ikeye akatika luholo lwa baMoabu, co akatika bikola bya bana ba lwozi.’ (Num 24:17) Mwafwa ya kuhyana ei nzita, muka-kwimba wendekele ngwendi Njambi wendekele kutalesa hali Moabu ngwendi: ‘ikeye lilonga lyange lya kutanena.’—Sm 60:8; 108:9.
NOVEMBER 25–DECEMBER 1
BISIMPI BYA SEHO BYA MU LIJWI LYA NJAMBI BISAMU 109-112
Kundwiyeni Yesu uje Napu Mwene!
w06 9/1 13 ¶6
Bitulilongesa ku Mukanda wa Bisamu Wamucitanu
110:1, 2—Yesu Kristu uje napu “Mwata wa [Devidi],” walingile bika mwakatumamene ku liboko lya cilyo lya Njambi? Yesu mwasangukile, waile mwilu, co wakakele ku liboko lya cilyo lya Njambi oku ali na kubandamena kweta na mu mwaka wa 1914 habamupwisilile Mwene. Ha simbu ije, Yesu wakele na kuyula bakubwabesa na kubatwamenena mu cipangi ca kwambulula na kupwisa banu bandongesi. Co lalo wakele na kubakwasa mangana balibwahesele kukayula nendi mu Bumwene bwendi.—Mat 24:14; 28:18-20; Luk 22:28-30.
w00 4/1 18 ¶3
Baka-kulwisa Njambi Kubakahyana
3 Banu ba Yehova banatwalelelaho kubalwisa kushwa lika kusañulu. Mu mafuti amangi banu bababi baneseka kwecelesa bakaleho ba Yehova kwambulula muzimbu waubwa wa Bumwene bwa Njambi. Aba banu bali na kubatwamenena kuli Citozi cetu Liyabolo uje “ali na kwendangana ngwe ndumba ali na kubuluma uje ali na kutonda yalya.” (1Pi 5:8) “Bisimbu bibanangula bya baka-mafuti” mu byahwile mu 1914, Njambi wapwisile munendi kupwa mwene wamuha wa lifuti-libu na kumuleka ngwendi: “Ya ukafungulule mukati ka bitozi bobe.” (Luk 21:24; Sm 110:2) Kristu wapangesele nzili yendi mu kusheka Satana mwilu na kumumbila hasi, co kubamutabesele lalo kwiluka mwilu. Liyabolo ali na kulwisa baka-Kristu bakubwabesa na bimanga beka mwafwa nazibuka ngwendi nasala lika na simbu yaindondo. (Kuj 12:9, 17) Byuma muka binatundu mu kutwalelelaho kulwisa banu ba Njambi?
be 76 ¶2
Twaleleleniho Kupanga Bipangi Byabingi bya ku Sipilitu
Nga mushaka kupanga bipangi byabingi bya ku sipilitu, munapande kupangesa nzili yeni ya kunanguka. Kuma mukalyana kupanga na bakweni mu cipangi ca kwambulula ndi? Kuma mukashakezeka bingila mumwasa kukwaselamo bandolome na bandokazi babaha, banike nambe biyanga ba mu cikungulukilo ceni ndi? Kuma mukalyana kujelesa Njibo ya Bumwene nambe kukwasa mu bingila byakulisezaseza ku biwano bya citingitingi na biwano bya mutambela ndi? Kuma mwasa kulingako bupainiya bwa kukwasa ha bisimbu bimo ndi? Kuma mwasa kulinga bupainya bwa simbu yoshe nambe kukwasa mu cikungulukilo muje muli bujene bwakama ndi? Nga mwapwa ndolome kuma munakupwisamo byuma bitondeka mangana mupwe ngamba wa cikungulukilo nambe mukulunu ndi? Nga mulyana na kulingako bipangi bimo mu cikungulukilo, co oku kumwesa ngwabo muli na kulinga byabibingi ku sipilitu.—Sm 110:3.
Kutondesesa Bisimpi bya Seho
it-1 524 ¶2
Cikumiiyo
Cikumiiyo Cakupwa Kapilistu Ngwe Meukizedeki. Eci cikumiiyo banacendeka ku Samu 110:4, co uje wasonekele mukanda wa baHebelu watalesele eci cikumiiyo kuli Kristu ku mukanda wa baHebelu 7:1-3, 15-17. Yehova walingile eci cikumiiyo na Yesu Kristu lika. Co cisholoka Yesu wendekele byeci cikumiiyo mwalingile cikumiiyo ca bumwene na baka-kumukabangeya. (Luk 22:29) Ngwe mwendekelele Yehova, Yesu Kristu akapwa kapilistu ngwe Meukizedeki. Meukizedeki wapwile mwene na kapilistu ka Njambi wa hano hasi. Oloni Yesu Kristu ikeye akapwa Mwene na Kapilistu Wahakamwa mwilu keti hano hasi. Bamupwisile Mwene mwaile mwilu. (Heb 6:20; 7:26, 28; 8:1) Eci cikumiiyo ca ku myaka yoshe mwafwa Yehova ikeye nalingisa Yesu apwe Mwene na Kapilistu Wahakamwa ku myaka yoshe.—Heb 7:3.
DECEMBER 2-8
BISIMPI BYA SEHO BYA MU LIJWI LYA NJAMBI BISAMU 113-118
Twasa kumwesa bati kukakendelela kuli Yehova?
w01 1/1 11 ¶13
Tuzemeni Yehova
13 Majwi a Yesu anamwesa mwamubwa ngwawo cuma ca seho manene citunapande kulinga cinapu kuzema Yehova. Oloni mutukasemuka kutwesi kukala neci cifwa ca kuzema manene Yehova. Ngeci, tunapande kulifwita kukala neci cifwa. Byuma bitwazibile hali ikeye lwakulibanga byatulingisile mangana tumuzeme. Co, kamandondo-kamandondo twashangumukile kulilongesa mwatangelele lifuti-libu mangana banu bakalemo. (Gen 2:5-23) Co lalo twalilongesele ngwetu Yehova katumbilile kuti bisemi betu bakulinga mubalingile bubi, oloni washakezekele ngila mangana atupatule ku bubi. (Gen 3:1-5, 15) Walingile mwamubwa banu baje bapwile ba kulongwa, co mukwita kwa simbu watumine munendi umo lika mangana akutupatule ku bubi. (Iwa 3:16, 36) Co ebi byuma bitwalilongesele byatulingisile mangana tuzeme manene Yehova. (Isa 25:1) Mwene Devidi wendekele ngwendi wazemene Yehova mwafwa wamunyungililile. (Sm 116:1-9) Netu Yehova akatunyungilila, kututwamenena, kutukanyamesa na kutushongangeya. Ngeci, nga tulilongesa byabingi hali ikeye, co tumuzema manene.—Sm 31:23; Zef 3:17; Lom 8:28.
w09 7/15 29 ¶4-5
Mweseni Kukandelela, co Pweni Baka-Kwana na Mbunge Yoshe
Muka-kwimba walihwile ngwendi: “Bika binjifweta Yehova Ha byuma byoshe byabibwa byananjilingila?” (Sm 116:12) Byuma muka byabibwa byamulingilile Njambi? Yehova watwaleleleho kumunyungilila ha simbu yakele “mu bukalu na busiwa bwakwama manene.” Co lalo Yehova wa ‘mwamenene ku kutsa.’ Ngeci, washakele ‘kufweta’ Yehova ha byuma byamulingililile. Bika byalingile ou muka-kwimba? Wendekele ngwendi: “Njilinga binjinalikumiiya kuli Yehova.” (Sm 116:3, 4, 8, 10-14) Wanyungile bikulaheso byoshe byakulahesele Yehova.
Neni mwasa kulinga byuma byakulifwa. Mungila muka? Nga mwononoka mashiko na binangulo bya Njambi mu kuyoya kweni kwoshe. Ngeci, kulemesa Yehova kunapande kutwalelelaho kupwa cuma cakulibanga mu kuyoya kweni, co lalo tabeseni sipilitu ya Njambi imitwamenene mu byuma byoshe bimulinga. (Eke 12:13; Gal 5:16-18) Kutwasa kufweta Yehova ha byuma byoshe byanatulingila. Oloni Yehova akazibi kubwaha ku mbunge nga tulyana kumupangela na mbunge yetu yoshe. (Pro 27:11) Kunapu kubezika kwakama manene kuzibisa Yehova kubwaha.
Bika Bitulilongesa ku Mukanda wa Levitike?
9 Cilongesa ca mu cibali: Tuli na kupangela Yehova mwafwa tumwesa kukandelela. Tucisimutwiyeni ha ñombelo ya kulitombola ije yapwile ya seho mu kulemesa kwa busunga mu simbu ya baIsalele mangana tuzibisise bwino eyi simpi. Ku mukanda wa baLevi, banamwesako ngwabo kaIsalele wanene ñombelo ya kulitombola “kupwa mulambu wa cikandelela.” (Lev 7:11-13, 16-18) Wanene uje mulambu mwafwa washakele kwana, keti kulingila lika lishiko. Ou wapwile mulambu walyanukilile munu ikeye babenya mwafwa ya kuzema Yehova Njambi. Uje wanene mulambu na naanga yendi hamo lika na tupilistu, balile ije situ ya kasitu ibalingile ñombelo. Oloni mazi na bilyo bimo bya kasitu ibalingile ñombelo babyanene lika kuli Yehova. Bilyo muka?
10 Cilongesa ca mu citatu: Twana Yehova byuma byabibwa, mwafwa twamuzema. Yehova wamwene mazi a kasitu kupwa amabwa. Wendekele lalo ngwendi bilyo bimo bya kasitu kwambateselela na binso byapwa byabibwa manene. (Tandeni Lev 3:6, 12, 14-16.) Ngeci, Yehova wazibile manene kubwaha omwo kaIsalele wamwanene mazi na bilyo byabibwa manene. kaIsalele uje walambwile ebi bilyo, wamwesele ngwendi washakele kwana Njambi byuma byabibwa. Mu ngila imo lika, Yesu nendi wanene Yehova byuma byabibwa omwo wamupangelele na mbunge yendi yoshe, mwafwa ya cizemo cakele naco kuli Ishe. (Iwa 14:31) Yesu wabwahelele kulinga cizango ca Njambi, mwafwa wazemene manene mashiko a Njambi. (Sm 40:8) Yehova wabwahelelele manene kumona Yesu amupangela na mbunge yendi yoshe
11 Biñombelo bya kulitombola, binalifu na cipangi cetu kuli Yehova, mwafwa capwa ca kulyana. Tuli na kwana Yehova byuma byabibwa, mwafwa twamuzema manene. Yehova ali na kuziba kubwaha kumona banu babangi bamulemesa, mwafwa yakumuzema na kuzema mashiko endi. Kuzibuka ngwetu Yehova ali na kumona bituli na kulinga nebi bili na kutushongangeya tubilinge, kututakamesa manene. Cakumwenako, nga mutukulukazi, co kumwasa kupanga ngwe mumutondela, anukeni ngweni Yehova azibuka bukalu bweni. Hamo muliziba ngweni kumwasa kwana Yehova byuma byakama, anukeni lalo ngweni Yehova amona ngwendi cizemo ceni cikeco cili na kumishongangeya mulinge bije bimwasa. Yehova nabwahelela kutambula byuma byabibwa bije bimwasa kumwana.
Kutondesesa Bisimpi bya Seho
w12 5/15 22 ¶1-2
Bihula bya Baka-Kutanda
Muka-kwimba bamuhwimininine kwimba ngwabo: “Kutsa ca banu ba Yehova ba kulongwa cikamuzibisa manene kubabala ku mbunge.” (Sm 116:15) Kuyoya kwa munu woshe akalemesa Yehova kwapwa kwa seho manene kuli ikeye. Oloni ku mukanda wa Samu 116 kuwendekele bya butsi bwa munu umo lika.
Nga mwendeka ñanda ya butsi kumwapandele kupangesa ou mukanda wa Samu 116:15 kutalesa ku mutsi nameme ngwabo napangela Yehova mu kulongwa kweta na kukutsa kwendi. Mwafwa bika? Mwafwa ou mukanda uli na bulumbunwisi bwakama. Mukanda wa Samu 116:15 umwesa ngwawo Yehova kasa kwecelela cibunga ca banu bendi ba kulongwa kunyonga ha simbu imo lika.—Taleni Sm 72:14; 116:8.
DECEMBER 9-15
BISIMPI BYA SEHO BYA MU LIJWI LYA NJAMBI BISAMU 119:1-56
“Mukwenje asa Kunyunga Bati Ngila Yendi Ipwe ya Kujela?”
w87 11/1 18 ¶10
Kuma Muli na Kutwalelelaho Kupwa ba Kujela mu Byuma Byoshe ndi?
10 Ku mukanda wa Efeso 5:5, Paulu watunangwile ngwendi: “Muzibuka eci cuma, muzibuka mwamubwa yeni babenya ngweni kukwesi muka-bupangala, nambe muka-mazilo, nambe muka-nuna, kulumbununa muka-kulemesa tumponya, uje akakala na buswana mu Bumwene bwa Kristu na Njambi.” Oloni banu babangi bali na kubendekela na kubatundisa mu cikungulukilo mwafwa ya bupangala, co bali na kubulumwina mibila yabo’ (1Kr 6:18) Kakangi bakalingi ngoco mwafwa kubesi kutwalelelaho kulinyunga kwesekesa na lijwi lya [Njambi.] (Sm 119:9) Bandolome babangi bakecela kulinyunga mubakai ku mitambela ya kulishubulwisila. Bakombwanesa babusamba babo ba mu munga na kulikwatasana na banu babakawana ku myela ya kulishubulwisila. Bakabamono kupwa banu bababwa, co baka-Kristu bamo banalikwatasana nabo mu kulinga byuma kubyapandele. Bamo co bakalizilila manene na banu babakapanga nabo. Mukulunu umo mu cikungulukilo washangumukile kulizilila manene na munakazi umo yakele na kupanga nendi, co wasezele naanga yendi na kukala na uje munakazi. Ngeci, bamutundisile mu cikungulukilo. Cili bene majwi a mu Mbimbiliya akwendeka ngwawo: “Kulikwatasana na banu bababi kubiisa bilinga byabibwa.” apwa a busunga.—1Kr 15:33.
w06 6/15 25 ¶1
“Njazema Byanukiso Byobe”
Yehova akana banu bendi binangulo mangana bibakwase maneneni mu simbu ino yaikalu. Ebi binangulo tukabiwana mutukalingi cilongesa ca munu endi lika, mu biñanda nambe mu bikumbululo bibakakumbulula ku biwano bya baka-Kristu. Co bwingi bwa byuma bitukatanda nambe kuziba keti byabiha kuli yetu. Hamo obyo biñanda twalilongeselebyo ha simbu imo. Tunapande kutwalelelaho kulyanukisa biyongola bya Yehova, binangulo na mashiko endi mwafwa tukebala bwasi byuma. Tunapande kukandelela ku binangulo byanatwana Njambi mwafwa bikatuhwimisa na kutukwasa kuyoya mu kulitombola na mashiko endi. Mukemwo muka-kwimba wembile ngwendi: “Njazema byanukiso byobe.”—Sm 119:24.
Tundiseni Mesho eni ku Byuma Byangoco!
2 Byuma bitukamono byasa kutukobelesa mu bukalu. Bwongo na mesho bikapangela hamo, co byuma bitukamono byasa kwindula mashungu na kualingisa akole mu bimbunge byetu. Kulingila tuli na kuyoya mu kaye kali na kuyula Satana, tukazibi mizimbu ya makuli na kutala bikupulo byabibi bije byasa kutungumuna bwasi nameme ngwabo tubitala lika ha simbu yaindondo. (1Iw 5:19) Mukemwo muka-kwimba walombele Njambi ngwendi: “Tundisa mesho ange ku byuma byangoco. Njinyungilile mu ngila yobe.”—Sm 119:37.
Kutondesesa Bisimpi bya Seho
w05 4/15 10 ¶2
Kulaheleni Lijwi lya Yehova
2 Mu mukanda wa Samu 119 muli simpi yakama manene ije imwesa seho ya muzimbu wa Njambi nambe lijwi lyendi. Muka-kusoneka ou mukanda wausonekele kwesekesa nomwo mubyalikabasanena bisona bya Cihebelu mangana kumupwile kwakwasi kwanuka majwi ali omu mu mukanda. Co mavesi akupwa 176 ali omu mu mukanda baasonekele kwesekesa nomwo mubilikabasanena bisona bya Cihebelu. Kwesekesa na Cihebelu cibakele na kwendeka ha kulibanga, umo na umo wa mitamba ya kupwa 22 ya samu ili na mikana 8 ije inashangumuka na cisona ca kulifwa. Ei samu yendeka bya lijwi lya Njambi, lishiko, binangulo, bingila na byuma byakangula kulinga. Muno mu cilongesa neci cinatako, tusimutwiya mubananungulwila mukanda wa samu 119 mu kusungama kwesekesa na Mbimbiliya ya Cihebelu. Kusinganyekesesa ha byuma bibaliwanene nabyo bangamba ba Yehova ba kusañulu nebi bibali na kuliwana nabyo bangamba bendi matangwa ano kutukwasa kuzibisisa mwamubwa ou mwaso wakuhwiminina, co lalo kutulingisa tukandelele manene ku lijwi lya Njambi Mbimbiliya.
DECEMBER 16-22
BISIMPI BYA SEHO BYA MU LIJWI LYA NJAMBI BISAMU 119:57-120
Byuma Bitwasa Kulinga Mangana Tukolese nga Tuli mu Bukalu
w06 6/15 20 ¶2
“Njazema Manene Lishiko Lyobe”
2 Kunapu kwa seho kulihula ngwetu, “Lishiko lya Njambi lyazembelekele bati muka-kwimba?” Byuma byamukwasele byapwile kukulahela ngwendi Yehova wamwakele mbunge. Muka-kwimba wazibukile mwamubwa byuma byabibwa byakele mu lishiko, co oku kwamulingisile apwe wakubwahelela nameme ngwabo wakele mu bukalu mwafwa ya bitozi bendi. Wanangukile ngwendi Yehova wamwakele mbunge. Kutundaho, kupangesa binangulo bya mu lijwi lya Njambi kwamulingisile akale na mana kutubakana bitozi bendi, co lalo kwamunyungililile mu kuyoya kwendi. Kwononoka mashiko a Yehova kwamulingisile apwe wakubwahelela na kukala na citakutaku ca kujela.—Sm 119:1, 9, 65, 93, 98, 165.
w00 12/1 14 ¶3
Kuma Mwazema Manene Binangulo bya Yehova ndi?
3 Muka-kwimba wamwesele ngwendi wazemene binangulo bya Njambi omwo wembile ngwendi: “Njizambula kunyunga mashiko obe, Kunjishwala. Mikole ya banu bababi inanjizengazenga, oloni kunjibala lishiko lyobe.” (Sm 119:60, 61) Binangulo bya Yehova bikatukwasa tukolesele mapakeso mwafwa twakulahela ngwetu Tate yetu wa mwilu asa kubatula mikole ibatukuta bitozi betu. Ha simbu inapande, akatupatula ku byuma byasakutwonowesa kulinga cipangi ca kwambulula.—Mak 13:10.
w06 9/1 14 ¶4
Bitulilongesa ku Mukanda wa Bisamu wamucitanu
119:71—Bubwa muka buli mu kuliwana na tuyando? Tuyando twasa kutukwasa tukulahele manene Yehova, kulombela kuli ikeye kutundilila kwisi ya mbunge na kwaka manene mbunge kukutanda Mbimbiliya na kupangesa byuma bitunalilongesa. Co lalo kutukwasa tunanguke buzeye bwetu na kwasa kupangelaho. Nga tuli na kuliwana na tuyando kutwapandele kulubala mwafwa kuyanda kutulingisa tukolese.
“Lileni na Baje Bali na Kulila”
3 Tate yetu wa cizemo Yehova, ikeye muka-kuzembeleka wakama. (Tandeni 2 Korinte 1:3, 4.) Yehova, muka-kuzembeleka mu cizemo, nakulahesa banu bendi ngwendi: ‘Yange njili na kukuzembeleka.’—Isa 51:12; Sm 119:50, 52, 76.
5 Netu twakukahela ngwetu Yehova atukwasa. Tunapande kumuleka busiwa bwetu mu lilombelo. Kukatuzembeleka kuzibuka ngwetu Yehova akamono kubabala kutukazibi, co akatuzembeleka mu ngila ije inapande. Akatuzembeleka bati?
Kutondesesa Bisimpi bya Seho
w06 9/1 14 ¶5
Bitulilongesa ku Mukanda wa Bisamu wamucitanu
119:96—Awa majwi akwendeka ngwawo “byuma byoshe bya kulumbunuka byakala naha habyasikisila” alumbununa bika? Muka-kwimba mwakele na kwendeka bya kulumbunuka, wakele na kutalesa mubakamwenamo byuma banu. Cisholoka muka-kwimba wanangukile ngwendi byuma bibamona banu kupwa bya kulumbunuka kubyalumbunukile mukushula. Oloni mashiko a Njambi apwa akulumbunuka. Akatutwamenena mu kuyuya kwetu kwoshe.
DECEMBER 23-29
BISIMPI BYA SEHO BYA MU LIJWI LYA NJAMBI BISAMU 119:121-176
Mwa Kujenjukila ku Byuma Byasa Kuminenela Bishoti
Tabeseni Mashiko na Binangulo bya Njambi Bilongese Citakutaku Ceni
5 Nga tushaka ngwetu mashiko a Njambi atukwase, co kutwapandele lika kuwatanda na kuwazibuka embwe. Oloni tunapande kuwazema manene na kuwasingimika. Lijwi lya Njambi ngwalyo: “Zindeni bije byabibi, co zemeni bije byabibwa.” (Amo 5:15) Twasa kulinga bati ngoco? Nga tulilongesa kumona byuma mwakabimwenamo Yehova. Cakumwenako, hamo muli na kulifwita na cilabulabu. Co ndotolo amileka cifwa ca byakulya bimunapande kulya na kweha bweho buje bukanyamesa mubila na kutengululako byuma bimo. Munima ya kupangesa byanamilekele, mumona ngweni byamikwasa. Mukandelela manene kuli ndotolo yeni mwafwa namikwasa.
6 Mu ngila imo lika, Ishamatanga yetu natwana mashiko aje atunyungilila ku kulinga bubi mangana tuyoye mwamubwa. Acisinganyekeni bubwa butuwana nga tupangesa mashiko a mu Mbimbiliya aje abindika kukwisa na kuyongwela bakwetu matumbe amabi na kwiba na bupangala na bukenya na budimoni. (Tandeni Provebia 6:16-19; Kujo. 21:8) Nga tumona bubwa butunda mu kulinga byuma byazema Yehova, co mbunge yetu izema na kukandelela manene kuli Yehova na mashiko endi.
w93 4/15 17 ¶12
Babaha, Yoyesi Muka Imulyangwila?
12 Babaha zindeni byuma byoshe byabibi. (Sm 97:10) Mwasa kuzinda bati byuma bije bisholoka kupwa byabibwa hakulibanga? Nga musinganyekesesa ha bukalu bwasa kutundamo. “Keti bamyungumune: Kucitaba kukwisa Njambi. Mwafwa byoshe byakuna munu, bikebyo lalo byateja. Mwafwa woshe akuna na biyongola bya situ yendi, ateja kubola kuje kutunda ku situ yendi.” (Gal 6:7, 8) Nga muli mu ceseko, singanyekeni ha bukalu bwakama bwasa kutundamo, nomwo mwasa kulizibilamo Yehova. (Esekeseni Samu 78:41.) Co lalo singanyekeni ha bukalu bunasa kutundamo bwakufwa ngwe kukala na limo lya kujeneka kubandamena nambe kutambula mushongo wakufwa ngwe AIDS. Kutundaho, singanyakeni ha bishoti bimwasa kukala nabyo na shwamwa imunasa kuziba. Co mwasa kukala mu bukalu buje bwasa kwambata simbu yailaha. Ndokazi umo wendekele ngwendi: “Nange na munalume wange twakele na kulilala simbu kanda tulyambate. Nameme hanoni tunapu baka-Kristu, oloni mwafwa ya yoyesi yetu ya kunima, simbu imo tukasinganyeka ngwetu kuli umo ali na lipangala hakati ketu.” Twanukeni lalo ngwetu nga munu alinga bupangala, banasa kumwecelesa bipangi bya mu munga byanakala na kupanga, co lalo banasa kumutundisa mu cikungulukilo. (1Kr 5:9-13) Kuma senga ya simbu yaindondo inapu ya seho manene kutubakana busamba bweni na Yehova ndi?
Kutondesesa Bisimpi bya Seho
Kuma Mwakulahela Ngweni Majwi a Njambi “Apwa a Busunga” Ndi?
2 Ha kupwa bangamba ba Yehova twakulahela ngwetu wapwa “Njambi wa busunga,” co lalo watwaka mbunge. (Sm 31:5; Isa 48:17) Twakulahela bitukatanda mu Mbimbiliya mwafwa tuzibuka ngwetu “majwi a [Njambi] oshe apwa a busunga.” (Tandeni Samu 119:160.) Ngeci tulitabasana na majwi endekele muka-kulilongesa bya Mbimbiliya umo ngwendi: “Njambi kasa kwendeka makuli, co byoshe byakendeka bikalishulisilila. Banu bendi bakakulahela byakendeka mwafwa bakulahela Njambi uje na byendeka.”
DECEMBER 30–JANUARY 5
BISIMPI BYA SEHO BYA MU LIJWI LYA NJAMBI BISAMU 120-126
Bakunine oku Bali na Kulila, Oloni mu Batejele Babwahelelele
Banabezika Baje Bakana Njambi Bumpau
10 Nga tupwa bandongesi ba Yesu, co tupwa bitozi ba Satana. Mukanda wa Jemusi 4:7 ngwawo: “Lwiseni Liyabolo, co atewa kuli yeni.” Oloni kulinga ngoco kukwapwile kwakwasi. Kupangela Njambi kutondeka kulifwita manene. (Luk 13:24) Ku mukanda wa Samu 126:5 Mbimbiliya yatukulahesa ngwayo: “Baje bakuna mbuto oku bali na kulila, bakateja oku bali na kulumwina bingunda.” Njambi ituli na kulemesa kesi kwibala byuma bitukalingi. Co ikeye “muka-kwana cikandelela kuli baje bali na kumutonda manene,” co lalo akabezikisa baje bakamwana bumpau.—Heb 11:6.
Kuma Likulahelo Lyeni Litwalelelaho Kukanyama Ndi?
17 Kuma mwatsisa munu imwazema ndi? Waneniko simbu ya kutanda biñanda bya mu Mbimbiliya bije byendeka bya banu baje basangukile ku batsi mangana mukanyamese likulahelo lyeni. Kuma muli na kuziba busiwa mwafwa ya kabushoko keni ibanatundisa mu cikungulukilo ndi? Lilongeseni Mbimbiliya na mabulu a kukundama ku Mbimbiliya mangana muzibisise ngweni Njambi akanyanyamesa mu ngila yaibwa simbu yoshe. Simbu imuliwana na bukalu anukeni ngweni ikeyo simbu imunapande kukanyamesa likulahelo lyeni. Lekeni Yehova mwoshe mumuli na kulizibila. (Pro 18:1) Lingeni byuma bije bimikwasa mukolese nameme nga muliziba busiwa ha simbu imubilinga. (Sm 126:5, 6) Twaleleleniho kukunguluka, kwambulula na kutanda Mbimbiliya. Co singanyekeseseni manene ha byuma byabibwa byakamilingila Yehova kulutwe. Omwo mumona mwali na kumikwasela Yehova, mumukulahela manene.
w01 7/15 18-19 ¶13-14
Twaleleleniho Kupanga Cipangi ca Kuteja
13 Mukanda wa Samu 126:5, 6 ngwawo: “Baje bakuna mbuto oku bali na kulila, bakateja oku bali na kulumwina bingunda. Uje aya ku mahya nameme ali na kulila na ngonga yendi ya mbuto, akeluka oku ali na kulumwina bingunda, oku nambata byanateje.” Awa majwi ali na kuzembeleka bangamba ba Njambi baje bali na kulinga eci cipangi ca kuteja, maneneni baje babali na kupakesa. Awa majwi endekele muka-kwimba kutalesa kukuna na kuteja amwesele ngwawo Yehova wakele mbunge bangamba bendi baje batundile mu Babiloni na kubabezikisa. Mubabapatwile mu bundungo babwahelelele manene, oloni hamo balilile mubakele na kukuna bimbuto mwafwa lifuti lyabo lyapwile ngundu ha myaka 70. Nameme ngoco, baje batwaleleleleho kutunga na kukuna bimbuto balikuwile bipangi bya maboko abo.
14 Bisimbu bimo tunasa kulila nga bandolome na bandokazi betu nambe nga tuli na kuyanda mwafwa ya kusungama.’ (1Pi 3:14) Hakulibanga tunasa kuliziba ngwe cipangi ca kuteja cinapu cacikalu mwafwa hamo kutwesi na kumona bubwa buli na kutundamo. Oloni nga tutwalelelaho kukuna na kushangelela, co Njambi akolesa bimbuto kutubakana nomwo mutunasinganyekelele. (1Kr 3:6) Tuli na kulimwena busunga bwa awa majwi mwafwa tuli na kwana banu Bimbimbiliya na mabulu amangi aje anakundama ku Mbimbiliya.
Kutondesesa Bisimpi bya Seho
cl 73 ¶15
“Njambi Ikeye Butewelo Bwetu” na Muka-Kutunyungilila
15 Tucisimutwiyeni tahi mwakatunyungilila Yehova. Ha kupwa banu ba Yehova tunapande kubandamena ngwetu atunyungilila ha kupwa cibunga. Mwafwa nga kalingi ngoco, co oku kulingisa Satana kumupwile kwakwasi kutulabula. Nangukeni ngweni: Satana, “uje ali na kuyula kano kaye,” ashaka kunyongesa bulombelo bwa busunga. (Iwa 12:31; Kuj 12:17) Bifulumende bimo bya nzili bya hano hasi binashoko cipangi cetu ca kwambulula, co lalo bineseka kunyongesa bakaleho boshe. Nameme ngoco, banu ba Yehova banatwalelelaho kwambulula mu kusimpa. Mwafwa bika baka-mafuti banonowa kwecelesa cipangi ca baka-Kristu baje banapu lika babandondo, co lalo basholoka ngwe kubesi nou wakubanyungilila? Mwafwa Yehova ali na kutunyungilila, co lalo natwaka mumambaba endi.—Sm 17:7, 8.